مِہر رُزوا کَنَگ نَبیت، مَن کُتَگ
ھِچّ تَماشا کَنَگ نَبیت، مَن کُتَگ
پہ تَرا آیَگ ءَ بُلۆربَدَن
کِشک بَڈّ ءَ کَنَگ نَبیت، مَن کُتَگ
جَنگ ءِ میان ءَ اَبێتکێں زالبُولے
اِینکَس زێبا کَنَگ نَبیت، مَن کُتَگ
تَہنا یَکّ واہَگے نَہ اِنت اِد ءَ
چے چے رَند ءَ کَنَگ نَبیت، مَن کُتَگ
گِند، بِچکَند ءُ پَدا ھِچّ مَگُش
چُشێں بَرۆسَہ کَنَگ نَبیت، مَن کُتَگ
اِے گُلامی ءِ اَہد ءَ اِشک ءُ وَپا
جَنگ ءِ پَیم ءَ کَنَگ نَبیت، مَن کُتَگ
"سِنگ ءُ سَر" آئی ءَ چادِر چَنڈِت
چۆن اِے داوا کَنَگ نَبیت، مَن کُتَگ
کئے گُشیت تَئی ھۆری ءَ گۆں زِمین
گێش زێبا کَنَگ نَبیت، مَن کُتَگ
بَسّ گۆں تَئی کِسَّہاں اَبێتکی ءُ شَپ
پَرچا مُلما کَنَگ نَبیت، مَن کُتَگ
تَہنا یَکّ مَردُمے پہ وَت آزِر
دْراہێں دُنیا کَنَگ نَبیت، مَن کُتَگ
<سترُنگ><اِم>آزِر مُراد