میزّاں میزّانا مَنی واب ءُ ھَیالاں چَہ دَر آ
دِل چَہ بَنداں تَئی اَندۆہ ءُ گَماں چۆ سِستَگ
کہ مَن دِل گْوَشتَگ بلے زْیادَگێں دْرُگے بَستَگ
اێشی ئے اُپّارَگاں سالے ءُ دو شَش ماہ گْوَستَگ
یَکّ دَمانے بیت کہ دَردانی دَوارجاہ تْرَہِتَگ
مِنَّتوار آں تَئی اێشیا نی مَٹۆہێں پہ ھُدا
میزّاں میزّانا مَنی واب ءُ ھَیالاں چَہ دَر آ
وَتی مَلگۆراں مَشِنگێں مَن ءَ بے سار مَکَن
شَہد ءُ وَشزێمِلێں گالاں گۆں وَتی گار مَکَن
واہَگ ءُ دۆستی ءَ مارا پَدا بیگار مَکَن
چۆ مَن ءَ تْرُند مَچار ءُ دِل ءَ واہدار مَکَن
دَست بَنداں کہ چَما راہ ءَ بُرَو تَرّ پَدا
میزّاں میزّانا مَنی واب ءُ ھَیالاں چَہ دَر آ
دۆتکَگ گۆنڈَلاں دِل ھۆش ءُ ھَیالانی بِزاں
تیرباراں کُتَگ مارتیناں شِگانانی مَناں
مُدَّتے پَتکَگ جَگَر اَنگَر ءُ سُہرێں آساں
ھُشک بات دُژمِن ءِ دَست اێر اَت تَئی زانسَراں
دْرُست تَئی ھَمراہ اَنت نی ھِجبَر مَنی دُنیا ءَ مَیا
میزّاں میزّانا مَنی واہ ءُ ھَیالاں چَہ دَر آ
بے ر ئِےائیں تَئی آ کَدَّہێں چَمّانی کَماں
ٹِکّ ئِے بَستَت پہ مَنی سێنَگ ءَ بے وَہد ءُ گُماں
تْرانَگ ءَ گْوَستَگێں پِرّێن اَنت مَن ءَ سَہت ءُ دَماں
تا اَبَد گار نَبَنت کاریگێں ٹَپّانی نِشاں
دیدَگاں آسکی مَشاں دیدَگی سَوگِند اِنت تَرا
میزّاں میزّانا مَنی واب ءُ ھَیالاں چَہ دَر آ
چۆ مَنی بَہتَئێگ ءَ شَپ پہ کَسے ءَ سْیاہ مَبات
کَسّی بالاد ءَ گَمانی چُشێں مُشکُل مَکَپات
گۆں تَو ھانُل مَنی اِے یَکّێں دْوا ھَمراہ بات
وَژدِلێں کُلّ تَئی دِلواہێں مُراداں گِندات
زیر وَتی داتَگێں سَوگاتاں پہ وَشّی ءُ رَزا
میزّاں میزّانا مَنی واب ءُ ھَیالاں چَہ دَر آ
<سترُنگ><اِم>سَیَد ھاشُمی
کَراچی
مارچ 1951