مَرچاں گُلام پِکنِکاں گۆں نَہ اِنت۔
چۆ بِہ نَبیتَگ کہ سَنگَت پِکنِک ءَ بُرَو اَنت ءُ گُلام گۆں مَبیت۔ آ وَرَگ ءِ گْرادَگ ءَ زَبر اَت ءُ مئے پِکنِکانی کَنوَری اَت۔ مَن چونایا پِکنِک ٹۆلی ءِ مُکیمی باسکے نَہ اَتاں چی ءَ کہ مَن شَہر ءَ وانَگ ءَ اَتاں۔ بَسّ بَرے بَرے کہ چُٹّیان اَتکاں گُڈا گۆں کَپتاں۔
یَکّ شَپے ھَور ءَ گْوَرت۔ اِندِگِ سُہبا بَچَکّ مُچّ بیت اَنت۔ مۆسُم وَشّ اَت۔ پِکنِک ءِ شَور ٹَہِت۔ ما وَرَگ ءُ چَرَگ چَمِدا زُرت گۆں کہ بَلکێں دار تَرّ بِبَنت۔
زیتّاں ما پِکنِک ءِ جاگَہ ءَ سَر بیتێں۔ رَسَگ ءَ مُلا مُراد ءَ چَہ کیسَّگ ءَ پَتّا ءِ جۆڈیے دَر کُت ءُ گۆں لال بَکش آزات، مَہمَد جَگَر ءُ سُوپی نِزَر ءَ وانکیا شُرُو بُوت۔
ھَر وَہد ءَ کہ ما پِکنِک ءَ شُتێں گُڈا مَن یَکّ بَرے کَمُّکے تَرِّت ءُ سَیل کُت ءُ رَند ءَ سَنگَتانی دیوان ءَ اَتک ءُ نِشتاں۔ چُشێں وَہداں مَنی ھَمراہ لال بَکش آزات اَت۔ مَن دێم گۆں آزات ءَ کُت۔ “نَیا ئے گۆں؟”
آئی ءَ پَتّائی ءِ یَلَہ دَیَگ دِل ءَ نَہ اَت۔ گُشت ئِے، “مَنی پاد چَوَٹّ ءَ جَتَگ۔”
مَن گُشت، “کُجام پاد؟” آئی ءَ کَندِت۔ زانت ئِے کہ دوێں پاداں گُشَگ ءَ نَہ اِنت۔
مَن اێوک ءَ شێپے ءَ بُرزاد بیتاں۔ چَہ پُشت ءَ گُلام ءَ تَوار جَت۔ “مَرچی آزات ءِ جاگَہ ءَ گُلام تَئی ھَمراہ بِبیت، چۆن اِنت؟”
مَن کَندِت ءُ پَسَّو دات، “سَر ءُ چَمّاں، واجَہ! بلے تَو کَنوَر نَوَر ئے؟”
پَسَّو ئِے دات، “بے ھال ئے؟ وَرَگ گۆں۔ مَرچی کَنوَر نَلۆٹیت۔”
مَن ءُ گُلام ھَمراہ بیتێں۔
یَکّێں شَپ ءِ ھَور ءَ دْرَچک ءُ دار رُژناتِر کُتَگَت اَنت۔ ما تَرّانا نَزّیک ءَ کۆہے ءَ سَر کَپت ءُ ٹُلّا ئِے نِشتێں۔ مۆسُم ساپ اَت۔ ھَور ءَ زِمین ءُ آزماں شُشتَگ ءُ سَپا کُتَگَت اَنت۔ چَرے کۆہ ءِ ٹُلّ ءَ گْوَہرَگ داں کانیگ، تێوَگێں نِگوَر دَر ءَ اَت۔ مَن گۆں گُلام ءَ گُشت، “مَن ءَ اِے نِدارَگ سَکّ وَشّ بَنت۔”
گُلام ءَ بِچکَندِت بلے ھِچّ نَگُشت۔ مَن ھَم بے تَوارا مۆسُم ءِ سَیل ءَ دِلگۆش بیتاں۔
“یار! مَن ءَ گۆں تَو گَپّے ھَست۔” کَمُّکے ءَ رَند گُلام ءَ دَرّاێنت۔
“بُگُش۔”
“مَن ءَ بَلاہێں پَرێشانیے ءَ گْوَر جَتَگ۔ مَن اێدِگِرانی کِرّا نام نَگِپتَگ۔ تَو ھَمے پِڈ ءَ داکتَری وانَگ ءَ ئے۔ بَلکێں مَن ءَ اِلاجے یا سَر ءُ سۆجے بِکَن ئے۔”
مَن سَر سُرێنت۔ گُلام گُشَگ ءَ اَت، “تَو اَنّی وَشّێں مۆسُم ءُ نِدارَگانی گَپّ ءَ اَت ءِ۔ مَن پێسَر ءَ تَئی وَڈ ءَ بیتَگاں۔ چُشێں نِدارَگاں مَن ءَ وَشّیے داتَگ بلے مَرچاں مَن چۆ نَہ آں۔ پێسَر ءَ وَہدے مَن وَتی دَمَگ ءِ کۆہ ءُ کَور، ڈِگار ءُ مَچکِدَگ، دَشت ءُ گْیاباناں تَرِّتَگاں، دِل چۆ کۆہ ءَ رُستَگ، تاہیرے رَسِتَگ دِل ءَ بلے مَرچاں چۆ نَہ اِنت…۔ مَرچاں وَہدے مَن سَیل ءَ دَر کایاں، ڈێہ ءِ زێد ءُ نِدارَگاں گِنداں، دِل گیمُریت، تَکانسَر باں۔ دَم پہ سَہت ھَمے ھَیال کئێت کہ مَنی ڈێہ، اِے نِدارَگ چَہ مَنی دَست ءَ رَوان اَنت۔ اَنچێں وَہدے کئێت کہ مَن اِشانی واہُند نَباں… ھما اِنت کہ بُگٹی ءُ بالاچ جَنَگ بیتَگ اَنت مَن اَنچُش آں۔”
گُلام کَمّے بے تَوار بُوت، پَدا جُست ئِے کُت۔
“تَئی ھَیال ءَ مَن اِلاج لۆٹاں؟”
مَن گُشت، “ڈێہ ءِ دۆستی نادراہیے نَہ اِنت۔”
گُلام ءَ دْراجێں گینسارتے کَشِّت ءُ پَدا وَتی گَپّ بِنا کُت، “بلے مَن ھِچّ پَیم ءَ تاہیر گِپت نَکَناں۔ مَنی شَپانی واب ءُ رۆچانی آرام شُتَگ۔ ھِچّ کار ءَ دِل پِر نَہ اِنت۔ نہ سَنگَتانی کِرّا نِشت ءُ وَشّێں گَپّے جَت کَناں، نہ سْیاد ءُ وارِسے ءِ گِندُک ءَ شُت کَناں۔ ڈێہ ءِ جاوَراں گِنداں، دِل سُچیت۔ رۆچے دو سئے وَرنا بے گْواہ بیت، رۆچے دو سئے لاش کئێت۔ مَنی کێنَگ چۆ بۆلان ءِ کۆہ ءَ رُستَگ۔ لۆنڈُوے گِنداں، دِل گُشیت سَرا ئِے سِند۔ تَو بَلکێں اَندازَہ جَت مَکَن ئے بلے مَن اَنگَراں لێٹان آں۔”
مَن آ تَسَلّا دات ءُ گُشت کہ تَو گۆلی ءُ دَرماں نَلۆٹ ئے، بَسّ وَتی ھَیال کَنَگ ءِ وَڈ ءُ پَیماں گِہتِر کَن۔ ھَر ھَیالے دار ئے بِدار بلے آئی ءَ چۆ بے مَہار مَکَن کہ تَرا تاواں بِدَنت۔ ھَر چیزّ ءَ راہ ءُ رَہبَند ھَست۔ زَہر ءُ کێنَگ ءَ ھَم۔
ما داں دێراں نِشتێن ءُ گَپّ ءُ رَپ جَت ءُ پَدا اێر اَتک ءُ بَچَکّانی نێمَگ ءَ شُتێں۔
ھَپتَگے کَپّے ءَ رَند مَن پَدا شَہر ءَ اَتکان ءُ وَتی وانَگ ءَ دَزگَٹّ بیتاں۔
چیزّے ماہ ءَ پَد مَن مێتَگ ءَ شُتاں۔ چَہ بَس ءِ دَریگ ءَ نِدارَگاں چاران اَتاں۔ کۆہ، کَور، تَیاب ءُ وَڈَّگ آیان ءُ رَوان اَت اَنت۔ ھَمے وَہد ءَ مَن گُلام ءِ تْرانَگ ءَ کَپتان ءُ آئی ءِ ھما گَپّ مَنی گۆشاں جَکسَگ ءَ لَگِّت اَنت… اِے نِدارَگ چَہ مَنی دَست ءَ رَوان اَنت۔ اَنچێں وَہدے کئێت کہ مَن اِشانی واہُند نَباں…
شَپ ءَ کہ لۆگ ءَ رَسِتاں، وَپسَگ ءِ وَہد ءَ ھَم گُلام ءِ ھَبَر مَنی گۆشاں جَکسان اَت اَنت۔ مَن دِل ءَ گُشت باندا گُلام ءَ ھال دَیاں کہ تَو وَتی نادراہی مَن ءَ شَکساتَگ۔ آ کَندیت ءُ گَل بیت کہ اێوک نَہ آں، ھَمراہے رَسِتَگ۔
اِندِگِ رۆچ ءَ سَنَتاں پِکنِکے کُت، بلے اِے رَندی گُلام گۆں نَہ اَت۔
مَن چَہ لال بَکش ءَ جُست کُت گُلام؟ آئی ءَ ساہیجی ءِ کۆہ ءِ نێمَگ ءَ اِشارَہ کُت۔ ءُ مَن سَرپَد بیتاں۔
گُلام ءَ وَتی نادراہی ءِ اِلاج دَر گێتکَگَت!
<سترُنگ><اِم>ناگُماں