کَلکَشاں گۆں وَتی نۆدَربَراں تَیاب ءِ لَمب ءَ سَیل ءَ اَت، بلے آئی ءَ وَتی ھَمراہ یَلَہ داتَگَت اَنت ءُ اێوک ءَ گَردَگ ءَ اَت۔ چَمّ ئِے کَپت سئے کَسانێں جِنِکُّواں کہ تَیاب ءِ لَمب ءَ کُچک چِنَگ ءُ پَندۆل ءَ کَنَگ ءَ اَت اَنت، لَیب ءُ گْوازی کَنانا رَوان اَت اَنت ءُ ناہُدا ءُ یَدّارانی کِرّا ماہیگ پَچ گْرَگ ءِ واست ءَ اوشتان اَت اَنت۔
گۆں ھَمے گْوَنڈُوانی گِندَگ ءَ کَلکَشاں وَتی ھَیالانی جُہلانکێں زِر ءَ اێر کَپت۔
ھانُل ءُ ھَتَّلی مَہدَروَر ءِ سَر ءَ کَندَگ ءَ اَت اَنت ءُ کَلکَشاں گُشَگ ءَ اَت، “تَو ھَمے کہ تَیاب ءَ کا ئے، اِے وَڈێں کُچک چِن ءِ، اِشاں چۆن کن ئے، گَنۆک؟”
چَہ مادَروَرا پێسَر ھانُل ءَ پَسَّو دات، “اِشاں کَما ایت ءُ گْوَر ءَ کَنت، ھَو نہ؟”
ھَہَہَ۔ ھَر سَیێں کَندَگ ءَ لَگِّت اَنت ءُ مَہدَروَر ءَ زَہر کُت، وَتی پَندۆل ءِ کُچک کَشِّت ءُ دَور داد اَنت ءُ ھامۆشی ءَ رَہادَگ بُوت۔ ھَتَّلی مَہدَروَر ءِ پُشت ءَ رَواں بُوت ءُ چاپ جَنَگ ءَ لَگِّت ءُ نازێنَگ ئِے بِندات کُت، “لاڈ ءِ لاڈ ءِ لاڈ ءِ، مَرچی ماہ مُجاں گِپتَگ، مارا تَیاب ءَ تَہاری ءَ گِپتَگ۔”
ھَہَہَ۔ ھانُل ءُ کَلکَشاں تَچانا شُت اَنت، آئی ءِ دێم ءَ ماں تَرِّت اَنت ءُ مَہدَروَر ءِ دَست گِپت ءُ گُشت، “جِنِکّ! تَو چۆ چے ءَ زَہر کن ئے، ما وَ مَسکَرا کَنَگ ءَ اَتێں۔ وَشّ بُو، اَڈ ءِ شَرَّنگ! ما ھَم باز کُچک چِتَگ۔”
رۆزَرد ءِ وَہد اَت۔ رۆچ ءِ زَردی ءَ زِر ءِ سَر ءَ ماں شانتَگَت ءُ زِر ءَ دِگِہ جَلوَہے آُرتَگَت۔ گْوات ءِ شیکَّگ ءَ تَیاب ءِ زێبائی گێشتِر کُتَگَت۔ گْوات اَنچۆ کَشَّگ ءَ اَت کہ دَزگُہارانی سَریگ ءُ مُود گْوات ءَ بال اَت اَنت۔ کَلکَشاں گۆں وَتی دَزگُہاراں چۆ زِری مُرگ ءَ تَیاب ءِ لَمب ءَ گۆں وَتی پَچێں بانزُلاں لَیب ءُ گْوازی کَنان اَت، چَہ دُنیا ءِ دْرُستێں گَماں بے سَما۔
مَہدَروَر ءَ گۆں لاڈُکی گُشت: “شُمئے دَزگُہار نَباں، یَلَہ دَیێت مَن ءَ ۔ شُما رَد دَیێت مُدام مَن ءَ ۔”
بلے آیاں یَلَہ نَدات ءُ ھَمراہ بُوت اَنت۔ مَہدَروَر ءَ ھَتَّلی ءَ را گُشت، “مَنی سَر ءَ نازێنک مَجَن، تَئی نام ءِ سَر ءَ ھَم سَوت ھَست اِنت۔ “ھَتَّلی لال گۆں جِنِکّاں کئێت اِنت، کَنڈیگ ءُ ھار ءُ جَوَکّاں کئێت اِنت”۔ گۆں ھَمے گالاں پَدا وَت کَندِت ئِے ءُ وَشّاں بُوت۔
“ھَہَہَ۔” ھَتَّلی ءَ ھَم کَندِت ءُ گُشت،<اَ> “مَن ءَ بلے اِے گَپّ وَشّ بیت، نَتَوریت۔”
مَہدَروَر ءَ گۆں ھَمے گَپّ ءَ آ تێلانک دَت ءُ زِر ءَ دَور دات۔ کَلکَشان ءُ ھانُل ءَ ھَم مَہدَروَر ءِ دَست گِپت ءُ زِر ءَ دَور کُت۔ یَکّے دُمیا آپ پِر رێچَگ ءَ لَگِّت اَنت، کَندَگ ءَ اَت اَنت۔
اَناگَہا کَلکَشان ءِ دێم ءَ آپ ءِ تْرینزُک لَگِّت ءُ آ گُڈِت۔ چَہ وَتی ھَیالاں دَر اَتک ءُ آئی ءَ چارِت کہ مَنی ھَمراہ ءِ تَوار اِنت۔ “تَو اِد ءَ سِنگ ءِ سَر ءَ اێوک ءَ نِشتَگ ءُ چے جێڈَگ ءَ ئے؟ اود ءَ ما دْرُست کَدیگێن اِنت کہ اَکس کَشِّگا این ءُ چۆن وَشّ اِنت۔ نوں وَ دَر کَپَگ ءِ وَہد اِنت ءُ تَو چۆ سِنگ ءِ بُت ءَ اِد ءَ نِشتَگ ءِ۔
کَلکَشان ءَ گۆں وَتی ژَندێں تَوار ءَ ءُ پْرُشتَگێں لَبزاں پَسَّو دات، “ھِچّ، بَسّ وَتی دَزگُہارانی تْرانَگ ءَ کَپتاں۔ دَزگُہار ھَم زِندَگی ءِ زِندَگێں بَہرے اَت اَنت۔”
<سترُنگ><اِم>آلیَہ شاہ