تَو کہ لَڈّ ءِ چِدا ساہِگاں گْوات بارت
چارێں نێماں مَنی بَمبَرے سَوت جَنت
ھَلوَتی زێمِرانی دْرَہێں پْرُشتَگێں ٹُکُّراں
مُرگ سُنٹاں چِن اَنت ءُ چِدا سَر گِر اَنت
اوستمَندێں دَریگانی چَمّ
شاِری دُرّسُمبێں زُباں شَہسَوارێں کَلَم
شَہم بِچکَندَگ ءِ بۆسَگانی جَلِشک
ھارے ءَ گۆں بَنت
ھِچّ نَمانیت بَسّ بَمبَرے سَوت جَنت
گۆں تَئی جُنزَگ ءَ زِندَگی گیمُریت
مِہلَباں گْوات بارت
تَو کہ لَڈّ ءِ چِدا رَنگ نادراہ بَنت
ساہِگاں گْوات بارت
تَئی جِتائی تَوارے کہ مانا نَبیت
گَم تَوانے تَئی ھِچّ دْرۆشُم نَگیپت
چۆنێں تَہنائیے شِنگِتَگ ھُلکَہ ءَ
رۆچ نِندیت چَمّ ءِ تَہا
ھَرچی اَندێم بیت
دیدَگاں رَہسَرے ھَست نہ مِنزِلے
بَسّ گُش ئے بَمبَرے
کئێت ءُ اوشتیت کَش ءَ سَوت جَنت
بَسّ بے رَنگێں یَکّ جَنگَلے رُستَگێں
کَسّے ھَمراہ مَنی نَئکِہ مَن اێوک آں
رۆچ ھَست اِنت نہ شَپ
چارێں نێماں مَنی بَمبَرے سَوت جَنت
سَوت مانا نَبیت
رَنگے سَہرا نَبیت
<سترُنگ><اِم>مُنیر مۆمِن