<سترُنگ>کارِست:
<سترُنگ>ناگُماں: (بۆلاں مێڈیکَل کالِج شالا وانَگ ءَ اِنت)
<سترُنگ>مَگُّل، گُلاتُون، ھاتُون: (ناگُمان ءِ تْری اَنت کہ نِشتَگێں جِنِکِّش نێست)
<سترُنگ>جَمیلَہ: (ناگُمان ءِ گُہار ءُ مَگُّل ءِ نِشار)
<سترُنگ>شَہربانُو: (ناگُمان ءِ مات)
<سترُنگ>گُلجاں: (مَگُّل ءِ جِنِکّ ءُ ناگُمان ءِ بْرات سالِہ ئے زال)
…………۔۔
(بے گاہ ءِ وَہد اِنت۔ کُلّ ءِ تَہا دیوان اِنت۔)
مَگُّل: دَمان ءَ رَو ئے؟ دَنینگَہ تَرا دَہ رۆچ نَبیت۔
ناگُماں: اَئید ءِ چُٹّی ھَمینچُک اَت اَنت۔ نی رَوَگ لۆٹیت۔
شَہربانُو: پَدا کَدی کا ئے، مَنی پِت؟
ناگُماں: زِمِستان ءَ ۔
مَگُّل: (بْرانز گیپت) اِنّاں، ءُ ناگُماں، تَئی دِل نی چے گُشیت؟
ناگُماں: چی ءَ زاناں تْرُو ءَ ؟
مَگُّل: اِے زِمِستان ءَ رَوَگا ئے ءُ دێم ءِ زِمِستان ءَ کا ئے۔ تَو نی ھَنچۆ بے ھاجَت ئے؟
ناگُماں: وانَگ اِنت۔ آیَگ نَبیت
مَگُّل: چِتَو آیَگ نَبیت۔ لَتیپ گۆش کْوَیٹَہا پێسَری ماہ ءَ شُتَگَت۔ بیست رۆچ نَگوَست، دْرِکّ اَت ءُ اَتک۔
ناگُماں: تْرُو ءَ ، آ دِگِہ جاہے وانَگ ءَ اَنت۔ آیاں داوا کُت۔ کالِجِش بَند بُوت۔
مَگُّل: اِینچُک نامَہ ءُ نیمۆن نَلۆٹیت۔ بُرَو بلے دو ماہ ءَ رَند مئے چارَگ ءَ مَیا ئے، تَئی شَلوار ءَ نَکَشّاں بِزاں بَئے اِنت!
ھاتُون: یا…۔ مَگُّل! ناگُماں جان ءَ چُش گُش ئے؟
مَگُّل: ھَو…۔ گُشان ئِے۔ چی ءَ گُشیت کہ دێم ءِ زِمیستانا کایاں۔
ناگُماں: بلے مُپتا چی ءَ وانَگ ءَ یَلَہ بِدَیاں، بْیایاں؟
مَگُّل: یا… نی شَرّ اِنت۔ تَئی لۆگ ءِ مَردُم ھَمِد ءَ اَنت۔ سْیاد ءُ سَنگَت ھَمِد ءَ اَنت۔ اَنگَت نَیا ئے؟ اود ءَ تَئی مَزَنپَنگ نِشتَگ؟
جَمیلَہ: تْرُو ءَ ! ناگُماں کئێت بلے پہ وَہد ءُ مۆسُم۔ وانَگ ءَ کَپّی چُنڈی بِکَنت گُڈا شَرّ اِنت؟
مَگُّل: کارانی ھَراب کَنۆک ھَمے جَمیلَہ اِنت۔ بِہ آیَگ ءَ نَیلیت ناگُمان ءَ ۔
شَہربانُو: شَرّ اِنت مَنی چُکّ، تَئی وانَگ چینچُک سالَئێگ اِنت؟
ناگُماں: شَش سال ءِ۔
مَگُّل: پَو! شَش سال ءِ؟ اَچہ تَئی بْرات ءَ سالے کَپّے ءَ تَوام کُت ءُ داکتَر لَگِّت۔ تَرا کْوَیٹَہ دِگِہ دِلے وَشّ بیت۔
گُلجاں: اَمّاں! سالِہ کَستِرێں داکتَرے۔ ناگُماں مَزَنێں داکتَری وانَگ ءَ اِنت۔
مَگُّل: سَر پِر بیت نہ گَڈیلَّگ! سالِہ مَستِرێں بْرات اِنت ءُ کَسترێں داکتَرے۔ ناگُماں کہ دَنینگَہ وَتی نێک ءُ بَد ءَ نَزانت، مَستِرێں داکتَرے؟
ھاتُون: یا…۔ مَگُّل! ناگُماں جان ءَ چُش گُش ئے؟!
مَگُّل: ھَو… گُشتَگ ءُ گُشان ئِے! اگں وَتی نێک ءُ بَد ئِے بِزانتێں، مارا دێری بَٹّ ئِے وارێنتَگَت۔
جَمیلَہ: دَنینگَہ وَ اِے سیری نَہ اِنت۔
مَگُّل: تَو مَزَنێں شاہۆکارے ئے! اِے سَکّ کَسان اِنت۔ اِشی ئے ھَمسَرُواں چار چار چُکّ ھَست۔ (دێم ءَ گۆں شَہربانُو ءَ کَنت) جِنِکّ شَہرُک! تَو وَتی لاڈێں بَچّ ءَ چی ءَ سیر نَکن ئے۔ دێر اِنت، نہ
چاپے جَتَگ نہ نازێنکے۔
شَہربانُو: مَستِر وَت اِنت۔ وَتی نێک ءُ بَد ءَ شَرّتِر زانت۔
مَگُّل: تَو شَرّێں ماتے ئے! سالِہ وَتی مَستِر وَت اِنت، تُوری چار چار جَن بِگیپت۔ ناگُماں مَستِر وَت اِنت، تُوری ھِچّ مَگیپت۔ شاباش اِنت تَئی ماتی ءَ ۔ ھَرکَس گُشیت مَن چُکّانی مُراداں بِگِندان ءُ تَو…
گُلاتُون: (لۆگ ءَ پُتِرانا) مَرچی مَگُّل ءَ جاک کُتَگ۔ ھَیر اِنت؟ سَلامال ئے
دْرُست: اَلِک ءُ سَلام جی!
ھاتُون: دَپ ئِے کِچَگ دَنت۔ نی ناگُمان ءَ زَبرَّگ ءُ کَکَرَّگ ءَ اِنت۔
گُلاتُون: یا… ناگُمان ءَ ؟ ناگُماں وَ نامہُدائی چُکّے۔ مَگُّل، تَو مَیاریگ ئے۔
مَگُّل: مَن نَگِپت دُزّ، دُزّ ءَ مَن ءَ گِپت۔ بَٹّ مارا ناگُماں نَوارێنیت ءُ مَیاریگ آں مَن؟
گُلاتُون: پہ بَٹّ ءَ تَئی دِل بَند اِنت؟ بْیا مَن تَرا وارێناں۔ کُورک وَر ئے، ماشبَٹّ؟
مَگُّل: ناز پہ کُرۆس ءَ ءُ کُرۆس بانگ نَدَنت۔ ناگُمان ءَ گُش ئے بانگے بِدئے ءُ اِے لَووا وَڈ وَڈێں نامَہ ءُ نیمۆن کَنت۔ دێر اِنت نہ چاپے جَتَگ نہ نازێنکے۔ مارا دِگِہ گْوات ءُ نیمۆنے مَگیپت شَرّ اِنت۔
گُلاتُون: شُمئے دِل پہ چاپ ءُ نازێنک ءَ بَند اِنت، گُڈا لْیاکَت ئے سیر بیت، شَرّ بِجَنِت۔ ناگُمان ءَ بِلِّت کہ وانیت بَلکێں رۆچے آسیدَگێں نَگَنے رَسیت ئِے۔
مَگُّل: بَسّ اِنت نی۔ اِینچُک وانَگ! چینچُک سال اِنت وانَگ ءَ اِنت!
ناگُماں: چاردَہ سال۔
مَگُّل: چاردَہ بَسّ نَہ اِنت گُڈا؟ اێدِگِ دْرُستێں بَچَکّاں دَہ ءُ دَہ وَنتَگ، کارے چیزّے شۆہاز کُتَگ، جَن ءُ جۆپاگ اَنت، نِشتَگ اَنت۔ تَو ئے کہ لُنڈ ءَ لُنڈ ءِ، چَکَرّ ئے۔
ھاتُون: یا… مَگُّل! ناگُماں جان ءَ چُش گُش ئے؟
مَگُّل: ھَو، گُشان ئِے۔ چی ءَ گُشیت سیر نَکَناں۔
ناگُماں: مَن وَ چۆ نَگُشت۔ مَن گُشت کَمّے رَنتِرا۔
مَگُّل: رَنتِرا؟ ھما وَہدی کہ تَئی مات مِریت؟ تَئی بَہِشتیگێں پِت ءَ تَرا چینچُک رَند ءَ گُشت بلے تَو یَڈَّکّے ئے، وَتی بْرات ءِ وَڈێں۔
شَہربانُو: (گۆں گُلجان ءَ ) مَنی مات! لَچ ءِ بُوچُّکاں پَسانی دێم ءَ دَئے۔ ھما آپانی لۆہیگ ءَ کِنزێں گۆں۔ بِچار ھما تَہت ءِ سَر ءَ کُکُّڈے نِشتَگ، گَلّێن ئِے گۆں۔
مَگُّل: اِد ءَ بِچار!… چینچُک کار اَنت۔ ناگُماں! شِہم ءُ رَہدارێں چُکّ ءِ وَڈ ءَ بُرَو جاہے وَت ءَ اَڈێں۔ شَہرُک ءُ گُلجان ءِ کۆپَگ ھَم سُبَکتِر بیت۔
جَمیلَہ: ناگُمان ءِ جَن مَن ءَ پہ چُشێں کاراں دِل نَبیت۔
مَگُّل: چۆن بِکَنت، پِلێنڈ!…۔ آ بِلّ ئِے بانُک بیت ءُ نِندیت ءُ مَنی جِنِکّ کار ءَ چێر بِبیت؟ ناگُماں بِکَنت سیر…۔ اگں دُمی رۆچ ءَ مَن بانۆر ءِ پَنگ ءَ نَگِپت ءُ کار نَبَست بِزاں مَن مَگُّل نَہ آں!
گُلاتُون: (گۆں ناگُمان ءَ ) مَنی چُکّ! مَنی گَپّ ءَ گِر ئے، مئے اَمبریشّێں رِچی پِچیے مَگِر۔ جَن ھَست ءُ جَنُک ھَست۔ تَو اَنچێںے بِگِر، اگں چَہ تَو چَما دێم نَبیت، چَہ تَو پَداتِر ھَم مَبیت!
مَگُّل: اِے سیری شێرے! چینچُک سال اِنت، ما ئِے ٹۆہێنَگ ءَ ایں کہ نی سیر کَن بلے سُدّے پِر ئِے نێست۔ بَرے نامَہے کَنت۔ مَن وَ گُشاں بَچَکّ “بَرۆبَر” نَہ اِنت!
ناگُماں، جَمیلَہ، گُلجاں: (ٹَہک دَ اَنت)
ھاتُون، گُلاتُون، شَہربانُو: (یَپّاریگے) یا…۔ مَگُّل! تَئی بَہت نی شَرّ کَپتَگ۔ ناگُماں جان ءَ چُش گُش ئے؟
مَگُّل: (ھَلوَت کَنت) شُما بِلِّت… مَن چُش گُشاں، بِلّ ئِے دِل کَنت ءُ سیر کَنت۔
ناگُماں: مَنی دِل کَنَگ ءُ نَکَنَگ دَرد نَوارت۔ مَن وَتی سیر ءِ مَستِر مَردُمے کُتَگ۔ آ ھَرچی گُشیت، مَن ھما وَڈ کَناں۔
مَگُّل: کئے اِنت؟
ناگُماں: جَمیلَہ۔
مَگُّل: جَمیلَہ ءِ راہ ءَ آرَگ چُشێں گَپّے نَہ اِنت… شاباش…۔ جَمیلَہ بُرَو جِنِکّے دَر گێج۔
جَمیلَہ: یا، اِے نی وَڈے، تْرُو ءَ ! ناگُماں زاناں مئے سَر ءَ بار اِنت کہ اِشتاپ اِشتاپ ءَ جاہے مێن ئِے بِکَنێں؟ بِلّ ئِے وَتی وانَگ ءَ…
مَگُّل: مَمِرِت مێشاں… اِے گُشیت اَنگَت شَش سال ھَست!
ناگُماں: شَش سال ءِ وانَگ اِنت۔ دو شُتَگ، چار ھَست۔
مَگُّل: شَرّ اِنت گُڈا چار سال کَمُّک اِنت؟
ناگُماں: بلے مَن ءَ وَشّ بیت وانَگ…
جَمیلَہ: تْرُو ءَ ! وانَگ ئِے وَشّ بیت کہ اِشانی کالِج ءَ بَچَکّ ءُ جِنِکّ ھۆر وانَگ ءَ اَنت۔
گُلجاں: مَنی گَپّ ءَ گِر ئے ناگُماں، ھَمانگُر یَکّے دَر گێج!
شَہربانُو: اِنّاں مَنی چُکّ، آنگُر اِنّاں… بارێں چۆنێںے بیت۔
مَگُّل: ما دَرکَوم نَزیرێں تُوری یَمُّٹّێں ڈِسکُوے بِبیت۔
ھاتُون: ما دَردین نَزیرێں تُوری بادشاہی جِنِکّے بِبیت۔
گُلاتُون: ما دَرزات نَزیرێں تُوری ھُورے بِبیت۔
ناگُماں: (یَکّ بَرے مُورکاں مُجێنیت، پَدا کَندیت) اَچہ گُڈا بْوَرِت بَٹّ ءَ !
<سترُنگ><اِم>ناگُماں