بانگواہ ءِ نۆدگۆنَگێں گیتَلُو ءَ ھَر نێمَگ ءَ ماں شانتَگَت۔ مَن چَہ بازار ءَ دیر میتّاپێں ڈَنّ ءُ ڈِگاراں تَرّان ءُ سَیل کَنان اَتاں۔ بَند ءُ شێپ، کَنڈ ءُ بے ٹ، جَہلَگ ءُ بُرزَگانی سَر ءَ بَرے گام ءُ بَرے تَچانا مَن سَکّ گَل اَتاں۔ نَگُش ئے زِمین ءِ سَر ءَ گیتَلُو ءِ تَہا تَرَّگ ءَ اَتاں، گُش ئے آزمان ءِ دێم ءَ کیشّێں کۆکِرانی تَہا بَل اَتاں۔
گیتَلُو ءِ وَہد ءَ بازار ءَ ڈَنّ ءُ چَہ مَردُماں دیر، بے بْرَمشێں جَنگَل ءُ گْیاباناں تَرَّگ مَن ءَ سَکّ وَشّ بیت ءُ اَنّی ھَم مَن ھَمے واست ءَ بانگواہ ءَ چَہ لۆگ ءَ دَر اَتکَگَتاں۔
ھَپتَگے پێسَر ھَور ءَ گْوَرتَگَت۔ مَن آپ ءَ پُرّێں، نێمانێں یا بُرتَگێں ڈِگاراں سَیل کَنان ءُ رَوان اَتان ءُ سَکّ گَل اَتاں۔ مَن چۆ ھما مُرگ ءَ اَتاں کہ داں گَپَّڈے وَہد ءَ چاڈپرۆشێں ڈَبّا بَند بَیَگ ءَ رَند یَلَہ بِبیت۔
آپ ءُ ڈِگارانی نِدارَگاں مَن ءَ کَسانی ءِ تْرانَگاں پِرّێنت۔ مَن ءَ یات اِنت کہ ھَر وَہد ءَ کہ جَمبَراں ماں شانت، مَن گۆں وَتی ھَمگَنگَلیاں دَست ماں دَست بُوت ءُ گِرد گِرد ءَ چَکَرِّتاں یا وَتی چَپّ ءُ چاگِرد ءَ تُرّ وارت ءُ “ھَورُو! ھَورُو! اێر دَئے، بَلُّک ءِ چُکّاں چێر دَئے”ئے لَیبی سَوت جَت۔ ءُ اگں ھَور ءَ اێر دات ھَم، ما وَتی دْرِکّ ءُ دَور ءُ لَیب نَداشت اَنت۔
ھَور ءَ رَند جُو ءُ شێپانی کِرّا اوشتَگ ءُ جُگّ ءُ کَپێں ھار ءِ چارَگ، وَڈَّگاں ڈِگارُک بَندَگ، گۆں گِل ءَ ٹۆپتراکی کَنَگ، کَنڈاں جاں شۆدَگ ءُ آپی لَیب کَنَگ۔ دْرُہ مَن ءَ گیر اَتک اَنت۔ ءُ اِشانی پَجّیگ ءَ مَن ءَ شَہداد ءِ ھَیال اَتک کہ چَہ دَرکَسانی مَنی شَرتِرێں سَنگَت اَت ءُ ھَمے وَڈێں زێبا ءُ یاتگارێں ساہَتانی ھَمراہ اَت۔
شَہداد ءِ ھَیال ءِ آیَگ ءَ مَن آئی ءِ مات تْرُو ءَ شَلی ءُ پِت ناکُو شَہمیر ءِ تْرانَگ ءَ کَپتاں کہ مَن ءَ را چۆ چُکّ ءَ دۆستِش داشت۔ مَن ءَ سئے سال پُرّێن اَت کہ آ نَدیستَگَت اَنت۔ مَن دِل ءَ گُشت کہ نی کہ مَن چَہ لۆگ ءَ دَر اَتکَگاں، یَپّاریگے رَواں، شَہدادێنتاں چاراں۔ مَن دێم پہ شیمازیا رَہ گِپتاں۔
چونایا مَنی لۆگ شَمدَر ءَ اَت ءُ شَہداد ءِ شیمازیا بلے دوێں مێتَگ نَزّیک اَت اَنت۔ مَن ءُ شَہداد ءَ شیمازی ئے اِسکۆل ءَ داں پَنچ ءَ ھۆر ءَ وَنتَگَت۔ پَنچ ءَ رَند وانَگ ءِ جاگَہ شَہر اَت ءُ ما ھَرد تَنگدَستێں مَردُم اَتێں پَمِشکا مئے وانَگ یَلَہ بُوت۔
مَن کہ مَستِر بیتاں گُڈا دَبیا پُوریاگِری کَنۆکێں سْیادے ءِ بَرکَت ءَ مَن ءَ باگی کارے ءِ ویزایے رَسِت ءُ مَن دێم پہ دَبیا شُتاں۔
سئے سال اود ءَ گْوازێنَگ ءَ رَند مَن ھَمِش اِنت پَیری سَباہ ءَ اَتکَگ ءُ وَتی مێتَگ ءَ رَسِتَگَتاں۔
سَنگَت ءُ پَجّارۆک ءُ نَزّیک ءُ گْوَر ءِ بازارانی مَردُم مَنی وَشَّتک ءُ جۆڈی ءَ ءُ دَبیا شُتَگێں وَتی کَس ءُ مَردُمانی ھال ءِ پُرسَگ ءَ اَتک اَنت بلے اِے دوێں رۆچاں شَہداد یا ناکُو شَہمیر یا تْرُو ءَ شَلی، چَرِشاں یَکّے ھَم مَنی چارَگ ءَ نَیَتک۔ مَن پَرے گَپّ ءَ ھَیران اَتاں چی ءَ کہ شیمازی ئے بازێں مَردُمے مَنی وَشَّتک ءَ اَتکَگَت۔ یَکّ ءُ دو رَند ءَ مَن تْرانَگ کُت کہ شَہدادێنتانی جُست ءَ کَناں بلے مَردُمانی رَووا ءُ آڈاواڈی ئے تَہا مَن پَہک شَمُشتان ءُ اَنّی اِے گیتَلُو ءَ کہ مَن ءَ آیانی ھَیال اَتک، مَن دێم پہ شیمازیا رَہ گِپتاں۔
نی مَن ءَ سَبر بَیَگ ءَ نَہ اَت۔ دِل ءَ لۆٹِت کہ ھَمے دَمان ءَ آیانی کِرّا بِرَساں بلے مَستِر پاد اَت اَنت، دِل نَہ اَت۔
گۆں مَنی گِندَگ ءَ آ چِتَور گَل بَنت، ھَیراں بَنت! شَہداد دْراجێں “اِیکُکُو”اِے جَنت ءُ مَن ءَ گُلاێش کَنت۔ ناکُو شَہمیر ءُ تْرُو ءَ شَلی مَن ءَ گَپَّڈے نێکدُا کَن اَنت۔ پَدا شیرچاہ بیت ءُ پَجّیگ ءَ گَپّ ءُ رَپّ ءُ کَندَگ ءُ مَسکَرا بیت۔ اِے گیتَلُو ءَ شیرچاہ چِتَور وَشّ اِنت!
مَن گام تْرُندتِر کُت اَنت بلے گۆں اِے ھَیال ءِ آیَگ ءَ پَدا کُنٹ بیت اَنت کہ مَن ھُشکێں دَستاں آیانی کِرّا رَوَگ ءَ آں۔ چونایا مَن پَرایاں چَہ دَبیا شَرّێں ٹیکی ءُ سَوگات آُرتَگَت گۆں بلے لۆگ ءَ اێر اَت اَنت ءُ نی واتَرّ کَنَگ ءُ آیانی آرَگ مَن ءَ تَہمبُل نَبُوت۔
اگں اَنّی مَن ءَ آ سَوگات گۆں بیتێن اَنت، پَرایاں شَہداد ءَ دِگِہ “اِیکُکُو”اِے جَتَگَت ءُ تْرُو ءَ ءُ ناکُو ءَ “مَنی چُکّ! وَت ءَ را چی ءَ کْیامَت کُتَگ؟ نَلۆٹیت اِینچُک”، چۆ گُشتَگَت ءُ دِگِہ گَپَّڈے نێکدُا کُتَگَت۔
گیتَلُو آماچێں بلے وَشزێدێں جاہ ءُ دَیاراں چارانا مَن زیتّاں شیمازیا سَر بیتاں۔ شَہدادێنتانی لۆگ بازار ءَ کَمّے پَسِّند رۆدَرَتکی نێمَگ ءَ اَت۔ مَن تَچک ءَ ھَمۆدا شُتاں۔ لۆگ کُبل اَت۔ چُلجاہێں کُڈُّک ءِ گِزدَپیگ ھَم گۆں ساد ءَ مُہر ٹَٹاتَگ ءُ بَستَگَت۔ کَسّ اود ءَ نَہ اَت۔ مَن اِینگُر ءُ آنگُر چارِت۔ گیتَلُو ءَ کَش ءُ گْوَر ءِ لۆگ ھَم اَلکاپ ءَ مَیم نَبیت اَنت ءُ نَنکہ مَردُمے زاہِر اَت کہ جُست بُکُتێں۔ مَن ھَیران اَتاں کہ بارێں شَہدادێنت کُج ءَ شُتَگ اَنت۔ لۆگ کہ کُبل اِنت بَلکێں لَڈِّتَگِش ءُ دِگِہ جاہے شُتَگ اَنت یا پہ اِلاج ءُ سَپَرے ءَ شُتَگ اَنت۔ پَدا مَن ءَ ھَیال اَتک کہ بیت کَنت مُلک ءِ سَر ءِ لۆگ ءَ اَنت۔ بلے اَنّی چُشێں زْیادَہێں مُلکی کار نێست کہ بازارِش یَلَہ داتَگ ءُ اود ءَ شُتَگ اَنت۔ ھامێن ءَ سئے ماہ اِنت کہ اێرَہت بیتَگ ءُ دِگِہ کِشار ءُ دَہلے نێست کہ پانِگی لۆٹی۔ اَلبَت لَد ءِ جَنَگ، ڈِگار ءِ بُرتَگێں جاہانی بَندَگ ءُ دِگِہ ھَمے پَیمێں کار ءُ چُلۆپَگ ھَست بلے اِے ھَم چُشێں کار نہ اَنت کہ مَردُم لَڈّ ءُ لۆگ مُلک ءِ سَر ءَ بُرَوت۔
دَنینگَہ مَن ھَمے ھَیالان اَتاں کہ سئے چار گْوَنڈُو چَہ دێم ءِ لۆگانی نێمَگ ءَ دَر ءَ بُوت۔ تْرَدّان ءُ لَیب کَنانا مَنی کِرّا گْوَست اَنت گُڈا مَن چَرایاں نَکُو شَہمیر ءِ جُست کُت۔ آ گُش ئے کَمّے ھَیراں بیت اَنت۔ اَوَلی رَند ءَ مَن ءَ شَرّی ءِ سَر ءَ چارِتِش۔ یَکّ بَٹێرُکێں زَہگے ءَ گۆں چَچّێں زُبان ءَ پَسَّو دات، “ناتُو وَ مُلت ئے شَل ءَ اِنت۔”
“مُلک ءِ سَر ءَ اِنت؟ پَرچا؟”
“مَن نَژاناں وَت۔ وَت شُتَگ۔” آئی ءَ پَسَّو دات۔
“کَدی شُتَگ؟”
“دێل اِنت۔” زَہگ ءَ پَسَّو دات ءُ مَن پِگر ءَ کَپتاں کہ اَنّی مُلک ءِ سَر ءَ چِہ واست ءَ شُتَگ اَنت۔
گْوَنڈُو لَیب کَنانا دێم ءَ شُت اَنت۔ مَن نَزّیک ئے لۆگ ءِ مَردُماں کہ مَنی سْیاد اَت اَنت، ھَم جُست نَکُت ءُ دێم پہ ناکُو شَہمیر ءِ ڈِگار ءَ رَہادَگ بیتاں چی ءَ کہ مَن زانت کہ سْیاد یَکّ ءُ دُا مَن ءَ رَوَگ ءَ نَیل اَنت۔ سَلام ءُ اَلِک دْراجکَشّ بیت ءُ چاہواری بیت ءُ دیواں بیت ءُ مَن یَکّ کَلاکے ءَ اَلَّما رُلّاں۔ مُردَنی اِنت ھَمے سْیاداں دَبی ئے رَوَگ ءَ پێسَر مَن ءَ دَپی جُستے ھَم نَکُت بلے نی کہ مَن ءَ اُمێت مانت اَت، دْرُہ پہ مَن تُنّیگ اَت اَنت۔
مَن زیتّاں ناکُو شَہمیر ءِ ڈِگار ءَ رَسِتاں۔ ڈِگار ئِے آپ ءَ پُرّ اَت ءُ ھاکیچَکێں آپ ءِ تَہا مِکّێں بُرز ءُ پَٹَکّێں مَچّ سَکّ بْرَہدار اَت اَنت۔ مَن گِراں بیتان ءُ پَتَنێں بَند ءِ سَر ءَ بَستَگێں کاپَر ءُ کَرگین ءِ نێمَگ ءَ شُتاں۔ کاپَر ءِ چێرا کَسّ نێست اَت۔ یَکّ مَزَنجۆنێں کُوٹّێں بَبَّریێں بُزے کاپَر ءِ دار ءَ بَستَگ ءُ کاہ وَرَگ ءَ اَت ءُ دو جاڈێں شِنِکّ آئی ءِ کِرّا تَچَگ ءُ تْرَدُّک جَنَگ ءَ اَت اَنت۔ کَرگین ءِ گِزدَپیگ پَچ اَت ءُ چِڈِکّایے ھَم ھَست اَت۔
مَن دَنینگَہ ھَمِد ءَ اوشتاتَگَتاں کہ چَہ لۆگ ءِ پُشت ءَ تَیارێں نَرازے چانگانا دَر اَتک ءُ مَنی نَزّیک ءَ اَتک ءُ اوشتات ءُ وَکَّگ ءُ گُرَّگ ءَ لَگِّت۔ پَرائی ئے تُرسێنَگ ءُ گَلّێنَگ ءَ مَن وَتی نَزّیک ءَ کَپتَگێں سَرچۆپێں سِنگ ءِ چِست کَنَگ ءَ جَہل بیتاں کہ چَہ کَرگین ءَ ناکُو شَہمیر ءَ سَرُک کُت ءُ گۆں مَنی گِندَگ ءَ ھَیراں بُوت۔ کُچِکّ ئِے ھَکَّل کُت۔
“مَنی چُکّ، شیرُو! تَو ئے؟” ناکُو نَزّیک ءَ اَتک ءُ مَن ءَ گُلاێش ئِے کُت ءُ گْرێوَگ ءَ لَگِّت۔ مَنی چَمّ ھَم اَرس بیت اَنت۔
وَشَّتک ءُ جۆڈی ءَ رَند مَن ءُ آ کَرگین ءَ شُت ءُ نِشتێں۔ ناکُو ءَ چاہ گْراستَگَت ءُ چُلّ ءِ کَش ءَ اِشکِرانی سَر ءَ پہ ھَلَگ ءَ اێر ئِے کُتَگَت اَنت۔ لۆگ چَہ دیتّا پُرّ اَت چی ءَ کہ دار نَمب اَت اَنت، رۆک وَ بیت اَنت بلے سَکّ دیتِّش کُت۔ مَنی چَمّ اَرس بیت اَنت ءُ مَن کُلَّگ ءَ لَگِّتاں۔ ناکُو پاد اَتک۔ چاہانی کَرَو ءُ کۆپ ئِے زُرت اَنت۔ چَہ دْرَنگ ءَ پَرزۆنَگ ئِے اێر کُت ءُ دَرّاێنت ئِے، “بُرێں ڈَنّ ءَ ، شێرجاں! اِد ءَ دیتّ اِنت۔”
ما ڈَنّ ءَ دَر اَتک ءُ کاپَر ءِ چێرا تَہت ءِ سَر ءَ نِشتێں۔ ناکُو گۆں شیرچاہ ءُ شَپ ءِ سَر اَتکَگێں نَگَناں ھَرَز بَندَگ ءَ لَگِّت۔ مَن اێوک ءَ شیرچاہ وَرَگ ءَ اَتاں۔
“نَگَن بْوَر گۆں، مَنی چُکّ۔” ناکُو ءَ مَن ءَ سَلاہ جَت۔
“نَوَراں، ناکُو۔ اَنّی وارتَگ، پێداگ آں۔” مَن دْرۆگے بَست چی ءَ کہ اِے گیتَلُو ءَ اێُکێں شیرچاہ وَشتِر اَت۔
مَن ھَیران اَتاں کہ ناکُو مُلک ءِ سَر ءَ چی ءَ نِشتَگ ءُ شَہداد ءُ تْرُو ءَ شَلی کُج اَنت۔ وَہدے ناکُو ءَ مَن ءَ ھَیال کَنَگ ءَ دیست، جُست ئِے کُت، “شێرجاں! تَو کَدی اَتکَگ ءِ؟
“مَن پَیری سَباہ ءَ اَتکَگاں۔ تَو مَنی چارَگ ءَ ھَم نَیَتکَگ ءِ۔” مَن گِلَگ کُت۔
“مَنی چُکّ، مَرچاں مَن ھَمِد ءَ آں۔ بازار ءَ سَکّ سَکّ ءَ نَرَواں پَمِشکا دُنیا ءِ ھال ءَ ھِچّ سَہیگ نہ آں۔ مَن تَئی آیَگ ءَ سَہیگ بیتێناں، چِتَور نَیَتکاں؟” مَن سَر سُرێنت۔ ناکُو گُشَگ ءَ اَت۔
“بازار ءَ بَرے بَرے مَن رَواں۔ وَرَگی چیزّے، دِگِہ سامانے گِران ءُ کاران ءُ ھَپتَگانی ھَپتَگ ھَمِد ءَ آں۔ اِد ءَ وَشتِر بیت مَن ءَ ۔ وَتی وَڈ ءَ آں۔” مَن ھَیال کُت کہ اِے کَماش ھَکّ ءُ دِل، وَشّ ءُ دِلساچێں زِندے گْوازێنَگ ءَ اِنت۔
ھَمے وَہد ءَ شِنِکُّوے تْرَدّانا اَتک ءُ گْوَرباسک ءِ سَر ءَ اێرێں مَنی دَست ءِ چُنکی لَنکُک ئِے دَپ ءَ کُت ءُ گۆں وَتی بے دَنتانێں آریکاں جایَگا ئِے لَگِّت۔ مَن ءَ کِلی بُوت بلے اِے کِلی ئے تَہا اَجَبێں لِزَّتے مان اَت۔
گیتَلُوێں سَباہے ءَ چَہ بازار ءَ دیر، گَرمێں شیرچاہ ءِ گُٹّ گِرَگ ءُ ڈِگار ءِ ھاکیچَکێں آپ ءِ تَہا اوشتاتَگێں مَچّاں چارَگ چۆنێں وَشّێں چیزّے بلے اِے ھَمُک ئے بَہت ءَ نَبیت۔ اِے پہ باز ءَ اێوک ءَ وَشّێں ھَیالے بلے پہ مَن زِندَگێں گْواچِنے اَت ءُ اِے پُرچاڈێں نِدارَگ ءُ مۆسُم ءِ وَشّی ءُ لِزَّت ھُردُکێں کُلُو ءَ گێش کُتَگَت کہ مَنی چُنکی لَنکُک ءَ گۆں وَتی بے زۆر ءُ بے دَنتانێں آریکاں وَتی مَنّاں جایَگ ءَ اَت۔
مَن پہ سَہتُکے کُلّێں جَہاں گُش ئے شَمُشت۔ لِزَّت ءِ چَولے مَنی جان ءِ بَند بَند ءَ شِنگ بُوت ءُ جان ءِ پُٹ ئِے پُونژَرێنت اَنت بلے دُمی کَتّرَہا مَن ءَ شَہداد ءِ ھَیال اَتک کہ مَن دَنینگَہ نَدیستَگَت۔ وَشّی ءِ جاوَر اێرمۆش بُوت ءُ مَن پَدا ھَکّیگێں دُنیا ءَ اَتکان ءُ چَہ ناکُو ءَ جُست کُت۔
“ناکُو، شَہداد کُج اِنت؟ نَگِندان ئِے، مَنی چارَگ ءَ ھَم نَیَتکَگ۔”
شَہداد ءِ نام ءِ اِشکُنَگ ءَ آئی ءِ دَست دْرَہَگ ءَ لَگِّت اَنت۔ کۆپ ئِے تَہت ءِ پَتَنسَرێں پادَگ ءِ سَر ءَ اێر کُت کہ چاہ مَرِچ اَنت۔ گۆں اَرسیگێں چَمّے گُشت ئِے،
“شَہداد اِے دُنیا ءَ نَہ اِنت۔”
شیرچاہ ءِ وَشّێں تام مَنی دَپ ءَ جَور بُوت۔ مَن گۆں ناباوَرێں چَمّاں ناکُو ءَ چارَگ ءَ اَتان ءُ آئی ءِ سَر جَہل اَت۔ شَہداد اِے دُنیا ءَ نَہ اِنت؟ مَن ءَ گیلّۆتَگاں گِپت۔
“ناکُو، چۆن بیتَگ شَہداد ءَ ؟”
ناکُو ءَ گُشت، “مَنی چُکّ، دو سال بیت آ گَپّ ءَ ۔ آ رۆچی مئے پَسے گار اَت۔ شَہداد شُت کہ پَس ءَ شۆہاز کَناں۔ آیَگ ءَ دێر ئِے کُت۔ بے گاہ ءَ شُتَگَت ءُ نی سَرشَپ اَت۔ شَلی ءَ پِری پِری کُت گُڈا ما ھَمے شَپ ءَ بازار پہ بازار، لۆگ پہ لۆگ تَرِّت ءُ جُست کُت بلے کَسّ ءَ نَدیستَگَت۔
اِندِگِ سَباہ ءَ پَس وَت اَتک ءُ شَہداد ءِ بارَوا ھَمے ھال اَتک کہ زی مَگرَب تَہارا پَوجیانی کَیمپ ءِ پُشت ءَ ، ھَمے کَور ءَ رَوَگ ءَ بیتَگ کہ بَلکێں پَس ھَمانگُر اِنت گُڈا پَوجیاں گِپتَگ کہ تَو سَرمَچارے ئے ءُ جَتَگِش۔ ناہَکّ ءَ کُشت زالِماں۔ شَہداد مئے پیری ءِ ھَسا اَت، مئے یَکّێں چُکّ اَت، کُشت رَستَراں، ءُ بے چارَگێں شَلی ھَم شَہداد ءِ جَگَرسِندێں گَماں گۆں وَت بُرت گۆں۔ مات اَت، سَگِّت ئِے نَکُت۔ ماہے کَپّے ءَ رَند آئی ءَ ھَم چَہ دُنیا ءَ سَپَر کُت۔”
…………
آ گیتَلُوێں سَباہ ءَ کہ مَن گۆں شاتکامێں دِلے چَہ لۆگ ءَ دَر اَتکَگَتاں، گۆں گران ءُ گَمیگێں دِلے واتَرّ بیتاں۔ نی گیتَلُو چۆ دیتّا مَنی گینّا گِران اَت۔
<سترُنگ><اِم>ناگُماں