سَہکَندَن ءِ چَمپاچی ءُ بے وانکی ءَ ھَست اِنت زُباں
چَمّے بِبیت پہ گِندَگ ءَ
گۆشے بِبیت پہ اِشکُنَگ
اِمبرۆز ئے گْرانباہَندێں آشۆب آکِبَت اوبادَگاں پہ ساہَت اِنت
سَہکَندَن ءِ
گِند اَنت ءُ بے رۆک اَنت چَمّ
کَرّ اَنت بلے گۆش اِشکُن اَنت
ساہ اِنت ءُ بے گْواہ اِنت زِند
گِند کَہر ءُ مِہر ءِ آدَمی گِستایا
اَرواہ ءِ چیہانٹاں سَر ءَ زُرتَگ جَہاں
کَرّ اَنت تَئی گۆش ءُ مَنی گُنگ اِنت زُباں
تَو چۆ بَدَلزُرتێں زُبان ءِ مِنَّت ءَ بے باوَر ئے
مَن چۆ زِمینجُمبانی کَہرێں نییَت ءَ پێداوَر آں
تَو پہ سَگاراں گِپتَگێں کۆٹ ءُ کَلاتاں گَل ئے
مَن پہ پِتی میراس ءُ ماتی گُلزِمین ءَ تَلوَساں
مَن آدَم ءِ اوبادَگ آں
مِہرانی ھَکّێں وارِس آں
راستے کہ تَئی سۆب ءَ مَن ءَ مَرگی کُتَگ
شاتے کہ تَئی زۆراکی ءَ زِند ءِ یَلێں بَچّے جَتَگ
بَچّ آجُوی
بَچّ اێمِنی
بَچّ گُلزِمین ءِ دیدَگ ءُ زِرد ءِ مُراد
بَچّ گَمجَتێں بَنیادَم ءِ رَکّێنَگ ءِ جُہد ءِ مُراد
بَچّ دێرمانێں شادِہ ءِ شۆہازَگ ءِ مُزد ئے مُراد
بَچّ زِند ءِ مِہر ءِ مُجَّتی اَرماں
مِستاگی اَزاب ئے آسَر ءِ
تَو پہ سَرانی گُڈَّگ ءَ زِند ءِ ھَیالانا کُش ئے؟!
پہ سِندَگ ءَ داشت کن ئے پُلّاں چَہ بۆتالانیا!!
مَرک ءَ مَنی لۆٹ ئے، تَ اَرواہ ءَ بُکُش
کۆش ءَ مَنی باڈا ئے، مِہر ءِ واہَگاں پاہۆ بِدئے
بے گْواہی ءَ زَہر ئے، بِکَن رُژن ءَ مَنیگ ءَ اێرجیگ
زانت ءَ بِکَن تیر ءِ نِشاں
ھار ءَ مَجَلّ، ھَور ءَ بِدار
جۆن ءَ مَگِند، ھۆن ءَ بِچار
مَن پہ مِرَگ گار نَباں
مِہر آں کہ آوار نَباں
داں آکِبَت ھَست اِنت مَنی گامانی رَند
داں زِند بیت رۆک اِنت مَنی ھۆنانی لیک
مَرک ءُ وَدیگ ءِ دَرد یَکّ
ھَست ءِ مِسال اِنت نێستی
بیت او نَبیت اِنت واہَگ ءِ ناپیلَہی
تکہاں بانیادَم زَریت
پہ رُژن ءُ زانت ءِ اێمِنی
پہ آگَہی
پہ آجُوی
زۆراکی ءِ آس ءَ سُچیت
بَندیگی ئے زَہر ءَ چَشیت
تیرشانی ئے آماچ بیت
ماں پاہۆاں گُٹگیر بیت
مَن مُرتَگاں، تَو ھَم مِر ئے
تَو زِندَگ ئے، مَن زِندَگ آں
بِشکُن مَنی گُنگێں زُبان ءِ زێمِل ءَ
بْیا آکِبَت ءَ گۆں مَنی چَمّاں بِگِند
دُور ماں تَہارۆکێں شَپ ءِ جُہلێں زِر ءَ
رۆک اَنت چۆ آچار ءَ چِراگ
ماں کَندی ءِ ھُشکاوَگ ءَ
زۆراکی ءِ زُرتَگ تَلام
مِہر ءِ یَلێں پَیگَمبَراں
زُلم ءِ سَگار اَنت سَرشَکُون
رُژن ءِ گِرۆک اِنت شَہمَگ ءَ
کَہر اَنت چۆ کَرسێں بۆجی ءَ
آشۆب ءِ شَرتَگ اێمِن اِنت
دُور ماں ھُدۆک ءِ مِنزِل ءَ
مِہرانی گْوَربام ءِ گُلابدرَنزێں سَمین
زِند ءِ اَوَلرۆش ئے گُلێں مِستاگی اِنت
<سترُنگ><اِم>اَتا شاد