1989 ءَ، وَہدے مَن ڈِگری کالِج تُربَت ءَ داکِلَہ زُرت گُڈا مَکُّران ءِ بَچَکّاں اَبَید مَشکِہی بَچَکّے دین مَہمَد ھَم مَنی ھَمجُماِت اَت۔ دین مَہمَد کہ ما سَنگَتاں دینجاں گُشت، مُدام دو بَچَکّ ءِ ھَمراہ اَت۔ یَکّے پَٹَکّ اَت، دُمی بُرز اَت۔ یَکّ رۆچے مَن جُست کُت کہ اِے پَٹَکّێن ءُ بُرزێں کئے اَنت کہ تَو مُدام اِشانی ھَمراہ ئے؟
دینجانا بِچکَندِت ءُ گُشت، “اِے دوێں مئے دَمَگی مَردُم اَنت۔ پَٹَکّێن ءِ نام مَنّان اِنت، بُرزێن ءِ اَلّاہ نِزَر۔”
مَن ءُ دینجاں اِپ۔اِس۔سی۔ (پسک)ئے اَوَلی سال ءَ اَتێن ءُ اَلّاہ نِزَر ءُ مَنّاں چَہ ما سێنیَر اَت اَنت بلے ما دْراہ بی۔اِس۔ءُ۔ (بی ایس او) یاسین ءَ اَتێں، پَمِشکا زیتّاں ھۆر ءُ تۆر بیتێں۔ آ وَہداں بی۔اِن۔وائی۔اِم۔ (بنیم) یا بی۔اِن۔اِم۔ (بی این ایم) ھَم جۆڈ بیتَگَت کہ آئی ءِ سَرۆک داکتَر ھَئی اَت۔
گۆں مَنّان ءِ گِندَگ ءَ مَن مُدام داکتَر ھَئی ءِ تْرانَگ ءَ کَپتاں۔ یَکّ رۆچے مَن جُست کُت کہ داکتَر ھَئی تَئی چے اِنت؟
گُشت ئِے، “ھِچّ نَہ اِنت۔ چی ءَ زانا؟”
مَن گُشت، “تَرا مَن گِنداں، داکتَر ھَئی ءِ تْرانَگ ءَ کَپاں۔”
آئی ءَ کَندِت ءُ گُشت، “چۆن؟”
مَن گُشت، “رَنگ ءُ دانَگ ءَ تَو آئی ءِ چَہرَگ ءَ جن ئے۔ ھَمائی ءِ وَڈ ءَ پَٹَکّ ئے ءُ ھَمائی ءِ رَنگ ءَ دیواناں گُشتانک دَیَگ ءَ شُرُو بَئے، بَسّی نَزان ئے۔”
مَنّان ءَ ٹَہک دات۔ آ وَہداں داکتَر ھَئی مئے دْرُستانی دِلواہێں رَہشۆن اَت۔ آ بی۔اِس۔ءُ۔ئے اَوَلی سَرکَماش بیتَگَت۔ بی۔اِس۔ءُ۔ئے اَوَلی رَہشۆن اَت کہ پاکِستان ءِ کَومی اَسَمبَلیا سَر بیتَگَت بلے 1973 ءِ آین ئِے دَزنام نَجَتَگَت۔ بَلۆچانی اُلُسی سْیاسَتدان اَت، بِزاں سَردارے نَہ اَت ءُ نی بی۔اِن۔اِم۔ئے رَنگێں راجدۆستێں گَلے ءِ مَستِر اَت۔ پَمِشکا داکتَر ھَئی ءِ نام ءِ بَندَگ ءَ مَنّاں گَل بُوت۔
اِپ۔اِس۔سی۔ کَنَگ ءَ رَند وَہدے مَن بۆلاں مێڈیکَل کالِج ءَ سیٹ گِپت، گُڈا دینجاں، مَنّان ءُ اَلّاہ نِزَر ھَم گۆن اَت اَنت۔ مَن گۆں مَنّان ءَ گُشت، “نی تَو شَرتِر داکتَر ھَئی بیت ئے۔”
کَندِت ءُ جُست ئِے کُت، “چۆن ڈ ئے؟”
مَن گُشت، “شُما پێسَر ءَ ھَمرَنگ اِت، پَٹَکّ اِت ءُ پیتّار اِت۔ نی داکتَر اِت ھَم۔”
آئی ءَ کَندِت ءُ گُشت، “نوں گُڈا مَن نَزّیک کُرتَگ۔”
آ دَور گْوَست۔ وَہد مَٹّ بُوت ءُ وَہد ءَ وَتی پَجّیا بازێں چیزّے مَٹّ کُت۔ داکتَر ھَئی ءَ بَلۆچ ءِ جُہد ءِ سَرۆکی یَلَہ دات ءُ پاکِستان ءِ رَندگیری بِنا کُت۔ داکتَر اَلّاہ نِزَر، داکتَر مَنّان ءُ داکتَر دین مَہمَد ءَ بَرگَشتَگێں داکتَر ھَئی ءِ رَندگیری وَیل کُت ءُ بَلۆچ ءِ جُہد ءِ سَرۆکی زُرت۔
مَرچی کہ داکتَر مَنّاں پہ بَلۆچ ءِ آجُوی ءَ شَہید بیتَگ ءُ داکتَر ھَئی پاکِستان ءِ گُلامی ءَ زِندَگ ءَ مُردار اِنت، مَن ھَیال کَناں کہ وَہد گێچِنے۔ آ ھَم دَورے اَت کہ داکتَر ھَئی ءِ نام پہ داکتَر مَنّان ءَ شَرَپے اَت ءُ نی ھَم وَہدے کہ داکتَر ھَئی ءِ نام پہ آئی ءَ زاہے۔
<سترُنگ><اِم>ناگُماں