گاڈی دَگّ ءِ سَر ءَ شَتۆر گِران اَت۔ مُروارِد بازار ءِ مَردُماں، ماڈیاں، گاڈیان ءُ دْرَچکاں گۆں ھۆرکێں دیدَگاں چاران اَت۔ ھِچّ چیزّ وَشّ نَہ اَت۔ دَگّ ءِ راستی کَش ءَ کَبرِستان ءَ کَماشے یَکّ کَبرے ءِ سَر ءَ پُلّ اێر کَنَگ ءَ اَت۔ ءُ مُروارِد ءَ ھَیال کُت کہ زِند یَکّ کَبرِستانے، پُلّێں واہَگانی۔
“تَو شُدیگ نا ئِے؟” آئی ءِ مَرد زَر ھان ءَ آئی ءِ نێمَگ ءَ چارِت۔ مُروارِد ءَ ٹێمب چارِت۔
نێمرۆچ ءِ دو ءُ نێم اَت۔
“بَل ءِ،” آئی ءَ گۆں نێمدِلی گُشت۔
“گُڈا سُبارِگ کُج ءَ کَنێں؟”
“لۆگ ءَ ۔”
“لۆگ ءَ ؟” زَر ھان ءَ ٹَہکے جَت۔ “مَرچیگێں رۆچ مئے زِند ءِ وَشتِرێں رۆچاں یَکّے۔ لۆگ ءَ کئے نِندیت ءُ کۆنا ایت؟”
مُروارِد ءَ ھِچّ نَگُشت۔ پَرایا مَرچاں دْراہێں رۆچ یَکّ اَت اَنت!
“گُڈا وَشتام رِستۆراں چۆن اِنت؟” زَر ھان ءَ گاڈی ءِ آدێنک ءِ تَہا آ چارِت۔
“دِگِہ جاگَہے نَرَوێں؟” مُروارِد ءِ تَوار لَرزَگ ءَ اَت۔
“دِگِہ کُج ءَ ؟ چَہ وَشتاما شَرتِرێں وَرَگجاہ ھَست؟” زَر ھان ءَ یَکّ بَرے پَدا گۆں بے پَرواہی ٹَہک دات ءُ گاڈی دِگِہ نێمَگے تاب دات۔ دێم ءِ چَوکا ٹْرَیپِک چۆ سَرتَرّێں پُورّ ءَ چَکَرُّکی وَران اَت ءُ گاڈیانی دَنز ءُ دیتّاں ھَر نِدارَگ کۆردێم کُتَگَت۔ مُروارِد ءَ اَنچۆ سَما بُوت گُش ئے اِے دیتّ ءُ دَنزێں بازار آئی ءِ زِند اِنت، آئی ءِ جِند اِنت۔ دِل ءِ چَوک… گَم ءِ ٹْرَیپِک… رَنج ءِ دَنز ءُ دیتّ… آئی ءَ پہ بے آرامی دَستانی لَنکُک یَکّے دُمیگ ءَ اَڈێنت اَنت۔
مَرچی آیانی سیر ءِ اَوَلی سالگَشت اَت۔ اَنّی آ شَہر ءِ کَش ءُ گْوَر ءِ سَرسَبزێں جاہانی تَرّ ءُ تاب ءَ بیتَگ ءُ پێداگ اَت اَنت۔ جَنگَل ءُ گْیاباں سَکّ وَشّ اَت اَنت۔ دْرَچکانی ٹُلّانی سَر ءَ نِشتَگێں مُرگانی دِلارامێں تَوار ھَر نێمَگ ءَ شِنگ اَت۔ کۆہِستانی تَکش ءُ کَورجُوانی تَہا نُگرَہلاپێں ماہیگاں اِینگُر ءُ آنگُر چِرّی جَت۔ مَستێں کَوش ءَ بَزتاکێں دْرَچک لُڈّان اَت اَنت۔ آ پادانی ءَ جَنگَل ءَ گَشت اَنت۔ گاڈی ءِ سَر ءَ ڈَولدارێں جاگَہاں تَرِّت اَنت۔
وَشّێں جاگَہ ءُ وَشّێں ساہَت اَت اَنت بلے پہ مُروارِد ءَ بے لِزَّت اَت اَنت۔ آ، دَم پہ سَہت دۆستێن ءِ تْرانَگ ءَ کَپت۔ ھَپتَگے پێش آئی ءَ دۆستێن ءِ کاگَدے رَسِتَگَت۔ آ چَہ پێسَر ءَ بُن اَت ءُ کاگَد ءَ ٹێل ءِ کار کُت ءُ نی آ شَپ ءُ رۆچ وَتی اَوَلی ءُ گُڈّی مِہر دۆستێن ءِ ھَیالان اَت۔
آئی ءِ مات ءُ پِت ءِ واہَگ اَت کہ آ سیر ءِ واست ءَ پہ زَر ھان ءَ ھَو بِکَنت۔ زَر ھاں مَزَنێں سێٹی چُکّے اَت۔ دوێں کَہۆل شَہر ءِ کارُبار ءُ اێدِگِ چِست ءُ اێراں یَکّے دُمیگ ءِ نَزّیک اَت اَنت۔ ھَرد نێمَگ ءِ کَماشانی واہَگ اَت کہ آ چِد ءُ گێشتِر نَزّیک بِبَنت بلے مُروارِد ءَ زَر ھاں بُوچّے دۆست نَہ اَت۔ آئی ءِ وابانی سالۆنک چَہ کَسانی ءَ آئی ءِ ھَمساہگێں بَچَکّ دۆستێن اَت کہ مُروارِد ءِ مَردُماں ھِچّ ماں نَیَتک۔
“تَو گُش ئے گۆں دۆستێن ءَ سیر کَناں؟” آئی ءِ مات ءَ یَکّ رۆچے آ مانبَند کُت۔ “تَو چۆن نِشت کن ئے اِے آڈالانی تَہا؟ دۆستێن ءِ جِند کَنگَلائیں تاکّارے۔ پِت ئِے نێزگارێں شاِرے۔ مات ئِے ھُدائی جَٹّے۔ دۆستێن ءَ گِر ئے پَدا پِنڈ ءِ؟”
پِت ءَ ھَم بَچَکّ نادۆست اَت۔
“تَو مئے یَکّێں چُکّ ئے مُروارِد! ما نَلۆٹێں تَئی زِند بَرباد بِبیت۔ مَنی مات! مَن اِے بَچَکّ ءُ آئی ءِ مَردُماں شَرّ زاناں۔ اِے چَر ءَ تَئی مَٹّ نَہ اِنت۔ تَو شَہر ءِ مَستِرێں سێٹ ءِ جِنِکّ ئے۔ وَتی ءُ مَنی اِزَّت ءِ کَمّے ھَیال ءَ بِکَن ءُ پَدا زَر ھان ءِ لۆگ ءَ تَرا ھِچّ ئے کَمّی نَبیت۔ بُودناکێں بَچَکّے۔ مَن دِل ءَ جَزم آں یَکّ رۆچے آ شَہر ءِ مَستِرێں باپاری بیت۔”
آئی ءِ وابانی سالۆنک دۆستێن اَت بلے آئی ءِ مَردُماں مَرگ کُت ءُ آ گۆں زَر ھان ءَ سیر دات۔ مُروارِد ءِ سیر ءَ رَند دۆستێں دِلپرۆش بُوت ءُ وَت ءَ ھالتاک ءِ بُنجاہی کارگِس ءَ کہ دِگِہ شَہرے ءَ اَت، بَدَل ئِے کَناێنت ءُ نی ھَمانگُر اَت۔
وَشتام رِستۆران ءِ دَپ ءَ گاڈی ءَ داشت۔ ھَرد اێر اَتک ءُ تَہا پُتِرت اَنت۔ رِستۆراں اَنگَت ھما وَڈ ءَ اَت۔ ھِچّیزّ بَدَل نَبیتَگَت۔ کارِندَہ، کُرشی، ٹێبَل، دیوالانی دێم ءَ جَتَگێں اَکس، کُلّ ھما اَت اَنت۔ اگں بَدَل بیتَگَت آئی ءِ ھَمراہ… مَرچی دۆستێن ءِ جاہ ءَ زَر ھان اَت۔
مُروارِد ءِ چَمّ دیوال ءَ جَتَگێں ھما اَکس ءَ شُت اَنت کہ آئی ءِ تَہا بَچَکّے ءُ جِنِکّے یَکّێں سْرۆپ ءَ پَجّیا گَٹّ چِنَگ ءَ اَت اَنت۔ دۆستێن ءَ ھَروَہدا کہ اِے اَکس دیت، پہ مَسکَرا گُشت ئِے: “اِشاں سْرۆپ کُشت ءُ اێر کُت!”
مُروارِد ءِ دَست بے اِنانی پَندۆل ءَ شُت۔ آئی ءِ لَنکُکاں وار وارا ھما کاگَد گِپت کہ دۆستێن ءَ چَمانگُر گۆں آۆکێں نَزّیکێں سَنگَتے ءَ گۆں کُتَگَت۔
“مَنی مُرُو!” دۆستێن ءَ نِبِشتَگَت۔ “زی مئے ھالتاک ءِ کارگِس ءَ جِنِکّے وَتی کارے ءَ اَتکَگَت۔ باوَر کَن تَئی دارێں سَر اَت۔ مَن آ دِل ءِ سێر ءَ چارِت۔ نی کہ تَو چَہ مَنی دَست ءَ شُتَگ ءِ بایَد اِنت مَن تَرا بے ھال بِکَناں بلے چۆن کَناں کہ ماہِکانێں شَپ، ساچانێں رۆچ، سَمینێں سُہب ءُ اَبێتکێں بے گاہ ءُ دْرُستاں گێش اِد ءِ شَرَّنگێں جِنِکّ مَن ءَ تَئی شَمۆشَگ ءَ نَیل اَنت۔”
اِے وَژگَپّێں دۆستێن اَت۔ پہ سیر ءَ دۆستێن ءِ کَش ءُ گْوَر ءَ جِنِکّ ءِ کَمّی نَہ اَت بلے آئی ءِ دِل اَنگَت پَرایا بَند اَت۔
“مُرُو جاں! دِگِہ تَو ھال کَن۔ زِندَگی چۆن اِنت۔ گۆں زَرّ ھان ءِ زَرّاں لَیب ءَ ئے یا دۆستێن ءِ دۆستی ءَ زَرَگ ءَ ئے؟”
دێمتِرا گُشتَگَت ئِے:
“مَنی گَپّ اَنگَت ھما اِنت۔ اگں تَو زِند ءِ چَپّ ءُ چۆٹێں راہانی مُساپِریا دَم بُرت، بْیا پہ مَن۔ مَن اَنگَت تَئی وَدار ءَ نِشتَگاں۔”
“مُروارِد! تَو وَشّ ئے؟” زَر ھان ءِ تَوار ءَ آ چَہ دۆستێن ءِ دُنیا ءَ دَر کُت۔
“ھَو، بَسّ کَمّے دَم بُرتَگ۔” آئی ءَ بِچکَندَگ لۆٹِت بلے لُنٹاں ھَمراہداری نَکُت۔
“شَرّ، گُڈا نی نَگَن وَرێں۔” زَر ھان ءَ وَتی کُرشی دێم ءَ کِنزێنت۔ “وَرَگ ءَ رَند رَوێں دُکّان ءَ ۔ مَرچی تَرا ھما سَوگات ءَ دیاں۔”
کَمّے دێرا رَند آ شَہر ءِ تَہا سَہت ءُ زێوَر ءِ مَستِرێں دُکّان ءَ پُتِرَگ ءَ اَت اَنت کہ مَرچی گێشتِر رَشّ اَت۔ اِے شاہی دُکّان ءِ واہُند زَر ھان ءِ جِند اَت۔ گِراکانی مُچّی ءَ راہ کَنانا ھَرد دێم پہ دُکّان ءِ کارگِس ءَ رَواں بیت اَنت کہ دَکَل ءِ راستی کَش ءَ اَت ءُ زَر ھاں مُدام ھَمۆدا نِشت۔
اَناگَہا مُروارِد ءَ بَچَکّے دیت کہ سُہر ءِ ڈَولدارێں ھارے دُزَّگ ءَ اَت۔ مُروارِد ءِ گام کُنٹ بیت اَنت۔ ھَمے وَہد ءَ دُزّ ءِ چَمّ ھَم پَرایا کَپت اَنت۔ دُزّ ءِ چَمّانی تَہا اَنچێں بَزَّگێن ءُ رَہملۆٹێں دَزبَندیے زاہِر بُوت کہ مُروارِد ءَ گُشادیا دِگِہ نێمَگے چارِت۔ اَنچۆ بِزاں ھِچّا سَہی نَہ اِنت۔ گُش ئے آ وَشّ اَت کہ دُکّان ءِ ھَر چیزّ اَنچۆ دُزَّگ بِبیت… دُکّان ءِ واہُند زَر ھاں ھَم۔
مُروارِد ءَ دێم ءَ رَوَگ ءِ اِرادَہ کُت بلے زَر ھاں اوشتاتَگَت۔ آئی ءَ دُزّ دیتَگَت۔
“بِگِرِت آ بَچَکّ ءَ ، سُہر ءِ ھارے دُزِّتَگ ئِے۔” زَر ھان ءِ بُرزێں تَوار جَکسِت۔ ھال ءَ ساڈیێں دْراہێں مَردُماں چَکّ جَت۔ دُزّ تَچاں بُوت ءُ چَہ نَزّیکتِرێں دَروازَگ ءَ دَر شُت۔ دُکّان ءِ دو سئے کارِندَہ ءُ ڈَنّ ءَ اوشتاتَگێں گاٹ دُزّ ءِ رَند ءَ کَپت اَنت۔
اَناگَہا ڈَنّ ءَ گاڈیے ءِ بِرِکّاں چیسکَگ جَت۔ کَسے ءِ چیہانٹ چِست بیت اَنت ءُ مَردُماں دیت کہ دُزّ دَگّ ءِ سَر ءَ لێٹ گِران اَت۔ گاڈی والاءَ کہ وَرنا کَپَگ ءَ دیت، گاڈی ئِے تێز کُت ءُ ھُشکہ سْیاہ شُت۔
مُروارِد ءَ وَت ءَ داشت نَکُت۔ آ چَہ دُکّان ءَ دَر اَتک۔ زَدَگێں وَرنا دێم پہ چێر کَپتَگَت ءُ نارَگ ءَ اَت۔ مُروارِد ءَ لۆٹِت کہ وَرنا ءِ کِرّا بُرَوان ءُ آئی ءِ ھۆنرێچێں سَر ءَ کۆنڈ ءَ بِکَنان ءُ بُگُشاں: “مَن دَردیگ آں کہ تَو گِرَگ بیت ئے۔”
“اِے دُزّے! ھار ئِے گۆن اِنت۔ پَٹِّت ئِے۔” زَر ھان ءَ گۆں دُکّان ءِ کارِندَہاں گُشت۔ آیاں دُزّ پَٹِّت بلے ھارِش نَدیت۔ مَردُماں سُکسُک ءُ ھَلوَت بُنگێج کُت۔ زَر ھاں کَمّے بے وار بُوت ءُ گُشت ئِے: “مَن چَمِّ وَت دیت۔ ھار ئِے دَست ءَ اَت۔”
ٹَپّیگێں وَرنا دَردانی ھَلاہۆش ءَ نارَگ ءَ اَت۔ مُروارِد ءَ آ چارِت نَکُت ءُ پہ دُکّان ءِ رَوَگ ءَ پَد تَرِّت بلے اَناگَہا اوشتات۔ وَرنا ءِ دُزِّتَگێں ھار آئی ءِ دێم ءَ کَپتَگَت۔ مُروارِد ءَ اِینگُر ءُ آنگُر چارِت۔ مَردُمانی دِلگۆش گۆں ٹَپّیگێں بَچَکّ ءَ اَت۔ آ جَہل بُوت ءُ وَتی پادانی دێم ءَ کَپتَگێں ھار ئِے چِت ءُ مُچّ ءَ کُت ءُ پَندۆل ءَ کَنَگ ءَ گێگ اَت کہ زَر ھاں آئی ءِ نَزّیک ءَ اَتک۔
“اِشیا اِسپِتال ءَ بَرِت۔” زَر ھان ءَ یَکّے ءَ را گُشت ءُ مُروارِد ءِ دَستا ئِے گِپت ءُ دێم پہ کارگِس ءَ رَہ گِپت۔
“مَردُم گُش اَنت بَلکێں دُزّے نَہ اِنت، مَن اَنچۆ شَکّ کُتَگ بلے مَن چَمِّ وَت دُزّی ءَ دیت۔ کَمبَہت ءَ ھار بارێں کُج ءَ چێر دات؟” زَر ھاں گُشَگ ءَ اَت۔ مُروارِد ءَ ھِچّ نَگُشت۔ آئی ءِ ھاریێں دَست اَنگَت زَر ھان ءِ پَنجَگ ءَ اَت۔
کارگِس ءِ پُتِرَگ ءَ رَند زَر ھان ءَ آئی ءِ دَست یَلَہ دات ءُ دَم بُرتَگێں مَردُم ءِ وَڈ ءَ ژَمبَگ ءَ کُرشی ءِ سَر ءَ نِشت بلے پَدا یَکدَم چِست بُوت ءُ ھُشک ءُ ھَیرانێں مُروارِد ءَ زانت کہ پَرچا۔ دْرَپشۆکێں ھار ءِ لَمبُکے چَرائی ئے مُچّ ءَ لۆنجان اَت ءُ زَر ھان ءَ دیتَگَت۔
“اِے… اِے چَہ کُج ءَ اَتک؟” زَر ھان ءَ ھار چَرائی ئے دَست ءَ چامپِت ءُ چارِت۔ مُروارِد ءَ تْرِکَّگ نَکُت۔
“اِے ھما ھار اِنت کہ بَچَکّ ئِے دُزَّگ ءَ اَت؟ تَئی کِرّا چۆن اَتک؟” زَر ھان ءِ گالِوار زِبر اَت۔ آئی ءَ اَنگَت ھِچّ نَگُشت۔
“بُگُش نہ، اِے ھار تَئی کِرّا چۆن اَتک؟ تَو چِت؟” زَر ھان ءِ آسگوارێں چَمّ آئی ءَ سَکّ اَت اَنت ءُ آ چۆ بُت ءَ گُنگ اَت۔
“بُگُش تَو پَرچا چۆ کُت؟” زَر ھان ءَ گُرِّت۔ “مَنی اِزَّت ءَ لیلّام کَنَگ لۆٹ ئے؟ بُگُش۔” شُت تْرُندێں شَہَماتے ءُ مُروارِد تَتَّرانا بُن ءَ کَپت بلے زُوکَّگ ئِے نَکُت۔ آ اَنچۆ بے تَوار اَت گُش ئے ھار بَچَکّ ءَ نہ، آئی ءِ جِند ءَ دُزِّتَگ۔
گۆں شَہَمات ئے جَنَگ ءَ زَر ھان ءِ زَہر کَمّ تَرِّت اَنت۔ کَمّے پَشَل بُوت ءُ مُروارِد ءِ کۆپَگان ئِے گِپت ءُ پاد ئِے کُت۔
“مُروارِد! تَو اگں گَپّ جَتێں مَنی دَست چِست نَبیتَگَت۔ تَو پَرچا ھامۆش ئے؟” زَر ھان ءِ گالِوار نَرم اَت۔ مُروارِد ءَ ھِچّ نَگُشت۔ آئی ءِ چَمّ اَرس اَت اَنت بلے اَرسێں چَمّانی تَہا سَرکَشّی ءِ گِرۆک شَہم کَنان اَت ءُ اِے سَرکَشّێں شَہم چَہ سُہر ءِ ھار ءِ دْرَپش ءَ رُژناتِر اَت۔
اَناگَہا مُروارِد دێم ءَ کِنزِت۔ ھار ئِے چَہ زَر ھان ءِ دَست ءَ چامپِت ءُ گُشادیا ڈَنّ ءَ دَر اَتک۔ زَر ھاں چَہ ھَیرانیا کُنٹ بُوت ءُ چارِت ئِے۔
ھَمے بے گاہ ءَ مُروارِد بالیگُراب ءَ سَوار دێم پہ دۆستێن ءِ شَہر ءَ رَوان اَت۔ آئی ءَ سُہر ءِ ھارے ھَم گْوَر ءَ اَت۔ اِے ھار پَرایا یادگارے اَت۔ اِے ھما ھار اَت کہ آئی ءَ را چَہ سُہر ءُ نُگرَہ ءِ دِگِہ بازێں چَمنَگِندێں ھار ءُ تَوکاں آزات ئِے کُتَگَت!
<سترُنگ><اِم>ناگُماں