“چیزّے رۆچ اِنت پَیزبُکّا گِندَگ نَبیتَگ ءِ؟”
“ھَو۔ دَزگُہارے ءِ سیر بیتَگ۔ گَٹّ بیتَگاں۔”
“سَرگوَپ بیتَگ ءِ زاناں؟”
“ھاہاہا۔ اِنّاں، مَن کار کُتَگ گۆں۔”
“چِہ کار؟”
“اَنچێں کار۔ سیر وَ ھُشکێں کار ءُ چُلۆپَگے۔”
“سیر ءِ وَشتِرێں کار وَ ناچ اِنت۔ تَو کُتَگ گۆں؟”
“ھاہاہا۔ اِنّاں، مَن ناچ نَزاناں۔”
“چۆ چۆن بیت؟ مَرچاں وَ جِنِکّ زَبر اَنت۔”
“ھَو بلے مَن نَزاناں۔”
“چی ءَ ؟”
“شَوک نێست۔”
“چے ءِ شَوک ھَست گُڈا؟”
“ھِچّ ئے۔”
“تَو ھما بادشاہ ءِ جِنِکّ ءِ کِسَّہ اِشکُتَگ کہ ھِچّ ئے شَوک ئِے نێست اَت؟”
جِنِکّ ھِچّ نَگُشیت۔
“ھاں۔ تَو ھِچّ نَگُش ئے؟”
اَنگَت جَواب نێست۔
“دَزگَٹّ ئے؟ شَرّ، گُڈا یَکّ بَرے وَشّ اِنت۔”
“بۆشت۔ اَنّی کہ مَن گۆں تَو گَپّ ءُ رَپّ ءَ اَتاں شاتُلے اَتک ءُ مَنی لَپٹاپ ئے سَر ءَ نِشت۔”
“تَو زاناں دْرۆگ مَبَند ئے تَرا وَشّ نَبیت؟”
“تَرا باوَر نَکَنت؟”
“اِنّاں۔ اِے نی باوَری گَپّے؟ لَپٹاپے نَہ اِنت، کێچ ءِ چِنال اِنت اَچہ!”
“مَن زانت تَو بَوَر نَوَر ئے پَمِشکا مُباِل ءِ سَر ءَ شاتُل ءِ اَکس گِپت۔ اَنّی تَئی سَر ءَ دێم ئِے دَیاں؟”
“شَرّ۔ دێم ئِے دَئے بارێں۔ چَہ نِٹ ءَ زُرتَگێںے نَہ اِنت نہ؟”
“اِنّاں۔ اِش اِنت بِچار ئِے۔ اِشی ئے تَہا مَنی تَئی اَنّیگێں گَپّ ءُ رَپّ ءِ بُکس ھَم زاہِر اِنت۔”
“ھَو، اِے لَیبُوکّے نَہ اِنت نہ؟”
“پُکَّو! چُشێں بے باوَر…”
“اگں اِے ھَکّ ءُ دِلێں شاتُلے گُڈا اِشیا کَمال اِنت۔”
“شاتُل ءَ کَمال اِنت یا مَن ءَ ؟”
“تَرا چی ءَ ؟”
“اِے نایابێں اَکس ءِ گِرَگ کَمالے نَہ اِنت؟”
“شَرّ، گُڈا تَرا ھَم کَمال اِنت۔”
“مَنی باریگ ءَ ناکامێں دِلے گُشیت: گُڈا تَرا ھَم…”
“ھاہاہا۔ تَو بُگُش، شاتُل چۆن اَتک ءُ نِشت؟”
“وَت اَتک۔”
“وَت چۆن کئێت؟ تَو لَپٹاپ ئے سَر ءَ داں رێتکَگ زاناں؟”
“ھاہاہا۔ اِنّاں۔”
“گُڈا چۆن اَتک؟”
“نَزاناں۔ ھَر رۆچ کئێت۔ اَنچۆ کہ مَن لَپٹاپا دێم ءَ کَناں، کئێت ءُ نِندیت۔”
“نَرێںے بَلکێں؟”
“سْتُوپید!”
“گُڈا پَیزبُکّ ئے چارَگ ءَ کئێت؟”
“ھاہاہا۔ بَلکێں۔”
“مُنیر مۆمِن ءَ گُشتَگ کَپۆت دێوانَگێں مُرگے بلے تَئی شاتُل پَداتِر نَہ اِنت۔”
“بَلکێں آئی ءِ کَمپیُوتَر ءِ سَر ءَ کَپۆتے نِشتَگ۔”
“ھاہاہا۔ ھَو، چۆ بیت۔ اِے شاتُل سَکّ رامَگ اِنت گۆں تَو۔ تَو داشتَگ بَلکێں؟”
“ھَو۔ مَن کَمُّک داشتَگ۔”
“کَمُّک؟ چۆن بِزاں؟”
“اِے پَیم کہ ڈَبّ ئِے مَنی کۆٹی ءَ دْرَتکَگ بلے آپ ءُ تام ئِے مَنی کَستِرێں بْرات کَنت۔”
“ھاں۔ گُڈا داشتَگێںے۔ رامَگ اِنت۔ اِشیا دێوانَگی نَگُش اَنت، مِہر گُش اَنت۔”
“مِہر ھَم دێوانَگیے۔”
“ھمّم۔ گُڈا اێوک ءَ شاتُل نَہ اِنت۔ دِگِہ بازێںے ھَم ھَمے نام ءِ ھَکدار اِنت۔”
“دِگِہ کئے؟”
“وَت بِزاں۔”
“مَن چے زاناں۔ دُنیا دێوانَگ ءَ پُرّ اِنت۔”
“مَن دُنیا ءِ نہ، تَئی دێوانَگانی گَپّ ءَ آں۔”
“پہ مَن کَسّ دێوانَگ نَہ اِنت۔”
“اگں کَسے بِبیت گُڈا؟”
“ھمّم۔ گُڈا ڈَبّا ئِے کَناں، لۆگ ءِ دێما ئِے دْرَنجاں!”
“ھاہاہا۔ وَتی لَپٹاپ ئے سَر ءَ نِندَگا ئِے کِلّ ءِ؟”
“سْتُوپید!”
<سترُنگ><اِم>ناگُماں