دِلگِداں نِندۆک مۆتکے سَر بِکَن
گَپگَپ ءَ جَمبُورێں آہے دَر بِکَن
نِندَگ ءَ نَیل اَنت جَگَربُرّێں زَہیر
دۆزَہی بْرێج اَنت دِل ءَ یاتانی تیر
لۆگ مئے زۆراکی ءِ آس ءَ بُن اِنت
پْرُشتَگ اَنت کۆٹ ءُ کَلاتێں بادگیر
ھَرگوَرا تۆپ ءُ تُپَنگانی تَوار
ھَرگوَرا نازێنک جَنت، ھۆنانی ھار
بُلبُل ءِ اَلہاں کَسّیگی نَہ اِنت
ھُرمَت ءَ گْرێت ءُ زَہیری زار جَنت
چَہ وَتی ڈێہ ءِ گَماں کُوکار جَنت
تَلوَسیت ءُ تَلوَسیت ءُ تَلوَسیت
جی مَنی باگانی بالُو بَزَّگێں
رێزِتَگ نازاکێں پُلّانی گَم ءَ
گیر کاریت کْرۆمَگاں گیمُرتَگێں
وَشبُواں ھَجگێں گُلابانی زَریت
مَن پہ اَرمانے دِل ءَ جێڈاں وَتی
گیر کاراں ڈێہ ءِ سالۆنکێں سَراں
کہ وَتَنمات ءِ پَناہ ءَ وَپتَگ اَنت
<سترُنگ><اِم>مُبارِک کازی