آ رۆچی مَن کارے ءِ نییَت ءَ چَہ لۆگ ءَ دَر اَتکان ءُ پَدا بے ھال بیتاں کہ کار چے اَت۔ چۆ مَن ءَ یات اَت کہ اَلَّمی کارے اَت بلے چے اَت؟ ھۆش ءَ ھِچّ کار نَکُت۔
زی ھَم گۆں مَن اَنچُش بُوت۔ آدێنک ءِ دێم ءَ سَر ءِ رَندَگ ءَ اَتاں۔ مَن دیست کہ مید کَمّے دْراج اَنت۔ دِل ءَ گُشت رَواں سَر ءَ ٹاپ کَناں۔ ھَمے نییَت ءَ چَہ لۆگ ءَ دَر اَتکان ءُ راہ ءِ نێم ءَ بے ھال بیتاں کہ چِہ کار ءَ رَوَگ ءَ آں۔ اوشتاتاں، ھَیال کُت بلے گیر نَیَتک۔ کَمّے اوشتَگ ءَ رَند بے رَو کُت ءُ پَدا لۆگ ءَ اَتکان ءُ گۆں لۆگ ءِ پُتِرَگ ءَ تْرانَگ ءَ کَپتاں کہ مَن ءَ ھَجّام ءِ گْوَر ءَ رَوَگی اَت۔
چۆ باز بَر ءَ بیتَگ کہ مَن گْوَنڈێں کارے چَہ دِل ءَ بُرتَگ بلے چۆ بِہ نَبیتَگ کہ مَزَنێں کارے ءِ واست ءَ چَہ لۆگ ءَ دَر بْیایان ءُ نێمراہ ءَ بے ھال بِباں۔ مَن ھَیران اَتاں کہ اَناگَہ چۆن شَمُشتاں۔ کَمّے پێشتِر داں چَوکا مَن ءَ کار یات اَت ءُ چَوک چۆ دیر نَہ اَت۔ چَگَلے ءِ راہ اَت۔ چَوکا اوشتاتَگێں سِپاہیگ ءَ ھَم مَن چَمِدا گِندَگ ءَ اَتاں۔
مَن داں دَمانُکے اوشتاتان ءُ چَوک ءِ نێمَگ ءَ چارِت۔ پَدا مَنی دِل ءَ اَتک کہ زی مَن بے رَو کُت ءُ سَر ءِ ٹاپ ءِ کار یات اَتک۔ بِگِند ئے اَنّی ھَم پَدا چَوک ءِ رَوَگ ءَ بے ھال بیتَگێں کار یات بْیَیت۔ بِگِند ئے کار ءِ تْرانَگ ھَمُدا کَپتَگ۔
چونایا چُشێں ھَیال ءُ وَہم ءِ تَہا باز پَرک نێست ءُ مَن وَہمیێں مَردُمے نَہ آں بلے مَرچی شَمُشتَگێں کار اَنچےنے اَت کہ مَن سَد میلّ پُشت ءَ رَوَگ ءَ ھَم تَیار اَتاں۔ پَمِشکا پَد تَرِّتان ءُ دێم پہ چَوکا رَہادَگ بیتاں۔
کَمُّکے ءَ رَند مَن چَوکا اوشتاتَگَتاں بلے کار اَنگَت گار اَت۔ اِینگُر آنگُر چارِت کہ بَلکێں مَردُمے، گاڈیے، دُکّانی نامے گِنداں، کار ءِ تْرانَگ ءَ کَپاں بلے ھِچّ۔ مَنی چَمّاں چارێں نێمَگ تَوواپ کُت اَنت بلے یادّاشت اَنگَت شُژدَو ءَ اَت۔
نی مَنی دِل ءَ ھَمے بیمّا سَر چِست کُت کہ چۆ مَبیت مَن ءَ گیرام ءَ گْوَر جَتَگ۔ اگں نہ وَسَّرا وَت مَردُم ءِ ھۆش چۆن رَوت۔ بے ھال ھَرکَس بیت بلے نہ کہ چۆ۔ نی چۆن کَناں؟
پَدا مَن ءَ ھَیال اَتک بَلکێں لۆگ ءِ رَوَگ ءَ کار یات بْیَیت۔ یَکّ بَرے گُشت رَواں لۆگ ءَ ۔ پَدا مَن ھَیال کُت لۆگ ءَ رَوَگ ءِ بَدَل ءَ چَمِدا پَونے کَناں۔ لۆگ ءِ مَردُم مَن ءَ شَرّ کَلاگ زیر اَنت بلے پَرواہ نێست کہ شَمُشتَگێں کار چَہ کَندَگ ءُ کَلاگاں دێماتِر اِنت۔
بلے وَہدے مَن لۆگ ءَ پَون کُت، اود ءِ پَسَّو ءِ اِشکُنَگ ءَ ھُشک ءُ ھَیراں بیتاں۔ لۆگ ءِ مَردُماں ھَم وَتی کار بے ھال کُتَگَت۔
نی مَن ءَ تُرسے چێر کَپت۔ مَن دْرَہَگ ءَ لَگِّتاں۔ اِے چِہ مِہنَتے کہ تێوَگێں لۆگ ئِے ماں پَتاتَگ؟ مَنی سَر ءَ چَکَّر وارت ءُ مَن یَکّ کِرّے نِشتاں۔
مَن داں دێراں ھَمِد ءَ نِشت ءُ جێڈِت بلے نَزانت کہ چۆن بِکَناں۔ سَر ھِچّ کار ءَ نَہ اَت۔ کَش ءُ گْوَر ءَ مَردُمانی رَووا اَت بلے مَنی کار اَنچےنے اَت کہ دِگِہ مَردُم پہ کُمَکّ ءَ تَوار پِر کَنَگ ھَم نَبَنت۔ آہِر مَن نِندَگ ءَ دَم بُرت۔ پیرێنانی وَڈ ءَ دَست کۆنڈاں کُت اَنت ءُ پاد اَتکاں۔ ھَمے وَہد ءَ سَنگَتے اَتک ءُ رَسِت۔ نہ سَلام نہ جۆڈی۔ رَسَگ ءَ گُشت ئِے، “یار، بَرے بَرے مَردُم اَجَبێں گَپچَلاں کَپیت۔ مَنی ھۆش ءَ بِچار۔ چَہ لۆگ ءَ کارے ءَ دَر اَتکَگاں بلے نی پَہک بے ھال آں کہ کار چے اِنت۔”
مَن رۆک رۆک ءَ آئی ءِ نێمَگ ءَ چارِت۔ مَن ءَ شَکّ بُوت کہ اِے مَنی ھال ءَ سَہیگ اِنت، پَمِشکا پہ کَلاگ زیرَگ ءَ چۆ گُشَگ ءَ اِنت۔ مَن گۆں مُجِتَگێں مُورکے گُشت، “بِلّ وَتی مَسکَرایاں۔ مَن وَت پَرێشان آں۔”
“دْرێگَتێں مَسکَرایے بیتێں بلے مَن راست گُشَگ ءَ آں۔ مَنی ھۆش کَلام ءَ گِپتَگ، گار اِنت۔ مَن …” آئی ءَ گَپّ ناسَرجَما یَلَہ دات۔
مَن آئی ءِ لَرزۆکێں لُنٹ ءُ دِلوارَگێں چَمّانی نێمَگ ءَ چارِت ءُ ھَیال کُت… یا وَ اِے راست گُشَگ ءَ اِنت یا بَلاہێں اَداکارے!
مَن بِچکَندِت۔ مَنی بِچکَندَگ ءِ سَر ءَ آئی ءَ ھَم پَشَلێں بِچکَندے جَت ءُ بَزَّگ بَزَّگ ءَ مَن ءَ چارَگ ءَ لَگِّت۔ وَہدے مَن وَتی کِسَّہ آُرت اَنت، آ ھَیراں بُوت۔ دَست ئِے مَنی دَست ءِ سَر ءَ جَت ءُ ٹَہک ئِے دات۔
کَندان ءَ آئی ءَ دَست یَکّ نێمَگے شَہارت۔ مَن چَکّ جَت، کَمّے پَسِّند دِگِہ پَجّارۆکے اوشتاتَگَت کہ بَرے رَہ گِپت، بَرے اوشتات۔ بَرے سَر ئِے کِچێنت ءُ ھَیال ئِے کُت ءُ پَدا رَہ گِپت۔ ما کَمُّکے آئی ءِ تَماشَہ چارِت ءُ پَدا تَوار کُت۔ آئی ءَ مارا دیست، چَمّ ئِے رُژن ءَ بیت اَنت، تَچانا اَتک ءُ بے جُست ءُ پُرس ءَ وَتی کِسَّہ ئِے بُنگێج کُت… آ ھَم مئے بۆجیگ ءَ سَوار اَت۔ آئی ءِ ھۆش ءَ ھَم جَواب داتَگَت۔
پَدا مَن ھَر یَکّے ڈیکّ دات، کار ءِ شَمۆشَگ ءِ زَنگ ءَ جَنَگ ءَ اَت۔ تێوَگێں شَہر ھَمے ھَوپ ءَ ماں پَتاتَگَت۔ ھَرکَس ءَ وَتی کار بے ھال کُتَگَت ءُ نی سَربَتَگ اَت۔ کار دْرُستانی بے ھال اَت بلے یَکّ ھَیالے دْرُستانی دِل ءَ یَکّ اَت۔ ھَرکَسی گُمان ءَ دْرُستانی بے ھال بیتَگێں کار یَکّ اَت۔
چۆ کہ شَہر ءِ دْرُستێں مَردُماں یَکّێں کار چَہ دِل ءَ بُرتَگَت، پَمِشکا اِے اُمێت ھَست اَت کہ اگں یَکّ مَردُمے ھَم شَمُشتَگێں کار ءَ تْرانَگ بِکَنت، دْرُستانی جَنجال کُٹّیت۔ ھَمے اُمێت ءَ تێزپَہم ءُ ھۆشمَندانی مَجلِسے ٹَہێنَگ بُوت کہ بِنِند اَنت ءُ پہ کار ءِ تْرانَگ کَنَگ ءَ ھَیال بِکَن اَنت۔ مَہلُوک ءَ را ھَم گُشَگ بُوت کہ ھَرکَس وَتی وَس ءُ واک ءَ وَتی پَہم ءُ ھۆش ءَ کار بِبَندیت۔
بلے اِے دْراہێں تَچ ءُ تاک آپ ءِ سَر ءَ رَستَگێں کِشک بیت اَنت۔ کار اَنگَت گار اَت۔ کار ءِ بے ھالی ءِ سَر ءَ ھَر یَکّے ءِ لُنٹ لۆنجان اَت اَنت بلے کَسّی دَست نَرَسِت۔ پَدا یَکّ نَوبَتے اَنچێں ھَم اَتک کہ ھَر وَہد ءَ لُنٹانی لۆنجانی ئے سَوَب ءَ کَمّ کَمّا مَردُماں کَندَگ بے ھال کُت ءُ گَپّ گَپّ ءِ سَر ءَ گْرێتِش۔
یَکّ رۆچے اَجَبێں گَپّے بُوت۔ مَنی سَر اَنچێں جاہے کَپت کہ اود ءِ مَردُم ھِچّ پَرێشان ءُ نَگێگ نَہ اَت اَنت۔ آ زِند ءِ کاراں اَنچۆ گُلاێش اَت اَنت گُش ئے آیاں وَتی کار تْرانَگ کُتَگ یا چَہ جَوپ ءَ بے ھال نَکُتَگ۔ مَن چَمِشاں یَکّے ءَ جُست کُت، “شُما زاناں وَتی کار تْرانَگ کُتَگ کہ چۆ گَل اِت؟”
آئی ءَ بِچکَندانا جَواب دات، “اِنّاں۔”
پَدا دَست ئِے مَنی کۆپَگ ءَ اێر کُت ءُ گۆش ءَ ھَلوَت ئِے کُت، “اگں بَلاہێں کارے بیتێں کَسّ ءَ بے ھال نَکُتَگَت!”
<سترُنگ><اِم>ناگُماں