بی اِس ءُ بَلّ نِگوَر ءِ وَرنایاں پہ مێتَگ ءِ نێزگار ءُ بے لۆگێں مَردُماں چَمبَیێں گِس بَندَگ ءُ دَیَگ ءِ ھَیراتی کارے بُنگێج کُتَگَت۔ وَرنایانی کِرّا ھُبّ ءُ واہَگ باز اَت بلے زَرّ ءَ سُست اَت اَنت، پَمِشکا تَرَّگ ءُ چَندَہ کَنَگ ءَ اَت اَنت۔
یَکّ نێرمۆچے کہ مَن دِلمانَگ اَتاں دُکّان ءَ بَند بِکَنان ءُ بُرَواں لۆگ ءَ سُبارِگ بِکَناں، ھَمے وَہد ءَ بی اِس ءُ ئے چَندَہی ٹۆلی رَسِت۔ وَرنایاں وَتی گَپّ جَت اَنت۔ آیانی اِرادَہ اَت کہ سالے یَکّ ءُ دو کَمگُشاد ئے لۆگ ءَ نۆک بِکَن اَنت۔ اِے رِد ءَ اَوَلی گِس کہ آیاں بَندَگی اَت، بانُکی نامێں نێزگارێن ءُ بے چُکّێں جَنۆزامےَئێگ اَت۔
مَن وانَگ ءِ زَمانَگ ءَ بی اِس اُا بیتَگاں۔ نی آ جۆش ءُ جَزبَگ پَشت نَکَپتَگ بلے گۆں بی اِس اُا ھَمدَردی اَنگَتا ھَست اِنت۔ پَمِشکا مَن وَرنا جۆڈُکێں چَندَہے دات اَنت ءُ پَرے کار ءَ دِلبَڈّی ھَم دات اَنت۔ چَندَہ ءِ گِرَگ ءَ رَند وَہدے آ چَہ دُکّان ءَ دَر اَتک اَنت، مَنی بَچَکُّو ءَ چَہ مَن جُست کُت۔
“اَبّا! چَندَہ چیے؟”
“چَندَہ…۔؟” مَن چَندَہ دَیَگ ءَ تَیار اَتاں بلے پَرے جُست ءَ تَیار نَہ اَتاں پَمِشکا نَزانت کہ چے بُگُشاں۔
“چَندَہ ھَمِش اِنت کہ اِش ئِے کَنَگ ءَ اَت اَنت۔”
گْوَنڈُو ءَ ھِچّ نَگُشت۔ بَسّ مَنی نێمَگ ءَ چارِت ئِے۔ مَن زانت کہ سَرپَد بَیَگ ءَ نَہ اِنت پَمِشکا گَپّ دێم ءَ بُرت ءُ گُشت:
“پہ یَکّ کارے ءَ مَردُمانی کِرّا رَوَگ ءُ زَرّ ءِ لۆٹَگ ءَ چَندَہ گُش اَنت۔ سَرپَد بَئے؟”۔ مَن “سَرپَد بَئے؟” اَنچێں وَڈے ءَ گُشت کہ سَرپَد بیتَگ، نَبیتَگ، نی اِے گَپّ ءَ چَمِدا ھَلاس بِکَنت۔
“مَن ھما رۆچی چَندَہ کُت، گِند ئے اَبّا؟”
“کَدی؟” مَن بِچکَندِت۔ مَن زانت کہ اَنگَت چَندَہ ءَ نَزانت۔
“ھما رۆچی، اَئید ءِ رۆچ ءَ ۔ مَن ءَ مَردُماں گَپَّڈے زَرّ دات۔”
“ھاااں…” مَن کَندِت۔ “آ چَندَہ نَبیتَگ اَنت، اَیدی بیتَگ اَنت۔ چَندَہ اَنگَت دِگِہ چیزّے۔ چَندَہ ھَر وَہد ءَ گِرَگ بیت، اَیدی اێوک ءَ اَئید ءِ رۆچ ءَ رَسیت۔”
چِد ءُ پَد مَن سَر کِچێنت۔ دَر پہ دَر تَرَّگ ءُ چَندَہ ءِ لۆٹَگ گران اِنت بلے پَنچ شَش سالی گْوَنڈُوے ءَ چَندَہ ءِ مانا ءِ سَرپَد کَنَگ چِد ءُ گْرانتِر اِنت۔ کَمّے ھَیال کَنَگ ءَ رَند جُست ئِے کُت، “اَبّا! مئے لۆگ ھَمِشاں بَستَگ؟”
مَن کَندِت۔ گۆں اِے جُست ءَ آئی ءَ مَن ءَ بُوچّے ءِ مال نَکُت۔
“اِنّاں یار! مئے لۆگ مَن وَتی زَرّانی سَر ءَ بَستَگ۔”
کَمُّکے ءَ رَند پَدا جُست ئِے کُت۔
“اَبّا، بانُکی کئے اِنت؟”
“تَو بانُکی ءَ نَزان ئے؟” مَن گۆں ھَیرانی کَندِت۔ “بانُکی ھَمے زالَکُو اِنت کہ لۆگ پہ لۆگ تَرّیت ءُ باکَلێنک بَہا کَنت۔ تَو ھَر سَباہ آئی ءِ کِرّا باکَلێنک گِر ئے وَر ئے، اَنگَت ناما ئِے نَزان ئے؟”
“اِشی ئے نام باکَلێنکی نَہ اِنت؟”
“اِنّاں باکَلێنکی وَ شُما کُتَگ۔ اِشی ئے نام بانُکی اِنت۔”
“بانُکی۔ باکَلێنکی…” آئی ءَ گۆں وَت گُشت ءُ پَدا جُست کُت، “باکَلێنکی ءَ زاناں لۆگ نێست؟”
“جَنڈێں کَلۆگَرے ھَست ئِے، کَپَگی اِنت۔”
مَنی گْوَنے گَپّ ءَ آئی ءِ کۆدِکێں دێم ءَ گَمواریے تالاں بُوت۔
“اَبّا، اگں باکَلێنکی مئے لۆگ ءَ بْیَیت، تَو ئِے گَلّێن ئے؟”
“ھاااں۔۔ بِزاں تَرا باکَلێنک ءِ لالِچ اِنت! مئے لۆگ ءَ کہ بیت، تَرا مُپتا باکَلێنک دَنت۔” مَن بُرواں بُرز بُرت اَنت۔
آ کَمّے پَشَل بُوت۔ کَندان ءَ دوێں دَست ئِے مُشتجَنگی ئے وَڈ ءَ مُشت کُت اَنت۔ مَن ھَم جَواب ءَ اَنچۆ کُت۔ اِے مئے کَلانکُلُو جَنگ ءِ دابے اَت۔ آئی ءَ وَتی مُشت مَنی نێمَگ ءَ شانت ءُ مَن وَت ءَ دَور دَیَگ ءِ وَڈ ءَ کُت۔
“اَڈ ءِ… اَڈ ءِ! بِگِرِت، مَرد ءَ مارا جَت۔”
“مَن جَنگ ءَ زَبر آں۔” آئی ءَ باجبَرێں ٹَہکے جَت۔
آ اَوَلیا وانَگ ءَ اَت۔ وانَگجاہ ئِے چَہ مَنی دُکّان ءَ نَزّیک اَت پَمِشکا چُٹّی ءَ رَند ھَر وَہد ءَ دُکّان ءَ اَتک ءُ نِشت ءُ پَدا سُبارِگ ءَ ما ھَمراہی ءَ لۆگ ءَ شُتێں۔ مَن ٹێمب چارِت ءُ گُشت۔
“نی بِرێں لۆگ ءَ ۔ تَو شُدیگ نا ئِے؟
“اِنّاں!” آئی ءَ مَلّانی وَڈ ءَ دِلبَند دێم ءَ دَر آُرت۔
“ھَو واجَہ، تَو سَباہی باکَلێنک ءُ پُراٹا چُپتَگ پَمِشکا سَہیا نا ئِے!” مَن آئی ءِ لاپ کِلی کُت ءُ آ کَندان ءَ دُکُلکۆچ بُوت۔
چیزّے رۆچ ءَ رَند مُلّایانی ٹۆلی ءِ دُکّان ءَ اَتک۔ آ پہ مێتَگ ءِ گِل ءُ ھِشت ءِ مَسیت ءِ پَکّ ءَ کَنَگ ءَ چَندَہ کَنَگ ءَ اَت اَنت۔ ھَمے وَہد ءَ کہ مُلّایاں چَندَہ گِپت ءُ دَر اَتک اَنت، مَنی گْوَنڈُو دُکّان ءَ پُتِرت۔ آ ھَیراں ھَیران ءَ آیاں چارَگ ءَ اَت۔ اِینچُک دْراجریشّ آئی ءَ بِہ یَجّاہ نَدیستَگَت۔
“اِے مُلا اَت اَنت؟”
“ھَو۔”
“اِشاں تَزبی زُرت؟” چُکّ ءَ آیانی دَست ءِ تَزبی دیستَگَت اَنت۔
“اِنّاں۔” مَن بِچکَندِت۔ پَیری آئی ءَ دُکّان ءَ پہ بَہا ءَ دْرَتکَگێں تَزبی زُرت اَنت ءُ لَیب ءَ لَگِّت۔ مَن گُشت کہ اِشاں اێر کَن۔ لَیبُو نَہ اَنت، تَزبی اَنت۔ مُلّائی چیزّ اَنت۔ ءُ اَنّی مُلّایانی دَست ءَ تَزبی ءِ گِندَگ ءَ آ پَیریگێں گَپّ ءِ تْرانَگ ءَ کَپتَگَت۔
“گُڈا اِشاں چے زُرت؟”
“اِشاں ھِچّ نَزُرت۔ اِے چَندَہ ءِ گِرَگ ءَ اَتکَگَت اَنت۔”
چَندَہ ءِ نام ءِ اِشکُنَگ ءَ آئی ءَ پہ گَلے جُست کُت، “اَبّا، اِے اوں باکَلێنکی ءِ لۆگ ءَ بَند اَنت؟”
<سترُنگ><اِم>ناگُماں