آ مَزَنێں چُرتے ءَ کَپتَگَت۔ کِساس نێم کَلاک اَت ئِے کہ سَنڈێمَن سێوَل اِسپِتال ءَ مێڈیکَل اِسٹُوڈَنٹانی کَنٹین ءَ نِشتَگَت ءُ ھَیال کَنان اَت۔ گَپّ دِگِہ ھِچّ نَہ اَت۔ بَسّ یَکّ نَرسے ءَ راہ رَواجی وَتی اَنچێں جاہے کِچێنت کہ آ یَکّ بَرے وَ اوشتات۔ بلے وَہدے نَرس گۆں بے دِلگۆشی کِچێنانا دێم ءَ شُت، آ ھَم کَنٹین ءِ نێمَگ ءَ رَہ گِپت۔ چاہے لۆٹاێنت ئِے۔ کِتاب ئِے پَچ کُت ءُ چیزّے وانَگ ءَ لَگِّت بلے دَمان ءَ ھَیال ئِے ٹَگَلِت ءُ نَرس ءِ نێمَگ ءَ شُت۔
نَرس ءَ وَتی ھما جاہ کِچێنت!
بِلّ کِچێنت ئِے۔ کِچَگ ھَرکَس ءَ گیپت۔ تَو بارێں وَت ءَ کِچێن ئے؟ دِگِر کہ کِچێن اَنت تَو وَڈ وَڈێں گَپّ دِل ءَ کار ءِ؟
بلے آئی ءَ وَتی اِے جاہ مَنی دێم ءَ چی ءَ کِچێنت؟
کِچَگ ءَ گِپتَگَت پَمِشکا۔
نہ، کِچَگ ءَ نَگِپتَگَت۔ آئی ءَ پَیگامے دَیَگی اَت۔
اِنساپ کَن یار! اگں پَیگامے دَیَگی بیتێن ئِے گُڈا آئی ءَ تَئی نێمَگ ءَ چارِتَگ ءُ بِچکَندِتَگَت یا دِگِہ اِشارَہے کُتَگَت ئِے۔ آئی ءَ ھِچّ نَکُت۔ تَئی ھَیال ءَ نَہ اَت۔ وَتی وَڈ ءَ اَت۔ تَو وَسَّرا چِست ئے کہ پہ مَن کِچێنتَگ ئِے۔
بِلّ ئِے مَنی ھَیال ءَ نَہ اَت بلے زاناں اِے کَسانسالێں نَرس ءَ مَردێنی نْیادانی تَلَب نێست؟ نۆزدَہ بیست سالی جِنِکّے۔ رَواں سَلاہے جَنان ئِے۔ آئی ءِ دِل اَلَّم سُریت۔ سِنگے نَہ اِنت، مَردُمے۔
ھۆڈ! بَلکێں آ پاکدامُنێں جِنِکّے۔ بَد بِبارت گُڈا؟
بِلّ ئِے بَد بارت۔ کَبراں کَلَمپۆگ ماں نێست۔
مَزَنێں گِر ءُ چیلّے ءَ رَند آ گۆں مُہکَمێں اِرادَہے چَہ کَنٹین ءَ دَر اَتک ءُ دێم پہ وارڈاں شُت۔ وارڈ پہ وارڈ تَرّانا گُڈّیگ ءَ آئی ءَ ھما نَرس دَر گێتک۔ آ اِسپێشَل وارڈ ئے اِسٹاپرُوما نِندۆک اَت۔ آئی ءِ گْوَر ءَ دِگِہ نَرسے ھَم اوشتۆک اَت کہ زیتّاں تَپچارے زُرت ئِے ءُ دَر اَتک۔ آ پہ پُتِرَگ ءَ جاڈی بُوت کہ نێمُمر ئے مَردے گُشادیا کۆٹی ءَ پُتِرت ءُ نَرس ءِ کِرّا شُت۔ آ نادراہے ءِ پانِگ اَت ءُ دَرمانانی بارَوا چَہ نَرس ءَ جُستے ءِ گِرَگ ءَ اَتکَگَت۔
آئی ءَ ھِمَّت کُت ءُ پُتِرت۔ سَلامے دات ئِے ءُ اوشتات۔ نَرس ءَ آئی ءِ سَلام اَلَیک کُت ءُ کُرشی ءِ نێمَگ ءَ اِشارَہ کُت۔ نَرس ءَ چَرائی ئے دَست ءِ کِتاب ءُ اِسٹِتِسکۆپ ءُ گْوَر ءِ اِسپێتێں کۆٹ ءَ زانت کہ مێڈیکَل اِسٹُوڈَنٹے۔
نَرس گۆں ھما مَردَک ءَ را گَپّ ءَ اَت ءُ آ ھَیال کَنَگ ءَ اَت کہ نَرس ءَ چۆن وَتی گَپّ ءَ بُگُشاں، بُنگێج چۆن بِکَناں۔ ھَمے بُگُشان ئِے کہ تَو وَتی ھما جاہ چی ءَ کِچێنت؟
نہ، نہ۔ اِے وَ جُست کَنَگ ءِ وَڈے نَہ اِنت۔ ھَمے گُشان ئِے کہ شال ءِ زِمِستاں تَرا اێوکی ءَ وَشّ بَنت؟
اِے نی جُستے؟ وَشّ بَنت، نَبَنت، تَئی چُنتُمی!
آ مَرد ءَ گۆں نَرس ءَ گَپّ ھَلاس کُت ءُ دَر اَتک ءُ نَرس ءَ وَرنائیں داکتَر ءِ نێمَگ ءَ چارِت۔
یا ھُدا! مَن چے بُگُشان ءُ چۆن بُگُشاں؟
نَرس ءَ ٹێبَل ءِ سَر ءَ چیزّے کاگَد سَر ءُ چێر کُت ءُ پَدا آئی ءِ نێمَگ ءَ چارِت۔ آئی ءَ سَر جَہل کُت۔ ماں اِے زِمِستان ءَ ھَم آئی ءِ پۆنز ءِ سَر ھێد اَت۔
مَن تَچک ءَ گُشان ئِے کہ مَن ءَ وَتی مَردُم بِکَن۔ وَہدے نَرس ءَ دیت کہ وَرنا ھامۆش ءَ نِشتَگ، ھِچّ نَگُشیت گُڈا وَت جُست ئِے کُت: “ھاں داکتَر ساہِب! کارے، تَرَّگے؟”
آئی ءَ دَپ پُرّ ءُ ھالیگ کُت بلے ھِچّ… ھێدے ءَ سَر کُتَگَت ءُ نی دْرَہَگ ئِے ھَم بِنا کُتَگَت۔ آئی ءِ ھال چۆ ھما گَیرَتدارێں بلے مَجبُورێں مَردُم ءَ اَت کہ اَوَلی رَند ءَ کَسے ءِ دێم ءَ پہ پِنڈَگ ءَ دَست ءَ ٹال بِکَنت۔
آئی ءَ نَرس ءِ نێمَگ ءَ چارِت۔ اَناگَہا آئی ءَ سَما بُوت گُش ئے اِے نَرس آئی ءَ مَرچیگ ءَ پێسَر ھَم دیتَگ۔ ءُ پَدا آئی ءَ یاد اَتک کہ ماہے کَپّے پێسَر آ رۆشُمی تَپاں تَہت ءِ باہۆٹ کُتَگَت ءُ ھَمِد ءَ اِسپێشَل وارڈا داکِل بیتَگَت ءُ اِے نَرس رۆچے سئے چار بَر ءَ آئی ءِ تَپ ءِ چارَگ ءُ دَوا ءُ دَرمان ءِ دیَگ ءَ اَتکَگَت۔
نی آ گَنتِر گَڈ ءُ مُنج بُوت بلے پَدا گۆں اِے ھَیال ءَ آئی ءِ دِل کَمّے ڈَڈّ بُوت کہ بیت کَنت ھَمے کْوَہنێں پَجّارۆکی مَنی راہ ءَ ساپ بِکَنت۔ نَرس ءَ وَہدے آئی ءِ ھێد ءُ دْرَہَگ دیت اَنت کَمّے پَرێشاں بُوت۔
“تَرا چۆن اِنت داکتَر؟”
“مَن ءَ … مَن ءَ ھِچّ نَہ اِنت۔ بَسّ مَن تَئی چارَگ ءَ اَتکَگاں۔ مَن ءَ زان ئے؟” واریے ھَمے گَپّ چَہ آئی ءِ دَپ ءَ دَر اَتک اَنت۔
نَرس ءَ آ شَرّی ءَ چارِت ءُ گُشت: “نہ، مَن ءَ ھۆش نَکَنت۔”
“مَن ماہے کَپّے پێش ھَمِد ءَ داکِل بیتَگاں۔ مَن ءَ رۆشَمی تَپاں گِپتَگَت۔”
“ھاں، ھاں۔ نی مَن ءَ یاد اَتک۔” نَرس ءَ تْرانَگ کُت ءُ پَدا شَرّی ءَ چارانا جُست ئِے کُت: “نی تَو وَشّ ئے، نہ؟”
آئی ءِ دِل ءَ اَتک بُگُشاں کہ مَن چَہ آ نادراہی ءَ وَشّ بیتَگاں بلے دِگِرے ءَ گْوَر جَتَگ ءُ اِشی ئے اِلاج تَو وَت ئے۔ دَوا ءُ دَرمانی کارے نَہ اِنت… بلے دَپ ءَ گُشت ئِے: “ھَو، نی وَشّ آں۔”
“تَو اَنچۆ ھێد اَت ءِ ءُ دْرَہَگ ءَ اَت ءِ کہ مَن پَرێشاں بیتاں،” نَرس ءَ کَندان ءَ گُشت ءُ آ کَمّے پَشَل بُوت۔ نَرس ءَ پَرایا چاہے لۆٹاێنت بلے آئی ءِ سَر جَہل اَت ءُ بے تَوار اَت۔ نَرس ءَ آئی ءِ نێمَگ ءَ چارانا جُست کُت: “داکتَر! تَئی نام کئے اِنت؟”
“نام… ناگُمان اِنت۔” آئی ءَ اَنچۆ پَسَّو دات گُش ئے آمیدگِس ءَ کازی ءِ دێم ءَ اوشتاتَگ۔
“مَن ءَ بْراتے ھَست۔ تَئی اُمرَئێگ بیت۔ ھَمانگُر پَیسَلابادا اِنت۔ نام ئِے نَومان اِنت۔ نام ئِے تَئی وَڈێںے ءُ وَڈ ءُ پَیم ئِے ھَم تئیگ اَنت۔ تَئی وَڈێں لَجُّوے۔ لۆگ ءَ ھَم چۆ مِہمان ءَ اِنت۔ اِے دَور ءَ وَ جِنِکّ چُشێں لَجُّو نَبَنت،” نَرس ءَ کَندِت۔
آئی ءَ ھِچّ نَگُشت۔ بَسّ بِچکَندِت ئِے۔
نی بِزاں اِشیا مَن ءَ وَتی بْرات کُت؟
نہ، نہ، پہ دَپ ءِ گُشَگ ءَ ھِچّ سْیادی نَٹَہیت۔
چۆ ھَو بلے اِے کہ مَن ءَ بْرات ءِ ھِساب ءَ چارَگ ءَ اِنت، اِشی ئے کِرّا مَن کُجام دَپ ءُ آپ ءَ چُشێں گَپّے بِجَناں؟
“داکتَر! تَئی چاہ سارت بیت،” نَرس ءَ گُشت ءُ آ گُش ئے گُڈِت۔ اِشتاپ اِشتاپ ءَ چاہ ئِے چِست کُت۔ دَست ئِے اَنچۆ لَرزَگ ءَ اَت اَنت کہ کَمّے چاہ آئی ءِ اِسپێتێں کۆٹ ءِ دامُن ءَ ھَم رِتک۔ آئی ءَ سارتێں چاہ دو گُلُمب ءَ گُلاٹِت۔ آ پَدا ھێد ءَ سَر کُتَگَت ءُ لَرزگا اَت۔
“تَو وَشّ ئے، داکتَر؟” نَرس کَمّے پَرێشاں بُوت۔ چَہ وَتی جاہ ءَ پاد اَتک ءُ آئی ءِ گْوَر ءَ اَتک۔ راستێں دَست آئی ءِ پێشانیگ ءَ اێر ئِے کُت۔ آ چۆ بُت ءَ نِشتَگَت۔ نہ سُر ءُ پُرے، نہ گَپّے۔
اَناگَہا آئی ءِ دَست سُرِت اَنت ءُ دُمی سَہت ءَ نَرس ءِ دَست آئی ءِ دَستان اَت۔ آئی ءَ نَرس ءِ دَست ءِ پُشت ءَ وَتی تَپتَگێں لُنٹ اێر کُت اَنت۔ بۆسَگے گِپت ئِے ءُ گُشادیا کِتاب ءُ اِسٹِتی زُرت اَنت ءُ ژَپَّگ ءَ چَہ کۆٹی ءَ دَر اَتک۔
نَرس بَہ ءُ بَکَّڈ اوشتاتَگَت۔ داں سَہتُکے آ اَنچۆ ھَیراں ھَیران ءَ اوشتات ءُ دَست ءِ پُشت ءَ چارانا اِے اَجَبێں بَچَکّ ءِ بارَوا ھَیال ئِے کُت ءُ پَدا آئی ءِ لُنٹانی سَر ءَ بِچکَندے اَتک۔ “نامان ءِ جِند اِنت،” آئی ءَ بِچکَندانا گۆں وَت گُشت۔ ءُ پَدا وَت ءَ کِچێنانا دێم پہ وارڈا شُت۔
<سترُنگ><اِم>ناگُماں