کَمبَر نَمیران اِنت اَزَل
کَمبَر چۆ بُلانا بُلَند
کَمبَر مَزارکۆہێں جَگَر
کَمبَر گۆں سِنچ ءُ زانَگ ءَ
راجدَپتَر ءِ دَمکاں وَدَگ
کَمبَر سَگارانی بَدَل
کَمبَر تَلارانی سَپَر
گۆں جُہد مِہر ءُ مَہرَمی
کَمبَر تَئی اَلبُرز بیت
یا گْوادِر ءِ نیلبۆمێں زِر
یا چاگی ءِ ٹَپّیگێں دِل
یا مادَر ءِ اَرسیگێں چَمّ
یا یاسَمین ءِ ھۆن ءِ تْرَمپ
بالاچ ءِ گۆرگێجێں سَر
بیرانی سُہرێں سَنگَراں
یا کَلمَت ءِ ھَمَّل بِبیت
داد شاہ ءَ بَمپُشت ءِ پَدا
زِندَگ بِداریت گێدی ءَ
چۆ کێچ ءِ مَیارجَلّێں کَہیر
ساہِگ سَماریت بَزَّگاں
وار ءُ لَگَتمالێں سَراں
اَرساں گۆں پُلکاں کَپتَگێں
کۆرێں دَریگ ءُ کۆٹیاں
رُژن ءِ سَباہ
اِستال ءِ بام
داِم رَواں
داِم رَواں
ھِجبَر نَجَلّیت کارَواں
دانکہ اَزَل بَرجَم مُدام
آ کَمبَرێں جُہد ءِ رَواں
<سترُنگ><اِم>کَریمَہ بَلۆچ