چُکّ ایں بَلۆچانی، ما چُکّ ایں بَلۆچانی
مئے تُرسا زِمین لَرزیت، مئے بیمّا کَلات جَکس اَنت
ما کۆہی مَزارچُکّ ایں، ما گُلُّڈ ایں شێرانی
چُکّ ایں بَلۆچانی، ما چُکّ ایں بَلۆچانی
ما کۆپَگ ایں پِسّانی، ما جامَگ ایں ماسانی
ما پَنجَگ ایں بْراتانی، ما لَجّ ایں گُہارانی
چُکّ ایں بَلۆچانی، ما چُکّ ایں بَلۆچانی
ما ناندِہ ءُ دادبَکش ایں، ما سَردِہ ءُ نامکَشّ ایں
ما ھۆنی مَیارجَلّ ایں، دێم ءَ رَوێں بے رانی
چُکّ ایں بَلۆچانی، ما چُکّ ایں بَلۆچانی
ما گَیرَت ءِ شیر مِتکَگ ماں ساہِگ ءَ زَہمانی
ھۆن پِٹّیت چَہ مئے چَمّاں، ما کَوم ایں شَہیدانی
چُکّ ایں بَلۆچانی، ما چُکّ ایں بَلۆچانی
مئے ھۆن زالُور کار ءَ کئێت، یَکّ رۆچے مئے کَوم ءِ
تاواں نَبَنت ھِجبَر نازێنک مئے ماسانی
چُکّ ایں بَلۆچانی، ما چُکّ ایں بَلۆچانی
ما پُشت ایں یَتیمانی، لاچار ءُ گَریبانی
زُلم ءِ ھَسار ءَ پْرۆشێں دَور نَیَیت پَدا زُلمانی
چُکّ ایں بَلۆچانی، ما چُکّ ایں بَلۆچانی
چَکّاسێں ھَزار رَند ءَ تیراں وَتی دِلبَند ءَ
کَول اِنت تَئی پَرزِند ءَ گۆں گۆنڈَلاں تیرانی
چُکّ ایں بَلۆچانی، ما چُکّ ایں بَلۆچانی
چَمرۆک اِنت بَلۆچِستاں نامدارێں بَلۆچانی
دَرگاہ اِنت شَہیداں شَہمۆکێں سَگارانی
چُکّ ایں بَلۆچانی، ما چُکّ ایں بَلۆچانی
<سترُنگ><اِم>اَبدُلمَجید گْوادِری