دۆدانی مئے بَیرَکدار بارێں چۆن بُوت اَنت
راج ءِ سۆنڈاِن سَردار بارێں چۆن بُوت اَنت
ما کہ ھَمۆدا لَیب کُتَگ سُہب داں بے گاہی
آ رۆچ ءُ شَپ آ بازار بارێں چۆن بُوت اَنت
گۆں ھۆنیگاں مَرچاں تَو نِند ءُ نْیاد کن ئے
تَئی پێشیگێں کَول ءُ کَرار بارێں چۆن بُوت اَنت
چ کَلمانٹ ءَ بے اُمێت نِشتَگ مۆنجان ئے
تَئی ٹَہل ءُ داب ءُ سینگار بارێں چۆن بُوت اَنت
چۆ آپانی پَدگوانکاں بْرَمشے گْواہ نَکَنت
کازی پُلّێں دۆست ءُ یار بارێں چۆن بُوت اَنت
<سترُنگ><اِم>مُبارِک کازی