زِمِستانی آپبَندێں شَپے اَت۔ تێوَگێں مێتَگ اِنسِرتَگَت بلے چیزّے میلّ پَسِّند مُلکانی سَر ءَ بَستَگێں آ بان ءَ اَنگَت بْرَمش ءُ چِڈِکّا ھَست اَت۔ بَرے بَرے چۆ بُرزێں ٹَہکے یا چَہ گَل ءَ دَر اَتکَگێں کْریشتَگے ھَم رُست کہ اگں ماں اِے بے وانکێں آتراپ ءَ مێتَگ ءِ مَردُمے ءَ بِشکُتێں، یَکّ بَرے وَ گۆش ئِے مِکّ بیتَگَت اَنت بلے پَدا بِچکَندانا گۆں وَت گُشتَگَت ئِے، “اِے ھَمے شَیتاں بَنت!”
اَمین، جامُل، اَژرَپ، واہِد، سَلیم، پیرَل ءُ مَہمُود مێتَگ ءِ مَوالی اَت اَنت۔ اِنشَپی ھَپتێں سَنگَتاں پَدا ماں اِے بان ءَ شَرابی مَجلِسے ٹَہێنتَگَت۔ ٹَیپا بَرکَت ءِ سَوتے پِر اَت۔ پَجّیگ ءَ گَپّ ءُ رَپّ اَت، کَندَگ ءُ کْریشتَگ اَت۔ ھَپتَگے یَکّ رَندے آیاں اِے وَڈێں دِلوَشّێں مَجلِس جَمێنت ءُ جاگَہِش جامُلێنتانی ڈِگار ءِ سَر ءَ بَستگێں ھَمے بان اَت۔
جامُلا مُدام گُشت کہ اِے وَڈێں مَجلِس بازار ءُ لۆگی چیزّ نَہ اَنت۔ گَرماگی شَپاں مَردُم وَشکَوشێں گِتاناں بِنِندیت ءُ بُنۆشیت ءُ زِمِستان ءَ ڈِگارانی سَر ءَ بَستَگێں باپێں بانانی تَہا۔
دیواں گَرم گِپتَگَت۔ آ چینگُر نۆشَگ ءَ اَت اَنت ءُ چانگُر کَنوَر ءَ اَت اَنت۔ اَمین ءَ گُشت، “یار! زی مَن ءَ ناکُو پَشَمبِہا گْرانێں جُستے کُت۔”
دْرُست دِلگۆش بیت اَنت۔
“ناکُو ءَ جُست کُت مُشۆک شَرتِر اِنت، شَراب؟”
“گُڈا تَو چے گُشت؟” مَہمُود نَزّیکتِرا کِنزِت۔ آئی ءَ شَراب ءُ مُشۆک دوێں کُت بلے اِے بارَوا ھِجبَر ھَیال نَکُتَگَت کہ کُجام شَرتِر اِنت۔
“مَن گُشت مُشۆک پَٹانی نِشَہے، شَراب اِنگرێزی نِشَہے۔”
“ھاہاہا… گُڈا ناکُو ءَ چے گُشت؟” اَژرَپ ءَ چَہ لۆہیگ ءِ بُن ءَ ٹَہک دات۔
“ناکُو ءَ کَندِت ءُ ھِچّ نَگُشت۔ پَدا مَن جُست کُت کہ ناکُو تَو مُشۆک پَرچا کن ئے؟ ناکُو ءَ ھَمے جُست مَنی نێمَگ ءَ شاپت کہ تَو شَراب پَرچا وَر ئے؟ ھاہاہا… مَن گُشت ناکُو مَن شَراب نَوَراں۔ بَرے بَرے بیَری ڈَبُّکے وَراں، پێشاپ ءِ واست ءَ شَرّ اِنت۔ ناکُو ءَ گُشت، گیتّے نَہ اِنت کَکّایے!”
دْرُستاں کَندِت۔ اَمین ءَ پَدا گُشت، “اِے جُست مَنی دِل ءَ بِہ نَیَتکَگ۔ شُمَئێگ ءَ اَتکَگ؟”
“کُجام جُست؟” پیرَل بارێں چِہ ھَیالان اَت۔
“ھَمے کہ مُشۆک شَرتِر اِنت یا شَراب؟”
“اَڈ ءِ ڈُوبّا! اِے نی جُستے، مُشۆک ءَ کار ءِ شَراب ءِ مَٹّ کن ئے؟” جامُلا بَلگاہ کُت۔
“اِے نُرّ ھَمِش اِنت۔ گُلاتُون چۆ آپی مارا اِنت۔ اَنگا کَپتَگ سْیاہُونڈَگێں گُلُو ئے رَند ءَ ۔” مَہمُود ءَ چا نێمَگ ءَ کُوکّار کُت۔
کَندَگ ءُ کُوکّار رُست اَنت۔
اَمین ءَ دَپ پَلَّگۆشت۔ “گَپّ مُشۆک ءُ شَرابَئێگ اِنت۔ شُما زۆر گُلُو ءُ گُلاتُون ءِ نێمَگ ءَ بُرت۔”
“گَپّ یَکّێن اِنت۔ گُلُو مُشۆک اِنت، گُلاتُون شَراب اِنت…” اَژرَپ ءَ اَمین ماں تَرّێنت۔ اَمین سَر ءِ کِچێنَگ ءَ لَگِّت۔
سَلیم ءَ اَمین ءِ سَر ءَ چانپَٹے جَت ءُ گُشت، “پَمے گَپّ ءَ ناچے بِبیت۔”
دْرُست پاد اَتک اَنت ءُ شُرُو بیت اَنت ناچ ءَ ۔ اَمین گۆنزَلیچَنڈا آت۔
ھَمے وَہد ءَ یَکّے ءَ دَروازَگ ٹُکِّت۔ آیاں گُشاد گُشاد ءَ ٹَیپ بَند کُت۔ بۆتَل ءُ بُلۆر چێر دات اَنت۔ وَت ءَ را گێگ ءُ گْوَر کُت۔ پَدا اَمین شُت ءُ دَروازَگ ئِے پَچ کُت۔ گۆں دَروازگ ئے پَچ کَنَگ ءَ آئی ءَ چَہ ھَیرانیا سِٹّ کُت۔ جِنِکّے گْوَہر ءِ سَر ءَ اوشتاتَگ ءُ دْرَہێنَگ ءَ اَت۔
“اَڈ ءِ! اِے وَ مُلُوک اِنت!” اَمین ءِ دَپ ءَ دَر اَتک۔ اِے مێتَگ ءِ گُنگ ءُ گَنۆکُوێں جِنِکّے مُلُوک اَت۔ اَمین ءُ مَہمُود ءَ یَکّ ءُ دُمیگ ءِ نێمَگ ءَ چارِت ءُ چَمُّوی چَمّ شَورے کُت۔
“بْیا تَہا،” اَمین ءَ گُشت ءُ مُلُوک تَہا پُتِرت۔
“شُومّ! تَو اِے شَپ ءِ نِہِنگاما اِینگُر چے لۆٹ ئے؟” اَمین ءَ دَروازَگ تَہا بَست ءُ مُلُوک ءِ دَست ءَ گِپت ءُ وَتی نێمَگ ءَ ژَپِّت۔ مُلُوک ءَ گۆں ھَزِتَگێں چَمّاں آ چارِت ءُ زۆر جَت پہ رَوَگ ءَ۔ پَردَگے چَہ آئی ءِ دَست ءَ بِلَگُشیت کہ سَلیم ءَ ھَم رُپت۔ مُلُوک ءَ کُوکّار کُت۔
“سُر ئے مِر ئے!” مَہمُود ءَ چَہ لانک ءَ تْرِپِناکێں کارچے کَشِّت ءُ مُلُوک ءِ گُٹّ ءَ پِر مُشت۔ آ بے چارَگ نِگُّٹّ بُوت۔
“ھَراب نَہ اِنت!” پیرَل ءَ مُلُوک ءِ نێمَگ ءَ ھیرت ھیرتا چارِت۔
“ءُ پہ وَہد اَتکَگ،” اَمین ءَ بِچکَندِت ءُ دَست ئِے پہ مُلُوک ءِ آنجَگ ءَ بُرت۔
“بِلّ ئِے شُومّ! اِشی ئے سَر ءَ ھَم نَکپ ئے!” اَژرَپ ءَ کَندِت ءُ اَمین ءَ را پَنچے دات۔
“گُڈا دِگِہ چِہ کار ءَ کئێت، اِے؟” سَلیم ءَ اَمین ءِ بُن داشت۔
“ناچ ئِے پَرمائیں۔ مَن بِہ مُجرا نَچارِتَگ۔ چے گُش ئے اُستاد؟” جامُلا پیرَل ءِ نێمَگ ءَ چارِت بلے پیرَل دُدِلَگ اَت۔
“تَو ھَم گْواہ کن ئے جامُل! مُلُوک ءُ مُجرا؟ بِلّ ئِے اَنگَت ما وَتی کۆلُک ءَ پَچێں۔” اَمین ءَ وَت ءَ جَہل ءَ کِچێنت۔
مَزَنێں کُوکّار ءُ جَگّاے ءَ رَند ھَمے پَیسَلَہ بُوت کہ اَوَلسَرا ناچ بِبیت، رَندی رَندیگے۔ ٹَیپ پَدا چالُو بُوت۔ کَدَّہ پَدا کَیل بیت اَنت۔ کارچ ءِ تُرسا مُلُوک ھَم سُرَگ ءَ لَگِّت۔ بَچَکّاں بُلۆر دَست ءَ کُت اَنت ءُ اێر کَپت اَنت ناچ ءَ ۔ ناچ ءِ تَہا آیاں بَرے مُلُوک دَست جَت ءُ بَرے گُلاێش کُت۔ آ اَنچۆ گَل اَت اَنت گُش ئے گَژدالێں مُلُوک نَہ اِنت، کَترینا کَیپِش دَست ءَ کَپتَگ۔
داں شَرّێں ساہَتے ءَ نَچَّگ ءُ تْرَدَّگ ءَ رَند بَچکّاں دَم بُرت ءُ نِشت اَنت۔ بے چارَگێں مُلُوک اَنگَت ناچ ءَ اَت۔
چَنڈێن ئِے، چَنڈێن ئِے!
یَلَہ دَئے سرێن ءَ ، زالِم!
دْرَہێن ئِے شَنک آں!
بَچکّانی کُوکّاراں باں جَکسَگ ءَ اَت۔ مُلُوک ءِ چَمّ رُمبُڈَگ ءَ اَت اَنت۔ ناچ ناچ ءَ اَناگَہا آ دێم پہ دَروازَگ ءَ شُت ءُ چِد ءُ پێش کہ بَچَکّ پاد بْیا اَنت، آئی ءَ دَروازَگ بۆتک ءُ تیرَئێگ ءَ دَر شُت۔ سَلیم ءُ اَمین تَتَّرانا دُمبا ئِے کَپت اَنت بلے آ چۆ آسک ءَ تْرَدّانا چَمّاں اَندێم بُوت۔
“شُت، ماتکُس!” مَہمُود ءَ چَہ زَہر ءَ زاہے دات۔
“زاہ ئِے نَگُش ئے، بُگُش:
باگ ءِ بُلبُل مَنی شُت
گۆں مَن ءَ زَہر اِنت۔”
پیرَل ءَ گۆں وَژگُٹّی گُشت۔
“دێم ئِے چُش اَت۔ مَنی ھَیال ءَ سۆرِک ءِ نێمَگ ءَ شُت۔” اَمین اَنگَت ھَمانگُر چارَگ ءَ اَت۔
“ھَیر، سۆچ ئِے۔” سَلیم پَدا اَتک ءُ وَتی جاہ ءَ نِشت۔
“اَمین بِنِند نی۔ بَزَّگ ءَ مئے شَپ وَشّ کُت۔” واہِدا اَمین ءِ دَست ءَ گِپت ءُ ژَپِّت۔
“اِنّاں، مَردُم ءَ کُپتے کَشِّتێں گُڈا بَئے اَت۔” اَمین بَژنیگ اَت۔ اێدِگِ کَندَگ ءَ اَت اَنت۔ کَندان ءَ اَژرَپ ءَ پُرّێں بۆتَلے دَست ءَ کُت ءُ داکتَر مالِک ءِ گالِوار ءَ گُشت، “چِہ! پُرّێںے، تَگَ!”
“پَچ ئِے کَن یار! چۆپێن ئِے،” جامُلا گُشت۔
“نہ یار! ھَدّ ءَ مَگوَزِت۔ اِشیا باندا وَرێں۔” پیرَل ءَ دِل ءَ نَہ اَت۔ “شُما ھَمے سۆج نَِشکُتَگ کہ شَراب ءَ بْوَر بلے شَراب ءَ مَیل کہ تَرا بْوارت۔”
“ما اِشکُتَگ یار! بلے تَو ھَمے بَتَل نَِشکُتَگ کہ مَرچیگێں کار ءَ پہ باندات ءَ اێر مَکَن؟” جامُلا بۆتَل زُرت ءُ گِلاساں ٹَلّات۔
آیاں نۆشَگ ھَلّێنتَگَت ءُ شام ءَ کَشَّگ ءَ اَت اَنت کہ پَدا یَکّے ءَ دَروازَگ جَت۔
“پیرَل! تَئی باگ ءِ بُلبُل اِنت،” واہِدا ھَلوَت کُت۔
اَمین پَدا شُت ءُ دَروازَگ ئِے پَچ کُت۔ ڈَنّ ءَ دو شالپۆشێں مَرد اوشتاتَگَت۔ اَمین ءَ آ دْرُست کُت اَنت۔ یَکّے مُلُوک ءِ بْرات اَت ءُ دُمی آیانی ھَمساہِگ۔ گۆں دَروازَگ ءِ پَچ بَیَگ ءَ مُلُوک ءِ بْرات ءَ جُست کُت، “اَڈ ءِ! شُما مُلُوک اِینگُر نَدیستَگ؟”
“بْیاِت تَہا، ڈْنّا گْوَہر اِنت۔” اَمین ءَ آ سَلاہ جَت اَنت۔ مُلُوک ءِ بْرات کہ مُلُوک ءِ وَڈ ءَ اَگل ءَ تَنَکّ اَت پہ پُتِرَگ ءَ دِلمانَگ بُوت بلے ھَمراہ نَسُرِت۔ گُشت ئِے، “ما اِشتاپیگ ایں… نَنِندێں۔ ما مُلُوک ءِ شۆہاز ءَ تَرّان ایں۔ شُما نَدیستَگ؟”
“اِنّاں ما نَدیستَگ۔” اَمین ءَ دْرۆگے شاپت ءُ پَدا جُست کُت، “اِے شَپ ءَ چِتَور دَر اَتکَگ چَہ لۆگ ءَ ؟”
مُلُوک ءِ بْرات ءَ گُشت، “شُومّا وَرَگ ءِ سَر ءَ زَہر کُتَگ۔ گُشیت ماشبَٹّ نَوَراں، مُرپُلَو لۆٹاں۔ شاہ ءَ پْرۆشتَگ بارێں کُج اِنت۔ رَستَرے مَدِرّیت ئِے شَرّ اِنت۔”
مُلُوک ءِ بْرات نُرُنڈانا رَہ گِپت ءُ ھَمراہ ئِے رَند ءَ بُوت۔ اَمین ءَ دَروازَگ بَست ءُ اَتک ءُ نِشت۔ داں کَمُّکے ءَ کَسّ ءَ ھِچّ نَگُشت۔ پَدا اَژرَپ ءَ بے تَواری پْرۆشت۔
“اَمین! ماشبَٹّ وَشتِر اِنت، مُرپُلَو؟”
ءُ دْرُستانی کُوکّار ءُ کْریشتَگاں بے بْرَمشێں شَپ جَکسێنت۔ گۆں کَندَگانی اِشکُنَگ ءَ مُلُوک ءِ بْرات ءَ کہ تَہاری ءَ تْرَبُز وَران اَت، گۆں ھَمراہ ءَ گُشت:
“شُگر اِنت، اِے شَرابیانی دَست ءَ نَکَپتَگ۔”
<سترُنگ><اِم>ناگُماں