(ھما سَرمَچارانی نام ءَ کہ پہ ماتێں گُلزِمین ءِ آجُوی ءِ راہ ءَ وَتی ساہ ءُ مالِش نَدر کُتَگ اَنت۔)
بِگِند کِسمَت ءَ مَنی
بِچار کُدرَت ءَ مَنی
چِہ رَنگێں سُہل ءُ تراں کَنت
چِہ ڈَولێں گَپّ بَیاں کَنت
پہ ھَکّ ءِ ھاتِر ءَ وَتی
زِمین ءَ آزماں کَنت
شَراب بارێں وارت نَوارت
پَدا اوں تَتَّراں کَنت
اِے کۆہسار ءُ ڈاک ءُ ڈَنّ
اِے باگ ءُ کَہچَر ءُ چَمَن
گْوَز اَنت ماہ ءُ سال ءُ سَن
اَزاب ءُ بَزَّگێں وَتَن
وَتی دِل ءَ مَن راج ءِ یَکّ بَلاہێں مِہروانے آں
وَتی دِل ءَ مَن گُنگے ءِ نَگُشتَگێں زُبانے آں
وَتی دِل ءَ مَن گُلزِمین ءِ یَکّ بُلَندێں آزمانے آں
مَن بِلّ ئِے پیری ءِ ھَزارپاندێں مِنزِلاں چَہ گْوَستَگاں
بلے چۆ آلُکُو مَن اَنگَتا نَرُستَگاں
مَن چے گُشان ءُ دَر باراں
کُج ءَ رَوان ءُ دَم بَراں
مَن ءُ گُلام ءُ شێر یَکّێں مَرکَب ءَ سَوار اَتێں
ما سَکّیانی یار اَتێں
(مُنیر ئے کِسَّہ ءَ مَکَن)
(مُنیر ئے کِسَّہ ءَ مَکَن)
گۆں بے وَپائیں چَشمَک ءَ
گۆں بے ر ئِےائیں تَسبی ءَ
مُنیر چینچو بَزَّگ اِنت
مَن چے گُشاں؟ مَن چے گُشاں
زَمانَگ ءَ ھَزار پَند بُرِّتَگ بلے داں اَنگَتا ھما وَڈ اِنت
زَمانَگ ءَ را کَئی گِلَگ پِر اِنت زَمانَگ ءَ
زَمانَگ ءَ را جُست ءُ پُرس کئے بِکَنت؟
زَمانَگ ءَ را اَرس ءُ پُرس کئے بِکَنت
(مُنیر ئے کِسَّہ ءَ مَکَن)
مَنی دِل ءِ نَگُشتَگێں اِے گُشتِناں دِل ءَ مَکَن
اِے کِسَّہاں دِل ءَ مَکَن
اِے راہ باز مُشکُل اِنت
وَت ءَ گۆں ھِچّ گِلَہ مَکَن
اِے جَنگ گۆں زَمانَگ ءَ شُبێن ءُ چَہر ءُ تَہر کَنت
اِے جَنگ مارا ھۆر کَنت، اِے جَنگ مارا بَہر کَنت
اِے جَنگ نَگدێں مۆسُماں چَہ مۆسُماں زِبَہر کَنت
اِے جَنگ داں کْیامَتا ھَمے وَڈ ءَ رَواں کَنت
کہ مارا باز پَند بُرَّگی اِنت اَنگَتا وَتَن
کہ مارا گُلزِمین ءَ نِندَگی اِنت اَنگَتا وَتَن
وَتَن، وَتَن، وَتَن، وَتَن
اِے ھۆن پہ تَو ھِچّ نَہ اَنت
اِے اَرس پہ تَو ھازِر اَنت
اِے آستاپتَگێں بَدَن تَئی گَمانی مِنَّت اِنت
اِے شَیر ءُ گال ءُ گَپّ ءُ تراں
اِے لَبز، گُشتِن ءُ بَیاں
اِے گُلزِمین، اِے آزماں
اِے شاہِگانێں ڈاک ءُ ڈَنّ
بَہِشتگۆنَگێں چَمَن
ما اَنچۆ وَت پہ دێم واب وابے ءَ نَگِپتَگ اَنت
اِے بے بَہائیں تاک ءُ پَنّ
اِے کۆہ ءُ کَہچَر ءُ دَمَن
اِے زِر کہ کِردَگار کَنت
گۆں چَولاں ھیرّ ءُ ھار کَنت
ھُدا ءِ یَکّ نَداتَگێں ھِسابے ءَ نَگِپتَگ اَنت
اِشانی پُشت ءَ ھۆن ءِ یَکّ مُرادباتێں کِسَّہے
بَلۆچ کُدرَت ءَ گۆں مَیل کَنت چۆ کہ زَہگے ءَ
بَلۆچ تَہاری ءَ گۆں جَنگ کَنت مُدام چۆ چِراگے ءَ
“چِدا نَہ اِنت”
بَلۆچ مَرزبۆم ءِ یَکّ مُجَّتی مُساپِرے
“دَڈی ئے کۆٹ”، کَور ءِ دِل، ماں جُلگَہێں کَراچی ءَ
لْیاری ئے گَٹَر مَن ءَ چۆ ساہ ءِ پَیم ءَ دۆست بَنت
مَن ءُ گُلام ءُ شێر یَکّێں مَرکَب ءَ سَوار اَتێں
مُنیر ئے کِسَّہ ءَ مَکَن
(سَادَتێں ماری تَو اَنگا زِندَگ ئے نَمُرتَگ ءِ)
(زَرینَہ بارێں تانگُر اِنت؟)
اِے مَرزبۆم ءِ ھاتِر ءَ مِڈاں بۆن، مِرۆن، رَوۆن
مِراں یا کہ دُژمِن ءَ کُشاں بۆن رَوۆن
داں ساہ ءِ ساز رَوت ءُ کئێت
ما گُشتِناں گُشاں بۆن
کَلاش ئے دێم ءَ ڈاڈَری پَلیتَگاں مِڈاں بۆن
چَہ کۆہَلُو داں چاہبار
اِے جَنگ کِردَگار کَنت
ھَزینَگاں بَہا مَکَن
زَمانَگاں تَہا کُشیت
اِے جَنگ بَرجام اِنت مُدام
داں ساہ ءِ گُڈّی سیمسَراں
داں اُمر ءِ رَند ءُ آسَراں
اِے جَنگ تَہنا یَکّ بَلۆچ ءِ گُلزِمین ءِ جَنگ نَہ اِنت
اِے جَنگ تَہنا مئے کِساس ءُ کَیل ءُ پارسَنگ نَہ اِنت
اِے جَنگ داں ھِساب ءِ رۆچ ءَ کاِم اِنت ءُ داِم اِنت
اِے جَنگ تَمام کاِنات، اِے اَرش ءُ کُرش ھۆر بَنت
اِد ءَ گۆں زِندَگی ءَ مَرگ ءِ ھَست ءُ نێست تۆر بَنت
بَرے بَرے مِڈ ءِ پِڈ ءَ تَواں ھَم لَگۆر بَنت
(بِگِند کازی پُسَّگ ءَ گۆں نارَوائیں کِسَّگ ءَ)
چِہ رَنگ ءَ بَہر ءُ بانگ بَنت دِلانی مِہر ءُ سَنگَتی؟
چِہ رَنگ ءَ جَٹّ ءُ وانگ بَنت گۆں چاکَر ءِ نِزۆری ءَ
(بَرے بَرے مَن کَمبَر ءَ گۆں راہ ءَ ماں گیشِّتاں)
“اِے کَور اَبّا بارت تَرا، اِے کَور اَبّا بارت تَرا”
بلے پہ مَن اَجَب نَہ اِنت کہ اَنگَتا نَبُرتَگ ئِے
دِل ءَ چَہ ماتێں سَرزِمین ءِ ھاک ءِ گَم نَزُرتَگ ئِے
سِلاہبَند بُوتَگاں پہ سَرڈَگار ئے ھاتِر ءَ
مَن ءُ گُلام ءُ شێر یَکّێں مَرکَب ءَ سَوار اَتێں
مُنیر ئے کِسَّہ ءَ مَکَن
اِے ھۆن کہ زَمانَگ ءَ مئے دامُن ءَ شَلێنتَگ اَنت
اِے ھۆن ءِ کِسَّہ ءَ مَکَن
اِے ھۆن چۆ کہ ھِنّی ءَ مئے اَندَر ءَ رَجێنتَگ اَنت
اِے ھۆن ءِ کِسَّہ ءَ مَکَن
بَلۆچ ءِ زَگرێں ھۆن زِندَگی ءِ دامُن ءَ کَپ اَنت
بَلۆچ ءِ نَگدێں گال بَندَگی ءِ دامُن ءَ کَپ اَنت
مَن ءُ گُلام ءُ شێر یَکّێں مَرکَب ءَ سَوار اَتێں
مُنیر ئے کِسَّہ ءَ مَکَن
ما کُلّ چَہ رۆچ بُندَر ءَ
بَلۆچ ءِ دَردوار اَتێں
گِسَر چَہ جِند ءِ ساہِگ ءَ
ما رُژن ءِ رازدار اَتێں
لَگۆر ءِ مَرگ ءُ زِند چے؟
نِزۆر ئے پاد ءُ پَند چے؟
اَبَید چَہ اِے بُندَر ءَ
مئے زِندَگی، مئے جِند چے؟
دِل ءَ مَن چۆن زُرت باں چَہ پُلّێں ھَمبَلاں وَتی
چِہ پَیم مَن شَمُشت باں شَہیدێں گَنگَلاں وَتی
اِے راہ داں رَواں کَنت
اِے ساہ ھَم رَواں کَنت
اِے آجُوی ءِ کارَواں وَتی مُراد ءِ مِنزِل ءَ ھَمے وَڈ ءَ رَواں کَنت
تَنیگَ باز پَند بُرَّگی اِنت مارا ھَمسَپَر
تَنیگَ بازێں چَپّ ءُ چۆٹ مئے راہ ءِ دێم ءَ بانٹ بَنت
تَنیگَ مَن نَمُرتَگاں
تَنیگَ دَم نہ بُرتَگاں
<سترُنگ><اِم>مُبارِک کازی