“ھَلَو۔”
“ھَلَو۔ چۆن ئے؟”
“مَن یَکّ ءِ سَر ءَ آں۔ تَو ھال کَن۔”
“ھاہاہا۔ یَکّ ءِ سَر ءَ ئے؟ چی ءَ ؟”
“وَت زان ئے تَو۔”
“ھمّم۔ تَو ھما آزمانک دێم دات؟”
“ھَو۔”
“کُج ءَ ؟”
“مُنیر مۆمِن ءِ ‘گِدار’آ۔”
“گُڈا کَدی چاپ بیت؟”
“نَزاناں، تَرا چی ءَ اِشتاپ اِنت؟”
“ھاہاہا۔ آئی ءِ تَہا نێم گَپّ مَنیگ اَنت۔ اگں تَرا سَیَد داد رَسِت گُڈا نێم مَنی۔”
“نێم ءَ بِلّ، تێوَگێں داد گۆں مَنی جِند ءَ تئیگ اِنت جاں!”
“ھاہاہا۔ سْتُوپید!”
“تَئی سْتُوپید چاکَلێٹ ئے وَڈ ءَ وَشّ اَنت۔”
“شَیتاں! شَرّ اِنت، دِگِہ ھال ءُ اِہوال؟”
“دِگِہ ھال اِش اِنت کہ مَن مُنیر مۆمِن ھال دات۔”
“چے ھال دات؟”
“مَن گُشت مَن ھَمے ھمّم وال ءَ جِنِکّ ءِ سَر ءَ پَسِّتَگاں۔”
“تَو مَنی نام گُشت گۆں؟”
“اِنّاں۔”
“شَرّ کُت۔ مَنی نام ءَ کَسّ ءَ مَگُش گۆں۔”
“پَرچا؟”
“وَت، مَن بَسّ تئیگ آں، جاں!”
“مِنَّتوار۔ تَئی نام ءِ سَر ءَ مَن ءَ شَیرے گیر اَتک۔”
“چے؟”
“تَئی نام رَہسَراں نَکش اِنت ھَیالے رُژنائیں
چِدا ما گْوَستَگێں داِم چِراگ دارانا۔”
“اُہُہ! تَو شاِری ھَم کن ئے؟”
“اِنّاں، اِے مُنیرَئێگ اِنت۔ مَن ءَ آئی ءِ شَیر سَکّ وَشّ بَنت۔ جِنِکّے بیتێناں، گِپتَگَت!”
“ھاہاہا۔ سْتُوپید!”
“مَرچی مَن شام نَکَناں۔”
“چی ءَ ؟”
“مَرچی مَن سْتُوپیدا سێر آں۔”
“ھاہاہا۔ تَو اَنچێں گَپّ جن ئے۔ مَن چۆن کَناں۔”
“ھاں۔ بارێں تَرا مَنی کِتاب دَست کَپت؟”
“اِنّاں، نَزّیک ءَ نێست۔ مات گُشیت باندا بازار ءَ گُد ءِ گِرَگ ءَ رَواں، یَکّے کاراں گۆں۔”
“گِند ئے تَئی مات سَہیگ بِبیت کہ مَن تَئی سَر ءَ گَنۆک آں، مَنی کِتاب ءَ دِرّیت۔”
“ھاہاہا۔ کِتاب ءَ ھَیر اِنت، تَئی جِند ءَ مَدِرّیت۔”
“پَو! ھَو؟ آ زاناں وَشّ نَبیت کہ جِنِکّ ءَ شَرّێں بَچَکّے رَسِتَگ؟”
“اِنّاں۔”
“چی ءَ ؟”
“اِے واست ءَ کہ مَن ءَ دِشتارے ھَست ءُ مات ءِ سْیادے۔”
“مَسکَرا کن ئے؟”
“دِل گُشاں۔ پاری ھَبَرسِندی بیتَگ۔”
بَچَکّ بے وانک بیت۔
“ھاں چے بُوت؟”
“تَو راست گُش ئے؟ ھَبَرسِندی بیتَگ؟”
“ھَو۔”
“مَنی دِل گُشیت مُباِل ءَ دیوال ءَ بِجَن، بِلّ ئِے چُنڈ چُنڈ بیت۔”
“ھاہاہا۔ مُباِل ءِ مَیار ءُ گُناہ؟ اِے بَزَّگ ءَ وَ ھَبَرسِندی نَکَناێنتَگ۔”
“تَو مَن ءَ ھال نَداتَگ چی ءَ ؟”
“مَن ھال داتێں، تَو چے کُتَگَت؟”
“آ رَندی گَپّے بلے تَو ھال بِداتێں۔ مَن بارێں چَہ تَو وَتی ھِچّ گَپّ چێر نَداتَگ۔”
“ھَمِش اِنت نی ھال داتَگ تَرا۔”
“دێر گْوَستَگ نی۔”
“چۆن؟”
“نی مَن ھما جاگَہ ءَ سَر بیتَگاں کہ واتَرَّگ نَبیت۔”
“ھاہاہا۔ پَرواہ نێست۔”
“تَرا بَلکێں پَرواہ نێست، مَن ءَ ھَست۔”
“تَرا چے بیت اگں مَن تَرا مَرَساں؟”
“مَن پْرُشاں۔”
جِنِکّ ھِچّ نَگُشیت۔
“تَرا کہ دِشتار ھَست اَت، تَو مَن ءَ چی ءَ گَنۆک کُت؟ ھَر رۆچ اِس اِم اِس ءُ پَون، جی ءُ جاں، سَوگِند ءُ مُسام… تَو چی ءَ چۆ کُت؟”
“مَن وَت کُت۔ مَستِر وَت آں۔”
“تَئی ‘مَستِر وَتی’ مارا گار کَنت۔”
“مَن تَرا وَت دَر گێجاں۔”
“دَر مَگێج، گار مَکَن۔”
“دُێناں کَناں۔”
بَچَکّ پَون ءَ بَند کَنت۔
جِنِکّ پَون کَنت۔ بَچَکّ پَون ءَ گیپت بلے ھِچّ نَگُشیت۔
“تَو ھِچّ نَگُش ئے، جاں؟”
“تَئی جاں مَن نَہ آں، دِگِرے۔”
“تَو زَہر ئے؟”
“تَو یَکّ بَرے بُگُش تَرا دِشتار ھَست اَت گُڈا گۆں مَن چی ءَ دۆستی کُت؟ تَو چی ءَ گُشت کہ مَن بَسّ تئیگ آں؟”
“مَن لۆٹِت کہ تَو مَنی سَر ءَ آشِک بِب ئے۔ مَن ءَ اَنچۆ دۆست بِدار ءِ کہ بے مَن مَب ئے۔”
“بلے پَرچا؟”
“ھاہاہا۔ وَت۔”
“نی لَیب اِنت! تَرا زاناں یَکّ بَچَکّے ءِ مِہر ءُ دۆستی بَسّ نَبیت؟”
“بَسّ بیت بلے آ یَکّ اَنچێںے بِبیت کہ مَن ءَ ھَم دۆست بِبیت۔”
“چۆن؟ مَن پۆہ نَبیتاں۔”
“ھاہاہا۔ سْتُوپید!”
<سترُنگ><اِم>ناگُماں