نِبِشتَہ ءِ جِند سَکّێں زِمَّوارێن ءُ اِیماندارێں کارے۔ پَدا شَہیدے ءِ سَر ءَ نِبِشتَہ کَنَگ چِد ءُ گْرانتِر اِنت۔
پَدا پہ یَکّ اَنچێں مَردُمے ءَ کہ چَہ رَم ءَ سِستَگێں نێمُردَگ ءُ پُژمُردَگێں زِندے ءِ نْیام ءَ گۆں کُہت ءُ بَژناں بارێں سَہت ءُ دَماناں پہ آئی ءَ چے پْہَر ءُ چے شاں پَشت کَپیت۔ اَلبَت ھَست اِنت وَ پْہَری گَپّے بلے پہ ھَماہاں کہ ھما ھاک ءَ اَنت، ھما رَندپَدان اَنت، ھما مِنّدی ءُ ھما نْیادانی ساہِگ ءَ اَنت۔
پہ یَکّ گَزّۆرێں مَردُمے ءَ شَہیدے ءِ بابَت ءَ نِبِشتَہ کَنَگ، پَدا شَہید داکتَر مَنّاں جان ءِ وَڈێں دِلێر ءُ بُودناکێں سْیاسی رَہشۆنے ءِ بابَت ءَ گراں نَہ اِنت بَلکێں گْرانی ئے ھما گُڈّی ھَدّ اِنت، چِد ءُ دێم ھِچّ پَشت نَکَپیت۔
مَن داں نِبِشتَہ ءِ نییَت بَستَگ، وَس کَناں بێدِ اَندَر ءِ مَلامَت کَنَگ ءَ دِگِہ ھِچّی نێست۔ بلے ھَمے دَمان ءَ کہ مَن ھَیراں مَنتَگاں، تَ دْرۆشُمے دَر ءَ بیت: لُکّ ءُ کاشێں مید، گِرد ءُ بَزێں دێم، گْوَنڈبُرّێں بَرۆت ءُ گۆں تْرُکِّتَگێں ماش ءُ کَنَگێں ریشّاں بِچکَندانا گُشت ئِے، “پُلّ، تَو چے جێڈَگ ءَ ئے؟”
گۆں ھَمے گُمان ءَ مَن ءَ گَپّے گیر اَتک۔ اوتاگے ءَ وَہدے بی۔بی۔سی۔ (بّک)آ پَد نْیاد کہ بُوت گُڈا نۆدَربَرے ءَ گُشت کہ شَہید ھَرجاہ مئے ھَمراہ اَنت، کۆہ ءُ جَبَلانی تَہا، رُنگراہ ءُ بے دِہاں ماِش ڈیکّ دیێں، مئے کُمَکّ ءَ کَن اَنت، سَینکلانی پَنچراں گِر اَنت ءُ مارا دی اَنت۔”
آ دَمان ءَ سَنگَتاں آئی ءِ ھما سِتک ءِ سَتا کُت کہ گۆں شَہیداں بَندۆک اَت۔ چونایا اِے گَپّ بِگِند ئے چُشێں مانایے مَداریت بلے وَہدے گَپّ کہ شَہید ءَ کئێت گُڈا یَکّ سِتکے مانیت ءُ یَکّ باوَرے وَدی کَنت۔ آ چَہ وَتی کُرتَگێناں پہ تَو مادَنێں راہے بۆجیت ءُ تَرا مِنزِلیگ کَنت۔
اَنّی چۆ ھما سَنگَت ءِ گَپّ ءَ شَہید مَنّاں جاں پہ وَتی بابَت ءَ نِبِشتَہ کَنَگ ءَ مَن ءَ دِلبَڈّی دیَگ ءَ اِنت۔ دْرُست واب اَنت بلے داکتَر آگَہ اِنت ءُ وَتی رۆدَپتَر ءَ نِبِشتَہ کَنَگ ءَ اِنت۔ وَتی سْیاسی کاراں اَبَید، داکتَر جاگَہانی نام ءُ مَردُمانی تَب ءُ مَیلاں ھَم نِبِشتَہ کَنَگ ءَ اِنت ءُ وَتی جَتَگێں سَپَر ءَ نِبِشتَہ کَنَگ ءَ پَد بانداتیگێں وَتی کارَّہبَندا نِبِشتَہ کَنَگ ءَ اِنت۔
داکتَر چَہ رَہشۆنے ءَ گێشتِر پَکیرے زانَگ بیت۔ آئی ءِ نِندَگ ءُ پاد آیَگ، گۆں سَنگَتاں آئی ءِ رَوِشت چَہ سْیاسَت ءَ بالاتِر جُہدکارے ءِ بیتَگ، آئی ءِ مِہر گۆں وَتی باسک ءُ رَہشۆناں ھَوار گۆں وَتی راج، زِمین ءُ زُبان ءَ ھَمینچ مُہکَم بیتَگ کہ اِے دْرُست پہ آئی ءَ پِراکی بیتَگ اَنت۔ آئی ءِ پَکیری ئے تَہا یَکّ بادشاہیے پِہنیام اَت! مَن ءَ جُست ئِے کُت، “اِے زَرّێنبُگ اِنت، داکتَر اَسَد ھَمِد اِنت؟ اَسَد کُج ءَ بیت؟ دَر ئِے گێجِت۔”
ھَمِد ءَ یَکّے ءَ گُشت، “واجُو! اَسَد ئے بْرات جَنَگ بیتَگ، اَسَد مُشکُل اِنت دُچار بِکَپیت۔”
“مَنی سَنگَت اِنت۔ مَن آئی ءِ بْرات ءِ پَتَّر ءَ اَلَّما رَواں۔ شَرّ اِنت کہ شُما نام گِپت۔ چونایا ھَم کَسے کہ جَنَگ بیت شُما آ کَہۆل ءِ پَتَّر ءَ اَلَّم بُرَوِت۔”
مارا زُرت ئِے ءُ شُت اَسَد ئے لۆگ ءَ ۔ اَسَد وَت اود ءَ نَہ اَت۔ داکتَر مَنّان ءَ پُرس جَت۔ شَپ ءَ یا اِندِگِ رۆچ ءَ اَسَد اَتک ءُ واجَہ ئِے داوَت کُت۔
“گِس ءَ نِندَگ وَشّ نَہ اِنت۔ مَردُم ڈَنسَری کَوشے بْوارت دِگِہ۔”
گۆبُرد، ھۆشاپ، دَشت یا نِگوَر ھَرکُجا کہ دو سئے رۆچ ءَ ٹِکانَہ ئِے کُت گُڈا سْیاسی کاراں پَد گێشتِر کُوچَگاں دَر کَپت۔ کَور ءُ کۆہ ءُ گْرێشَگانی شَیدائیے اَت۔ یَکّ جُنُونے ھَست اَت واجَہ ءِ تَہا۔ ھَرجاہ کہ مَن گۆں بیتَگاں، گَل ءِ باسک یا لَس مَردُمے ءَ کہ داوَت ءُ کارے کُتَگ، تَ گێشتِر گْرێشَگ ءُ کُوچَگاں داشتَگ ءُ وَرَگ چَرگ ئِے کُتَگ۔
واجَہ ءِ تَہا دِگِہ یَکّ چیزے کہ مَن مارِتَگ، آ آئی ءِ ھما دَرد ءُ تَورِشت کہ زاہِری دْرۆشُم ءَ سَنگَتانی گِسَر کَپَگ ءِ بیتَگ اَنت، آہانی چِر تَرّێنَگ ءُ وَت ءَ تاہیر دیَگ ءَ، یَکّے وَ اِش کہ آ گێشتِر کار ءَ یا سَپَر ءَ بیتَگ، آ وَت یَکّ مُلمائیے، یَکّ شُگُلے۔ ھما لِزَّت ءُ چاشنیے کہ تَرا چَہ شَہیدانی پَشت کَپتَگێں کارانی کَنَگ ءَ رَسیت، دِگِہ ھِچّ چُشێں اِزمے نێست کہ اِینچ تاہیر بِدَنت۔ بلے وَہدے کہ گَپّ ءُ رَپّی مَجلِس بیتَگ اَنت گُڈا سَنگَتانی تَہا یَکّے اَلَّما آئی ءِ مَسکَرا ءُ وَژگَپّیانی نِشانَگ بیتَگ۔ گۆں ھَمے کَندَگدرۆشُمێں پاہاراں وَتا ئِے سَہڈێنتَگ۔
بِہ یَکّێں جَہا بێدِ کار ءَ باز وَہد ءَ نَنِشِت، مُدام سَپَر ءَ اَت، سَپَر دَر سَپَر۔ آئی ءَ وَتی زِند یَکّ سَپَرے کُتَگَت۔ جاہے پَرپَٹ ءُ سَینکَل، جاہے ھَر ءُ ھُشتِر ءُ جاہے مۆٹَل ءُ گاڈی، مێتَگ پہ مێتَگ، ھَلک پہ ھَلک۔ داکتَر کہ ھَرکُجا اَوَلی بَر ءَ شُتَگ چَہ آئی ءَ پَد کُجام ھَم سَنگَت ءُ رَہشۆنے کہ ھما ھَند ءُ دَمَگاں شُتَگ تَ آ ھَند ءِ مَہلُوک ءِ اَوَلی جُست داکتَر ءِ بیتَگ۔
داکتَر مَنّاں جان ءَ شَہید گُشَگ گُش ئے وَشّ نَہ اِنت۔
آ نِشتَگ، ٹیوی چالُو اِنت، کادِری ءُ اِمراں ھان ءِ دَرناءَ چارَگ ءَ اِنت۔ نَزاناں کئے ءَ گُشت کہ واجُو، تَو سۆچ اِشیا، بْیا پَتّائیے کَنێں۔
گُشت ئِے، “اِنّاں، اِشیا مَسۆچ۔ اِشاں اَلَّم بِچار ءُ گۆش دار۔”
دِگِہ یَکّے ءَ گُشت، “تَو اِشیا گُش ئے؟ داکتَر وَشّ ٹیوی ءَ ھَم چاریت۔ وَشّ ئے نی چارَگ بیتَگ۔
وَشّ چالُو اِنت۔ اَسلَم بُلَیدَئی ءَ بَشیر یا زَرکاں جُست ءَ اِنت۔ ما یَکّ گْوَنڈێں اوتاگے ءَ نِشتَگێں۔ لۆگ ءِ پێژگاہ ءَ دیوان اِنت۔ مێتَگ ءِ کُلّێں جَنێں، مَردێں، وَرنا ءُ کَماش، کُلّ نِشتَگ اَنت ءُ داکتَر تران ءَ اِنت۔ گَل، جُہد، زِمین، زُباں، ھَمبَستَگی ءُ ھَمسَنَّتیا گۆں بَندۆک بَیَگ ءِ پَنت ءُ سِکێن ءَ دیَگ ءَ اِنت۔ باسکانی جُستانی پَسَّواں دیَگ ءَ اِنت۔
گَلی جێڈَہے گیشّ ءُ گیوار کَنَگ ءَ اِنت۔ کُج ءَ نہ کُج ءَ یَکّ سُر ءُ پُرے اَلَّم کَنَگ ءَ اِنت۔ گۆں کُلّێں شَہیداں ھَوار گَل ءِ رَہشۆنی ءَ کَنَگ ءَ اِنت۔
دَنیگَتَ کار سَرجَم نَہ اَنت۔ بازێں کارے کَپتَگ، بازێں جێڈَہے گیشوار کَنَگی اِنت۔ بلے بَچُّو ءَ کئے جَواب کُت کَنت؟ ھَمے سَہت ءَ کئێت گُشیت، “اَبّی! سَنگَتاں اولاک جاڈی کُرتَگ پہ مَستۆنگ ئے رَوَگ ءَ!!!”
<سترُنگ><اِم>ھَسا بِجّار