کَسانی ءَ مَن ھَر شَپ چَہ بَلُّک ھاتُون ءَ کِسَّہ گۆش داشتَگ۔ بے کِسَّہ ءَ واب نَکَپتَگان ءُ پَدا ھَر شَپ نۆکێںے لۆٹِتَگ۔ مات ءِ لاپشۆد ءُ لاڈُک بیتَگاں پَمِشکا گَلنازی کُتَگ، اِشکُتَگێں کِسَّہ دُبَر گۆش نَداشتَگ۔
بَلُّک ھاتُون ءَ باز کِسَّہ یات اَت۔ داں سالے کَپّے ءَ مَن تَماشَہ کُت۔ پَدا یَکّ شَپے آئی ءِ کِسَّہ کُٹِّت اَنت۔ وَہدے آُرتَگێںے بُنگێج ئِے کُت، گُڈا مَن کُوکّار کُت کہ اِے مَن اِشکُتَگ۔ بَلُّک ھاتُون ءَ گُشت، “تَو کِسَّہ ھَلّێنتَگ اَنت، نۆکێں چَہ کُج ءَ بْیاراں؟”
بلے مَن گِرّ بَست۔ آ سَہتُکے بے تَوار بُوت۔ گُش ئے وَتی دِل ءَ کِسَّہے ساچَگ ءَ اَت ءُ پَدا گُشت ئِے:
“ھَست اَت نُماسَگے۔ ھَست اَت بَلُّکے۔ نُماسَگ ءَ ھَر شَپ بَلُّک ءِ کِرّا کِسَّہ گۆش داشت۔ بے کِسَّہ ءَ نَوَپت۔ تَئی وَڈ ءَ ھَر شَپ نۆکێںے لۆٹِت ئِے۔ ھَو، ھَو، یَکّ شَپے بَلُّک ءِ کِسَّہ کُٹِّت اَنت۔
تێوَگێں شَپ ءَ نُماسَگ واب نَکَپت۔ بَلُّک ءَ تَورِت۔ دیر دِگِہ مێتَگے ءَ بَلُّک ءَ کْوَہنێں دَزگُہارے ھَست اَت کہ باز کِسَّہ ئِے یات اَت۔ بَلُّک ءَ گُشت رَواں یَپّاریگے دَزگُہار ءَ چاران ءُ پہ نُماسَگ ءَ لَہتے کِسَّہ ھَم کاراں گۆں۔ اِندِگِ رۆچ ءَ بَلُّک سَرچادِر بُوت۔ مێتَگ دیر اَت۔ بَلُّک شَپ کَپت۔ سَرشَپا مێتَگ ءِ نَزّیک ءَ رَسِت بلے تَہاری ءَ بَزَّگ ءَ مَیم نَکُت ءُ کۆرچاتے ءَ کَپت ءُ مُرت۔”
بَلُّک ھاتُون ءَ کِسَّہ ھَلّێنت۔
“گُڈا بَلُّک مُرت؟”
“ھَو مَنی چُکّ، بَلُّک مُرت۔”
مئے مێتَگ ءِ نَزّیک ءَ ھَم کۆرَچاتے ھَست اَت۔ مَن جُست کُت، “آ کۆرچات مئے مێتَگ ءِ کۆرچات ءِ وَڈێںے بیتَگ؟”
“ھَو، ءُ بَلُّک ھَم مَنی وَڈێںے بیتَگ۔”
مَن دِل ءَ گُشت بَلکێں دێمتِرا ھَمے گُشیت کہ نُماسَگ ھَم تَئی وَڈێںے بیتَگ بلے آئی ءَ چۆ نَگُشت ءُ لَٹّ ءَ جِکّ دَیانا شُت ءُ وَتی نِپادانی سَر ءَ وَپت۔
مَن داں دێراں واب نَکَپتاں۔ آ شَپی مَن دِگِہ وَڈێں واب دیست۔ کۆرچات اَت اَنت، تَہا بَلُّک کَپتَگَت اَنت ءُ ڈَنّ ءَ نُماسَگ نِشتَگ ءُ گْرێوَگ ءَ اَت اَنت۔
مَن داں مُدَّتے ءَ گُشت زاناں کۆرچات ءِ کِسَّہ وَتگَڈێںے بلے مَستِر بیتاں گُڈا زانت کہ آ شَپی بَلُّک ھاتُون ءَ وَتی دَزگُہار ءِ کِسَّہ آُرتَگَت!
<سترُنگ><اِم>ناگُماں