آ کَماش چَہ ڈِگار ءَ سئے لَچ ماش ءِ رُنَگ ءُ کۆسَگانی سَر چِنَگ ءَ رَند، ڈَگَّرێں کَہیر ءِ چێرا پہ دَم کَنَگ ءَ تَچک اَت۔ گَرماگی نێمرۆچاں ھَروَہدا کہ آئی ءَ چَہ کار ءَ دَم بُرت، ساسارَگ ءَ ھَمے پیرێں بلے ساہِگدارێں کَہیر ءِ چێرا اَتک ءُ نِشت۔
اِے نی آئی ءِ آدَت اَت۔ چۆ ڈَگَّرێں کَہیر ءِ جِند ءِ رۆتَگاں اِے آدَت ئے رۆتَگ اَنچۆ جُہل شُتَگَت اَنت کہ کَماش ءَ دِگِہ ھِچّ کَہیر ءِ چێر وَشّ نَبُوت۔ اێدِگِ کَماشاں آ بَرے بَرے کَلاگ زُرت کہ اِے کَہیر یَکّ رۆچے تَئی جِند ءَ چێر تَرّێنیت بلے آئی ءِ پَسَّو مُدام ھَمِش اَت کہ کْوَہنێں ھَمراہانی یَلَہ کَنَگ گران اِنت۔
آئی ءِ دِل پہ واب ءَ رَوَگی اَت کہ بے تَوارێں چاگِرد ءَ پادبرَمشے گۆشان ئِے کَپت۔ چَکّ ئِے جَت ءُ چارِت ئِے۔ آئی ءِ چُکّانی مات ءَ سُبارِگ گۆن اَت ءُ پێداگ اَت۔ ھُردُکێں رِگِتّ ئِے ھَم گۆن اَت۔ آ گۆں نُماسَگ ءِ گِندَگ ءَ گَل بُوت۔ آئی ءِ نِشار مَرچی وَتی مات ءُ پِت ءِ چارَگ ءَ کَور ءَ آدَست ئے بازار ءَ شُتَگَت۔ جِنِکُّو کہ نۆک شیر ءَ پَچ اَت، بُرتَگَت ئِے گۆں بلے رِگِتّ ھَمِد ءَ اَت۔
“بَچَہ! تَو مات ءَ نَشُت ئے گۆں؟” کَماش ءَ چَہ نُماسَگ ءَ جُست کُت بلے نُماسَگ ءَ پێش زال ءَ پَسَّو دات۔
“شیرێن ءَ وَ گُشت کہ بُرێں بلے اِشیا گُشت اگں پیربا گۆن اِنت، مَن کایاں گۆں۔”
کَماش ءَ ٹَہک دیانا نُماسَگ بَڈّ ءَ کُت ءُ پێشانیگ ئِے چُکِّت۔ چَرے گَپّ ءَ کَماش ءِ دِل وَشّ بُوت کہ آئی ءِ نُماسَگ مات ءَ گێش گۆں آئی ءَ لِچِّتَگ۔ ھَمے سَہت ءَ کَہیر ءِ سَر ءَ نِشتَگێں کَپۆتے کُوکُو ءَ لَگِّت۔ گْوَنڈُو ءِ دِلگۆش ھَمانگُر شُت۔
“پیربا!” آئی ءَ گۆں کَماش ءَ گُشت۔
“ھاں، مَنی چُکّ!”
“پیربا! مَن ءَ کَپۆتے بِدئے۔”
“کَپۆتے؟ چۆن ئِے کن ئے؟” کَماش ءَ کَندِت۔
“لۆگ ءَ بَران ئِے گۆں۔ بِلّ ئِے ھَمۆدا کُوکُو کَنت۔”
“چۆ گِرَگ نَبَنت، مَنی چُکّ! بال کَن اَنت۔ مَن رَند ءَ دام ءِ سَر ءَ پہ تَو یَکّے گِراں کاراں گۆں۔ اَنّی مَن دَم بُرتَگ۔ شُدیگ آں، نَگَن وَراں۔ شَرّ اِنت؟” کَماش ءَ گُشت ءُ ساکِمێں نُماسَگ ءَ مَنِّت بلے گۆش ئِے اَنگَت کَپۆت ءِ کُوکُوان اَت اَنت۔
نُماسَگ ءِ گَپّاں کَماش وَتی یَکّێں بَچّ ءِ تْرانَگ ءَ پِرّێنت کہ دَبَیا کار ءَ اَت۔ آئی ءَ ھَم کَسانی ءَ کَپۆت ءِ کُوکُو دۆست بیت اَنت۔ رِگِتّ رَنگ ءُ دانَگ ءَ پِت ءِ دارێں سَر اَت ءُ گَپّ ءُ آدَت ئِے ھَم ھَماَئێگئی اَت اَنت۔ بَچّ ءَ دو سال ءُ نێم اَت کہ وَلاِتان اَت۔ آ وَہدی کہ آ شُت رِگِتّ نۆکی چَہ شیر ءَ پَچ اَت ءُ جِنِکُّو نِشار ءِ لاپ ءَ اَت۔
“ھَو، دێر ئِے کُت،” کَماش ءِ دَپ ءَ بے اِرادَہی دَر اَتک۔ پیرزال کہ بارێں چِہ ھَیالان اَت، گُڈِت ءُ وَتی مَرد ءِ نێمَگ ءَ رۆک رۆک ءَ چارَگ ءَ لَگِّت۔
“کئے ءَ دێر کُت؟ مَن؟”
“نہ، نہ۔ تَو نہ۔ رِگِتّ جان ءِ پِت ءَ ۔ آئی ءَ ھَم کَپۆتانی کُوکُو دۆست بَنت،” کَماش ءَ گُشت ءُ پیرزال ءِ کْرِچکێں دێم ءَ اَبێتکیے ءَ ماں شانت۔ دُێناں پہ دۆستی وَتی نُماسَگ ءِ نێمَگ ءَ چارِت کہ کَپۆت ءِ کُوکُواں دِلگۆش اَت۔ کَماش ءَ گۆں گَرّ گَرّێں تَوارے ءَ کُوکّار کُت۔
“کُوکُوکُو، کُوکُوکُو۔”
ءُ نُماسَگ ءُ پیرزال ھَرد آئی ءِ سَر ءَ کَندَگ ءَ لَگِّت اَنت۔
رۆزَرد ءَ وَہدے کَماش ءَ لَچے کاہ بَڈّ ءَ اَت ءُ دێم پہ لۆگ ءَ رَوان اَت، کَپۆتی چُنکیے ھَم گۆن اَت ئِے۔ دام ءَ ھِچّ مُرگ نَگِپتَگَت بلے ڈَگَرّێں کَہیر ءِ چێرا ھَمے چُنکی زُکُرِّتَگَت کہ چَہ وَتی کُدُو ءَ کَپتَگَت۔
“گۆں ھُشکێں دَستاں رَوَگ ءَ شَرتِر اِنت کہ اِشیا بِبَراں گۆں،” کَماش ءَ دِل ءَ گُشت ءُ چُنکی زُرت گۆں۔ آ دَنینگَہ چَہ لۆگ ءَ کَمّے دیر اَت کہ رِگِتّ پہ گَل ءُ اُمێت کَندان ءُ کْریشتاں، تَچان ءُ سِٹُّک ءَ جَناں، آئی ءِ دێم ءَ اَتک۔
“پیربا! اِے چِپِلُکے۔” رِگِتّ ءَ چُنکی دَست گِرانا پہ گَل ءُ ھَیرانی گُشت۔
“ھَو، مَنی چُکّ! اِے تَئی وَڈێںے۔” کَماش ءَ بِچکَندِت۔
“اِے کُوکُو کَنت؟”
“اِنّاں، دَنینگَہ کَسان اِنت۔”
“تَو نَگُشت تَئی وَڈێںے؟ مَن بارێں گَپّ زاناں۔ اِے چِتَور کُوکُو نَزانت؟” رِگِتّ ھَیران اَت۔
“تَرا پَنچ سال اِنت۔ اِشیا بَلکێں پَنچ رۆچ نَبیت۔” کَماش ءَ کَندِت۔
ھُردُکێں رِگِتّ ءِ سَر پِر نَبُوت کہ وَہدے آئی ءِ اُمر پَنچ سال اِنت ءُ کَپۆت ءِ چُنکی ءِ اُمر پَنچ رۆچ اِنت گُڈا آ چۆن یَکّ اَنت؟ بلے آئی ءَ اِے چیستان ءِ سَر ءَ گێشێں وَہدزَوالی نَکُت ءُ گۆں پیرُک ءَ گُشت:
“پیربا! اِشیا مَن کُوکُو گُشاں گۆں۔”
رِگِتّ ءَ چُنکی وَتی دَپ ءِ نَزّیک ءَ آُرت ءُ کَپۆت ءِ وَڈ ءَ کُوکُو ءَ لَگِّت۔
“تُہ نامِ ھُدا، تُہ ماشَلّا!” کَماش ءَ وَتی نُماسَگ تُکّ جَت۔ آئی ءِ چَمّ نَہ اَت اَنت، کارچ اَت اَنت۔ یَکّ رَندے ڈِگار ءِ نَنگار دَیَگ ءِ وَہد ءَ آئی ءَ نَنگار ءِ تَوسیپ ءَ دِل ءَ بَسّ ھَمے گُشت کہ نَنگارے نَہ اِنت گُش ئے زَہمے گُہارگایدَگ۔ ءُ ھما دَمان ءَ نَنگار ءِ کَمێر پْرُشت۔ آئی ءَ نُماسَگ پَدا تُکّ جَت۔
مَگرَبتَہارا بارێں چَہ کُجانگُر جَمبَراں سَر کَشِّت ءُ زیتّاں آزمانِش پُچِت۔ آیاں شام کُتَگ ءُ نِشتَگَت اَنت کہ تْرَمپاں اێر دات۔
“شَرّ بُوت مَن ماش ھَلّێنت اَنت۔ اگں نہ ھَور ءَ آیانی کار بَرابَر کُتَگَت،” کَماش ءَ گۆں زال ءَ گُشت ءُ آئی ءِ کُٹّ ءَ نِشتَگێں نُماسَگ ءَ گُش ئے گَپّے تْرانَگ کُت۔
“پیربا!”
“ھاں۔”
“اَنّی اَمّا ھَور ءِ سَر ءَ اِنت؟”
“نہ اَڈ ءِ، آ وَتی اَمّا ئے لۆگ ءَ اِنت۔” کَماش ءَ کَندِت۔
“اَمّاءَ بُگُش ڈَنّ ءَ دَر مَیا۔ ھَور اِنت۔”
کَماش ءَ چَمّ نَزّ کُت اَنت ءُ اَنچۆ گَپّ جَت گُش ئے نِشار آئی ءِ تَوار ءَ اِشکُنَگ ءَ اِنت۔
“شیرێں! رِگِتّ گُشیت ڈَنّ ءَ دَر مَیا، ھَور اِنت۔”
“بُگُش نُنُّک ءَ ھَم دَر آیَگ ءَ مَیل۔”
“گُشیت نُنُّک ءَ ھَم دَر آیَگ ءَ مَیل۔”
رِگِتّ ءِ چَمّ لۆگ ءِ دێم ءَ دْرَتکَگێں ڈَبّا شُت اَنت کہ آئی ءِ تَہا چُنکی بَند اَت۔
“پیربا!”
“ھاں مَنی چُکّ!”
“چُنکی ءَ اَمّا ھَست؟”
“ھَو۔” کَماش ءَ پَدا کَندِت۔
“اَنّی کُج ءَ اِنت؟”
“ڈَگَّرێں کَہیر ءِ کُدُو ءَ اِنت۔”
“آئی ءَ ھَم بُگُش ڈَنّ ءَ دَر مَیا۔”
کَماش ءَ اِے کُلَہ ھَم سَر کُت۔
“پیربا! چُنکی ءَ پیربا ھَست؟”
“ھَو اَڈ ءِ،” کَماش ءَ گُشت ءُ پیرزال ءَ کَندِت۔
“اَنّی کُج ءَ اِنت؟ ڈَگَّرێں کَہیر ءِ کُدُو ءَ اِنت؟”
“اِنّاں۔ اِش اِنت۔” پیرزال ءَ کَندان ءَ کَماش ءِ نێمَگ ءَ اِشارَہ کُت ءُ رِگِتّ ھَیراں بُوت۔
“ھَو، پیربا؟ چُنکی ءِ پیربا تَو ئے؟”
کَماش ءَ کَندِت۔ “نہ اَڈ ءِ، مَن نَہ آں۔ مَن تَئی پیربا آں۔ چُنکی ءِ پیربا ڈَگَّرێں کَہیر ءِ کُدُو ءَ اِنت۔”
“پیربا! تَو شَپ ءَ مَنی واست ءَ کِسَّہ کار ءِ۔ چُنکی ءِ پیربا کِسَّہ کاریت؟”
کَماش ءَ پَدا وَتی کَندَگ داشت نَکُت۔
“ھَو اَڈ ءِ، چُنکی ءِ پیربا اَنچێں کِسَّہ کاریت کہ مَنِش ھَم نَزاناں۔”
“ھَو؟” رِگِتّ ھَیراں بُوت۔
“اَچہ چے۔” کَماش ءَ گُش ئے رِگِتّ ءِ ھَیراں کَنَگ وَشّ بُوت۔ رِگِتّ ءَ گۆں ناباوَری وَتی پیرُک ءَ را چارِت۔ آئی ءَ ھَروَہدا اێدِگِ گْوَنڈُوانی کِرّا گُرِّت کہ مَنی پیربا چَہ شُمَیگاں گێشتِر کِسَّہ زانت۔ بلے نی اِے گَپّ ءَ آ نَگێگ کُت کہ چُنکی ءِ پیربا چَہ آَئێگئی ءَ ھَم گێشتِر کِسَّہ زانت۔ آئی ءَ کَمّے ھَیال کُت ءُ پَدا چُنکی ءِ نێمَگ ءَ چارانا جُست کُت: “پیربا! چُنکی باندا کُوکُو کَنت، گِند ئے؟”
“ھَوووو،” کَماش ءَ دْراجێں ھَوے جَت۔
ڈَنّ ءَ ھَور تْرُند بَیان اَت۔ رِگِتّ ءَ داں سَہتُکے ھَور ءِ تَوار گۆش داشت ءُ پَدا گُش ئے چُرتے ءَ کَپت۔
“پیربا،” آئی ءَ آناگہا گُشت، “نی مَن زاناں، چُنکی چی ءَ کُوکُو نَکَنت۔”
“ھَو؟” کَماش ءَ وَت ءَ زۆر ھَیراں کُت۔
“ھَو، اِشیا وَتی پیربا ءِ کِسَّہانی واست ءَ زَہیر کَنت۔ پیربا! چُنکی ءَ کِسَّہے بِجَن ءُ بِدئے۔”
کَماش ءَ پیرزال ءِ نێمَگ ءَ چارِت ءُ پَدا ھَردُکاں کَندِت۔ آزمان ءَ جَمبَر ءَ ھَم ٹَہک دات۔
<سترُنگ><اِم>ناگُماں