آس وَتی ءُ گِس وَتی، سِنگ وَتی ءُ سَر وَتی
زَیمێں دِل ءَ کُج ءَ بَراں، تیر وَتی جَگَر وَتی
کێنَگ ءُ کَست ءِ جَمبَر اِنت، نَپت شَلیت ءُ ھار کَنت
وائے گِدان ءِ نِشتَگێں! گْوات ءَ کن ئے سِپَر وَتی
آہِن پہ آس مۆم بیت، آپ نَبیت دِل تَئی
اُو مَنی مِہر ءِ وَشنَیَتک! بْیا واہَگاں بِبَر وَتی
سیت پہ جَنگ شَکَّل اِنت، وَت پہ وَت ءِ بَدَل نَہ اِنت
رُستُم ءِ سْیالی ءَ مَرَو، گُرز ءَ مَکَن گَزَر وَتی
“مُولا ئے شَہجُو ءَ بِگِند، گیر آر، تَلّ ءُ تازیاں”
چاکَر ءِ ھارێں گۆرُم ءَ مَلِّتَگ کَہچَر وَتی
بْیا پہ زِمین ءِ آکِبَت، کۆہێں سَراں کَناں کَتار
دُژمِن ءِ ھَور ءَ ماں سَر ءَ ھار کُتَگ ھُنَر وَتی
دِل کہ سُچیت اَگان اَتا شیرکِنێں گال زَہر بَنت
ما تَئی ھَیال ءِ ساہِگ آں، مارا مَلێک “دَر” وَتی
<سترُنگ><اِم>اَتا شاد