جُست: کامرَیڈ تَئی ھَیال ءَ سْیاسَت چیے؟
کامرَیڈ: اِبادَت ءِ کِسمے۔ باز اِبادَت رُوہ ءَ پاک کَنت۔ باز زِہنا ءُ سْیاسَت چاگِرد ءَ ۔ مَن سْیاسَت ءَ اِبادَتے سَرپَد باں۔ سْیاسَت ءَ داِمی اَمَلے سَرپَد باں۔
جُست: کامرَیڈ تَئی دِل ءَ سْیاسَت ءَ کُجام چیزّ گێشتِر نُکس ءُ تاواں دات کَنت؟
کامرَیڈ: ھامۆشی، بے ھِسی، لاتالُکی۔ تَئی دێمَ زُلمے بُوَگ ءَ اِنت، تَو ھامۆش بَئے۔ تَئی دێمَ ناجاِز بُوَگ ءَ اِنت، تَو لاتالُک بَئے۔ تَئی دێم ءَ مَردُمے جَنَگ بُوَگ ءَ اِنت۔ مَہلُوک کُشَگ بُوَگ ءَ اِنت، تَو بے ھِس بَئے۔ سَرپَد بَئے کہ مِرۆک، جَنَگ بُوۆک یا زُلم ءِ آماچ، تَو نا ئِے، تَئی ھانداں نَہ اِنت، تَرا چِہ کار۔ بلے کَمّ بِجێڈ تَئی بازار ءِ مَردُمے، تَئی مُلک ءَ نِشتَگ۔ اَڈ ءِ! بَلۆچے، اِنسانے۔ کُجام کُجام سْیادیاں چَمّاں بَند کن ئے؟ تَرا جاگَہے نہ جاگَہے کۆنڈیے گیپت۔ سْیاسَت تَرا سَرپَد کَنت کہ آوَز چِست کَنَگی اِنت۔ زُلم ءِ دێم ءَ اوشتَگی اِنت۔ آشۆب کہ داِمی اَرزِشتے، پہ آئی ءَ راہ ءُ دَر داِم پَچ کَنَگی اِنت۔ بلے اِے ھَم زانَگی اِنت کہ بازار ءُ مێتَگ ءَ آشۆب آرَگ ءَ ءُ ساری، تَرا وَتی اَندَر ءَ آشۆب وَشَّتک کَنَگی اِنت۔ بَدَلی سَدَلیا مُدام چَہ وَتی زات ءَ بِندات بِکَن۔ گُڈا تَو دُمیا گُشت کن ئے۔ اِے کار ءَ مَکَن، اِے رَد اِنت۔ زُلم مَکَن۔ راجی اِستِہسال مَکَن۔ سْیاسَت تَرا پَہم ءَ دَنت۔ مَن گْوَشاں گُلامێن ءُ پَشت کَپتَگێں راج ءِ ھَرچ پَردا سَرپَد بُوَگ لۆٹیت کہ بێدِ سْیاسَت، بێدِ چِست ءُ اێر ءُ بێدِ زُلم ءِ دێم ءَ اوشتَگ ءَ دِگِہ ھِچّ راہ پَش نَکَپتَگ۔ اگں زالِم تَوانگِر ءُ مَگرُور اِنت، گَپّ جن ئے کہ جَنَگ بَئے، نَجَن ءِ ھَم جَنَگ بَئے۔ گُڈا گَپّ ءَ بِجَن ءُ جَنَگ بُو۔ دِل ءَ کُہت مَبیت کہ مَن ھِچّ نَکُت۔
<سترُنگ><اِم>ھَنیپ شَریپ
پِلِم: <سترُنگ>کَریم (2014)