شَپ ءِ بارێں چِہ وَہد اَت کہ دیناباد ئے مَردُماں چَہ گْرانێں واب ءَ بُست کُت۔ سَکّ گَرم اَت۔ ھَرکَس چَہ ھێد ءَ جانشۆد اَت۔ چَہ تُنّ ءَ آیانی نُکّ ھُشک اَت ءُ دِل تُسَگ ءَ اَت۔
شَپ سَکّ تَہار اَت۔ اِستار گار اَت اَنت۔ گُش ئے آزماں جَمبَراں یا مُجے ءَ پۆشِتَگَت۔ پۆہام اَت ءُ گَرم ءَ اێر داتَگَت۔
وابسَرێں مَردُم سَربَتَگ اَت اَنت کہ یَکّ اَناگَہ اِے چِہ کَہرے کَپتَگ، چِہ کَزایے اَتکَگ۔ کَمّے پێشتِر سَرشَپ ئے وَہد ءَ آزماں ساپ اَت۔ اِستار دَر ءَ اَت اَنت۔ شَپ رُژن ءَ رُژن ءَ اَت ءُ گْوات ھَم کَشَّگ ءَ اَت۔
گَرماگ ءِ مۆسُم ءَ بے آسراتێں دیناباد ئے مَردُمانی اُمێت بَسّ ھَمے کَوش اَت کہ آیانی دِل ئِے سارت کُت۔ اِے ھُدائی گْوات کہ چَہ آزمان ءَ اَتک اَنچۆ پُرکَیپ اَت کہ آیانی دِل ءَ لَگِّت ءُ آ ھَروَہدا واب ءُ نێمواب اَت اَنت۔ اگں بَرے بَرے آزمان ءِ گْوات سُست بُوت، آیاں چَہ پیشّا گْوَپتَگێں گْواتُو زُرت اَنت ءُ وَت ءَ گْوات کُت بلے اِنشَپیگێں پۆہام گْواتُو ءِ وَس ءَ ڈَنّ اَت۔ دیناباد ئے مَردُماں وَتی یاد ءَ چُشێں گَرم نَدیتَگَت۔ جَنَّتێں شَپ گُش ئے دۆزِہ ءِ تْرانَگ ءَ کَپتَگَت۔
گَرمجَتێں مَردُماں گَرم ءِ تَوجیل چۆ کُت کہ آیاں آپ وارت، وَتی پُچّ کَشِّت ءُ دَور دات اَنت، جاں آپ جَت، گْواتُو زُرت ءُ وَت ءَ گْوات کُت۔ چَرِشیا آیانی جاوَر کَمّے گِہتِر بُوت بلے جَنجال اِش اَت کہ وَہدے آیاں گْواتُو اێر کُت اَنت، پَدا گَرم ءَ اێر دات، پَدا آیانی ھێد رِتک اَنت ءُ نُکّ ھُشک بُوت۔
آیاں باز بَر ءَ آپ وارت، جاں شُشت ءُ وَت ءَ گْوات کُت۔ زْیادَہێں آپ وَرَگ ءَ آیانی لاپ تْرَکَّگی بیت اَنت۔ دَم پہ سَہت ءِ جاں شۆدَگ ءَ لۆگانی آپ ھَلاس بیت اَنت۔ یَکَّجّێں گْوات کَنَگ ءَ آیانی دَست ھُشک بیت اَنت۔ نی گُش ئے گێشتِر گَرم اَت۔ چُکّ ءُ جَنێں گْرێوَگ ءَ اَت اَنت۔ مَردێں پَرێشان اَت اَنت۔ ھَر نێمَگ ءَ کُوکّار اَت، آہ ءُ زاری اَت۔ آیاں زانت کہ اِے گَرم داں سُہبا بازێںے سارت کَنت۔
دۆزِہێں گَرم ءَ آ بُرت اَنت ءُ کَہن ءُ کَہن ءِ کِرّ ئے اوٹَگ ءَ سَر کُت اَنت۔ دێر نَگوَست کہ دیناباد ئے تَوامێں مَردُم، جَنێں داں مَردێں، کَساں داں مَزَن، کَہن ءِ آپ ءَ اَت اَنت۔ کَہن ءِ سارتێں آپ ءَ آیانی گَرم شُشت۔ نی آیانی ھۆش کَمّے بَرجاہ بُوت ءُ وَتی سَر ءَ کَپتَگێں جَنجال ءِ بارَوا ھَیال کَنَگ ءَ لَگِّت اَنت۔ وَڈ وَڈێں گَپّ جَنَگ بُوت۔
دیناباد ئے تَبیب ءَ شَکّ اَت کہ گْوات نادراہ اِنت پَمِشکا کَشِّت نَکَنت۔
سائنس ءُ سْیاسَت ءَ ھُبدارێں وَرناے ءِ ھَیال اَت کہ چاگی ءَ بیتَگێں اَیٹُمی تْراکانی تابکاری ءِ سَوَب ءَ گْوات بَند اِنت۔
مۆسُم ءِ بارَوا کَمّے باز واکُوبێں دِہکانکارے ءِ اَندازَہ اَت کہ گْوات ءِ بَندی آۆکێں تُوپّاںے ءِ نِشانی اِنت۔ اَنچێں سْیَہگواتے گۆں ھَور ءَ کئێت کہ نہ لۆگ کِلّیت، نہ دْرَچک ءُ دار۔
دیناباد ئے پێشِماما یَکین اَت کہ آزمانی گْوات ءِ بَندی بَنیادَم ءِ گُناہانی بَروَرد اِنت ءُ مَہشَر ءِ نِشانیاں یَکّے۔ دێر نَکَنت اِسراپیل کئێت پہ سُور ءِ دَمَگ ءَ۔
کَمّے ھامۆشی بُوت۔ پَدا چِد ءُ تُرسناکێں ھالاں گَردِش کُت۔ اِشانی اِشکُنَگ ءَ ھَریَکّے دِلترَکّ بُوت بلے کَسّ ءَ نَزانت کہ اِے گَپّاں کئے جَنت، اِے ھالاں کئے کاریت۔ چَمے شِگبِگاں یَکّے اِش اَت کہ مُلک ءِ نۆکێں بادشاہ ءَ گْوات ءِ سَر ءَ پابَندی جَتَگ۔ بادشاہ ءَ گُشتَگ مَردُم کہ مَنی گُلام اَنت، گْوات چی ءَ آزات بِبیت۔ اِشکُنَگ ءَ بادشاہ ءَ دۆشی مِہتِر سُلَیماں واب ءَ دیتَگ ءُ اِے پابَندی ھَمے واب ءِ مانا اِنت۔
دِگِہ ھالے اِش اَت کہ گْوات ءِ تَہا مَردُمی ھۆن ءِ بُو ھَوار بیتَگ، پَمِشکا گْوات بَند اِنت۔ نی ھَور کہ بیت آپ ءِ بَدَل ءَ ھۆن رِچیت ءُ مَردُم آپ ءِ بَدَل ءَ ھۆن وَر اَنت۔
اِشیا رَند دِگِہ ھالے تَرِّت کہ ھُدا چَہ مَردُم ءِ ناپَرمانیاں نَوَشّ اِنت ءُ آئی ءَ اِرادَہ کُتَگ کہ گْوات ءَ چِست کَناں، جَہان ءِ دِگِہ کُنڈے ءَ بَراں۔ ھَمۆدا دِگِہ سُرِندَہ ءُ سُرِندَہانی سَروَری جۆڈ کَنان ءُ اِشکُنَگ ءَ، گْوات ءَ رَند واجَہ ھُدا آپ ءَ ھَم بارت۔
تَوامێں شَپ ءَ وَڈ وَڈێں شِگبِگ ءُ ھال تَرِّت۔ یَکّ چَہ یَکّ ءَ بیمناک۔ یَکّ چَہ یَکّ ءَ ھۆشبَر۔ کَسّ ءَ نَزانت کہ اِے ھالاں کئے کاریت بلے دْرُستاں اِشانی سَر ءَ باوَر کُت۔
یَکّ نێمَگے دۆزِہێں گَرم، دُمی نێمَگ ءَ اِے وَڈێں تُرسناکێں گَپّ ءُ ھال۔ دیناباد ئے مَردُمانی دِل کَپتَگَت۔ دْراہ آہ ءُ زاریا اَت اَنت، چَہ ھُدا ءَ دْوا ءُ پِریات ءَ اَت اَنت، تَوبَہ ءُ کُوکُرُو ءَ اَت اَنت۔
اِے مَہشَرێں شَپ پہ ھَزار اَزابی گْوَست ءُ شُت۔ سُہب ءِ سَر ءَ آیاں اَجَبێں نِدارَگے دیت۔ دْرَچکانی تاک سُرَگ ءَ اَت اَنت۔ گْوات کَشَّگ ءَ اَت۔ گْوات ءِ کَشَّگ ءِ تَوار ھَم گۆشاں کَپت۔ گْوات کَشَّگ ءَ اَت بلے آیانی جان ءَ نَلَگِّت ءُ کَس ءَ نَزانت کہ اِے چِہ اِسرارے، چِہ شِزایے۔ آ دِگِہ گَپّے ءَ ھَم ھَیران اَت اَنت کہ اِے گْوات چَہ آزمان ءَ آیَگ ءَ نَہ اَت۔ اِے زِمینی گْواتے اَت ءُ چَہ رۆبَرکَت ءَ کَشَّگ ءَ اَت۔
اِے گَپّ ءَ زَمانَگے گْوَستَگ۔ دیناباد ئے مۆسُم بَدَل نَبیتَگ۔ اَنگَت ھما وَڈ گَرم اِنت۔ چَہ ھما رۆچ ءَ آزمانی گْوات بَند اِنت ءُ چَہ رۆبَرکَت ءَ کَشّۆکێں گْوات آیانی بَدَن ءَ نَلَگّیت۔ پَمِشکا آ شَپ داں رۆچ کَہن ءِ آپ ءَ پُگُلانی وَڈ ءَ وَپتَگ اَنت، پہ ھَمے اُمێت ءَ کہ یَکّ رۆچے کئێت کہ آزمانی گْوات پَدا کَشّیت۔
<سترُنگ><اِم>ناگُماں