وَشّێں دیوانے اَت ءُ نی چِد ءُ وَشتِر بَیان اَت۔ سْیاسَت، لَبزانک، پِلِم ءُ دِگِہ بازێں بُنگَپّے ءَ پَد نی دیواں ھیرّۆکیانی بَڈّ ءَ کَپتَگَت۔ ھَریَکّے آیانی جَٹّی ئے کِسَّہاں آرَگ ءَ اَت ءُ اێدِگِ ٹَہک دیان اَت اَنت۔
مَن نَزانت کہ چۆن بِکَناں چی ءَ کہ مَنی مَستِرێں بْرات ءَ ھَمانگُر سانگے کُتَگَت ءُ نی نێمہیرّۆکیے اَت۔ اِے پَیم مَن ھَم چارِکے، چُنڈُکے ھیرّۆکیے اَتاں۔ آیانی مَسکَرایانی سَر ءَ مَن کَندَگ ءَ اَتاں بلے کَمّے نَگێگ اَتاں۔
دیوان ءَ چیزّے دَرامَدێں مَردُم ھَم نِندۆک اَت۔ آ گۆں اێدِگِ سَنگَتاں پَجّارۆک اَت اَنت بلے مَن نَزانت اَنت۔ ھما سَنگَت ءِ کہ مِہمان اَت اَنت، آئی ءَ آیانی پَجّار کُت ءُ گُشت کہ گْوادِر ءِ مَردُم اَنت۔ مِہماں زیتّاں گۆں مَن ھۆر ءُ تۆر بیت اَنت۔ اَلبَت چَہ آیاں یَکّے بے تْرِکّ ءُ تَوار نِشتَگَت۔ بَرے بَرے بِچکَندِت ئِے بلے گَپّ ئِے ھِچّ نَجَت۔ اَوَل ءَ مَن زانت نَکُت کہ چۆنێں مَردُمے۔ بارێں نابُودے ءُ گَپّ نَزانت یا بَلاہێں دانایے ءُ مئے گَپّ ءُ ھَبَر ئِے ماں نَیا اَنت بلے رَندتِرا مَن ءَ سَما بُوت کہ اِے نابُودے۔ لاِکێں مَردُمے دیواںے ءَ نِندۆک بِبیت گُڈا مَردُم آئی ءَ چۆ ڈالچار نَکَن اَنت۔ گَپّ گَپّ ءِ تَہا بَرے بَرے آئی ءِ نێمَگ ءَ چار اَنت یا جُست گِر اَنت کہ “اَنچۆ نَہ اِنت واجَہ؟”“ جُست گِرَگ وَتی جاگَہ ءَ ، کَسّ ءَ یَکّ رَندے آئی ءِ نێمَگ ءَ نَچارِت ھَم، ءُ آ ھَم بے تَوار اَت۔
مَن کَمّے ھَمے بے وانکێں وَرنا ءِ بارَوا ھَیال کُت بلے پَدا گۆں دیوان ءَ دِلگۆش بیتاں۔
یَکّے گُشَگ ءَ اَت: “ھیرّۆکا یَکّے ءَ وَتی ڈِگار ءَ شَکَر کِشتَگ کہ بِلّ ئِے رُد اَنت۔”
دْرُستاں کَندِت۔ وَہدے کَندَگاں تَم کُت، مَن دَرّاێنت: “بُندَر ءَ گَپّ چُش اِنت کہ ھَمے مَردَک ءَ دُکّاںے ءَ سَرکاری سَماتے زُرتَگ۔ اِندِگِ رۆچ ءَ وَتی چُکّ ئِے دێم داتَگ کہ بُرَو دُکّان ءَ سَمات ءَ بِزیر ءُ ڈِگار ءِ سَر ءَ بَر۔ دُکّاندار گۆں گِراکاں گَٹّ بیتَگ۔ بَچَکّ ءَ سَمات ءِ بَدَل ءَ ھَمرَنگێں شَکَری گۆنیے بَڈّ ءَ کُتَگ ءُ بُرتَگ۔ شَپ ماہِکانی بیتَگ۔ کَماش ءَ ھَمے شَکَر ءِ گۆنی زُرتَگ ءُ ڈِگار ءَ چَنڈاں کُتَگ۔ اِندِگِ سُہبا شُتَگ داں ڈِگار سْیاہ سْیاہ اِنت چَہ مۆر ءَ ۔”
ٹَہک پَدا رُست اَنت۔ نابُود ھَم بِچکَندگا اَت۔
“دِگِہ لَہتے ھیرّۆکیاں زان ئے چے کُتَگ؟” یَکّے ءَ کُوکّار کُت ءُ دیواں گۆں ھَمائی ءَ دِلگۆش بُوت۔ “جَرنَیٹَرِش تێلانک داتَگ کہ چالُو بِبیت۔”
دْرُستاں پَدا ٹَہک دات۔ وَہدے کَندَگ ءَ سێرِش کُت گُڈا مَن گُشت: “تێلانکِش نَداتَگ، کَشّانِش کُتَگ۔ چۆ بیتَگ کہ ھَمے جَرنێٹَر ئے کِکّ تْرُند بیتَگ۔ یَکّے ءَ چالُو کُت نَکُتَگ۔ گُڈا کِکّ ءِ ساد ءِ سَر ءَ دِگِہ سادے بَستَگِش ءُ پَنچ شَش مَردُم ءَ گِپتَگ ءُ کَشِّتَگ۔ جَرنێٹَر چالُو وَ بیتَگ بلے داں گَپَّڈے ءَ گِرّاں بیتَگ۔”
مَن پَدا ھما نابُودێں وَرنا ءِ نێمَگ ءَ چارِت۔ آ مَنی نێمَگ ءَ چارَگ ءُ بِچکَندگا اَت۔ مَن زانت نَکُت کہ آ ھیرّۆکیانی سَر ءَ بِچکَندگا اَت، جَرنێٹَر ئے سَر ءَ یا مَنی سَر ءَ ؟
“ھیرّۆکا ناگُمان ءِ بْرات ءِ سیر بیتَگ۔ لادیے بَرپِش زُرتَگ ءُ چات ءَ کُتَگ کہ آپ سارت بِبَنت۔” دِگِرے ءَ مَنی نێمَگ ءَ چارانا وَتی دانک دَور دات۔
“مَنی بْرات ءِ سیر ءَ نہ۔ دِگِرے ءِ سیر ءَ بَرپِش چات ءَ کُتَگ،” مَن کَندان ءَ گُشت۔ مَن دیت کہ دیواں لاپلێٹی وَرَگ ءَ اَت۔ بلے آ نابُود بَسّ بِچکَندگا اَت۔ چۆنێں گْرانتَبے، کَندَگ ھَم نَزانت۔
“ھیرّۆکیاں ھَمے زیتّاں دِگِہ جَٹّیے کُتَگ۔ شُما سَہی اِت؟” دِگِرے ءَ جار جَت۔ دْراہ دِلگۆش بیت اَنت۔ آ نابُود ھَم۔
“اَنّی 1996 ءِ وَرلڈکَپ کِرکِٹ کہ بُوت، اِے ھَوپ ءَ دِگِہ جاہاں اَبَید ھیرّۆک ھَم ماں پَتات ءُ اود ءَ ھَم کِرکِٹ شُرُو بُوت۔ یَکّ لَیبیے ءَ اَوَلی اُوَر ئے اَوَلی بۆل ءِ سَر ءَ سئے سَد رَن جۆڈ کُت۔”
کَندَگ ءُ کُوکّار رُست اَنت۔
“اِے پَکّائیں دْرۆگے۔” مَن اَڈی کُت۔ اِے پہ مَن نۆکێں ھالے اَت۔
“دْرۆگے نَہ اِنت۔ راستے۔ تَو وَ شالا ئے۔ ھیرّۆک ئے ھال ءَ چے زان ئے۔ زان ئے ھَمائی ءَ کہ سئے سَد رَن جۆڈ کُتَگ کئے بیتَگ؟”
“نہ،” مَن گُشت۔
“تَئی بْرات سالِہ بیتَگ،” آئی ءَ گُشت ءُ دْرُستاں پَدا ٹَہک دات۔
“گُڈا یَکّ بۆلے ءِ سَر ءَ اِینچُک رَن؟” مَن ءَ باوَر نَبُوت۔
“چۆ بیتَگ کہ بۆل شُتَگ مُشکی ھۆنڈے ءَ پُتِرتَگ۔ دانکہ دُمی ٹیم ءِ مَردُماں کۆڈالے آُرتَگ ءُ زِمین کۆنڈِتَگ ءُ بۆل دَر کُتَگ، اِے نێمَگ ءَ تَئی بْرات ءَ تَتکَگ ءُ رَن جۆڈ کُتَگ۔ یَکّ سَد ءُ پَنجاہ رَنا رَند نِشتَگ دَم ئِے کُتَگ ءُ پَدا شُرُو بیتَگ تَچَگ ءَ۔ وَہدے رَن سئے سَد ءَ رَسِتَگ اَنت، گُڈا آئی ءَ تَچَگ بَند کُتَگ ءُ مَیچ چَمۆدا کُٹّێنَگ بیتَگ۔ آ “مَردِ مَیداں” کَرار دیَگ بیتَگ۔ اِندِگِ رۆچ ءَ اِے وَرلڈ رِکارڈ ئے سَر ءَ سالِہ ئے ٹیم ءَ گۆکے کُشتَگ ءُ ھَیرات کُتَگ۔”
دْراہ کَندَگ ءُ لاپلێٹی وَرَگ ءَ اَت اَنت۔ مَن کَندان ءَ آ نابُود ئے نێمَگ ءَ چارِت۔ اێوک ءَ بِچکَندگا اَت۔
اِے بے ھَبَرێں نابُودا بِچار، چُشێں وَشّێں دیواںے ءَ نِشتَگ، اَنگَت نہ گَپّے جَنت نہ کَندیت۔ بُتابُت اِنت، نِشتَگ۔ اِشی ئے ھَمراہ اَنگَت نِشتَگ ءُ ھیرّۆکیاں کَلاگ زیر اَنت۔ وَتی نابُودێں ھَمراہ ءَ نَگِند اَنت۔
مَنی اوپار ءِ بَند پْرُشت۔ مَن دێم گۆں نابُودا کُت بلے کَندان ءَ گُشت: “اَڈ ءِ، تَو نہ گَپّے جن ئے، نہ کَندَگے۔ بَلکێں بُنیاد ءَ ھیرّۆکیے ئے؟”
نابُودا ھِچّ نَگُشت بلے مَن دیت کہ دْرُستانی کَندَگ یَکدَم اوشتات اَنت ءُ یَکّے دُمیگ ءِ نێمَگ ءَ چارِتِش۔ مَنی کَندَگ ھَم اوشتات۔ مَن ھَیراں بیتاں کہ چِہ گَپّے بُوت۔
“اِے گُنگے،” مِہماندارێں سَنگَت ءَ دَرّاێنت ءُ مَن پَشۆماں بیتاں کہ مُپتا بَزَّگ ءَ را نابُود ءُ بارێں چے چے گُشتَگ۔
“مئے ھَند ءِ وانِندَگتِرێں مَردُماں یَکّے۔ اِشیا شَہزانتی اِم ئے کُتَگ،” چَہ گُنگ ءِ ھَمراہاں یَکّے ءَ گُشت۔
مَن سَکّ بے وار اَتاں۔ چۆنێں لاِکێں مَردُمے۔ چَہ مَن گێشتِری وَنتَگ۔ نابُود آ نَہ اِنت۔ نابُود وَ مَن آں کہ مَردُم ءِ پَجّاہ آرَگ ءَ رَد وَراں۔
“مَن ءَ بِبَکش، یار!” مَن گُنگ ءِ دَست گِپت اَنت۔ “مَن نَزانتَگ۔ تَرا ھَزار آپرین اِنت کہ تَو گُنگی جاگَہ ءَ اِینچُک وَنتَگ۔ مَن وَتی گَپّ ءَ سَکّ پَشۆماں آں۔”
گُنگ ءَ بِچکَندِت ءُ بَکشگ ئے وَڈ ءَ سَر سُرێنت۔
“اِے پێش ءَ گُنگ نَبیتَگ۔” گُنگ ءِ دِگِہ ھَمراہے ءَ دێم گۆں مَن کُت۔ “اِشیا شَہزانتی ءَ اِم ئے کَنَگ ءَ رَند وَتی لِلِّک بُرِّتَگ۔”
چَہ ھَیرانیا مَنی دَپ پَچ بُوت۔ مَن گۆں دَر گُڈِتَگێں چَمّاں گُنگ ءِ نێمَگ ءَ چارِت۔ آ بِچکَندگا اَت!
<سترُنگ><اِم>ناگُماں