بَرے یَکّ ھاجَتے سایاں بَرے نۆکێں گَمے مێناں
مَن ءَ دَرماں بِرێپێنیت ءُ دَردے مَن بِرێپێناں
سَگارے، مَرکَبے، کَبرے نہ داوا نہ گُبارے ھَست
کئے اِنت اَنگا سُرێناں کَنت مَندیلاں نِگارێناں
ھَیالانی دَمَگ سَبز اِنت ءُ وَہمانی رَمَگ تالاں
زِمین چۆ آزمان ءَ اِنت ءُ دَرداں شێنک چارێناں
اِے دِل اِے مِہلَبێں رَنگانی آدّیرَہ سَلامَت بات
اگں مۆسُم بِمَٹّیت مَن دِگِہ نیمّۆنے بادێناں
کُجام کِشک ءَ آ واتَرّیت، کُجام ھَنکێن ءَ مِنزِل کَنت
دَمے پێسَر بْیَتکێناں یا سَہتے پَش بِکَپتێناں
تَئی اوست ءِ تاہَت ءِ سِتک ءَ بَہِشتے سازِتَگ پہ مَن
نِگاہ چۆ سُجدَگ ءَ دْرَتک اَنت دَریگاں بے نُمازێناں
ھما اَرمان ءَ رُشنا کَن، ھما کْوَہنێں دِل ءَ بالێں
اِے شَپ داں مِنزِلے بُرتَگ چِراگاں نۆکگامێناں
مُنیر شَیدائیں مُرگان ءَ مَنی ھَلک ءِ اَمانَت گۆں
ھَتَم ماں بانزُلاں پێتکَگ کَپۆتاں دِلگَیابێناں
<سترُنگ><اِم>مُنیر مۆمِن