مَن چَہ دَریگ ءَ چَمّ شانک دات اَنت۔ اَنگَت ھَور اَت۔ بے بْرَمشێں ھَورے اَت۔ نہ گْوات، نہ گِرۆک، نہ گْرَند… بَسّ رِچان اَت۔ مَن چَہ دَریگ ءَ چَمّ کِنزێنت اَنت ءُ وَتی جَن ماہِکان ءِ نێمَگ ءَ چارِت کہ گْوانزَگ ءِ نَزّیک ءَ جُلّ ءِ سَر ءَ نِشتَگَت ءُ نُنُّک ءَ مێچێنَگ ءَ اَت۔ لۆگ ءِ تَہا، ڈَنّ ءَ ھَر چیزّ پہ اَجام اَت، بے تَوار اَت ءُ مَن شِزار بَیان اَتاں۔ ھَور ءُ آپ مَبُوتێں مَن شُتَگَتاں بازار ءَ وَتی دُکّاں پَچ کُتَگَت۔
گَرماگی نێمرۆچاں چُشێں بے تَوارێں ھَور مَن ءَ دۆست بیت بلے مَرچی نَزاناں چی ءَ دِل لۆٹَگ ءَ اَت کہ ھَور ءِ پَجّیا اَنچێں تْرُندێں گْواتے بِکَشّیت کہ تْرَمپ چۆ تیر ءَ بِبَنت۔ گِرۆک اَنچۆ چیلک بِجَنت کہ آزماں بِدِریت۔ جَمبَر اَنچۆ بِگرَندیت کہ گۆش کَرّ بِبَنت۔ نُنُّک بُگُڈیت ءُ گْرێوَگ ءَ شُرُو بِکَنت ءُ ماہِکاں پَرائی ئے سَہڈێنَگ ءَ نازێنک بِجَنت۔ ھَر نێمَگ ءَ کُوکّار بِبیت، جَگّا بِبیت۔
“مَرچی سُہبا آبّاءَ پَون کُت۔ تَرا سَلام ئِے کُت۔ گُشت ئِے دێم ءِ آدێنَگ ءَ کایاں۔” ماہِکان ءَ بے تَواری پْرۆشت۔
مَن آئی ءِ نێمَگ ءَ چارِت بلے ھِچّ نَگُشت۔ مَن ءَ وَشتَب ءُ مَسکَرابازێں ناکُو ءِ گَپّے گیر اَتک۔ وَہدے سیر ءَ رَند دو سئے ماہ ءِ تَہا ماہِکان ءِ لاپ پُرّ بُوت گُڈا ناکُو ءَ گۆں مَن مَسکَرا کُت: “بَچَکّ! تَو چُکّ ءِ تْراشَگ ءَ زَبر ئے بلے اِے چُکّ کہ پێداگ بیت، تَئی جَنا چَہ تَو بارت ءُ وَتی مات کَنت ءُ تَئی دَپ کَوش ءَ بیت، ھُشکا نِند ئے… ءُ اگں اَوَلی چُکّ بِبیت بَچَکّے گُڈا پِت ءِ نِہر ءَ چَٹ دَور دَنت!”
ءُ مَرچی کہ مئے بَچَکُّو ءَ کَمّ ءُ گێش دو ماہ بَیَگ ءَ اَت، مَن ءَ سَما بُوت کہ ناکُو ءِ مَسکَرا داں ھَدّے ءَ راست اِنت۔ ھما اِنت کہ چُکّ پێدا بیتَگ، ماہِکاں مَنی ھَیال ءَ نَہ اِنت۔ ھَروَہد گۆں ھَمائی ءَ گَپّ جَنت۔ کَندیت گۆں ھَمائی ءَ ، وَپتَگ گۆں ھَمائی ءَ ، بَسّ ناں گۆں مَن وارت۔
“مَن پِت ءَ را گُشت کہ نُنُّک ءِ واست ءَ نِندَگی گاڈیے بْیار گۆں،” ماہِکان ءَ مِچۆکێں نُنُّک ءِ نێمَگ ءَ پہ مِہر چارانا گُشت۔
پێش ءَ اِے وَڈێں مَستێں مۆسُماں چے چے نَبُوت… بلے نی آ شَہدێں گَپّ ءُ مَجلِسانی جاگَہ نُنُّک ءِ نِنَدگی گاڈی ءَ گِپتَگَت۔ مَن نُنُّک ءِ نێمَگ ءَ چارِت۔ آ اَنچۆ آرام ءَ شیر مِچَگ ءَ اَت گُش ئے مَن ءَ سۆکلُو دیَگ ءَ اِنت کہ بِچار، مَن چۆن تَئی نِہر دَور داتَگ۔
“نُنُّک ءَ چی ءَ چۆ رۆک رۆک ءَ چارَگ ءَ ئے؟” ماہکانا پہ دابے گُشت۔
“تَو اَنچۆ گَپّ ءَ ئے گُش ئے نُنُّک اێوک ءَ تئیگ اِنت ءُ مَن آئی ءِ دُزَّگ ءَ اَتکَگاں۔” مَن بِچکَندِت۔
“تَو وَ دُزّے ئے، اَنچۆ چارَگ چارَگ ءَ مَنی دِل دُزِّت ءُ بُرت۔”
چُکّ ءِ بَیَگ ءَ پَد اِے اَوَلی رَند اَت کہ آ گۆں مَن وَشّێں وَشّێں گَپّ جَنَگ ءَ اَت۔ مَن چَہ تَہت ءِ سَر ءَ پاد اَتکان ءُ شُتاں بُن ءَ آئی ءِ کَش ءَ نِشتاں۔
“مَرچی شیرکِنێں گَپّ جَنَگ ءَ ئے۔ دِگِہ نُنُّکے لۆٹ ئے زاناں؟” مَن بِچکَندانا آئی ءِ چَمّانی تَہا چارِت۔
“دیر آ!” آئی ءَ لَجّ بُوت۔
مَن کَندان ءَ گۆں نُنُّک ءَ گُشت: “اَڈ ءِ ءُ شَیتاں! اِے پێسَر ءَ مَنی جَن اِنت، رَند ءَ تَئی مات اِنت۔ سَرپَد بَئے؟ ھما اِنت کہ تَو اَتکَگ ءِ، اِے مارا دَپی جُستے ھَم نَکَنت۔ شاباش، نی وَتی چَمّاں بُوٹّ، مَن وَتی جَنا چُکّاں۔”
مَن گۆں نُنُّک ءَ ھۆر آ گُلاێش کُت۔ نُنُّک وَتی ءُ وَتی مات ءِ سَر ءَ چَرے ناگَتێں اُرُش ءَ دِلوارَگ بُوت ءُ دَپ ئِے پَچ کَشِّت ءُ گْرێوَگ ءَ لَگِّت۔ ماہِکان ءَ گُشادیا وَت ءَ را چَہ مَن گیشّێنت ءُ نُنُّک ءِ سَہڈێنَگ ءَ لَگِّت ءُ آئی ءَ را چُکَّگ ءِ اِشکِرێں واہَگ مَنی لُنٹاں سۆچاں بُوت۔ مَن ءَ پَدا ناکُو ءِ گَپّ گیر اَتک۔
ھَمے شَپ ءَ کہ ھَور اَنگَت گْواران اَت، نُنُّک ءِ بَیَگ ءَ پَد اَوَلی رَند ءَ مَن ءُ ماہِکاں یَجّاہ بیتێں۔ بلے ھَمے وَہد ءَ نُنُّک ءَ وَسَّرا وَت چیووَلَگے جَت۔ ماہِکاں مَنیگی نَبُوت، گُشادیا پاد اَتک ءُ گْوانزگ ئے چَنڈێنگا لَگِّت۔ چَنڈێنَگ ءَ نُنُّک ءَ بَسّ نَکُت گُڈا ماہِکان ءَ مێچێنت۔ نُنُّک ءَ گْرێوَگ بَسّ کُت ءُ واب کَپت بلے وَہدے ما پَدا یَجّاہ بیتێں نُنُّک پَدا شُرُو بُوت ءُ اِے رَندی نہ چَنڈێنَگ ءَ بَسّ ئِے کُت، نہ مێچێنَگ ءَ۔ مَن نُرُنڈَگ ءَ لَگِّتاں۔
“ماتکُس! دِگِہ وَہد ءَ ھِچّ نَگُشیت، بَسّ ھَمے سَہت ءَ دَپ ءَ پَچ کَشّیت۔ دِل گُشیت مان ئِے بُرّ آنگُر۔”
“اَلّاہ! چۆ مَگُش نُنُّک ءَ !” ماہِکان ءَ تَورِت۔
“ھُومّم۔” مَن جَوَڈانا دُمی کۆٹی ءَ شُت ءُ وَپتاں۔ نی نُنُّک ءَ پَنچ مِلِٹّ ءَ گْرێت ءُ پَنچ مِلِٹّ ءَ بے تَوار بُوت۔ بَرے ماہِکان ءِ نازێنکانی تَوار اَتک ءُ بَرے کُپَّگانی۔ یَکّ رَندے آئی ءَ نُنُّک بَڈّ ءَ کُت ءُ مَنی کِرّا اَتک۔
“نُنُّک ءَ بارێں چے اِنت۔ نَزاناں چۆن بِکَناں؟” آئی ءِ لُنٹ لۆنجان اَت اَنت۔
مَن تَسَلّا دات۔ “ھِچّ مَکَن۔ اِے اُمر ءَ نُنُّکانی کار گْرێوَگ اِنت ءُ بَسّ۔”
“بلے پێش ءَ چۆ نَگرێتَگ ئِے۔ بَلکێں وَشّ نَہ اِنت۔ داکتَرے نیار ئے؟” آئی ءَ بَزَّگ بَزَّگ ءَ مَن ءَ چارِت۔
مَن ٹێمب چارِت ءُ گُشت: “نی شَپ ءِ دو اِنت۔ مێتَگ ءِ داکتَر واب بَنت ءُ پَدا ھَور اِنت۔”
آ گۆں دِلگرانی شُت۔ نُنُّک ءِ چیووَلَگ ءُ چیہانٹ کَمّ نَبیت اَنت۔ ماہِکاں پَدا اَتک۔ اِے رَندی گْرێوان اَت۔
“داکتَرے نیار ئے؟” آئی ءَ بَسّ ھَمینچُک گُشت ءُ ھِڈِکَّگ ءَ لَگِّت۔
مَن تَوکَل کُت، پَرپَٹ زُرت ءُ ھَور ءَ رێچانا شُتاں۔ مێتَگ ءِ اِسپِتال ءِ دو داکتَر اَت اَنت کہ چَمِشاں یَکّے مَنی کْوَہنێں سَنگَتے اَت ءُ اِسکۆل ءِ زَمانگا مَنی ھَمجُماِت بیتَگَت۔ مَن وَ ھَیر دَہ ءَ رَند وانَگ یَلَہ دات ءُ پِت ءِ دوێں دُکّاناں یَکّے زُرت ءُ نِشتاں بلے آئی ءَ وَنت ءُ داکتَر بُوت۔
مَن آ چَہ واب ءَ پاد کُت ءُ آُرت۔ آئی ءَ نُنُّک دَوا ءُ دَرماں کُت۔ سَنگَتی ءِ چارَگ ئِے کُت ءُ پیس ئِے ھَم نَزُرت ءُ گُشت ئِے کہ باندا سُہبا نُنُّک ءَ اِسپِتال ءَ بْیار کہ شَرّی ءَ اِلاج ئِے بِبیت۔
داکتَر ءِ رَسێنَگ ءَ پَد وَہدے مَن اَتکاں داں نُنُّک ءُ مات ھَرد واب اَت اَنت۔ مَن شُت ءُ دُمی بان ءَ وَپتاں۔
سُہبا مَہلَو ماہِکان ءَ مَن ءَ پاد کُت۔ مَن ءَ واب سَر ءَ اَت۔ تْرُندا تْرُند جُست کُت: “ھاں، نی چےے؟”
آئی ءَ گْرێوان ءَ پَسَّو دات: “نُنُّک مُرتَگ۔”
“نُنُّک مُرتَگ؟” مَنی واب ءَ بال کُت۔ مَن تَتَّرانا دێم پہ گْوانزَگ ءَ شُتاں۔ گۆں لَرزۆکێں دَستاں گْوانزَگ ءِ دێمدار لێٹێنت ءُ نُنُّک چارِت۔ گُش ئے آئی ءِ بے نُورێں دێم گُشَگ ءَ اَت: “آبّا! نی مَن بِہ نَگرێواں۔”
چَہ مَنی چَمّاں آرس شێپ گِپت اَنت۔
ھَمے شَپ ءَ مَن وابے دیت۔ گِنداں کہ نُنُّک زِندَگ اِنت۔ مَن ءُ ماہِکاں نُنُّک ءِ دێم ءَ اوشتاتَگێں۔ مَن نُنُّک ءَ گُشاں بْیا۔ آ وَتی چَپّێں پاد ءِ چُنکی لَنکُک ءَ سِندیت ءُ مَنی نێمَگ ءَ چَگَل دَنت ءُ وَت مات ءِ نێمَگ ءَ رَوت۔
مَن چَہ واب ءَ گُڈِتاں، اِینگُر آنگُر چارِت۔ مَہِکاں نِپادانی سَر ءَ نَہ اَت۔ آ گْوانزَگ ءِ دێم ءَ نِشتَگ ءُ گْرێوَگ ءَ اَت۔ مَن پاد اَتک ءُ آئی ءِ کِرّا شُتاں، آئی ءِ آرس پَہک کُت اَنت، تَسَلّا دات ءُ آُرت ءُ واپێنت۔
چیزّے رۆچ ءَ رَند دُکّان ءِ کارے ءَ مَن کَراچی ءَ شُتاں۔ دو سئے ھَپتَگ ھَمانگُر لَگِّت۔ وَہدے پَدا اَتکاں، نُنُّک ءِ مِرَگ ءَ ماہے بیتَگَت۔ سَرزاہِرا ماہِکان ءَ اَوَلی نُنُّک ءِ بے رانی ءِ گَم وارتَگَت ءُ اِے دِگِرانی وَڈ ءَ زِند ءِ کارَوان ءَ گۆن اَت۔ مَن ءَ ھَم اَنچۆ سَما بُوت گُش ئے ھَر چیزّ سَرجَم اِنت۔ ھِچّ ئے کَمّی نَہ اِنت۔ گُش ئے نُنُّک ءِ ھاجَت نَبیتَگ۔ گُش ئے آئی ءِ جِند بِہ نَبیتَگ۔
ھَمے شَپ ءَ وَہدے مَن ءُ ماہِکاں یَجّاہ بیتێں، اَناگَہا آ گُش ئے گُڈِت۔ پاد اَتک ءُ نِشت ءُ اِینگُر آنگُر چارَگ ءَ لَگِّت۔ مَن ھَیراں بیتاں بلے گۆں نَرمی جُست کُت:
“چِہ گَپّے، ماہِکاں؟”
آئی ءَ گۆں اَرسیگێں چَمّے جَواب دات: “مَنی گۆشاں نُنُّک ءِ گْرێوَگانی تَوار اَتک۔”
<سترُنگ><اِم>ناگُماں