سَوالیگ آں، پَرچا جَوابے نَلۆٹاں
اگں ھَکّ نَداراں ھِسابے نَلۆٹاں
بِکَنت نام ءُ دَپ گُڈِّ مَرگ ءَ مَن ءَ را
چُشێں وَشّێں وَنگ ءُ کَبابے نَلۆٹاں
مَن ءَ بَسّ اَنت اِے دَرد ءُ مِہنَت جَہان ءِ
چِد ءُ دێم گێشێں اَزابے نَلۆٹاں
تَباہیگ اگں بیت مُرادانی بۆجیگ
چُشێں بے پَکارێں تَیابے نَلۆٹاں
مَنی دَرد ءِ دێمپاں کہ وار ءُ اَزاب اَنت
مَن سَردار ءُ میر ءُ نَوابے نَلۆٹاں
اگں دِل ھُدۆک اِنت مُدام پہ گُناہ ءَ
بلے چۆ نَہ اِنت کہ سَوابے نَلۆٹاں
کَسے شات بِکَنت کَدَّہاں شَکَّلانی
مَن ءَ وَلّاہ کَیپ ءُ شَرابے نَلۆٹاں
بِپێچ پَتَّراں دُہل ءُ سُرنا مَکَن کہ
مَن چَنگ ءُ سُرۆز ءُ رَبابے نَلۆٹاں
سَلامَت بِبات گُل گۆں کَنڈیگ ءُ ھاراں
نَلۆٹاں دِگِہ ٹَہل ءُ دابے نَلۆٹاں
مَن دِلگۆش آں مُلا چَہ تَئی واز ءُ پَنتاں
پَمێشکا دِگِہ سۆج ءُ بابے نَلۆٹاں
<سترُنگ><اِم>جی اَر مُلا