ھَمے رۆچ ءَ کہ مئے سیر ءَ سالے تَوام بُوت، ھَمے رۆچ ءِ جِند ءَ مَنی زال کَپت ءُ بَچَکّێں چُکّے آُرت ئِے۔ پَمِشکا ما چُکّ ءِ نام سالاں کُت۔
ماہ ءُ رۆچ گْوَزاں بیت اَنت۔ سالانا پَنچ ماہ بُوت۔ نی مَن آ بَڈّ ءَ کُت، لَیب داشت، گۆں آئی ءَ گَپّ جَت ءُ پَدا وَت گَپّانی پَسَّو دات۔
سالاں اێدِگِ چُکّانی وَڈ ءَ اَت۔ بے پَرواہ ءُ بے زانت بلے دۆستناک۔ اَلبَت آئی ءِ یَکّ چیزّے چَہ آدِگے چُکّاں جِدا اَت۔ مَن آ بِچکَندَگ یا کَندَگ ءَ نَدیتَگَت۔ مَن آ کِلی کُت، دَستاں کُت، گْوات ءَ ماں بُرِّت ءُ پَدا گِپت، آدێنک پێش داشت، آئی ءِ دێم ءَ چۆ شادی ءَ سَما کُت بلے یَکّ رَندے ھَم آئی ءِ لُنٹانی سَر ءَ بِچکَندے دَر ءَ نَبُوت۔
اَوَل ءَ مَن ءُ زال پَرێشاں بیتێں بلے پَدا ما ھَیال کُت کہ دانینگَ کَسان اِنت، دێم ءَ بَلکێں وَت شَرّ بیت۔
ھَو، ھَو، سالاں رُست ءُ بَٹێرُک بُوت۔ نی اِسکۆل ءَ ھَم رَووا کَنَگ ءَ اَت بلے کَندَگ ءِ نْیامَت ءَ اَنگَت زِبَہر اَت۔ مَنی گَت ءُ گُمان ءَ ھَم نَہ اَت کہ مَنی وَڈێں وَشتَبێں مَردُمے ءِ چُکّ چُشێں گْرانتَبے بیت۔ مَن ھَیران اَتاں کہ اِشیا چَہ کئے ءَ کَشِّتَگ۔ مَن، مَنی زال، مئے ھَردُکانی مات ءُ پِت، اێدِگِ سْیاد ءُ وارِس، دْرُست وَشرُو ءُ مَسکَراباز اَت اَنت۔
ما سالاں داکتَراں پێش داشت۔ دْرُستانی گَپّ اِش اَت کہ دِگِہ ھِساب ءَ چُکّ سَلامَت اِنت۔ اَلبَت اِے نَکَندَگ ءِ آدَت بِگِند ئے اِشیا چَہ بُنپیرُک یا بُنبَلُّکے ءَ زُرتَگ بلے داکتَراں چۆ ھَم گُشت کہ مَزَن بیت، وانیت ءُ دُنیا ءَ گِندیت گُڈا بَلکێں وَتی اِے آدَتا یَلَہ بِدَنت۔
سالان ئے نَکَندَگ ءِ آدَت مَن ءَ سَکّ نادۆست اَت بلے آئی ءِ دِگِہ آدَتے مَن ءَ دۆست بُوت، چی ءَ کہ اِے مَنی تَہا ھَم ھَستَت: ماہ ءُ ماہِکان ءِ دۆستی۔
یَکّ گَرماگی سَرشَپے کہ لَین شُتَگَت اَنت، ما لۆگ ءِ چَتّ ءَ شُت ءُ وَپتێں۔ ماہ ءَ چاردَہ اَت۔ سالانا مَنی راستێں دَست چۆ سَرجاہ ءَ سَر ءِ چێرا اَت ءُ چَمّ ئِے ماہ ءَ سَکّ اَت اَنت۔
“اَبّا!” آئی ءَ اَناگَہا گُشت۔
“ھاں۔”
“اَبّا! ماہ پَرچا ڈَولدار اِنت؟”
مَن پاد اَتک ءُ نِشتاں۔ مَنی زَہگ مَنی جُست ءَ چَہ مَن کَنَگ ءَ اَت۔ بلے مَن وَتی ھَیرانی چێر دات ءُ کَندان ءَ گُشت: “اگں تَو کَندَگے جن ئے گُڈا تَرا گُشاں گۆں۔”
کَندَگ وَتی جاہ ءَ آئی ءَ زَہر کُت ءُ شُت مات ءِ کَش ءَ وَپت۔ چِد ءُ پَد آئی ءَ اِے جُست ھِجبَر چَہ مَن نَکُت۔
آ شَپی سالان ئے جُست ءَ مَن ءَ وَتی کَسانی ءِ تْرانَگے ءَ پِرّێنت۔ مَن ءَ یاد اِنت کَسانی ءَ یَکّ بَرے مَن چَہ مات ءَ جُست کُت:
“اَمّاں! ماہ پَرچا ڈَولدار اِنت؟”
یَکّ بَرے وَ آئی ءَ مَن ءَ شَرّی ءَ چارِت ءُ پَدا گُشت: “نَزاناں، مَنی چُکّ! ھُدا ءَ کُتَگ۔”
رَند ءَ وَہدے مَن مَستِر بیتاں، وانَگ ءَ شُتاں گُڈا زانت کہ ماہ چۆ زِمین ءَ ھاک ءُ سِنگے۔ بلے اِے گَپّ ءَ مَن ءَ گێشتِر اَڈێنت کہ ماہ کہ اَسَل ءَ دِگِہ وَڈ اِنت، مئے چَمّاں پَرچا دِگِہ وَڈ اِنت؟ دیری ءُ نَزّیکی نِدارَگاں چی ءَ مَٹّ کَنت؟
وَہد ءِ گْوَزان اَت۔ سالاں کہ چَرایا پَد مارا ھِچّ چُکّ نَبُوت، رُست ءُ مَزَن بُوت۔ اَنچۆ کہ مَن دِل ءَ اَندازَہ جَتَگَت، دانِشگاہ ءَ آئی ءَ شَہزانتی زُرت ءُ وانَگ ءِ سَرجَم کَنَگ ءَ رَند ھَمۆدا لِکچَرار لَگِّت۔
اِینچُک وانَگ ءُ دُنیاگِندی ءَ رَند ھَم آئی ءِ لُنٹانی سَر ءَ یَکّ بَرے کَسے ءَ بِچکَندے نَدیت۔ اِے آدَت ئے سَوَب ءَ آ تێوَگێں شَہر ءَ ءُ کَش ءُ گْوَر ءِ ھَنداں نام ءُ دَپ اَت۔ مَن ءُ مَنی زال ءَ دێر اَت کہ آئی ءِ اِے آدَت کَبُول کُتَگَت ءُ آئی ءَ را ھِچّ نَگُشت۔
یَکّ رۆچے مَن ءَ اَنچۆ ھَیال اَتک کہ اگں سالاں سیر بِکَنت، بیت کَنت چُکّ ءُ چَلانگانی سَوَب ءَ نَکَندَگ ءِ آدَت ئِے کَمّ کَمّا بُرَوت۔ مَن گۆں زال ءَ گَپّ جَت۔ آ گَل بُوت۔ شَپ ءَ ما سالاں ماں تَرّێنت۔
“سالاں! سیر ءِ بارَوا تَئی ھَیال چے اِنت؟” مَن جُست کُت۔
“ھِچّ۔” آئی ءَ گْوَنڈێں جَوابے دات۔
“اگں تَرا جِنِکّے دۆست بیت بُگُش۔” مات ءَ چُنڈِت۔
“نہ۔” آئی ءِ پَسَّو پَدا کَسان اَت۔
“ما پہ تَو دِشتارے شۆہاز بِکَنێں؟” مات ءَ آئی ءِ دَست ءَ گِپت۔
“مَستِر وَت اِت۔” آئی ءِ گالِوار ءِ تَہا نہ بے زاری ھَستَت نہ ھُدۆناکی۔
“بلے تَو سیر کن ئے نہ؟” مَن پَکّ ءَ کَنَگ لۆٹِت۔
“اگں شُمئے رَزا اِنت، گُڈا ھَو۔” آئی ءَ اَنچۆ گُشت گُش ئے آئی ءِ نہ، مئے سیر ءِ گَپّ بَیَگ ءَ اِنت۔
اِندِگِ رۆچ ءَ ما سْیادے ءِ گْوَر ءَ شُتێں۔ مَردُماں مَنِّت بلے وَہدے جِنِکّ سَہی بُوت، آئی ءَ اَڈی کُت کہ مَن چُشێں مَرد نَگِراں کہ کَندَگ ھَم نَزانت۔
ما بے مُرادا پَدا اَتکێں۔ دِگِہ دو سئے جاہ ءَ شُتێں۔ ھَر جاگَہ مات ءُ پِتاں مَنِّت بلے جِنِکّاں اَڈی کُت۔ جِنِکّانی مَستِرێں اِیراد سالان ئے نَکَندَگ اَت۔
یَکّ شَپے مَن سالاں مانبَند کُت۔ “تَو وَتی اِے شُومّێں آدَتا پَرچا یَلَہ نَدی ءِ؟ ما چینچُک جاہ ءَ تَئی واست ءَ شُتَگێں۔ مات ءُ پِت مَنّ اَنت بلے جِنِکّ اَڈی کَن اَنت۔ دْراہ ھَمے تَئی بَدێں آدَت ئے سَوَب ءَ ۔ وَتی گْرانتَبی ءَ یَلَہ دَئے اگں نہ تێوَگێں زِند ءَ لُنڈ بی ءُ بِنِند۔”
آئی ءَ زُوکَّگ نَکُت۔
چَما رۆچ ءَ رَند مَن پَرایا جن ئے شۆہاز یَلَہ دات بلے مات ءِ دِلے نَرمێں، اَنگَت تَچ ءُ تاک ءَ اَت۔ یَکّ رۆچے آئی ءَ مَن ءَ ھال دات کہ مَن جِنِکّے دَر گێتکَگ۔ جِنِکّ سالان ئے تَب ءَ شَرّ سَہی اِنت چی ءَ کہ سالان ئے شاگِرد اِنت۔
اِے وَشّێں ھالے اَت ءُ بَدێں ھَم۔ جِنِکّ ءِ مَنَّگ وَشّێں گَپّے اَت بلے شاگِردی ئے گَپّ ءَ مَن ءَ نَگێگ کُت۔ چۆ مَبیت اِے ھَم بے کَندَگے بِبیت بلے زال ءَ پَکّ ءَ کُتَگَت۔ گُشت ئِے جِنِکّ رَنگ ءُ دانَگ ءَ ھَم شَرّ اِنت ءُ رُو ءُ دَم ئِے ھَم وَشّ اِنت۔
پَدا ما سالاں سالۆنک کُت۔ نِشار راستی وَژگَپّ ءُ پُلکَندَگے اَت بلے ھما اَندازَہ کہ ما جَتَگَت، راست نَبُوت۔ نِشار ءِ وَشرُویا سالان ئے گْرانتبی بُرت نَکُت۔
سالے کَپّے ءَ پَد آیاں چُکّے بُوت۔ جِنِکّے اَت۔ سالان ئے جِنِکّ کہ نام ئِے زێبا اَت، بَٹێرُک بُوت۔ زێبا ءَ کہ ما پہ دۆستی زێبُل گُشت، چَہ مات ءَ کَشِّتَگَت۔ اَنچێں وَژگَپّ ءُ وَشکَندَگے اَت کہ دْراہ پَرایا تُنّیگ اَت اَنت۔ ما نی سالان ئے بے رُوی ءِ بارَوا ھَیال کَنَگ ھَم یَلَہ داتَگَت۔ مارا زێبُل بَسّ اَت۔
زێبُل ءِ آدَت ءُ تَب چَہ پِت ءَ چَٹ جِدا اَت اَنت۔ اَلبَت یَکّ آدَتے آئی ءَ چَہ پِت ءَ زُرتَگَت۔ اِے ھما اَت کہ مَنی تَہا ھَم ھَستَت، بِزاں ماہ ءُ ماہِکان ءِ دۆستی۔
یَکّ ماہِکانێں شَپے ءِ گَپّ اِنت۔ ما پَنچێں ٹیوی ءِ دێم ءَ نِشتَگ ءُ ھالاں چارَگ ءَ اَتێں۔ زێبُل ءَ دَم بُرت۔ مَنی دَست ءَ گِپت ءُ گُشت ئِے: “بُرێں بُرز ءَ ۔”
مَن زانت کہ ماہ ءَ چارَگ لۆٹیت۔ مَن گُشت۔ “کَمّے سَبر کَن، مَنی مات! مَن ھالاں چاراں۔ پَدا مَن ءُ تَو رَوێں۔”
بلے آئی ءَ نَمَنِّت۔ دیت ئِے کہ پیرُک آیَگ ءِ وَڈ ءَ نَہ اِنت گُڈا وَتی پِت ءِ بَڈّ ءَ کَپت۔ سالاں زاناں چَہ ھالاں شِزار بیتَگَت کہ زێبُل ءِ یَکّێں گُشَگ ءَ پاد اَتک۔ ھَرد بُرز ءَ شُت اَنت۔
ما ٹیوی ءِ چارَگ ءَ دِلگۆش اَتێں کہ اَناگَہ ٹَہکے ءِ تَوار اَتک۔ تَوار چَہ لۆگ ءِ سَر ءَ پێداگ اَت۔ گالِوار گُش ئے سالاَئێگن اَت بلے کَسّ ءَ باوَر نَبُوت۔ سالاں چۆن کَندیت؟
مَنی دِل ءَ جَت کہ چۆ مَبیت شَہزانتێں سالان ئے سَر گَشتَگ، گَنۆک اِنت۔ زێبُل ئِے چَہ لۆگ ءِ سَر ءَ بُن ءَ ماں بُرِّتَگ ءُ وَت کَندَگ ءَ اِنت۔
ما اِشتاپ اِشتاپ ءَ پَدانکاں سَر کَپان ءَ بُرز ءَ شُتێں۔ اود ءَ اَجَبێں نِدارَگے اَت۔ زێبُل ءُ سالاں ھَرد کَندَگ ءَ اَت اَنت۔ ما بَہ مَنتێں۔ سالان ءُ کَندَگ؟ ھَمے یَکّێں دَمان ءَ مَنی دِل ءَ ھَزار گَپّ آُرت۔ مَن سالان ئے دَست ءَ گِپت ءُ پہ نَرمی جُست کُت۔
“سالاں، بابا! چِہ گَپّے؟”
سالانا کَندان ءَ پَسَّو دات: “اَبّا! زێبُل گُشیت ماہ پَرچا ڈَولدار اِنت؟”
<سترُنگ><اِم>ناگُماں