(لُمَّہ کَریمَہ ءِ یات ءَ )
ما دَسَمبَرجَتێں اَہدے ءَ نِشتَگێں
پَمّا سال ءِ سَر ءَ جَنوَری اوں نَیَیت
یار باوَر نَبیت مِہر ءَ سَرّێچێں ماتێں پَری اوں نَیَیت
ما دَسَمبَرجَتَگ!
تَنک ءُ بے لِزَّتێں دَمکے ءَ نِشتَگێں
جێڈَگ ءَ ایں تَرا
تَو چۆ بے مۆسُما کْوَہنێں دُنیاے ءَ نۆکێں جَنگے ٹَہێنت
مۆتکی بازارے ءَ
دَردی کۆہے سُرێنت
بۆتک اَنت مُرگانی رَم
پَٹَّگ ءَ اَنت تَرا زَردێں تاکانی چَمّ
لۆٹَگ ءَ اَنت تَرا اَہد ءِ کُہسارێں گَم
ما دَسَمبَرجَتَگ سَرپَد ایں کہ دُبَر کَسّ واتَرّ نَکَنت
کئے بِمَنّیت بلے
یار باوَر نَکَنت
ما دَسَمبَرجَتێں اَہدے ءَ نِشتَگێں
سَوت شِنگ اَنت بلے ساز ءُ آواز نێست
رَنگ ءُ بُو، دَرد ءُ اَندۆہَگ اَنت
مُرتَگێں ھَلوَت اَنت شِنگ اَنت بازارے ءَ
مَہرَمێں دَست نێست مِہری اَمباز نێست
مۆلُمانی بَہار
یار کَرّائی اِنت
یَکّ اَناگَہ کہ دُگنیا ءِ چَمّ اِنسِر اَنت
دُورا شۆرے رُدیت
گِلَّہێں چَمّے ءَ
شَپجَتێں پاسے ءَ کَسّے کُوکّار کَنت
کَسّے آواز دَنت
شاہر ئے گْرێواسک ءُ تُنّیگێں چَمّ ءِ تَہا
نِندَگی اَت تَرا
کَندَگی اَت تَرا
مِہروَناکێں پَری
زێمِلانی سَری
گْواڈَگێں دِلبَری
تَو اَناگَہ چَہ دیوان ءَ پاد اَتکَگ ءِ
تَہزَدێں نَوبَت ءِ گْرانێں باریگے ءَ
چینچو زیتّا ءُ اَرزان ءَ پاد اَتکَگ ءِ
ما پِرێم ئے تَہا
ھۆرک ءُ ھالیگێں دُنیا ءِ دێم ءِ تَہا
اَنگَتا نِشتَگێں
اَنگا ماں گیشِّتَگێں
ما دَسَمبَرجَتَگ
آست اَست اِد ءَ
نیلّێں دَریا ءَ آلاڈ ءُ بیلّ ئے رَوانی شَمۆشت
ماہِکان ءَ وَتی ماہِکانی شَمۆشت
بَندێں دَروازَگاں
کْوَہنَگێں ساہِگاں
دَردی تَہسِندێں آہ اَنت پہ بے وارسِی
کَپتَگ اَنت ماں دَگاں
تاکرێچ ءِ اَبێتکێں نِگاہ اَنت پَچ اَنت
مَہرَمێں کُہسَری
تَو نوں مارا بُگُش
اِے تَہارێں زِر ءَ
کَہر آماچ ءُ دِلسۆچێں اِے مۆسُم ءَ
کئے زَہیرے بُزُوریت ءُ آس ءَ بِکَنت
یات ءُ گیرے بُزُوریت ءُ آس ءَ بِکَنت
<سترُنگ><اِم>گُلاب گُلزار