گۆریچ اَتکَگَت ءُ پہ مُرادے اَتکَگێں جَمبَراں کِرّ کُتَگَت۔ مۆسُم ءِ اِے ناگَتێں تاب ءَ دْراہ بے وار کُتَگَت اَنت۔ مێتَگ ءِ پیرتِرێں مَردُم بَلُّک شُوشَل ءَ بِگِر داں شَکَروَرنائیں سَیلان ءَ دَر آ کہ اِے گْوَنڈێں بازار ءَ یَکّێں بَچَکّ اَت کہ شَہر ءَ دْوازدَہا وانَگ ءَ اَت۔ چَہ گۆریچ ءِ ناگُمانێں اُرُش ءَ ھَریَکّے نَگێگ اَت بلے کَسّ ءَ وَتی کار یَلَہ دات نَکُت۔ پَمِشکا آ زِمِستانی نێمرۆچ ءَ سُبارَگ ءَ رَند ھَریَکّے گۆریچ ءِ وَڈ ءَ وَتی کار ءَ دَزگَٹّ اَت۔ سَیلاں بان ءِ تَہا تَہت ءِ سَر ءَ وَپتَگ ءُ کِتابے وانَگ ءَ اَت۔ بان ءِ دێمی نِوان ءَ رۆتاب ءَ لَہتے جِنِکّ نِشتَگ ءُ گُد دۆچَگ ءَ اَت۔ بَلُّک شُوشَل رۆتاب ءَ تَہتے ءِ سَر ءَ وَتی نێمسۆنێں شالێں چادِر ءِ تَہا دُکُلکۆچ اَت۔ بَلُّک ءِ مَستِرێں بَچّ سادێں کہ نی ماش ءُ کَنَگ اَت، یَکِّرّا نِشتَگ ءُ ساد چۆپَگ ءَ اَت۔
چاگِرد ءَ گۆریچ ءِ شیکّ شیکّ ءُ ساد ءِ چۆپَگ ءِ تَوار ءَ آبَید دِگِہ ھِچّ چِڈِکّا نێستَت۔ اِے دوێں تَوارانی تَہا یَکّے ءِ سازۆک اَبرَم اَت ءُ یَکّے ءِ اِنساں۔ دوێں تَوار دِگِر دِگِر اَت اَنت بلے دُێنانی یَجّاہیا اَنچێں بے دَروَرێں زێمِرے وَدی بَیَگ ءَ اَت کہ آئی ءِ اِشکُنَگ ءَ سَیلان ءِ دِل ءَ ھَمے دِلوَشّێں بلے بے پَسَّوێں جُست پاد اَتک کہ آءَ اِنساں نی اَبرَم ءِ ھَمسَریا کَنَگ ءَ اِنت؟ چُکّ پِت ءِ دێم ءَ دَر آیان اِنت؟
دو سئے بَراں آئی ءَ کِتاب ءِ وانَگ بَند کُت ءُ ھَمے جُست ءِ سَر ءَ ھَیال کُت بلے ھِچّ آسَرے ءَ نَرَسِت۔ پَمِشکا پَدا کِتاب ئِے دَست ءَ کُت۔ گۆریچ ءِ پَیم ءَ نَگێگ کَنۆکێں جُستانی سَر ءَ ھَیال کَنَگ ءِ بَدَل ءَ چَرے کِتاب ءَ کِسَّہ ءِ وانَگ وَشتِر اَت۔
سَہتے ءَ پَد سَیلان ءَ دْراجێں گینّے کَشِّت۔ کِتاب یَکِّرّا اێر کُت ءُ شالێں چادِر داں دِلبَند ءَ پِر دات۔ آئی ءَ چۆ شالا باپ ءُ وَشّێں کِسَّہے وَنتَگَت۔
اِے کِسَّہ چۆن وَشّ اَنت۔ اِشانی کارِست چِتَور دِل ءَ پُتِر اَنت۔ گُش ئے مئے وَڈ ءَ اَنت بلے گُش ئے چَہ ما جِدا اَنت۔ آیانی زِند، آیانی گَپّ، آیانی ھَیال… چۆنێں لَہمێں دَردے مانِش۔ مَن اگں کِسَّہ ءِ نِبِشتَہ کَنَگ بِزانتێں بَلُّک شُوشَل ءِ سَر ءَ اَلَّما یَکّے نِبِشتَہ کُتَگَت۔ وَتی واری ئے چۆنێں چۆنێں کِشّاں کاریت۔ وَرَگ کاہُک ءُ پُژُّو بیتَگ اَنت۔ دِل پہ ماہیگی گَلّ ءُ ناہی گَدَّہگے ءَ بَند بیتَگ۔ پُچّ اێوک ءَ گْوَر ءِ پَشک بیتَگ ءُ بَسّ۔ شَلوارے ھَم نَبیتَگ۔ نِپاد ءُ گَندَلانی بَدَل مَچّانی لُٹّ ءُ پُونس بیتَگ اَنت۔ اِسکۆل ءُ اِسپِتال ءِ وَ کَسّ ءَ نام نَِشکُتَگ۔ گُش ئے ھَزاراں سال پێسَر ءِ گَپّ اَنت۔ بلے نہ، اِے بَلُّک شُوشَل ءِ کَسانی ءِ راستێں گَپّ اَنت۔ ھَو، دُنیا باز بَدَلِتَگ…
آئی ءَ چَہ لۆگ ءِ دَروازَگ ءَ اَوَلسَرا تَہت ءِ سَر ءَ دُکُلکۆچێں بَلُّک شُوشَل ءِ ءُ پَدا جِنِکّانی نێمَگ ءَ چارِت کہ گُد ءِ دۆکَہگا دِلگۆش اَت اَنت۔ وَہدے اِے جِنِکّ بَلُّک بَنت بَلُّک شُوشَل ءِ وَڈ ءَ وَتی کِشّاں کار اَنت! آئی ءَ بِچکَندِت۔ بلے کَبگێں پیر مَبات! داِم ھَمے پَیم کَسان ءُ شَرَّنگ بات!
آئی ءِ چَمّ کَسانسالێں کَبگێن ءِ سَر ءَ اوشتات اَنت کہ نی چُکّے نَہ اَت بلے جَنێںے ھَم نَہ اَت۔ وَرنائی ءِ بِندات اَت ءُ اِے وَہد اَنچێںے کہ جان ءِ بَند بَند ءُ بَہر بَہر گُش ئے چَہ کَرنانی واب ءَ پاد کئێت ءُ ھَرکَس ءَ وَتی آگَہی ءِ ھال ءَ دَنت۔ دْرُستاں گێش چَمّ نَۆشت اَنت۔ بَرے اِشیا چار اَنت بَرے آئی ءَ ۔ گُش ئے کَسے ءِ شۆہاز ءَ اَنت۔ اَنچێںے ءِ کہ چَبُلێں چَمّانی بے آرامیا اوشت ءُ آرامے بِدَنت۔
بلے… اِے کَبگێن ءِ چَمّ چی ءَ چِست نَبَنت پہ مَنی چارَگ ءَ؟ یَپَّیما گُد ءَ سَکّ اَنت۔ پێسَر ءَ وَ آ گُد ءَ گێش گۆں مَن دِلگۆش بیتَگ بلے نی… بیت کَنت آئی ءَ پێسَر ءَ باز بَر ءَ چارِتَگ بلے مَن وانَگ ءَ دِلگۆش بیتَگاں۔ ھَو، دُنیا ءَ دِلکَشّێں چیزّ باز اِنت۔ اَنچێں کہ چَہ دۆست ءِ مَستێں چارَگاں ھَم وَشتِر اَنت۔
کَبگێن ءَ کَش ءُ گْوَر ءِ جِنِکّانی نێمَگ ءَ دُزچَمّی چارِت۔ ھَرکَس گۆں وَتی کۆنڈ ءِ گُد ءَ گێڈ اَت۔ آئی ءِ چَمّ بان ءِ تَہا سَیلان ءِ نێمَگ ءَ شُت اَنت۔ بے تاہیرێں دیدَگاں ڈیکّ وارت۔ تُنّیگێں لُنٹاں بِچکَندِت۔ زِرێں دِلانی تَہا وَشّی ءِ مَستێں چَول چِست بیت اَنت۔
کَبگێن ءِ چارَگ ءُ بِچکَندَگ چِتَور وَشّ اَنت! سَیلان ءِ دِل دْریکّ دْریکّا لَگِّت۔ اِے وَڈێں دِلکَشّێں اَدا آئی ءَ چَہ کُج ءَ ھێل کُتَگ؟ پِلِمی جِنِکّانی ءُ کَبگێن ءِ وَڈێں نَوانِندَگ ءُ لۆگنِندێں جِنِکّانی ناز ءُ اَدا پَرچا یَکّ اَنت؟
اِے اَجَبێں یَرَّنگی ئے ھَیال ءَ آئی ءِ لُنٹانی سَر ءَ ھَیرانێں بِچکَندے اَتک۔ اِے نْیام ءَ کَبگێن ءِ چَمّ پَدا چَہ گُد ءَ دیر اَتک اَنت ءُ گۆں سَیلان ءِ چَمّاں دُچار کَپت اَنت ءُ سَیلان ءَ وَتی بِچکَند ءِ پَسَّو رَسِت۔ کَبگێن ءِ بِچکَند گُش ئے آئی ءَ را گُشَگ ءَ اَت، تَو سَرپَد نَبَئے جِنِکّانی اِسراراں۔
نَزاناں داں کَدێنا تَئی چارَگ ءُ بِچکَندَگ مَنی دِل ءَ وَشّیانی آزمان ءَ بال دی اَنت؟ سَیلان ءَ آزمان ءِ نێمَگ ءَ چارِت کہ گۆریچ ءَ گُبار کُتَگَت۔ آئی ءَ ھَیال کُت کہ آئی ءِ دِل کانگَڈَوے ءُ کَبگێن ءِ مِہر آئی ءِ بَندیکّ اِنت بلے آئی ءَ اِے ھَم زانت کہ دین ءِ تێزێں مانجا آئی ءِ دِل ءِ کانگَڈَو ءَ چَہ کَبگێن ءِ مِہر ءِ بَندیکّ ءَ کُجام نہ کُجام سَہَتا تْرِکَّگ ءَ سِست کَنت… اُپّ، اِے دین ءُ سِتکانی جێڈَہ۔ دْرێگَتێں مَن زِگریے بیتێناں۔ مَنی پِت ءَ نُماز مَکُتێں یا دْرێگَتێں کَبگێن ءِ پِت ءَ ھَم نُماز کُتێں گۆں۔
آئی ءَ گۆں نَگێگی کِتاب چِست کُت ءُ بے اِرادَہی کِتاب ءِ سَر ءَ کَبگێن ءِ نام نِبِشتَہ کُت ءُ کَبگێن ءِ پِت ناکُو سادێن ءِ نێمَگ ءَ چارِت کہ یَکَّجّا ساد چۆپَگ ءَ اَت۔
اِے ساد بُزُرتێں، پاہُو ءِ مُہرێں لۆپے بْرِستێن ءُ زِگر ءُ نُماز دْرَتکێن اَنت۔ اێشانی بَیَگ ءَ نَبَیَگ… چے گُش ئے مَنی بانُک؟ آئی ءَ وَتی دۆستێں دۆچگِر ءِ نێمَگ ءَ چارِت۔ چَمّاں پَدا ڈیکّ وارت۔ لُنٹاں پَدا بِچکَندِت۔ گُش ئے اِے رَندی کَبگێن ءِ بِچکَند گُشَگ ءَ اَت، تَو سَرپَد نَبَئے دین ءُ سِتکانی اِسراراں۔
ھَمے سَہت ءَ بَلُّک ءِ ڈێک کہ بَلُّک ءَ نام کَٹَّگ کُتَگَت، چَہ نێمَگے تَچانا دَر اَتک ءُ دێم پَرینگُر اَتک۔ سئے چار پاچِن لۆلارانا آئی ءِ دُمب ءَ اَت ءُ آ اِینگُر ءُ آنگُر چِرّی جَنان اَت۔ وَہدے راہ ئِے نَبُوت گُڈا گِرد ءَ گِرد نِشتَگێں جِنِکّانی تَہا پُتِرت ءُ گَنتِر گَٹّ بُوت۔ یَکّ تَیارێں پاچِنے آئی ءَ را پِر سِٹِّت۔
“اُوبابی!” ھَریَکّ جِنِکّے ءَ چَہ لَجّ ءَ کُوکّارے جَت ءُ وَتی دێم ءَ گِرانا پاد اَتک۔
“کِچّ مِر کِچّ! جِنِکّاں، گَلّێنت اَنت ءُ سۆچِت بے زاتاں، کَٹَّگ ءِ سرێن ءَ پْرۆش اَنت۔” بَلُّک کُوکّار کَنانا پاد اَتک ءُ نِشت بلے تَیارێں پاچِن ءِ گِندَگ ءَ اێرمۆش بُوت ءُ نَرم نَرما گُشت ئِے: “بلے پاچِنے شِہمێں دُمبا ئِے۔ دَر ئِے کَنِت آکُشتِرا، چُکّاں! بِلّ ئِے یَکّ ءُ دو پاد ئِے دَنت۔”
جِنِکّاں چَہ وَتی کِرّا پَس گَلّێنت اَنت بلے ھَمے ھَڈا ھُڈۆا یَکّے ءِ سیچِّن گار بُوت۔ یَکّے ءِ اَڈّ کُتَگێں ساکۆلَہ پَساں بُرت گۆں۔ یَکّے ءِ گُشاں پَسانی کانٹاں دِرت۔ ناکُو سادێن ءَ ھَم یَکّ بَرے ھَمینگُر چارِت۔ کَندَگے جَت ئِے ءُ پَدا ساد ءِ چۆپَگ ءَ لَگِّت۔
سَیلاں اِے نِدارَگ ءِ سَر ءَ بِچکَندَگ ءَ اَت۔ گِند ئے مَردُم پَسانی وَڈ ءَ بیتێں، تَماشَہے اَت۔ ھَرچے دِل ءَ لۆٹِتێں، کُتَگَت۔ بلے مَن چۆن سَگِّتَگَت کہ کَبگێں… ءُ آئی ءَ سَما بُوت کہ اِے اِنسان ءِ اوپار ءَ ڈَنّێں کارے۔
جِنِکّ اَنگَت وَت ماں وَت ھَلوَت کَنَگ ءُ کَندَگ ءَ اَت اَنت۔ بَلُّک شُوشَل ءَ جِنِکّانی کَندَگ ءُ ھَلوَت وَشّ نَبیت اَنت بلے اوپار ئِے کُت۔ جِنِکّ اَنگَت کَندَگ ءُ ھَلوَت ءَ اَت اَنت۔ بَلُّک ءَ وَت ءَ داشت نَکُت۔
“شُمارا لَجّ نَکَنت، جِنِکّاں! کَندَگ ءُ سُکسُک شُمارا دِگِہ دِلے وَشّ بیت۔ کْرێہی گُدِش کۆنڈان اَنت، ڈَکّے نَجَن اَنت، نِشتَگ کِٹی کِٹی کَند اَنت۔”
ءُ جِنِکّانی کَندَگ ءُ سُکسُک ھما دَمان ءَ اوشتات اَنت۔
سَیلان ءَ بَلُّک ءِ اِے گَپّ بُوچّے ھَم دۆست نَبُوت۔ بَلُّک تَیار اِنت کۆدِکێں جِنِکّانی سَر ءَ بے لَجّی ئے بُہتام ءِ بَندَگ ءَ۔ وَت زاناں پێسَر ءَ اَنچێں جِنِکّے نَبیتَگ؟ ھَمے وَڈێں نِدارَگ ئِے نَدیتَگ؟ ھَمے وَڈ کَندَگ ءُ مَسکَرا ئِے نَکُتَگ؟ نَزاناں اِے بَلُّک پیری ءَ پَرچا کانٹیێں پارسا جۆڈ بَنت؟ بارێں کَبگێں ھَم بَلُّکیا اَنچُش بیت؟
آئی ءَ گۆں جُستیگێں چَمّاں کَبگێن ءِ نێمَگ ءَ چارِت۔ چَمّاں ڈیکّ وارت، لُنٹاں بِچکَندِت… تَو سَرپَد نَبَئے بَلُّکانی اِسراراں۔ گُش ئے کَبگێن ءِ بِچکَند ءَ پَسَّو دات۔
اَجَبێں گَپّے۔ سَیلان ءَ پہ ھَیرانی ھَیال کُت۔ ھَروَہدا کہ مَن اَنچێں ھَیالے ءَ باں، کَبگێں مَن ءَ چاریت ءُ بِچکَندیت ءُ گُش ئے آئی ءِ بِچکَند گَپّ جَن اَنت۔ مَرچی وار کَناں گُشان ئِے گۆں۔ آ ھَم ھَیراں بیت…
سَیلان ءِ چَمّ پَدا ڈَنّ ءَ کَبگێن ءِ نێمَگ ءَ شُت اَنت۔ پَدا آیانی چَمّ دُچار کَپت اَنت ءُ لُنٹاں بِچکَندِت ءُ پَدا گُش ئے کَبگێن ءِ بِچکَند ءَ مانایے ھَست… تَو سَرپَد نَبَئے بِچکَندانی اِسراراں۔
“مێےێں، مێےێں” پَسے ءِ دۆدَگ ءِ تَوار اَتک ءُ بَلُّک ءَ دَمان ءَ گُشت: “ھاں! کَپتِر ئے تَوار اِنت۔”
کَپتِر کَبگێن ءِ مات تِلێہان ئے گِتاچ ءِ نام اَت۔ آئی ءَ وَتی وَہرێں گِتاچ ناکُو کُلان ئے بَبَّریێں پاچِن ءِ کِرّا بُرتَگَت کہ شِنِکّ ئِے بَبَّریزادَگ بِبَنت ءُ شیر ءُ شِنِک ھَرد گێشتِر بِبَنت۔
“جِنِکّ! تَو دێر کُتَگ۔ کَپتَرا یَکّ ءُ دو پاد ئِے دات؟” بَلُّک ءَ چَہ وَتی نِشار ءَ پَجّیا دو جُست کُت۔
“ھَو۔ پادے دات ئِے۔ باندا پَدا بَران ئِے۔” آئی ءَ گِتاچ کاپَر ءِ دار ءَ بَست۔ دێم گۆں ناکُو سادێن ءَ کُت ءُ دَرّاێنت: “مَیار اَتکَگَت۔”
“ھمّم، چِہ ھال ئِے کُت وَتی دَمَگ ءِ؟” ناکُو ءَ ساد چۆپانا جُست کُت۔
“بَدێں ھالے کُت ئِے۔”
دْراہ دِلگۆش بیت اَنت۔
“سێٹ کَمالان ءَ دو مَردُم کُشتَگ۔”
چَہ سَیلان ءِ دَست ءَ کِتاب لَگُشت۔ جِنِکّانی سیچِّن اوشتات اَنت۔ بَلُّک پاد اَتک ءُ نِشت۔ ناکُو ءَ سَرچۆپ چِست کُتَگَت بلے ساد ءِ سَر ءَ جَنَگ ءِ بَدَل ءَ سُبَکّ سُبَکّا بُنچۆپ ءِ سَر ءَ اێر ئِے کُت ءُ تِلێہان ئے نێمَگا ئِے چارِت۔
“مَردُم کئے بیتَگ اَنت؟”
“یَکّے آئی ءِ جِند ءِ جَنێں زَرُکّ بیتَگ ءُ دُمی دِگِہ بَچَکّے۔ چۆ بیتَگ کہ پَیری سێٹ پہ کارے ءَ شَہر ءَ شُتَگ۔ دۆشی کہ واتَرّ کَنت داں گِندیت کہ زَرُکّ ءُ بَچَکّ یَجّاہ اَنت… گُڈا وَتاس ءَ کَشّیت ءُ دُێناں جَنت۔”
“ھَوووو!” بَلُّک ءَ دْراجێں ھَوے کَشِّت کہ آئی ءِ تَہا ھَیرانی ءُ تُرس ئے ھَمراہی ءَ دِلجَمی ھَم مان اَت۔ گُش ئے بَلُّک ءِ “ھَو” گُشَگ ءَ اَت کہ چُشێں کارانی آکِبَت بایَد اِنت ھَمے بِبیت۔
“سێٹ ءَ وَتی اَوَلی جَنێں ھَپۆگی کُت ءُ ھَمے گِپت ءُ اِے بے نَنگا وَتی دێم سْیاہ کُت۔ شَرّ، گُڈا ھال نَکَن اَنت کہ بَچَکّ کئے بیتَگ؟” بَلُّک ءَ جُست کُت۔ دِگِہ کَسّ ءَ زُوکَّگ نَکُت۔
“بَچَکّ سَبزَل بیتَگ۔” تِلێہانا پَسَّو دات۔
“سَبزَل؟ کُجام سَبزَل؟” بَلُّک ءَ گیر نَیَتک۔
“سَبزَلِ کێنَگی۔ ھَمے بَچَکّ گِند ئے وَتی نِشتَگێں گُہار ئِے گۆں بَچَکّے ءَ دیت ءُ دُێن ئِے گۆں تَپَر ءَ ڈَکّی کُت ءُ کُشت اَنت۔”
“اِے سَبزَل؟” بَلُّک ءَ چَہ ھَیرانیا کُوکّار کُت۔ آئی ءَ سَبزَل ءِ اِے کار شَرّ یاد اَت ءُ مُدام ساڈات ئِے۔
“ھَو، تْرُو ءَ ! ھَمے سَبزَل۔ دِگِرے چُشێں کارے کَنت، کُشَنت ئِے۔ پَدا وَت تَرّ اَنت ھَمے وَڈ کَن اَنت۔”
“ھَوووو۔” بَلُّک ءَ پَدا دْراجێں ھَوے کَشِّت۔ اِے ھَو ءِ تَہا بے کہ بے واری ءَ دِگِہ ھِچّ ماں نێستَت۔ آدِگے بے تْرِکّ ءُ تَوار ءَ ھَمے ھۆشبَرێں ھال ءِ سَر ءَ ھَیال کَنَگ ءَ اَت اَنت ءُ تِلێہاں وَتی دۆستیگێں گِتاچ ءَ لۆٹُکے کاہ دێم ءَ دیَگ ءَ رَند لۆہیگ ءِ آپاں کِنزێنَگ ءُ آئی ءِ نَزّیکتِرا کَنَگ ءَ اَت۔
اَناگَہ، پَہک اَناگَہ سَیلان ءَ اِے ھَیال اَتک گُش ئے اِے گَپّ پێسَر ءَ ھَم بیتَگ اَنت۔ بَلُّک، ناکُو سادێں، کَبگێں، اێدِگِ جِنِکّ ءُ آئی ءِ جِند… دْراہ ھَمے وَڈ ھَمے جاہ ءَ نِندۆک بیتَگ اَنت۔ ھَمے پَیم گۆریچ بیتَگ۔ ھَمے ڈَول تِلێہانا سێٹ کَمالان ءِ دَست ءَ زَرُکّ ءُ سَبزَل ءِ کُشگ ئے ھال آُرتَگ ءُ ھَمے ڈَول دْراہ نَگێگ ءُ ھَیراں بیتَگ اَنت۔ ھَرچے کہ اَنّی بیتَگَت گُش ئے پێسَر ءَ ھَم چَٹ ھَمے وَڈ آئی ءِ دێم ءَ گْوَستَگَت۔
بلے یَکّ مَردُمے دو بَراں چۆن کُشَگ بیت؟ چَرے گَپّ ءَ آئی ءَ باوَر بُوت کہ اِے بَسّ گارێں ھَیالے بلے… بلے آئی ءِ دِل ءَ اِے مُہکَمێں مارِشت ھَم ھَستَت گُش ئے اِے دْراہ پێسَر ءَ بیتَگ اَنت۔ آ اَجَبێں کَشّانچیلّے ءَ کَپتَگَت۔ آ ھَمینچُک ھَیال کَنان اَت، ھَمینچُک آئی ءَ باوَر بَیان اَت کہ اِے بیتَگ ءُ گْوَستَگێں گَپّ اَنت۔ ھَو، اِے پێسَر ءَ ھَم بیتَگ اَنت۔ یَکّ رَندے نہ، ھَزار رَند ءَ ، بے ھِساب رَند ءَ ، چَہ کَرنانی کَرن ءَ …سَیلان ءَ کِتاب ءِ سَر ءَ کَبگێن ءِ نِبِشتَگێں نام کۆر کُت ءُ پَدا نِبِشتَہ کُت ءُ آئی ءِ نێمَگ ءَ چارِت… چَمّاں پَدا ڈیکّ وارت بلے اِے رَندی آیانی دیدَگ ھۆرک اَت اَنت ءُ چَہ لُنٹاں بِچکَند گار اَت اَنت۔
<سترُنگ><اِم>ناگُماں