(دِلگۆش: اِے گَپّ چَہ ناگُمان ءِ وَٹساپی تَواربَنداں زیرَگ بیتَگ اَنت۔)
شَہید وَت شَرّ اِنت۔ شَہمیر ءِ مانا شَہید نَہ اِنت۔ شَہمیر ءِ مانا میرانی شاہ، میرانی بادشاہ بِزاں مَزنێں میر۔
دِگِہ لَہتے مَردُم پہ شَہید ءَ “نَمیراں”ئے لَبز ءَ کارمَرز کَنت۔ مَنی دِل ءَ اِے ھَم شَرّ نَہ اِنت۔ نَمیراں ھما اِنت کہ داِم زِندَگ اِنت۔ اِنگرێزی ءَ “اِیمُّرتَل” اِنت، ھِندی ءَ “اَمَر” اِنت۔ چۆشێں بازێں مَردُمے ھَست کہ شَہید نَبیتَگ اَنت، بلے نَمیران اَنت۔ بَلۆچی ءِ شاِری ءَ اَتا شاد نَمیران اِنت، بلے شَہیدے نَہ اِنت۔
شَہید رَجانک نَلۆٹیت۔ شَہید وَت شَرّ اِنت۔ اِدارَہ، سْیاسَت، سائنس، سَواب، اِیماں، پیزّا، بَرگَر، جَگ، گِلاس، وَت شَرّ اَنت۔ رَجانک نَلۆٹ اَنت۔
دِگِہ گَپّے اِش اِنت کہ اِینچ رَجانکاری دُنیا ءِ ھِچّ زُبان ءَ نَکُتَگ، بے کِ مئے ھَمے چیزّے مَردُم ءَ ۔ مئے کَش ءُ گْوَر ءِ زُباناں بِچار، سِندی اِنت، پَشتُو اِنت، پَنجاپی اِنت، اُردُو اِنت، پارسی اِنت۔ کَسّ لَبزاں اِینچ رَجانک نَکَنت۔ اِنگرێزی ءَ بِچار۔ اِنگرێزی دُنیا ءِ دێماتِرێں زُبان اِنت۔ کَسّ ءَ نَِشکُتَگ کہ اِنگرێزی ءَ لَبزے رَجانک کُتَگ۔ اِنگرێزی بِہ رَجانک نَکَنت، ھَمائی ءِ جِند ءَ زیریت، تَوار ءِ بَدَلێنیت وَتی ھِساب ءَ ، بلے رَجانک مَجانک نَکَنت۔ بِچار “پِرکِنت”ئے لَبز اِنت۔ اِے لاتینی لَبزے، “پِر”ئے مانا اِنت “تَہا”، “کِنت”ئے مانا اِنت “سَد”۔ نی اِنگرێز اگں بُگُشیت “ٹْری اِین ھُوندرِد”، بیت کَنت۔ آ کُت ئِے کَن اَنت بلے نَکَنَنت ئِے۔ “ٹْری پِرکِنت”اِش زُرتَگ کہ لاتینی لَبزے، بلے رَجانکِش نَکُتَگ۔
اِشیا اَبَید، اِے سائنسی زُباں ھَرچی کہ ھَست اِنت اِنگرێزی ءَ ، اِنگرێزِش کارمَرز کَن اَنت، سائنسی گالبَند دْرُست لاتینی ءُ یُونانی اَنت۔ اِنگرێزانی کِرّا زُبانزانت ھَست، زَرّ ءُ زۆر ھَست بلے آ گالبَنداں رَجانک نَکَنت۔
مَن ھَیراں آں۔ دِگِہ زُباں دِگِہ راہے ءَ رَوان اَنت بلے مئے مَردُم نِشتَگ ءُ بے سَرێں لَبز تْراش اَنت ءُ بَلۆچی ءَ جِنّی زُبانے کَنَگ ءَ اَنت!
<سترُنگ><اِم>ناگُماں