ئے ھُدا!
ئے مُنسِپێں پَروَردِگار!
ئے ھَستی ءِ ساز ءِ سُرانی رازدار!
مَرچی کاہوارێں اِے گۆسپُندا پَہِل کَن، ئے ھُدا!
ئے ھُدا!
گۆں تَرا زاری ءُ پِریات اِنت مَنی
گۆں تَرا دَزبَندی ءُ اَرز اِنت مَنی
یَکّ ءُ دو جُست اَنت مَن ءَ پَسَّو بِدئے
ئے ھُدا!
چیزُّکے رۆچ اِنت مئے بازار ءَ اَجَبرَنگێں سِپاہیگ اَتکَگ اَنت
مات ءُ شیرمِچ، پیر ءُ وَرنا کُشتَگ اَنت
کُشتَگ اَنت ءُ بْرَہنَگ ءَ دَور داتَگ اَنت
ءُ دِگِہ چَندے مَیارجَلّێں مَزار
دێم پہ بے نامێں دَیارے بُرتَگ اَنت
(کئے بِزانت آ زِندَگ اَنت کہ مُرتَگ اَنت)
آس داتَنتِش دْراہێں بازار ءِ گِس
کُڈُّک ءُ کَرگین ءُ پیشبَند ءُ گِداں
لۆگ ءُ باں
مال ءُ مَڈّی دْرُست گۆں وَت بُرتَگ اَنت بارۆٹیاں
تَہنا مَن گۆں پَنچ ءُ شَش ھِرّ ءُ جَڈ ءَ پَشت کَپتَگاں
جاہ پہ جاہ، مِنزِل پہ مِنزِل سَر جَناں
ھِچّ نَگِنداں مِہروانێں مَردُمے
جُنزِتَگ بازار کُلّ
ئے ھُدا!
ئے مُنسِپێں پَروَردِگار!
ئے مِہرَباں!
ئے ھُدا!
مَن ھُشک ءُ ھَیراں آں کہ بارێں چے کَناں
کہ ھَمے ڈَنّی سِپاہیگ نوں مَنی شۆہاز ءَ لۆگ ءُ مێتَگ اَنت
بُرز ءَ آزمان ءَ تْرِپ اَنت جَنگی گُراب
گُلزِمین ءَ ٹێنک ءُ ٹۆپ
ئے ھُدا!
ئے ھَستی ءِ ساز ءِ سُرانی رازدار!
پَروَردِگار!
یَکّ ءُ دو جُست ءِ مَن ءَ مۆکَل بِدئے
مَن کُجام کَیمپ ءَ سِلاہبَندێں سِپاہ ھێل داتَگ اَنت؟
مَن کُجام بازار ءُ بَس بُن داتَگ اَنت؟
مَن کُجام جَرنێل ئے گِس بَمبے جَتَگ؟
مَن کُجام میلواجَہ ئے چُکّ دُزِّتَگ
مَن کُجام رێل ءِ ٹِرَیک لێٹێنتَگ اَنت؟
مَن کُجام بَینک لُٹِّتَگ؟
کار مئے چی اِنت؟
وَتی واہُند ءِ اُمر ءِ بَندَگی
آ کہ ھَرچی ھُکم کَن، ما ھما پَیم ءَ کَنێں
اُو تَئی بَندَہ ھَپیز ءُ اَلَماں
ئے ھُدا شُگر اِنت مَن اِنسانے نَہ آں!!
<سترُنگ><اِم>مُبارِک کازی