“سَبزَل!”
“ھاں۔”
“بُرێں کۆہ ءَ ۔”
“چی ءَ ؟”
“شَرابے وَرێں۔”
“پَرچا؟”
“یَکّ بَرے مۆسُم ءَ بِچار! رَند ءَ بُگُش پَرچا۔”
“اَم م م… چارِتَگ۔ مَن نَیایاں گۆں۔”
“شَرّ اِنت، بابا! گَمے تاچێنێں۔”
“مَن ءَ گَم پِر نێست۔”
“گَم ھَرکَس ءَ پِر۔ زْیَدَہ مانجائی مَکَن، بْیا۔”
سَبزَل ءَ کَمّے ھَیال کُت۔ پَدا گاڈی ءِ دَروازَگ ئِے پَچ کُت ءُ اَسلَم ءِ کَش ءَ نِشت بلے ھِچّ ئِے نَگُشت۔ کَمّے دێرا رَند دوێں شَہر ءَ دیر کۆہے ءِ وَشکَوشێں ٹُلّ ءَ نِشتَگَت اَنت۔ پَیکے ءِ وَرَگ ءَ رَند سَبزَل ءَ اَسلَم ءِ گَپّ تْرانَگ کُت۔
“اَسلَم! تَو چے گُشت، گَمے تاچێنێں؟”
“ھَو۔”
“چَہ شَراب ءِ وَرَگ ءَ گَم نَتَچ اَنت، ما وَت تَچێں۔”
“چۆن؟”
“اَنچۆ۔”
“بلے تَو بُگُش چۆن؟”
“بِچار، وَہدے گاڈی تَچیت سَواریانی چَمّاں نَزّیک ئے کۆہ، دْرَچک ءُ لۆگ دْراہ گۆں زْرابا رَوان اَنت بلے چۆ نَہ اِنت۔ اِے شَراب ھَم گاڈی ءِ وَڈ ءَ مَردُمانی دِل ءَ وَشّ کَنت۔ وَرۆک ءِ ھَیال ءَ گَم تَچان اَنت بلے اَسَل ءَ آئی ءِ جِند تَچان اِنت۔”
“ھُوم م م۔” اَسلَم ءَ چَہ وَتی پَیک ءَ گُٹّے گِپت ءُ سَر سُرێنت۔
“تَئی گَپّ راست اِنت بلے مَردُم گاڈی ءَ چی ءَ سَوار بَنت؟”
“گاڈی ءَ چی ءَ سَوار بَنت؟ جاگَہے رَوَگ ءِ واست ءَ ۔”
“بِزاں سَپَر آیانی مَجبُوریے۔”
“ھَو… تَو گُشت کن ئے،” سَبزَل ءَ ھَیال کَنانا گُشت۔
“اَنچۆ کہ گاڈی تَرا چَہ یَکّ جاہے ءَ دُمی جاہ ءَ بارت، ھَمے پَیم شَراب تَرا چَہ یَکّ وَہدے ءَ دُمی وَہد ءَ بارت۔”
اَسلَم ءِ گَپّ ءَ گُش ئے سَبزَل چُرتے ءَ دَور دات… مَن چَہ یَکّ وَہدے ءَ دُمی وَہد ءَ سَر بَیَگ ءِ واست ءَ شَراب ءِ گاڈی ءَ پَرچا سَوار آں؟ مَنی گَم چے اِنت؟ آئی ءَ دِل ءِ پُتِنک پَٹِّت اَنت بلے ھِچّ چُشێں گَم ئِے دَست نَکَپت کہ شَراب ءِ وَرَگ بِپَرما ایت۔ آ دْراہجانێں وَرنایے اَت، رَنگ ءُ دانَگ ءَ شَرّ اَت، وانَگ ءَ اَت ءُ پَرائی ئے باندات ءِ سَمبَہێنگا شَرّێں شَرّێں کار ءُ نَوکَری اێر اَت اَنت۔ وَگَرنَ آئی ءَ نَوکَری ءُ کار ءِ ھَم ھاجَت نَہ اَت۔ اِے دْراہێں وَشّی ءُ آسراتی وَتی جاگَہ ءَ بلے پَدا ھَم گُش ئے آئی ءَ گَمے ھَستَت۔ یَکّ بے نامێں گَمے، یَکّ بے نِشانێں دَردے۔ بلے کُجام؟ آئی ءَ ھِچّ نَزانت۔ وَہدے وَتی گَم ئِے دَر گێتک نَکُت، گُڈا اَسلَم ءِ بارَوا ھَیال کَنَگ ءَ لَگِّت بلے سَرزاہِرا اَسلَم ءِ کِرّا ھَم ھِچّ ئے کَمّی نَہ اَت۔
“اَسلَم! تَئی گَم چے اِنت؟ تَو پَرچا شَراب ءِ گاڈی ءَ سَوار ئے؟”
“مَنی گَم؟ مَنی گَم اِش اِنت کہ مَنی کَش ءُ گْوَر ءَ شَرَّنگێں جِنِکّ مُچّ اِنت۔ مَن لۆٹاں کہ یَکّے ءِ سَر ءَ آشِک بِباں۔ مَنی دِل ءَ بے کِ آئی ءَ دِگِہ کَسّی ھَیال مَیَیت۔ آئی ءِ سَر ءَ گَنۆک بِباں بلے گۆں مَن نَبیت،” اَسلَم ءَ گُشت ءُ سَبزَل ءَ وَتی بے نامێں گَم دَست کَپت۔
“مَنی ھَم اَنچێں جێڈَہے بلے…” سَبزَل ءَ گُشت بلے اَسلَم گێشِ وَتی کِسَّہ ءَ نَہ اَت۔
“اگں جِنِکّے گۆں مَن نَزّیک بَیاں بیت، مَن دِل ءَ گُشاں اِے جِنِکّ اَنّی وَ شَرّ اِنت بلے بارێں دێم ءَ چۆن بیت۔ بِگِند ئے مَنی لۆگ ءَ بَیَگ ءَ رَند چَہ مَن ءُ شَرتِرێں بَچَکّے دۆست ئِے بیت ءُ گۆں مَن بے وَپائی کَنت یا ناجۆڈیے گیپت ئِے ءُ پہ مَن جَنجال بیت ءُ مَنی مِہر کَمّ کَنت۔ ھَمے پَیمێں وَسواسانی تَہا ماں گیشّان ءُ اِے پَیسَلَہ ءَ کُت نَکَناں کہ گۆں اِے جِنِکّ ءَ دۆستی بِکَناں یا نہ۔” اَسلَم ءَ وَتی گَپّ تَوام کُت۔
“مَن تَئی گَم ءَ سَرپَد بیتاں، اَسلَم!” سَبزَل ءَ سَر سُرێنت۔ “مَنی ھَم اَنچێں کِسَّہے بلے مَنی جَنجال اِش اِنت کہ مَن ءَ چَہ جِنِکّاں تُرسیت۔ مَن دِل ءَ گُشاں اگں جِنِکّے ءِ کِرّا وَتی دۆستی ءَ زاہِر بِکَناں، آ بارێں چے گُشیت۔ چۆ مَبیت کہ مَن ءَ اِشکبازێں، یَلَہچَرّێں بَچَکّے سَرپَد بِبیت ءُ مَنی مِہر ءِ کَدر ءَ مَکَنت۔ اِے وَڈێں گَپّ دِل ءَ کاران ءُ ھِمَّت نَبیت کہ گۆں جِنِکّے ءَ وَتی دۆستی ءَ زاہِر بِکَناں۔ اَنچۆ، اَنچۆ، یَکّ وَہدے کئێت کہ آ جِنِکّ دِلپرۆش بیت ءُ دِگِہ بَچَکّے ءِ نێمَگ ءَ رَوت۔ مَن ھَیراں آں کہ آدِگے بَچَکّاں اِے ھِمَّت چۆن بیت کہ گۆں جِنِکّے ءَ گُش اَنت: تَو مَن ءَ دۆست بَئے۔”
“اِے وَ ھَیر مُشکُلے نَہ اِنت،” اَسلَم ءَ دَرّاێنت۔ “جِنِکّ ءِ کِرّا دۆستی ءِ زاہِر کَنَگ گْرانێں کارے نَہ اِنت۔ مَنی ھَیال ءَ گْرانتِرێں کار اِش اِنت کہ مَن جِنِکّ ءِ سَر ءَ گَنۆک ءُ شَیدا بَیَگ لۆٹاں بلے نَباں۔ مَنی سَر ھَمے گَپّ ءَ دَر نَرَوت کہ شَئے مُرید پہ ھانی ءَ چۆن گَنۆک بیتَگ۔ اِینچُک سَکّی ءُ سۆری آئی ءِ دێم ءَ اَتکَگ، آ پَرچا نَبَجِّتَگ۔ آ چۆن سَدِّک بیتَگ کہ ھانی بے وَپائی نَکَنت۔ مَن پَرچا مُرید ءِ وَڈ ءَ اِشک کُت نَکَناں؟”
اَسلَم کَمّے بے تَوار بُوت۔ پَدا گُشت ئِے:
“مَنی ھَیال ءَ مِہر ءِ دَور ءَ لَڈِّتَگ۔”
“نہ، چۆ نَہ اِنت۔” سَبزَل ءَ چَہ وَتی نێمانێں بُلۆر ءَ گُٹّے گِپت۔ “مِہر ءِ دَور نَشُتَگ۔ باہۆٹ ءُ جاں بیبی چۆن اَنت پہ یَکّے دُمیگ ءَ! مَزار ءُ زَراتُون۔ پِنڈُل ءُ زُبَید… دْراہ مئے ھَمسَرُو اَنت۔ پہ یَکّے دُمیگ ءَ چۆن شَیدا اَنت!”
“ما چۆن بِکَنێں یار؟” اَسلَم ءَ آئی ءِ گَپّ ءِ تَہا دَور کُت۔ “گُش اَنت کہ آ وَرنائی وَرنائیے نَہ اِنت کہ بے اِشک ءَ بُگوَزیت۔ ما چۆن بِکَنێں کہ وَتی وَرنائی ءَ وَرنائی کُت بِکَنێں؟”
“سیر بِکَنێں، چۆن اِنت؟ پَدا گۆں جَناں اِشک کَنێں۔” سَبزَل نێم دِل ءُ نێم مَسکَرا اَت۔
“اِے وَ نَکلی اِشکے بیت۔”
“دِگِہ وَڈے کَنێں۔ چَہ باہۆٹ، مَزار، پِنڈُل ءُ چَمے بَچَکّاں جُست کَنێں کہ شُما چِتَور اِشک کُتَگ؟ مارا ھَم سَر ءُ سۆج بِکَنِت۔” سَبزَل اَنگَت مَسکَرا ءِ چاڈ ءَ اَت۔ اَسلَم ءَ بِچکَندِت بلے ھِچّ نَگُشت۔ سَیمی پَیکِش اَنچۆ بے تَواری ءُ جێڈَگ ھَلّێنت۔ وَہدے چارُمی پَیک کَیل بیت اَنت، اَسلَم ءَ سَکّ دیر چارانا دَرّاێنت۔
“سَبزَل! اود ءَ بِچار، دیر ھَمۆدا کہ زِمین ءُ آزماں ڈُکّ اَنت۔”
“ھُومّم، گِندَگ ءَ آں۔”
“مئے چَمّاں زِمین ءُ آزماں ڈُکِّتَگ اَنت بلے چۆ نَہ اِنت۔ اِے نہ ھۆر بیتَگ اَنت، نہ بَنت۔”
“ھَو بلے تَو چے گُشَگ لۆٹ ئے؟”
“مَن ھَمے گُشَگ لۆٹاں کہ مُرید ءُ ھانی، لَیلا ءُ مَجنُون، رۆمیَو ءُ جُولیِٹ اِینچُک نَزّیک نَبیتَگ اَنت چۆ کہ ماِش گِندێں۔”
“بلے اَسلَم! آیاں پہ یَکّے دُمیگ ءَ ھَر سَکّی ءُ سۆری سَگِّتَگ۔”
“مئے چَمّاں ھَو بلے بِگِند ئے اِے گَپّ رَد اِنت۔ اَنچۆ کہ اَنّی مئے چَمّ رَد وَرَگ ءَ اَنت ءُ زِمین ءُ آزمان ءَ ھۆر گِندَگ ءَ اَنت۔”
“نہ یار! چۆ نَہ اِنت۔ اِشک مَردُماں یَدِّل ءُ یَجّاں کَنت۔ زِمین ءُ آزماں دِلی دۆست نَہ اَنت۔ اِے چۆ ھما بے مِہرێں مَرد ءُ جَنا اَنت کہ مَردُمانی چَمّاں ھۆر اَنت بلے آیانی دِل کَرنانی دیری ءَ اَنت۔ دُمی نێمَگ ءَ مُرید ءُ ھانی بِلّ ئِے جِدا بیتَگ اَنت بلے آیانی دِل ھۆر بیتَگ اَنت۔” سَبزَل ءَ گۆں جَزم گُشت ءُ اَسلَم گُش ئے چَہ وَتی پێسَری گَپّ ءَ بَجِّت۔
“یار! ما کَدی ھَمے پَیم بے ن؟ مارا کَدی اِشک بیت؟ آ رۆچ کَدی کئێت کہ ما ھَم کَسے ءِ وَدار ءَ شَپاں رۆچ ءُ رۆچاں شَپ کَنێں؟ آ رۆچ کَدی کئێت کہ ما ھَم کَسے ءِ زامُرێں بیکّانی سارتێں ساہِگ ءِ ھاتِر ءَ سَکّیانی سۆچاکێں لِوار ءَ سَگّێں؟ آ رۆچ کَدی کئێت؟” اَسلَم ءِ تَوار لَرزگا اَت۔
آئی ءَ وَتی ھۆرکێں گِلاس ءَ شَراب ٹَلّات ءُ بے آپ ءَ گُلاٹَگ ءَ لَگِّت۔ سَبزَل ءَ آ نَداشت۔ آئی ءِ دِل ھَم اَنچێں جُست گۆں وَت ءَ کَنَگ ءَ اَت ءُ پَسَّو ھِچّ نێستَت۔ آئی ءَ ھَم وَتی گِلاس چَہ زَگرێں شَراب ءَ کَیل کُت ءُ یَتِّنگ کُت… ءُ دَماںے ءَ پَد بۆتَل ھَلِّتَگَت۔
اَسلَم ءَ بۆتَل دَست ءَ کُت ءُ چَمّانی نَزّیک ءَ آُرت گُش ئے بۆتَل ءِ تَہا ھیرتێں چیزّے چارَگ ءَ اَت۔
“بے شَراب ءَ بۆتَل ھِچّ کار ءَ نَیَیت۔” آئی ءَ بۆتَل ماں بُرِّت کہ کۆہَہ ئے بُن ءَ شُت ءُ کَپت ءُ ٹُکُّر ٹُکُّر بُوت۔ “ءُ بے اِشک ءَ وَرنائی بے کار اِنت۔ سَبزَل! بْیا وَتی اِے بے کارێں وَرنائی ءَ اِے بے کارێں بۆتَل ءِ وَڈ ءَ کُورّائیں، ٹُکُّر ٹُکُّر کَنێں۔”
“چِتَور؟” سَبزَل ھَیراں بُوت۔
“بْیا دَور کَنێں چِدا۔” آ تَتَّرانا پاد اَتک بلے سَبزَل چَہ وَتی جاہ ءَ نَسُرِت۔
“سَبزَل! چی ءَ ھَیال کن ئے؟ مَن دِل ءَ سَدِّک آں کہ مئے وَرنائی پہ مُپت رَوت۔ ما بِہ اِشک کُت نَکَنێن ءُ بے اِشکێں وَرنائی چۆ شَراب ءِ ھۆرکێں بۆتَل ءَ اِنت کہ بے کِ پْرۆشَگ ءَ دِگِہ ھِچّ کار ءَ نَیَیت۔ بْیا سَبزَل! ھما جَہان ءَ رَوێں کہ اود ءَ نہ گَم ھَست نہ وَشّی۔ نہ وَرنائی ھَست نہ اِشک۔ بْیا رَوێں ھَمۆدا کہ واجَہ ھُدا ءِ ھَنکێن اِنت۔ ءُ چَرایا جُست کَنێں کہ تَو مئے کِسمَت ءَ پَرچا ھۆرکێں بۆتَل نِبِشتَہ کُتَگ؟”
اَسلَم ءَ سَبزَل ءِ دَست ءَ گِپت، ژَپِّت ءُ پاد کُت۔ ھَرد بے گَپّ ءُ ھَبَر ءَ ، تَتَّرانا شُت ءُ کۆہ ءِ کَلانٹَگ ءَ اوشتات اَنت۔ سَبزَل گُش ئے اَسلَم ءِ گَپّاں سِہر کُتَگَت۔
ھَمے سَہت ءَ ژَپَّگ ءَ چیزّے آیانی سَر ءَ گْوَست۔ ھَردُکاں بُرز ءَ چارِت۔ دو کۆہجِنگ یَکّے دُمیگ ءِ دُمب ءَ بال اَت اَنت۔ بَرے اِینگُر چِرّیِش جَت بَرے آنگُر۔ بِگِند ئے آ ھَکّ ءُ دِل مِڈَگ ءَ اَت اَنت یا بِگِند ئے ساچانێں مۆسُم ءَ مَست کُتَگَت اَنت۔
“اُو ھُدا! تَو مارا ھۆرکێں بۆتَل دات ءُ ما اِشیا ٹُکُّر ٹُکُّر کَنَگ ءَ ایں۔” اَسلَم ءَ گۆں لِلّێں زُبان ءَ دَرّاێنت بلے سَبزَل ءِ دِلگۆش گۆں مُرگان اَت۔
“سَبزَل!” اَسلَم ءَ آ ٹۆہێنت۔
“ھاں،” سَبزَل گُڈِت۔
“بْیا نی دَور کَنێں۔”
“کَمّے بِجَلّ یار! اِے جِنگُلاں چارێں۔ بارێں کئے گێش بیت؟” سَبزَل ءَ اِے دێم ءُ آ دێم چِرّی جَنۆکێں مُرگانی نێمَگ ءَ چارِت۔
“سۆچ اِشاں۔” اَسلَم زَہر گِپت۔
“نہ یار! مِرَگ ءَ وَ ما ھما وَڈ ءَ مِرێں۔ اِشانی تَماشَہا وَ بِچارێں۔”
سَبزَل ءَ گَپّ دَپ ءَ اَت کہ ھَور ءِ تْرَمپے آئی ءِ لُنٹاں لَگِّت۔ آئی ءَ لُنٹاں زُباں پِر مُشت۔ نۆکاپ ءِ تام چَہ شَرابَئێگ ءَ وَشتِر اَت۔
کۆہجِنگ یَکّے دُمیگ ءِ پُشت ءَ بال کَنانا دِگِہ نێمَگے شُت ءُ گار بیت اَنت۔ دیر گِرۆک ءَ جَت ءُ گْرَند ءِ سُبَکّێں تَوارے اَتک۔ جَمبَر گْوارَگ ءِ وَڈ ءَ اَت اَنت۔ چَہ دیر ءَ کَپۆتے ءِ کُوکُو ءِ تَوار گۆشاں کَپت۔ سَبزَل ءِ چَمّ ھَمۆدا شُت اَنت کہ اود ءَ آزمان ءُ زِمین یَکّے دُمیگ ءَ اَمبازاں گِران اَت اَنت۔
اَناگَہا سَبزَل ءَ دَرّاێنت: “اَسلَم!”
“ھاں،” اَسلَم ءَ لُڈّانا گُشت۔ آ ھَمے وَدار ءَ اَت کہ کَدی سَبزَل دَور کَنَگ ءَ جاڈی بیت۔
“ما وَتکُشی کَنَگ ءَ ایں؟”
“وَتکُشی؟” اَسلَم ءَ ٹَہک دات۔ “نہ یار! وَتکُشی زِندَگێں کَن اَنت، ما وَ پێسَر ءَ مُرتَگێں۔”
“چۆن؟”
“آ زِند ءَ کہ مِہر ءُ اِشک مَبیت مَرگ ءِ دَروَر اِنت۔”
“بلے اَسلَم! اِے وَشّێں کَوش، اِے نۆد ءُ ساچاں، گْرَند ءُ گِرۆک، دْرَچک ءُ دار، کَپۆتانی کُوکُو ءُ مۆسُمانی مَستی… ما اِے دْرُستاں یَلَہ دیَگ ءَ ایں۔ مارا پَرِشاں زَہیر نَکَنت؟” سَبزَل گُش ئے بَجِّتَگَت۔
اَسلَم ءَ بُرز ءَ لۆنجانێں جَمبَرانی نێمَگ ءَ چارِت۔ کۆہ ءِ چَپّ ءُ چاگِرد ءَ گۆں کَوش ءَ لُڈّۆکێں دْرَچکانی نێمَگ ءَ چَمّ شانک دات اَنت۔ دێم ئِے گۆں کَوش ءَ کُت ءُ چَمّ نَزّ کُت اَنت بلے ھِچّ ئِے نَگُشت۔
بارێں چینچُک دَماں اَنچۆ گْوَست۔ سَبزَل ءَ اَسلَم ءِ دَست ءَ گِپت۔ اَسلَم گُڈِت ءُ آئی ءِ نێمَگ ءَ چارِت ئِے۔ دُێناں داں سَہتُکے ءَ یَکّے دُمیگ ءِ چَمّانی تَہا چارِت ءُ پَدا سَبزَل ءَ اَسلَم زُرت ءُ شُت ءُ وَتی پێشی جاہ ءَ نِشت اَنت۔
“اَسلَم! زِند وَشّ اِنت۔ چۆ یَلَہ دَیَگ نَبیت۔ تُوری اِشک بیت یا نَبیت،” سَبزَل ءَ گُشت۔
اَسلَم چۆ بُت ءَ بے تَوار اَت۔
“اِشتاپ مَکَن، اَسلَم! زِندَگی بیت، یَکّ رۆچے مِہر ءُ اِشک ھَم بیت۔ اگں مَبیت ھَم، تَئی اِے گَپّ رَد اِنت کہ بے شَراب ءَ بۆتَل بے کار اِنت۔ ھۆرکێں بۆتَل باز کار ءَ کئێت۔ ھۆرکێں بۆتَل ءَ ما آپ ماں کُت کَنێں کہ زِند ءِ بُنیاد اِنت۔ بے نَگ ئِے ماں کُت کَنێں کہ تامانی بادشاہ اِنت۔ ءُ سَپائیں رۆگِن ھَم ماں کُت ئِے کَنێں کہ ماشبَٹّ ئے سَر ءَ سَکّ وَشّ اِنت۔”
ماشبَٹّ ءُ سَپائیں رۆگِن ءِ اِشُکنَگ ءَ اَسلَم ءَ بِچکَندِت۔ اِے آئی ءِ دِلپَسُندێں وَراک اَت۔
کۆہ ءِ وَشکَوشێں ٹُلّ ءَ آیاں داں دێرا نِشت ءُ گَپّ ءُ رَپّ جَت ءُ کَندِت۔ نی ھۆرکێں بۆتَل پَرایاں کارامَدێں چیزّے جۆڈ بیتَگَت۔
<سترُنگ><اِم>ناگُماں