زِمِستانی بے گاہے اَت۔ گۆریچ ءَ شیکّ شیکّے چێر اَت۔ لَین ءِ ھیٹَرا کۆٹی داں ھَدّے گَرم داتَگَت بلے مَرچی چَہ دْرُستێں رۆچاں گْوَہرتِر اَت۔
مَن داں دِلبَند ءَ کَمبَل پِر داتَگَت ءُ تَچک اَتاں۔ دِل ءَ نَگُشت کہ چَہ لۆگ ءَ دَر بْیایاں۔ دِل ءَ وانَگ ھَم نَلۆٹِت۔ ٹیوی ءَ دو رۆچ اَت کہ ھَراب اَت ءُ مێتَگ ءِ مِستِری ءِ گْوَر ءَ کَپتَگَت۔ مَن نَزانت کہ چے بِکَناں۔ مَن کَش ءَ لێٹِتان ءُ ٹَیپ ئے نێمَگ ءَ چارِت۔ اگں اێوک بیتێناں سَوتے گۆش داشتَگَت بلے مَنی کَش ءَ مَنی لۆگی وَپتَگَت ءُ وَتی پَسُند ءِ کِتابے وانَگ ءَ اَت ءُ مَن نَلۆٹِت کہ آئی ءَ نَگێگ بِکَناں۔
ھَمے وَہد ءَ آئی ءَ تاکے لێٹێنت، مَنی نێمَگ ءَ چارِت، بِچکَندِت ءُ پَدا شُرُو بُوت وانَگ ءَ۔ مَن ھَیال کُت اِے ھما مِجازیێں جِنِکّ اِنت کہ یَکّ وَہدے مَن ءَ دَپی جُستے ھَم نَکُت ئِے۔ مَن ءَ یاد اِنت آئی ءِ مَستِرێں گُہار ءِ سیر ءِ شَپ ءَ کہ آ وَت ھَم چۆ بانۆر ءَ سَمبَہِتَگَت مَن وار کُت ءُ اَوَلی رَند ءَ آئی ءِ کِرّا گُشت: “تَو مَن ءَ سَکّ دۆست بَئے۔”
“بلے تَو مَن ءَ دۆست نَبَئے،” آئی ءَ گۆں تْرُندی گُشت ءُ پُشت ماں دات۔
“مَنی گَپّ ءَ گۆش دار، مَن گۆں تَو سیر کَناں۔” مَن اَنچۆ سَربَتَگ بیتاں کہ آئی ءِ رَند ءَ کَپتان ءُ آئی ءِ دَست ءَ گِپت۔ آئی ءَ دێم تَرّێنت ءُ سۆچاکێں شَہَماتے مَنی گۆژبُن ءَ گْوَر دات ءُ گۆں آزگوارێں چَمّاں مَن ءَ چارانا شُت۔
مَن وَتی شَہمات وارتَگێں گُبّ لَتَرت ءُ دِل ءَ سَوگِند وارت کہ اِے جِنِکّ کہ مِہر ءِ نام ءَ اِشکُنت شَہَمات جَنت، اِشیا مَن وَتی مِہر ءُ دۆستی ءِ زۆر ءَ اَنچۆ بَدَل کَناں کہ یَکّ رۆچے کئێت مَنی ھَمے گُبّ ءَ چُکّیت۔
وَڈ وَڈێں جێڈَہ ءُ جَنجال دێم ءَ اَتک بلے مَن پَد نَکِنزِتاں۔ پَدا یَکّ رۆچے اَنچێں ھَم اَتک کہ ما چێرُکائی نِند ءُ نْیاد شُرُو کُت۔ دێر نَگوَست کہ مَن پَرایا گَپّ دێم دات ءُ آ مَنی دِشتار بُوت۔ پَدا مئے سیر بُوت ءُ مَرچی ھما مِجازێں جِنِکّ مَنی مِہر ءَ اَنچۆ بَدَل کُتَگَت کہ مَن وَت بَرے بَرے ھَیراں بیتاں۔
پَہکێں گَنۆک اَنت اِے جِنِکّ۔ نہ زَہر ءَ اِشاں ھَدّ ھَست، نہ مِہر ءَ ۔
مَن ھَیال کُت ءُ بِچکَندِت۔ ھَمے وَہد ءَ آئی ءَ تاکے لێٹێنت ءُ مَنی نێمَگ ءَ چارِت۔ مَن ءَ بِچکَندَگ ءَ دیت ئِے، جَواب ءَ بِچکَندِت ئِے ءُ پَدا وانَگ ءَ لَگِّت۔
“باز مَواں۔ شَرّ نَہ اِنت۔ ڈَولدارێں چَمّ اێوک ءَ وانَگ ءِ واست ءَ نَہ اَنت۔” مَن کِتاب ءِ نێمَگ ءَ دَست شَہار دات۔ آئی ءَ کِتاب دیر داشت ءُ گُشت: “بِلّ وَتی داکتَری ءَ ، وَت نَوان ئے، مَن ءَ ھَم نَیل ئے۔”
“مَن کہ نَواناں تَو چی ءَ وان ئے؟” مَن چینڈُکے پَتک۔
“اَلّاہ، اَلّاہ! تَو بِلّ۔ بَسّ تاکے پَشت کَپتَگ اِے دَر ءِ۔”
آئی ءَ کِتاب ءِ دَپ پَدا پَچ کُت ءُ مَن زَہر کَنَگ ءِ وَڈ ءَ دێم تَرّێنت۔ مَن زانت کہ آ مَنی وَشّاں کَنَگ ءَ دێر نَجَنت ءُ راستی دێر نَگوَست کہ آئی ءَ تاک ھَلّێنت ءُ پُشتُکائی مَن ءَ گُلاێش کُت۔ مَن ھِچّ نَگُشت۔
“اَپَو، زَہر کُت واجَہ ءَ ؟ اِش اِنت نَواناں۔ نی وَشّ ئے؟”
مَن دَنینگَہ ھِچّ جَواب نَداتَگَت کہ گَیٹ ءِ گَنٹی ءَ تَوار کُت۔
“اِشنَیا! یَکّے اَتک۔ بارێں شَرَپ اِنت۔ اِے گۆریچ ءَ ھَم آرام ئِے نێست،” مَن گۆں نێمبێزاری گُشت۔
“اِنّاں واجَہ! اِے تَئی رۆلێں سَنگَت نَہ اَنت، مَنی پِت اِنت۔ مَرچی نێمرۆچ ءَ پَون ئِے کُت۔ گُشت ئِے بے گاہ ءَ بَلکێں شُمئے چارَگ ءَ بْیایاں۔”
“بلے تَئی پِت ھَم مَنی بَلاہێں سَنگَتے۔ آ ھَم رۆلے؟” مَن کَندِت۔
“رۆل تَئی جِند اِنت،” آئی ءَ گۆں ٹَہلے گُشت ءُ گُشادیا ڈَکّ ءَ شُت۔ پَدا کہ اَتک، پِت ءِ بَدَل ءَ مَنی سَنگَت سُلَیمان ئِے گۆن اَت۔ آ چَہ گْوَہر ءَ دْرَہێنَگ ءَ اَت ءُ بے سَلام ءَ تَچک ءَ ھیٹَر ئے دێم ءَ شُت ءُ نِشت۔
زال ءَ چاہ آُرت۔
سُلَیماں مَرچی پَرێشان اَت۔ سَر ئِے جَہل اَت ءُ بے تَواری چاہ وَرَگ ءَ اَت۔ مَن زال ءِ نێمَگ ءَ چارِت۔ آ ھَم ھَیران اَت کہ وَشرُوێں سُلَیمان ءَ مَرچی چۆن اِنت۔
گَنۆکچَڈائیں سُلَیماں چَہ بازار ءِ دْرُستێں مَردُماں جِدا اَت۔ آ اَجَبێں ھَیالانی واہُند اَت۔ مَردُماں آئی ءِ ھَیالانی سَر ءَ کَندِت بلے مَن ءَ دۆست بیت اَنت۔ چونایا سَکّێں یَڈَّکّے اَت، کَسّ ئِے نَمَرّێنت بلے مَنی گَپّ ئِے بِہ نَگُڈِّت۔ آئی ءَ مَنی باز اِزَّت کُت۔ بِگِند ئے اِے واست ءَ کہ مَن بازار ءِ اێدِگِ مَردُمانی وَڈ ءَ آئی ءَ را گَنۆک ءُ گَژدال ءِ گُشَگ ءِ بَدَل ءَ آئی ءِ گَپّ گۆں دِلگۆش گۆش داشت اَنت۔
مَن ءَ یاد اِنت یَکّ رَندے آئی ءِ کَماشێں پِت مَنی گْوَر ءَ اَتک ءُ ھال ئِے دات کہ “دَکتَر ساب، سُلَیمان ءَ ھَپتَگے بیت کہ تَپیگ اِنت۔ دَوا ءُ دَرمان ءِ نام ءَ گِر ئے، جَبَزَّہ کَنت۔ تَو وَت بْیا ٹَہێن ئِے۔ بَلکێں تَئی ھَبَر ءَ گیپت۔”
مَن شُتاں داں ھَو، تَپ ءَ رۆک اَت۔ مَن گۆں نَرمی گُشت: “ھاں اَڈ ءِ! ھَپتَگے بیت، نادراہ ئے کَپتَگ ءِ۔ نہ اِسپِتال ءَ اَتکَگ ءِ نہ مَن ءَ ھال داتَگ۔”
ءُ آئی ءَ مَن ءَ اَنچێں پَسَّوے دات کہ مَن سِٹّ کُت۔ نادراہ مَن باز دیتَگ بلے کَسّی دَپ ءَ چُشێں ھَبَر نَِشکُتَگَت۔ آئی ءَ گُشت: “مَن ءَ تَپیگ بَیَگ وَشّ بیت۔”
“چۆن؟ نادراہی وَ نَوَشّێں چیزّے۔” مَن ھَیراں بیتاں۔
آئی ءَ جَواب دات: “مَن وَہدے تَپیگ باں، جان ءِ ھَڈّ ءُ بَنداں اَنچێں شیرکِنێں، لَہمێں دَردے تَچیت کہ چے بُگُشاں۔ ءُ پَدا اَنچێں پُرلِزَّتێں واب گِنداں کہ گَپّ ءَ مَجَن۔ مَرچی مَن واب دیت کہ آزمان ءِ دێم ءَ بال آں۔ دێم پہ رۆچ ءَ رَواں آں۔ پَدا چَہ رۆچ ءِ بے کِساسێں بْرانزاں آپ بان ءُ زِمین ءِ سَر ءَ گْواراں۔ مَنی تْرَمپ ھَر جاہ کَپ اَنت۔ آ جاہ ٹُنگ بیت ءُ چَمے ٹُنگاں مۆر ءُ سُلۆر ءُ کِرم دَر کَپ اَنت ءُ دێم پہ رۆچ ءَ بال کَن اَنت۔”
سُلَیمان ءَ تَپ ءِ بارَوا دِگِہ اَنچێں اَجَبێں گَپّ جَت ءُ کِسَّہ آُرت کہ یَکّ بَرے وَ مَنی دِل ءَ ھَم تَپیگ بَیَگ ءِ ھُلّے چِست بُوت۔ مَن کَمّے آئی ءِ کِرّا نِشتان ءُ آئی ءِ گَپّ گۆش داشت اَنت۔ پَدا پہ گَل ءَ ءُ گُلُو دَوا ءُ دَرماں کُت ءُ اَتکاں۔
“داکتَر ساہِب!” سُلَیمان ءِ گْرانێں تَوار ءَ مَن ءَ چَہ ھَیالاں دَر کُت۔ آ اُمر ءَ چَہ مَن کَستِر اَت بلے ھَروَہدا مَن ءَ پہ نام تَوار ئِے کُت۔ پَمِشکا آئی ءِ دَپ ءَ داکتَر ساہِب ئے لَبز مَنی گۆشاں وَشّ نَبُوت بلے پَدا مَن دِل ءَ گُشت کہ بَلکێں کَسے ءِ گێگاناں گِرَگ ءَ اِنت۔ آ مَردُمانی گێگان ءِ گِرَگ ءَ سَکّ زَبر اَت۔
“مَن بێر گِرَگ لۆٹاں۔” آئی ءِ گالِوار تْرُند اَت۔
“بێر؟ چۆنێں بێر؟” مَن ءَ یاد نَہ اَت کہ سُلَیماں یا آئی ءِ مَردُماں گۆں کَسے ءَ دُژمِنی ھَستَت۔
“مَن چَہ گَرکُو ءَ بێر گِرَگ لۆٹاں۔”
“چَہ کئے ءَ ؟ گَرکُو ءَ ؟” مَن ھَیراں بیتاں چی ءَ کہ گَرکُو آئی ءِ زال اَت ءُ آیانی سیر ءَ دَنینگَہ سئے چار ماہ نَگوَستَگَت۔
“گَپّ چے اِنت سُلَیماں؟ گَرکُو ءَ چے کُتَگ زاناں؟” مَنی زال ءَ گۆں نَرمی جُست کُت۔ سُلَیمان ءَ سَہتُکے ءَ ھِچّ نَگُشت۔ پَدا گُشت ئِے:
“سیر ءَ پێش ءِ گَپّ اِنت۔ یَکّ رۆچے مَن گۆں گَرکُو ءَ گُشت تَو مَن ءَ سَکّ دۆست بَئے… مَن چَہ دَرکَسانی آئی ءِ دِشتار اَتاں۔ دِشتار کہ چُشێں گَپّے جَنت بایَد اِنت جِنِکّ گَل بِبیت بلے آ زَہر گِپت ءُ گُشت ئِے دِگِہ پَر ءَ گۆں مَن چُشێں گَپّ مَجَن۔ مَن ءَ سَکّ زَہر اَتک کہ جاگَہے مَنی دِشتار اِنت ءُ پَدا مَن چُشێں وَشّێں گَپّے جَنَگ ءَ آں، اِے اَنگَت مِجاز اِنت۔ مَن چَمّ ءُ دُچَمّ کُت ءُ آ گِپت ءُ گُلاێش کُت ءُ چُکِّت۔ زان ئے گَرکُو ءَ جَواب ءَ چے کُت؟ مَن ءَ شَہَماتے جَت ئِے۔ چَما رۆچ ءَ مَن وَتی نِزَراں کَپتاں۔ مَن سَوگِند وارت کہ چَہ گَرکُو ءَ وَتی بێر ءَ گِراں۔”
مَن کَندِت۔ اَوَلی رَند ءَ مَن سَہی بیتاں کہ چَہ مَن آبَید اِد ءَ دِگِہ بازێں وَرناے ءِ سَر ءَ ھَم اِے رَہمَت رِتکَگ۔ مَن کَندان ءَ زال ءِ نێمَگ ءَ چارِت۔ آئی ءَ ھَوادَگێں کَندَگے جَت ءُ گۆں سُلَیمان ءَ گُشت: “نی چۆن اِنت گَرکُو گۆں تَو؟”
مَن ءَ اَنچۆ سَما بُوت گُش ئے زال اِے گَپّ ءَ مَنی گۆشاں جَنَگ ءَ اِنت کہ جِنِکّ سیر ءَ پێش گۆں بَچَکّ ءَ ھَر وَڈ بِبیت، پَرواہ نێست۔ اَسَل گَپّ سیر ءَ رَندَئێگ اِنت۔
“نی گَرکُو شَرّ اِنت گۆں مَن۔” سُلَیمان ءَ چێر نَدات۔
“نی کہ شَرّ اِنت گُڈا بێر چی ءَ گِر ئے؟” مَن گُشت۔ مَن دیت کہ چَہ مَنی اِے گَپّ ءَ سُلَیماں گُش ئے دِلپرۆش بُوت بلے زال ءِ دێم رُژناتِر بُوت ءُ سَرپَد کَنَگ ءِ رَنگ ءَ گۆں سُلَیمان ءَ گُشت ئِے: “پێش ءَ وَ مَن ھَم اَنچۆ بیتَگاں۔ مئے ھَبَرسِندی ءَ پێش یَکّ رَندے اِشیا ھَم اَنچێں گَپّے جَت کہ تَو گۆں گَرکُو ءَ جَتَگَت۔ زان ئے سُلَیماں، مَن چے کُت؟ مَن ءَ اَنچۆ لَجّ بُوت ءُ اَنچۆ سَربَتَگ بیتاں کہ اِشیارا شَہَماتے جَت۔”
زال ءَ مَنی نێمَگ ءَ چارِت ءُ ما ھَردُکاں ٹَہک دات بلے سُلَیمان ءِ لُنٹانی سَر ءَ بِچکَندے ھَم نَیَتک۔
“بلے اِے دْراہ تَو دِشتاری ءَ پێش کُت اَنت۔” سُلَیمان ءِ لُنٹ اَنچۆ لۆنجان اَت اَنت گُش ئے اَنّی شَہمات ئِے وارتَگ ءُ پێداگ اِنت۔
“گَرکُو مَن ءَ باز دۆست اَت بلے ھَمے سَہت ءَ کہ آئی ءَ مَن ءَ شَہمات جَت مَنی دِل ءَ آئی ءِ مِہر مُرت ءُ زَہر ءَ سَر چِست کُت۔ مَن ھما وَہدی دِل ءَ سَوگِند وارت کہ چَرے جِنِکّ ءَ وَتی بێر ءَ گِران ءُ مَن وَتی بێر ءَ گِراں، داکتَر ساہِب!”
آئی ءِ تَوار چۆ کۆہ ءَ مُہر اَت۔ مَن زانت کہ سُلَیماں اِے رَندی مَنی گَپّ ءِ گِرَگ ءِ وَڈ ءَ نَہ اِنت بلے اَنگَت ھَم مَن تَسَلّا دات: “مئے چاگِرد ھَمے وَڈ اِنت سُلَیماں! اِد ءَ جِنِکّ آ وَڈ بیت نَکَن اَنت کہ مَن ءُ تَو لۆٹێں…”
“تَو ھَم؟ تَو ھَم اَنچێں گَپّ جن ئے؟” آئی ءَ پہ تَژن بِچکَندِت۔ “تَرا یاد اِنت یَکّ رَندے تَو وَت گُشتَگَت کہ اِشک اِشکێل نَبیت۔ راستێں مِہر ءَ پابَندی داشت نَکَن اَنت۔”
“شَرّ اِنت، سُلَیماں! تَو بێر گِرَگ لۆٹ ئے، بُرَو بِگِر!” مَن گُش ئے دَست چِست کُت اَنت۔ زال ءَ مَنی نێمَگ ءَ اَنچۆ چارِت گُش ئے مَن چَہ آئی ءَ بێر ءِ گِرَگ ءَ سَر گِپتَگاں۔
داں سَہتُکے بے تَواری بُوت۔ مَنی زال ءُ سُلَیماں نَزاناں چِہ ھَیالان اَت اَنت، اَلبَت مَن ھَمے چُرت ءَ کَپتَگَتاں کہ وَتی اِے یَڈَّکّێں سَنگَت ءِ زِند ءَ چَہ زَہر ءُ کێنَگ ءِ آس ءَ چۆن بِرَکّێناں۔
“سُلَیماں۔” مَن آئی ءِ کۆپَگ ءَ دَست اێر کُت۔ “مَن تَرا بێر گِرَگ ءِ شَرّێں راہے گُشاں گۆں۔”
آئی ءَ گۆں پُرُمێتی بلے زال ءَ گۆں تَکانسَری مَنی نێمَگ ءَ چارِت۔
“تَو چۆ کَن شَہَمات ئے بَدَل ءَ آئی ءَ شَہَماتے بِجَن۔ بَسّ ھَلاس۔”
مَن دیت کہ چَہ مَنی اِے گَپّ ءَ زال ءِ دێم رُژن ءَ بُوت بلے سُلَیماں گۆں ھۆرکێں دیدگاں مَن ءَ چارَگ ءَ لَگِّت۔
“اگں دِل نَمَنّیت آئی ءَ را دو شَہَمات بِجَن، سئے بِجَن۔ وَتی بێر ءَ گۆں سُوتّ بِگِر۔” مَن کَندان ءَ سُلَیمان ءِ بَڈّ ٹَپِّت۔
“سُوتّ ئے گَپّ مَن ءَ دۆست بیت۔” سُلَیمان ءَ بِچکَندِت۔
آئی ءَ دِگِہ چاہے وارت ءُ پَدا پاد اَتک ءُ شُت۔
مَن سارتێں گینّے کَشِّت ءُ گۆں زال ءَ گُشت۔ “مَن گُشت مَرچی اِے گَہێڈ مَنی گَپّ ءَ نَگیپت۔”
“ھَریَکّے وَتی اَمبریشّ ئے گَپّ ءَ گیپت۔” زال کِٹی کِٹی کَندَگ ءَ لَگِّت۔
“چے؟” مَن آ رۆک رۆک ءَ چارِت۔
“اَچہ چے، اِے نی سۆجے اَت تَو دات؟ اگں گَرکُو شَہمات ءِ بَدَل ءَ آئی ءَ دِگِہ شَہماتے بِجَنت گُڈا؟”
“گُڈا سُلَیماں گْرێواں بیت پَدا مَنی کِرّا کئێت۔ مَن گُشاں پَرواہ مَکَن وَرنا! بُرَو گۆں سُوتّا بێر بِگِر۔” مَن ٹَہک دات۔
“داں کَدێنا؟”
“داں باندات ءَ ۔ باندا مَن رَواں ٹَہێنانِش۔”
“اگں اود ءَ ھَم بے سَر ءُ پادێں پَیسَلَہے کُت گُڈا؟” زال شَیتانی ءِ چاڈ ءَ اَت۔
“آیاں بِلّ، وَتی ھَیر ءَ بُلۆٹ۔ نی مَن وَتی بێراں گِراں۔” مَن آئی ءِ پَنجَگ ءَ گِپت۔
“دِگِہ شَہَماتے وَرَگی اِنت زاناں واجَہ ءَ ،” آئی ءَ پہ ٹَہلے گُشت ءُ مَن گُلاێش کُت۔
ما شام کَنَگ ءَ اَتێں کہ سُلَیمان ءِ ناکُوزَتکے کہ اِسپِتال ءَ مَنی چَپراستی اَت، تَچانا اَتک ءُ ھال ئِے دات سُلَیمان ءَ گَرکُو ءَ را سئے شَہمات جَتَگ ءُ سَون داتَگ اَنت۔
<سترُنگ><اِم>ناگُماں