گَرماگی بے گاہے۔ مَن ھاسٹَل ءَ وَتی کۆٹی ءَ اێوک آں۔ کِتاب مَنی دێم ءَ اِنت۔ وَتی مَنّاں وانَگ ءَ آں بلے ھَیال سَہت ءُ دَمان ءَ ٹَگَلیت۔ دو رۆچ بیت کہ مَنی سَنگَتے گاڈیے ءَ دام کُتَگ، کُشتَگ۔ ھما اِنت کہ اِے سَنگَت مُرتَگ مَن یَپَّیما ھَمے ھَیال ءَ آں کہ زِندَگی چےے؟ پَرچا دَمان ءَ ھَلّیت؟ زِند ءِ مِنزِل مُدام مَرگ اِنت پَرچا؟
مَن داکتَری وانَگ ءَ آں۔ اِم بی بی اِس ئے گُڈّی سال ءَ آں۔ اِنسان ءِ زِند، آئی ءِ زِندَگێں جان ءِ راہ ءُ رَہبَند ءُ آئی ءِ ناجۆڈیانی بابَت ءَ بازێں کِتابے وَنتَگ، چَہ اُستاداں بازێں گَپّ ءُ ترانے اِشکُتَگ، وَت ھَم ھَیال کُتَگ بلے اَنگَت زِند ءِ بابَت ءَ مَنی جُست بے پَسَّو اَنت۔
اِے جاوَر بَرے بَرے مَن ءَ دِلپرۆش کَنت۔ دِل گُشیت بِلّ اِے داکتَری ءَ ، زِند ءَ مَرگ ھَر پَیم پِر اِنت۔ مُپتا وَتی چَمّانی ھیردَگاں پَرچا رێچ ءِ؟ سۆچ اِے کِتاب ءُ دَرمانی دُنیا ءَ ۔ بُرَو جَنگَل ءُ گْیاباںے ءَ۔ مَستێں کَوش ءَ لُڈّۆکێں دْرَچکانی ساہِگ ءَ بِنِند ءُ آیانی ژامب ژامب ءَ گۆش دار۔ بِکَشّ اِمرۆز ءِ وَشّێں کَوش۔ ماہِکانێں شَپاں بُرزێں کۆہے ءِ ٹُلّ ءَ بِنِند ءُ ماہ ءَ بِچار۔ بِگَرد، سَیل کَن۔ پَرے جَنگَل ءُ پَر ءَ کۆہِستاں۔ زِند ءِ چارێں رۆچاں چَہ دُنیائی گَم ءُ گَرَٹّیاں دیر دِلسِرێں اَبرَم ءِ ھَمساہِگی ءَ گْوازێں۔
مَنی چَمّ اَلماری ءَ جَتَگێں اِسٹیکَر ئے نێمَگ ءَ رَو اَنت۔ زَردێں کاگَد ءِ سَر ءَ گۆں سُہرێں لَبزاں نِبِشتَہ اِنت:
دُن’ت تَکہ لیپِ تُو سِریُُوسل ئِے۔ اِیت اِیسن’ت پِرمَنِنت۔
مَنی کۆٹی ءَ دِگِہ ھِچّ اَکس، سالدَر یا دِگِہ چیزّ نَجَتَگ۔ بَسّ ھَمے یَکّێں اِسٹیکَر اِنت کہ مَن چَہ بازار ءَ یَکّ رۆچے آُرت ءُ جَت۔ اِ مَنی دِلپَسُندێں گُشتِناں یَکّے۔ مَن ھَمے گُشتِن ءِ پَدا زِند ءَ گۆں بے پِکریا گْوازێنَگ لۆٹاں۔
گْرانێں تَوارے مَنی گۆشاں کَپان اِنت۔ گُش ئے جَمبَر گْرَندَگ ءَ اِنت یا بالیگُرابے گْوَزَگ ءَ اِنت۔ مَن پَردَہ ءَ کِنزێنان ءُ دَریگ ءَ ڈَنّ چاراں۔ ڈَنّ ءَ ھَور اِنت۔
مَنی کۆٹی بُرز بُرزی تَبَکّ ءَ اِنت۔ چَہ دَریگ ءَ دیر دیر ءِ نِدارَگ گِندَگ بیت۔ ھاسٹَل ءِ نَزّیکێں کَور، کَور ءَ آدَست ئے مُلک ءُ ڈِگار، بان ءُ ماڈی، دیر بُرزێں کۆہِ مُردار ءُ پَدا آزماں۔ بلے نی اِے نِدارَگ کَپّی اِنت۔ ھَور ءَ آزمان ءُ کۆہ اَندێم کُتَگ اَنت۔
ھَور تْرُند بَیان اِنت۔ آ دو مَردُم اَنت۔ ھَور ءَ گِپتَگ اَنت۔ تَچانا دێم پہ پْراہ ءُ بَزێں دْرَچکے ءَ رَوَگ ءَ اَنت کہ آئی ءِ چێرا پَسے پێسَر ءَ اوشتاتَگ۔ گِند ئے دْرَچک ھَم پہ نِوان ءُ پَناہ ءَ بِتَچ اَنت گُڈا لَیب بیت۔ بلے اِے نَتَچ اَنت۔ گَرم بیت یا گْوَہر، گْوات بیت یا ھَور، گۆریچ بیت یا لِوار، تَپَر بیت یا ھَرَّگ… اِے اوشتاتَگ اَنت۔ مِر اَنت یا زِندَگ بَنت بلے نَتَچ اَنت۔ اِشانی ھَم زِندے۔ دْرێگَتێں مَن دْرَچکے بیتێناں۔ کَمّ چَہ کَمّ مَنی تَہا مَرگ ءِ دێم ءَ اوشتَگ ءِ ھِمَّت یا مَجبُوری وَ بیتَگَت۔
یَکّے دَروازَگ ءَ پَجّارۆکێں وَڈے ءَ ٹُکّیت۔ مَن گُشاں بْیا ءُ آ پُتِریت۔ اِے کَنٹین ءِ کَماشێں نَوکَر اِنت کہ آپ ءُ چاہ ءِ جُست ءَ اَتکَگ۔
“داکتَر ساہِب، چاہ بْیاراں؟” آ جُست کَنت۔
مَن سَر ءَ پہ ھَو سُرێنان ءُ آ دَر کئێت۔ اِے ھَم مَردُمے۔ زِند ءِ بارَوا اِشیا ھَم ھَیالے ھَست؟ وَڈ وَڈێں گَپّ دِل ءَ کاریت؟ نَزاناں چُشێں مۆسُم ءَ آ مَنی وَڈ ءَ زِند ءُ مَرگ ءِ ھَیالان اِنت یا چۆ دْرَچک ءَ چُشێں چیزّاں بے ھاجَت اِنت؟
سَہتُکے ءَ رَند آ گۆں چاہ ءَ کئێت۔
“ناکُو!” مَن چاہ ءَ دَست گِراں۔
“ھاں جی۔” “اێدا کُرشی ءِ سَر ءَ بِنِند۔ مَن چَہ تَو جُستے کَناں۔”
آ نِندیت۔
“اَنّی اِے مۆسُم ءَ کہ ھَور گْواران اِنت، گِرۆک چیلک وَران اِنت، جَمبَر گْرَندان اِنت، دْراہێں ڈَنّ ءُ ڈِگار آپ اِنت، اِے وَڈێں وَہداں تَئی دِل ءَ چۆنێں ھَیال کئێت؟”
مَنی جُست ءَ آ ھَیران اِنت۔ گُش ئے مَن اَنچێں گَپّے جَتَگ کہ اێوک ءَ گْوَنڈُواں یا گَنۆکاں بْراہیت۔ آ مَنی گَپّ ءَ سَرپَد بَیَگ ءِ جُہد ءَ اِنت ءُ مَن چَہ وَتی جُست ءَ پَشۆماں آں۔
کَمّے ھَیال کَنَگ ءَ رَند آ گُشیت:
“مَن گُشاں ھَور مَبیت۔”
“چی ءَ ؟” نی مَن ھَیراں آں۔
“اگں ھَور بَسّ مَکَنت مَنی ھاک ءُ گِل ءِ لۆگ کَپیت۔”
مَن ناکُو ءَ چاران ءُ پَدا مَنی چَمّ اِسٹیکَرا رَو اَنت بلے ھِچّ نَگُشاں۔ دانکہ چاہ ءَ ھَلّێناں۔
دێر اِنت کہ ناکُو ءَ چاہ ءِ ھالیگێں کۆپ زُرتَگ ءُ چَہ کۆٹی ءَ دَر اَتکَگ۔ ڈَنّ ءَ اَنگَت ھَور اِنت۔ گْرَند ءُ گِرۆک اِنت۔ دْرَچک ءِ باہۆٹ اَنگَت اوشتاتَگ اَنت ءُ اِسٹیکَر…؟
اِسٹیکَر ئے دِرتَگێں ٹُکُّر بُوچدان ئے تَہا کَپتَگ اَنت!
<سترُنگ><اِم>ناگُماں