پێسَر ءَ بَلۆچی ءِ “مَجبُور ٹۆلی” یَکّے اَت بلے مَرچاں دو اَنت۔ یَکّے سْیاسَتَئێگ اِنت ءُ دِگِرے زُباَئێگن اِنت۔
سْیاسَت ءِ مَجبُور ٹۆلی گُشیت کہ اَنّی ما پِلاں پِلاں سَوَب ءَ اُردُو ءَ ءُ پارسی ءَ نِبِشتَہ کَنێں۔ وَہدے بَلۆچِستاں آزات بیت گُڈا ما بَلۆچی ءُ بْراہُوی ءَ زیرێں۔
زُبان ءِ مَجبُور ٹۆلی گُشیت کہ اَنّی پِلاں پِلاں سَوَب ءَ ما اَرَبی سْیاہَگ زُرتَگ، وَہدے ما آزات بے ن گُڈا لاتینی سْیاہَگ ءَ زیرێں۔
اَسَل گَپّ زان ئے چے اِنت؟ اَسَل گَپّ اِش اِنت کہ ھَور ءَ کہ گْوارَگی نَبیت، نامَہ گۆریچ ءِ کَنت۔ مارا اُردُو زُبان ءُ اَرَبی سْیاہَگ یَلَہ دَیَگی نَہ اَنت، پَمِشکا ما نِشتَگ ءُ وَڈ وَڈێں نامَہ ءُ نیمّۆن تْراشێں۔
راستێں گَپّ اِش اِنت کہ ما وَتی زُبان ءِ بارَوا اِیماندار نَہ اێں۔ ما بَسّ وَتی سْیاسی ءُ لَبزانکی ٹُکّ ٹُکّا کَنَگ لۆٹێں۔ مارا گۆں زُبان ءُ زُبان ءِ سْیاہَگ ءُ لَبزانی واناکی ءَ کار نێست۔
مئے سْیاسی مَردُماں بِچار۔ وَتی زُبانِش پادانی چێرا کُتَگ ءُ کَبزَگیر ئے زُباں اُردُوِش زُرتَگ ءُ سَر ءِ تاج کُتَگ ءُ ھِچّ سُدِّش پِر نێست۔ زُباندُژمِنی ھَمِش اِنت۔ زُباندُژمِنیا دِگِہ کانٹ پِر نَبیت۔ نی بِچار، کُجام کَوم ءِ آزاتیپَسُنداں وَتی زُباں یَلَہ داتَگ ءُ واجَہ ءِ زُباں زُرتَگ؟ چَرِشیا زانَگ بیت کہ ما دَپ ءَ بِلّ ئِے آزاتی ءِ گَپّ ءَ جَنێں بلے مئے سَسّا اَنگَت گُلام اِنت۔
ھَمے پَیم ءَ مئے کَلَمکارانی دُتَل ءُ دُپۆستی ءَ بِچار۔ دَپ ءَ گُش اَنت کہ پہ بَلۆچی ءَ لاتینی سْیاہَگ شَرتِر اِنت بلے وَہدے اَرَبی سْیاہَگ ءِ یَلَہ دَیَگ ءُ لاتینی ءِ زیرَگ ءِ باریگ کئێت گُڈا وَڈ وَڈێں اُزر پێش کَن اَنت۔
اُزرانی اِے چادِر ءَ بِلێٹێن ئے گُڈا راستێں گَپّ زاہِر بیت۔ ءُ آ گَپّ اِش اِنت کہ ما اُردُو زُبان ءُ اَرَبی سْیاہَگ ءَ ھێلدار ایں پَمِشکا اِشانی یَلَہ دَیَگ ءَ تَیار نَہ اێں۔
بلے ھێلداری جَوازے نَہ اِنت۔ اگں کَسے ھێرُون ءَ ھێلدار اِنت گُڈا اِشی ئے مانا اِے نَہ اِنت کہ ھێرُون شَرّ اِنت۔ اگں ما اُردُو زُبان ءَ ءُ اَرَبی سْیاہَگ ءَ نِبِشتَہ کَنَگ ءَ ھێلدار ایں، اِہسی ئے مانا اِے نَہ اِنت کہ اُردُو زُبان ءُ اَرَبی سْیاہَگ پہ ما شَرّ اَنت۔
نی جُست اِش اِنت کہ مئے سْیاسَتداں داں کَدێنا اُردُو ءُ پارسی ءَ وَتی سْیاسی دَرشان ءِ زُبان ءِ دَرجَہ ءَ دَ اَنت ءُ بَلۆچی ءُ بْراہُو ءَ ڈالچار کَن اَنت؟ ءُ مئے کَلَمکار داں کَدێنا اَرَبی سْیاہَگ ءِ تَچک کَنَگ ءِ شَوکا وَتی زُبان ءِ لَبزاں ماں گیشّێن اَنت؟ ھما مَردُم کہ اُردُو زُبان ءُ اَرَبی سْیاہَگ ءِ یَلَہ دَیَگ ءَ مَرچیگ ءُ باندات کَنَگ ءَ اَنت، آ دو جُست ءِ جَواب ءَ بِدَ اَنت۔
اَوَلی جُست اِش اِنت کہ پاکِستاں وَشّ بیت کہ تَو اُردُو زُبان ءَ یَلَہ بِدئے ئے؟
دُمی جُست اِش اِنت کہ پاکِستاں وَشّ بیت کہ تَو اَرَبی سْیاہَگ ءَ یَلَہ بِدئے ئے؟
اگں تَئی جَواب اِش اِنت کہ پاکِستاں وَشّ نَبیت گُڈا اِشی ئے مانا زان ئے چے اِنت؟ اِشی ئے مانا اِش اِنت کہ تَو گۆں اُردُو زُبان ءُ اَرَبی سْیاہَگ ءِ زیرَگ ءَ ھما کار ءَ کَنَگ ءَ ئے کہ پاکِستاں لۆٹیت۔
<سترُنگ><اِم>ناگُماں