بْیا اُو مُرید، بْیا اُو مُرید، بْیا اُو مُرید دێوانَگێں
بْیا بْیا کہ دیوانے کَنُن، مَولانَگ ءُ مَستانَگێں
سۆتکَگ تَرا اِشک ءِ زَراب، مارا گَماں کُرتَگ کَباب
تَو ھانُل ءِ دَرداں زَر ءِ، ما پہ وَتَن جانانَگ ایں
چاکَر تَئی دۆست ءَ پُلِّت، چَمّ ءَ دِگِہ ڈُنگاں وَتَن
تَو سَر پہ شَیدائی شُت ئے، ما پیہَناں زِندانَگ ایں
تَو ھانُل ءَ اِشت ءُ شُت ئے، ماڈی ءَ میرێں چاکَر ءِ
ما ھانُل ءِ مُلک ءَ نَدَُن، جَورێں بَداں دِلمانَگێں
اِشت ئے وَتَن پہ مَکَّہا، لُوچێں مَلَنگاں گۆں شُت ئے
مئے مَکَّہ ءُ ماس اِنت وَتَن، نَیلُن وَتَن شاہانَگێں
پَردێس تَو ماں مَکَّہا، شَیراں زَہیرنالێں جَت ئے
ما کَپتَگ زِندان ءِ تَہا، شَیراں جَنُن رِندانَگێں
ھِجر ئے چَہ دَرد ءُ دُوریاں، بَند بَند وَتی داگ داتَگ ءِ
مئے بَند ءُ بَنداں سۆہتگ اَنت، جَورێں بَداں مَستانَگێں
تَو زُرتَگ کَچکۆل ءُ ھَسا، کُوڈێں جَہاں داتَگ یَلَہ
دَر کَپتَگُن سَربازیا، ما پہ پِڈ ءَ مَردانَگێں
پَرک ھِچّ نَہ اِنت مَئێگ ءُ تَئی، دَرد ءَ ءُ زِرد ءِ آچِش ءَ
تَو ھانُل ءِ اِشک ءَ گَنۆک، ما پہ وَتَن دێوانَگ ایں
ماں شَیر ءُ اِشک ءِ دَپتَراں، دانکہ جَہاں ھَست اِنت تَو ئے
ما ھَم جَہان ءَ یات بُن، ماں مَجلِساں پَروانَگێں
پُلّێں مُرید، پُلّێں مُرید، بْیا گۆں پَکیری باتِن ءَ
گۆش دار شَیراں شَکَّلێں، گْوَشتَگ نَسیر دیرزانَگێں
<سترُنگ><اِم>گُل ھاں نَسیر