دانکہ جَل ماں تَئی دَر ئِےائیں دِل ءَ آچ نَبیت
پہ تَئی بانۆر ءَ گُلێں، تَنگَہێں پَرداچ نَبیت
بَرجَمێں! مَنگِہێں مَرداں گۆں بَزێں دیوانے
دِلجَمێں کار پہ اِشتاپێں تَگ ءُ تاچ نَبیت
اَبرَم ءُ اَبَدمی سَسّا ءُ سَما سِچکان اَنت
مُجَّتی مَنگِہ ءِ دَروَر تَئی وَسّاچ نَبیت
زِند ءِ ماہۆر اَگاں لَبّ ءِ نِہِنگاں دِرتَگ
پہ بَگ ءِ آمَگێں بَندیک ئِے سَتَر سْراچ، نَبیت
دانکہ بۆہێری ئے آس ءَ نَسُچیت تَنگَہێں دِل
ھیر ءُ آریپ ءُ گِہێں واہَگ ءِ آماچ نَبیت
دانکہ پہ سَمّیاں پێداک نَبیت دۆدایے
پہ تَئی دۆدایاں کَدی بے رْگِرێں بالاچ نَبیت
سُہبَت ءَ اێر مَکَپ رَہگوَزی سیر ءِ دُہلاں
مَرگ ءُ سَلۆنکیا تَئی چاپ نَبیت ناچ نَبیت
بۆسکی بۆسَگ ءُ شیشارێں سَماراں شارێں
بے نَسیب بات ئے اَگاں گۆں تَو سَگار ماچ نَبیت
واہَگ ءِ اَنگَراں چۆ سۆتکَگ ءُ پُر کُرتَگ
کہ سَیَد مُرتَگ بلے شۆدَگ ءُ اَرداچ نَبیت
<سترُنگ><اِم>سَیَد ھاشُمی
2 نَوَمبَر 1972