چاردَہی ماہ
شَپ ءَ چاردَہ اَت۔ چَہ ماہ ءِ تَنَکّێں رُژن ءَ گێدی ءِ دْراہێں ھَستی جانشۆد اَت۔ سَدُو کاپَرُک ئے سَر ءَ وَتی نِپادانی سَر ءَ نِشتَگَت۔ آئی ءِ سُہرچَکێں مُوداں گْوات شِنگێنَگ ءَ اَت، ءُ ماہ ءِ رُژن ءَ چَہ آیانی تَہا یَکّ جَلَشکے وَدی بَیَگ ءَ اَت۔ آئی ءِ تَنَکّێں لُنٹ لَرزَگ ءَ اَت اَنت، ءُ آئی ءِ اَرس ءَ گُلگُلێں بادامیێں چَمّ ماہ ءَ سَکّ اَت اَنت۔ آئی ءِ اِسپێتێں دێم گُش ئے مُروارِدی آپ ءَ گۆں شُشتَگَت۔ سَدُو ءِ سُور ءَ مَرچی چار سال سَرجَم اَت۔ آ ماہ ءَ چاران ءُ ھَیالانی بۆجیگ ءَ سْوار اَت۔
سُور ءَ دَہ رۆچ گْوَستَگَت۔ نَمرۆز ءِ ویزا ھَلاس بَیَگ ءَ اَت۔ آئی ءَ گۆں وَتی مات ءَ گُشت کہ آ نوں دَرمُلکا نَرَوت ءُ سَدُو ءَ یَلَہ کُت نَکَنت۔
"مَنی چ(کّ)! سَدُو لاپے وَ لۆٹیت۔ اِد ءَ چے ھَست؟"
پہ دِلنَکَشّی ءُ مات ءِ بازێں گُشَگاں نَمرۆز پہ رَوَگ ءَ ساڈی بُوت۔ آ شَپ ءَ اوں ماہ ءَ چاردَہ اَت۔ آ ھَر دو وَتی نِپادانی سَر ءَ نِشتَگَت اَنت۔ سَدُو ءِ شِنگێں مَہپَراں سَمارانا نَمرۆز آئی ءَ گُشَگ ءَ اَت۔
"سَدُو، مَنی پُلّ! مَن بے تَو دَرمُلکا بَرباد باں۔ اَمّاءَ بُگُش بِلّے نَمرۆز ھَمِد ءَ اِنت، ھَمِد ءَ کار کَنت۔"
سَدُو ءَ اوں پہ مِہرے آ چارِت ءُ گُشت۔
"اَمّا بلے کُج ءَ پَہمیت۔ تَو بلے رَو ئے گُڈا وَتی رَوَگ ءَ پہ آیَگ بِکَن۔"
رَوَگ ءَ پَد ھَر شَپ نَمرۆز ءِ پَون اَتک ءُ سَدُو ءَ پَون زُرت ءُ تَتک ڈَنّ ءَ شُت۔ نَمرۆز ءِ مات ءَ بَرے نُرُنڈِت ءُ بَرے کَندِت۔ دانکہ چار پَنچ ماہ گْوَست۔ کَمّ کَمّا نَمرۆز ءِ پَون کَمتِر بَیاں بُوت اَنت۔ رۆچانی بَدَل ءَ ھَپتَگانی سَر ءَ ، پَدا بِگِند ئے ماہے یَکّ بَرے آئی ءِ پَون اَتک۔ سَدُو بے چاڈ اَت بلے نَمرۆز ءِ مات ءَ آ تَسَّلا دات کہ کار ءُ کَسَب ءَ اِنت، بَزَّگ گَسی اِنت، اِینچ نوں پَون کُج ءَ بیت۔ آ وَہدی شُما نۆکسُور بُوتَگِت۔
سالے ءَ پَد دَرمُلکا نَمرۆز ءِ سَنگَتے اَتک۔ سَدُو اَبێد چَہ تْرُو ءِ جُست ءَ ، آئی ءِ چارَگ ءَ شُت ءُ جُست ئِے کُت کہ، "نَمرۆز چۆن اِنت، پہ مَن چیزّے دێم ئِے داتَگ کہ اِنّاں؟"
آئی ءَ سَر جَہل کُت ءُ پَسَّو دات:
"مَنی گُہار! مَن چے بُگُشاں، نَمرۆز اود ءَ گۆں سَنگَت ءُ جِنِکّاں زَوال اِنت۔ رۆچے یَکّ جِنِکّے آئی ءِ سَنگَت بیت ءُ پُلیت ئِے۔ مَن چینچو سَر ءُ سۆج کُتَگ۔ مَنی سَر ءُ سۆجانی سَوَب ءَ مَرچاں مَن ءَ اَنچۆ راہ ءَ گِندیت، وَتی راہ ءَ تاب کَنت۔ مَنی وَ دِل گُشیت چَمے جِنِکّاں یَکّے گِپتَگ ئِے۔"
سَدُو پاد اَتک ءُ گْرێوان ءَ لۆگ ءَ اَتک ءُ دێم پہ چێر کَپت۔ چُنت رۆچ ءُ شَپ آئی ءَ وَرَگ دَپ نَجَت۔ نَمرۆز ءِ مات ھَمساہِگانی کِرّا شُت کہ چُکّ ءِ پَون ءَ بِجَنِت ءُ بِدَیِت بلے آئی ءِ لَمبَر بَند اَت۔ ھَمُکّ رۆچ نَمرۆز ءِ مات ءَ بَسّ سَدُو تَسَلّا دات ءُ سَدُو ءَ اَچ اِے تَسَلّایاں چِد گێش گْرێت۔ سَدُو ءَ ھَمُکّ شَپ نِشت ءُ جێڈِت کہ اِے وَڈێں مِہر کَنۆکێں نَمرۆز ءَ چے بُوت؟
اِنشَپی اوں آ جێڈَگ ءَ اَت کہ داں کَد آ ماہ ءِ تَنَکّێں رُژن ءِ چێرا اێوک ءَ بِنِندیت ءُ پہ نَمرۆز ءَ بِجێڈیت۔۔۔؟
<سترُنگ>اَندَلیب گِچکی