“دَر آ چَہ مَنی گِس ءَ ، تَو مَنی زِند اَزاب کُرتَگ۔ نَزاناں ھما
چۆنێں شُومّێں رۆچے اَت کہ مَن گۆں تَو آرۆس کُرت۔ اِے دَہ سال ءِ تَہا
تَو مَن ءَ کُجام وَشّی داتَگ، بُگُش؟” جَت ئِے چَپانٹے، پَدا لَگَتے
جَت ئِے، آ کَپت۔ ناشُتێں زاہ چۆ ھار ءُ ھیرّۆپا چَہ آئی ءِ دَپ ءَ دَر آیَگ ءَ
اَت اَنت۔ آ چۆ بُت ءَ لَٹّ ءُ لَگَتانی چێرا کَپتَگَت، بلے چَہ آئی ءِ دَپ ءَ اُپّ
ءُ اَبَّوے دَر نَیَتک۔ اِے چَہ ماہے ءَ زْیات اَت کہ آئی ءِ وَرد ءُ وَراک زاہ ءُ
مُشت ءُ لَگَت اَت، بلے مَرۆچی لَٹّ ئِے سَربار اَت۔
آئی ءَ زانت کہ مَنی ھَمجوابی آئی ءِ زَہر ءِ آس ءَ چۆ گاسَٹێلا تێزتِر کَنت۔
بَدتِر گَنۆک بیت۔ جَت ئِے، جَت ئِے تکہاں وَت دَم ئِے بُرت۔ لَٹّ ئِے چَگَل دات، تاں
دَروازَگ ءَ شُت، پَد تَرِّت ءُ اَتک۔ “مَن واپَسیا تَرا اِد ءَ مَگِنداں،
اگں نہ چَہ مَن ءُ گَندَگ کَسّ نێست” ءُ چَہ دَروازَگ ءَ دَر اَتک۔
آ ڈَگار ءِ سَر ءَ چۆ مُردَگ ءَ تَچک اَت۔ آئی ءِ ھَڈّ ءُ جان ءِ بَند بَند چَہ
دَرد ءَ پْرُشَگ ءَ اَت۔ آئی ءَ وَتی چَمّ نَزّ کُرت اَنت۔ “ھَمزَہ گُشیت تَو
مَن ءَ وَشّی نَداتَگ۔ آئی ءِ ھَدّ ءَ وَشّی چے ءَ گُش اَنت؟ گۆں آئی ءِ
کَہۆل ءَ یَکّی ءُ تِپاکی، نان ءِ دَیَگ، رُپت ءُ رۆپ، شُشت ءُ شۆد،
مِہمانداری، مِہر ءُ دۆستی، مَن وَتی جاں وار کُرتَگ بلے آئی ءَ را آسُودَگ
کَنَگ ءِ جُہدُن کُرتَگ۔ بے آئی ءِ رَزا ءَ مَن وَتی مات ءُ پِت ءِ چارَگ ءَ ھَم
نَشُتَگاں۔ ھَمزَہ ءِ نِزّ ءَ وَشّی ءِ کْیاس ءُ کَیلۆ چے اِنت، آ وَشّی
چے ءَ گُشیت؟ آئی ءَ مَن ءَ جَت۔ اَلبَت گۆں ھُدا ءَ کئے ءَ دَست ءُ داوا ھَست؟”
پَدا آئی ءَ وَتی کَسانی دِل ءَ اَتک۔ وَلی ءَ کہ جَت ءُ آئی ءَ گْرێت، مات ءَ آئی ءِ سَر
بَگَل ءَ کُرت ءُ گُشت: “وَلی! تَرا گُہار دِل بیت؟ گُہار گۆں تَو پادار
نَبیت، تَو نَزان ئے گُہار تَئی گِس ءَ مِہمانے؟” آئی ءَ مات گُلاێش کُرت ءُ
گۆں آئی ءِ گُشان ءِ لَمب ءَ وَتی چَمّ پَہک کُرت اَنت۔ گُشت ئِے “اَمّا!
مَن تَرا، اَبّا ءَ ءُ وَلی ءَ نَیلان ءُ دِگِہ جاگَہَ نَرَواں۔” مات ءَ آ
بَگَل ءَ کُرت ءُ سَر چُکِّت۔
وَہد ءِ گْوَزَگ ءَ دێر نَلَگِّت، گُش اَنت جِنِکّ چۆ کِشار ءَ اِنت، زُوتّ
رُدیت۔ وَہد ءُ پاس ماہ ءُ سالانی پَرَّگاں سْوار، بال کَنانا شُت اَنت۔
دْرُستێں جِنِکّانی وَڈ ءَ آئی ءِ مَجگ ءِ تَہا اِے ھَبَر چَہ کَسانی ءَ رۆدێنَگ
بُوتَگَت کہ جِنِکّ ءِ گِس آئی ءِ مَرد ءِ گِس اِنت۔ آئی ءَ وَتی دِل ءِ تَہا وَتی گِس ءِ سینگارَگ ءُ پَلگارَگ شُرُو کُرتَگَت ءُ وَتی ھَیالانی واجَہ ءِ
وَدار ءَ اَت کہ کَدی کئێت ءُ آئی ءَ بارت ءُ گِس ءِ بانُک کَنت۔
پَدا ھما رۆچ اَتک کہ آئی ءَ پہ وَشّێں رۆچانی اُمێت ءَ گۆں یَکّ ڈَنّی
مَردے ءَ وَتی پَلگارتَگێں گِس ءِ رَوَگ ءِ تَیاری کُرت کہ آ گِس آئی ءِ وَتی
گِس اَت۔ دَزگُہاراں آ سَمبَہێنت، گُش اَنت بانۆر ءَ تاں سئے رۆچ ءَ پَری
وَتی رَنگ ءَ دَ اَنت، بلے چَہ آیۆکێں وَہد ءُ آکِبَت ءِ وَشّیانی نُور ءَ
آئی ءِ دێم وَت چاردَہی ماہ ءَ رۆشنا اَت۔
دَزگُہاراں گُشت کہ چَمّاں پَچ مَکَن کہ سال ڈُکّال بیت، بلے
آئی ءَ پہ وَتی وَشّێں وابانی ساٹَگ ءَ وَتی چَمّ نَزّ کُرتَگَت اَنت کہ
چُش مَبیت کہ واب چَہ آئی ءِ چَمّاں بِرِچ اَنت۔ دَزگُہارانی
گْوَشَگ ءِ پَدا، آئی ءَ وَتی چَمّ گۆں زۆر ءَ پْرِتک اَنت۔ پَدا دَزگُہاراں
کُراں شَریپ، سَبزێں تاک ءُ اِسپێتێں تاسے ءِ تَہا ساپێں آپ آُرت ءُ
گُشتِش: “نوں چَمّاں پَچ کَن۔” آئی ءَ اَوَل ءَ بِسمِلّاہ کُرت ءُ
چَمّ پَچ کُرت اَنت ءُ کُراں وَنت ءُ چَہ ھُدا ءَ وَتی وَشّێں رۆچانی
دْوا لۆٹِت۔ آپ ئِے چارِت اَنت ءُ دْوا ئِے کُرت: “یا اَلّاہ! مَنی ءُ ھَمزَہ ءِ
دِل ءَ وَتمانوَتا گۆں آپ ءَ ساپ کَن،” سَبزێں تاک ئِے چارِت ءُ وَتی زِند ءِ
کِشارانی سَبز بَیَگ ءِ دْوا ئِے کُرت ءُ پَدا آئی ءَ وَتی مات ءُ پِت، بْرات ءُ
گُہارانی مِہر ماں دِل ءِ یَکّ کُنجے ءَ بَند کُرت اَنت ءُ گۆں ھَمزَہ ءَ
یَکّ نۆکێن ءُ وَشّێں زِندے ءِ گْوازێنَگ ءَ اِے گِس ءَ اَتک۔
مات ءُ پِت ءُ دُنیا ءِ گُشَگ ءِ پَدا، آئی ءَ وَتی پُشت ءَ تیرَنکے دات۔ آئی ءِ
دِل ءَ گُشت بُرَو مات ءِ گُٹّ ءَ بِگِر ءُ بُگُش ءُ جُست کَن: “مات!
شُما گۆں بے وَسێں جِنِکّاں چے ءَ دْرۆگ بَندِت ءُ آیاں چَہ وَتی گِس ءَ
کَشِّت؟ پِت گُشیت کہ جِنِکّ ءِ گِس آئی ءِ مَرد ءِ گِس اِنت، مَرد
گُشیت: ‘چَہ مَنی گِس ءَ دَر آ، اِے گِس کہ مَنیگ اِنت، تَرا ھاکِمی کئے ءَ
داتَگ۔ جَن مالے، پہ بَہا رَسیت ءُ اَنچۆ کہ گِس ءِ اێدِگِ مال ءُ اَسباب چَہ
مَنی مَرزی ءَ گِس ءَ اێر اَنت، اَنچۆ جَن ھَم چَہ مَنی مَرزی ءَ اِنت، دۆست نَبُوت،
گَلّێنانی، آئی ءِ بَدَل ءَ دِگِرے کاراں۔’”
آئی ءِ دِل ءَ شاہگُل ءُ زینَت اَتک اَنت، گُش ئے آئی ءَ را نَپتے ءَ گۆں جَت، تْراس ئِے
کُرت ءُ نِشت۔ شاہگُلا سالے چُکّے اَُرت بلے لاپ پُرّ ءُ کُٹّ ھَلیگ اَت،
چُکّ ئِے سَر نَیَتک اَنت۔ داکتَراں گُشت کہ مَرد ءُ جن ئے ھۆن بَرابَر
نَہ اَنت۔ مَرد ءَ اِلاج نَکُرت، گُشت ئِے: “ھَمے زَرّاں کہ پہ اِلاج ءَ داکتَراں
بِدَیاں پَرچا دِگِہ جَنے مَکَنانِش؟” شاہگُلی گَلّێنت، شاہگُل چَہ
گَماں گَنۆک بُوت۔ زینَت ءِ گُناہ اِش اَت کہ آئی ءَ جِنِکَّ آُرت بلے مَرد ءَ
سَون دات اَنت، بلے مَن… مَنی گُناہ چے اِنت؟
دَروازَگ ءِ دْرَہپارَگ ءِ تَوار بُوت۔ آئی ءِ ھَیالانی بَندیکّ ءِ اَڈِتَگێں
تار تْرَہکارَگ ءَ سِست۔ ھَمزَہ ءَ پَدا ھَبَر کُرت: “تَو اَنگَت ھَمِد ءَ
نِشتَگ ءِ، سَنٹ؟” آئی ءِ دِل ءَ ھَم پاہار کُرت: “تَو گۆں ھُدا ءِ ھُدائی ءِ
داوا بِکَن کہ تَرا اَیب ئِے ماں کُرتَگ، مَن ءَ چے ءَ جن ئے؟ تَو چُکّے
مَنی لاپ ءَ بِدئے، مَن چُن پێدا ئِے نَکَناں؟ شُما مَردێں ھَر ڈُبَّہ ءَ جَنێن ءِ سَر ءَ جَنِت۔ شُما ھَم بَندَہ اِت۔ شُما بیمّار نَبِت؟ ھُدا
شُمارا سَنٹ کُرت نَکَنت؟ شُما چَہ ھُدائی کاراں چے ءَ مَیاریگ
نَبِت؟ داکتَر ءَ تَرا چے گُشت؟ تَئی دِل ءَ مَن سَہیگ نَہ آں؟ وَتی اَیب ءَ
مَنی سَر ءَ تَپّ ئے؟” پاد اَتک، ھَمزَہ ءِ دێم پہ دێم ءَ اوشتات۔ “مَن ءَ
یَلَہ دَئے ئے دِگِرے گِر ئے پَدا آئی ءِ سَر ءَ سَنٹی ءِ ڈُوبَہا جن ئے؟”
ھَمزَہ گَنۆک بُوت، دات ئِے دُدَستی تێلانکے، آ دُور شُت ءُ کَپت۔ گُشت ئِے:
“داکتَر گُہ وَر اَنت، جَکّ جَن اَنت، دْرۆگ بَند اَنت داکتَر، تَو داکتَرانی
ھَبَر دْرۆگ کُرت نَکُرت اَنت، ھَیادار ءُ پارسا تَو بُوتَگ ءِ۔ مَن تَرا گۆں
وَتی دۆستاں پَجّارۆک چے ءَ کُرت؟ تَو چَہ آیاں پہ مَن اِینچُکێں وَشّیے
گِپت نَکُرت؟ مَن تَرا پہ زانت گۆں آیاں تَہنا نَکُرت؟ بلے تَو…”
اِے ھَبَر نَہ اَت اَنت کہ چَہ ھَمزَہ ءِ دَپ ءَ دَر اَتک اَنت، گُش ئے سْرُپ اَت اَنت
کہ ھَمزَہ آئی ءِ گۆشانی تَہا ماں رێچَگ ءَ اَتِش، آئی ءِ سَر ءَ گُش ئے
گِرۆکے کَپت۔ اَرس ئِے چَمّانی تَہا ھُشک بُوت اَنت، نُکّ ئِے چَہ نادۆک ءَ چۆ
جَور ءَ تَہل بُوت، ٹێلَگ ئِے دَر گُڈِت اَنت۔ ھَمزَہ ءِ تَوار دُور چۆ کہ چَہ
جُہلێں چاتے ءِ تَہا بْیَیت آئی ءِ گۆشاں کَپت: “بُرَو، مَن تَئی سَون
دات اَنت، سَون دات اَنت۔”
آئی ءِ چار جِنِکّ اَنت، بَچّے بُوت ئِے بلے مُرت۔
ھَمزَہ مَزَنێں دیندارێں مَردُمے۔ ھَجّ ئِے کُرتَگ، دْرُستێں مَردُم
“ھاجی ساہِب” گُشَنت ئِے، پێشِمامی ھَم کَنت، دِگِہ جَنے گِپت ئِے بلے اِے
ھَم آئی ءِ کِسمَت ءَ “سَنٹے” بُوت۔
<سترُنگ><اِم>گَوہَر مَلِک