تَو مَنی کُچَّلاں مَنۆشات ئے
تَو مَنی سَکّیاں مَگِندات ئے
تَو وَتی راج ءِ وَت بِب ئے مَستِر
چَہ وَت ءَ مَستِرے تَو مَیلات ئے
گْوَنڈێں تِبلے بِبات ئے کَندۆکێں
تَو یَکیمی پہ چَمّ مَگِندات ئے
تَو بِب ئے مات ءُ گُہار ھَکّیێں
گُرّ مَردینی ھِچّ مَسَگّات ئے
پِت تَو ھَمکار بات ئے چُکّانی
تَو وَت ءَ مَستِرے مَلێکات ئے
ھَر وَڈێں سانکَلاں بُپرۆش ئے تَو
مَکّێں وَرنایے آجُوێں بات ئے
ڈَنّ ءَ ھَرکَس کہ کئێت ءُ راج ءَ جَنت
چَہ وَتی گُلزِمین ءَ کَشّات ئے
ھِچّ تِپاوَت مَبیت تَئی راج ءَ
زَرّ ءِ ءُ مال ءِ، زۆر ءِ ءُ زات ءِ
تَو بِب ئے مَرگ جَنگبازانی
گۆں وَت ءَ اێمِنی بِنِندات ئے
زۆر ءُ زَرّ ءَ بِدار ءِ کار ءِ گُلام
رَسم ءُ وَہم ءِ ھَیالاں چُٹّات ئے
مُلک دَرمُلک ئے زالِم ءُ دُزّاں
یَکّ یَکّ ءَ تَو کَلّ کَناں بات ئے
واجَہ ءُ مَستِر ءُ کَماشانی
نام ءُ بُنمال پَشت مَگێجات ئے
رۆک دانائی ءِ چِراگ بِبیت
زانت ءِ شۆہاز ءَ ھَر جاہ گۆں بات ئے
تَو وَتی نێک ءُ پاکێں لۆٹاں گۆں
مُلک ءُ دَرمُلکا نام بْیارات ئے
چَہ وَت ءَ مَستِرے مَمَنّات ئے
پہ کَسّ ءَ دَست تَو مَبَندات ئے
تَو وَتی کۆہ ءُ پَٹّ ءُ گْیابان ءُ
کُوچَگ ءِ مَستِر اێوک ءَ بات ئے
مَرچیگێں مَردُمانی جَنجالاں
مَردُمے دَر بْیَیت باندات ءِ
<سترُنگ><اِم>ھاں سابِر
(جَنوَری 1978 / شال)