کۆہِ مُراد ءِ زْیارَت کَنَگ ءَ رَند زِگریانی اِے کارَواں سِپَت ءُ چَوگاں جَنانا دێم پہ وَتی ھَلک ءَ واتَرّ بَیَگ ءَ اَت۔ سئے بَس ءُ ھَشت پیکَپ ءِ اِے گْوَنڈێں کارَوان ءَ لَیویز ئے گاٹ ھَم گۆن اَت۔ لَیویز ئے یَکّ گاڈیے سَر ءَ اَت ءُ یَکّے رَند ءَ ۔ اێشیا اَبَید راہ ءَ جاگَہ جاگَہ یَکّ ءُ یَکّ سِپاہیگے ھَم اوشتۆک اَت۔
پێسَری سالاں زْیارَت ءِ وَہد ءَ کہ ھَر سال 27 رَمزان ءَ کَپیت، مُلّایاں زِگریانی کارَوانانی سَر ءَ تیرگواری کُتَگَت۔ کۆہِ مُراد ءُ زِگری پێشوایانی بازار کَلَّگ کُلاچ ءِ سَر ءَ بَمب ءُ ٹۆپ چَگَل داتَگَت۔ چیزّے بێراں بُوت ءُ چیزّے ٹَپّی۔ اِے سالی مُلّایاں پَدا بیہار داتَگَت کہ زِگری زْیارَت ءَ مَیا اَنت۔ اگں کاینت گُڈا ھَرچے بیت زِمَّوار وَت اَنت۔ پَمِشکا اِے رَندی سَرکار ءِ اِنتِزام تْرُندتِر اَت اَنت ءُ دَنینگَہ ھِچّ نَوَشّێں گَپّے نَبیتَگَت۔
اِے گْوَنڈێں کارَواں دێم ءَ کِنزان اَت۔ پیکَپ دێم ءَ اَت اَنت ءُ بَس پُشت ءَ ۔ بَسانی تَہا جَنێن ءُ چُکّ اَت اَنت ءُ چَتّ ءَ مَردێں۔ ھَریَکّ گاڈیے ءِ مَردُم وَتی وَڈ ءَ سِپَت ءُ چَوگاں جَنان اَت اَنت۔ تَہا جَنێں وَتی وَڈ ءَ ھُدا ءُ مِہدی ئے تَوسیپ ءَ اَت اَنت ءُ بُرز ءَ مَردێں وَتی وَڈ ءَ ۔ رَند رَندی بَس ءِ تَوار چَہ دْرُستاں بُستِر اَت۔ بَچَکّ ءُ مَچَکّ وَ گێشتِر کُوکّار کَنَگ ءَ اَت اَنت۔ یَکّے ءَ سَدایے دَپ ءَ اَت:
“اِے سال ءَ ما زْیارَت کُت،”
ءُ اِندِگِ گۆں بُرزێں تَوارے ءَ جَواب دیَگ ءَ اَت اَنت:
“دێم ءِ سال ءَ یا کِسمَت!”
بلے بَس ءِ چَتّ ءَ نِشتَگێں آ وَرنا بے تَوار اَت… یا کِسمَت؟ آ سَدا ئے لَبَزانی سَر ءَ ھَیال کَنان اَت۔ کِسمَت پَرچا؟ نی زْیارَت ءِ اِلّۆک ءُ نَیلۆک کِسمَت وَ نَہ اِنت، چیزّے مَردُم اَنت۔ بایَد اِنت اِے سَد ءَ چۆ بِبیت:
“اِے سال ءَ ما زْیارَت کُت
دێم ءِ سال ءَ یا مُلا!”
آ مات ءَ پہ زۆرے زْیارَت ءَ آُرتَگَت گۆں۔ اگں نہ آئی ءِ ھِچّ اِرادَہ نَہ اَت۔ یَکّے وَ مات ءَ ھَمراہ نێستَت ءُ دُمی مات ءَ اَڈی کُتَگَت کہ سَیلان ءَ لازُم بَراں گۆں کہ بِہ زْیارَت ئِے نَکُتَگ۔ اگں نہ گُڈا مَن ھَم نَرَواں۔
پَمِشکا آ ناکامێں دِلے مات ءِ ھَمراہ بُوت۔ آئی ءَ نَلۆٹِت کہ اِے رَندی ھَم مات ءِ دِل ءَ رَنج بِکَناں۔ آئی ءَ اَئید ءِ ھما شَپ اَنگَت یاد اَت۔ مات ءَ گُشت بُرَو زِگر ءَ ، ءُ آئی ءَ زِگر ءُ نُماز ءُ دُنیا ءِ کُلّێں دینانی ھِلاپا واز شُرُو کُت۔ ناوانِندَگێں مات آئی ءِ گَپّاں شَرّی ءَ پۆہ نَبُوت بلے اِینچُک ئِے زانت کہ دین ءُ سِتکاں اێر جَنَگ ءَ اِنت۔ آ بَزَّگ ءَ اَوَلسَرا وَ ھَیراں ھَیران ءَ وَتی وَرنائیں بَچّ ءِ نێمَگ ءَ چارِت ءُ پَدا اَرس ئِے رِتک اَنت۔ سَیلان ءَ سَما بُوت کہ اَئید ءِ وَشّێں شَپ ءَ ، گۆں مات ءِ دِل ءِ کَہر کَنَگ ءَ آئی ءَ شَرّ نَکُت۔ آئی ءَ مات گُلاێش کُت ءُ وَشّاں کُت ءُ دێم پہ زِگرانَہ ءَ شُت۔
“اَڈ ءِ، تَو چی ءَ سَد ءَ نَجَن ءِ گۆں سَیلاں؟” سَنگَتے ءَ آئی ءَ را چَہ ھَیالاں دَر کُت۔ چِد ءُ پێسَر کہ آ جَواب بِدَنت دِگِرے ءَ گُشت: “زْیادَہێں چَوگاناں گُٹّ ئِے شُتَگ۔”
دْرُستاں دَپ ءِ سَد ءَ یَلَہ دات ءُ کَندَگ ءَ لَگِّت اَنت۔ چِد ءُ رَند کۆچرائی ءُ مَسکَرائی بُنگێج بُوت۔
“آ مُلایے!” یَکّے ءَ کُوکّار کُت۔
دْرُستاں چَکّ جَت۔ یَکّ اِسپێتێں ھَرے ڈَنّ ءِ سَر ءَ اوشتاتَگَت ءُ آیانی نێمَگ ءَ چارَگ ءَ اَت۔ دْرُستاں پْریشت کُت کَندَگ۔
“مَکَندِت، بَمب جَنت،” دِگِرے ءَ کَندان ءَ گُشت۔ یَکّ بَرے پَدا کَندَگ ءُ کُوکّار بُوت۔
آئی ءَ ھَم کَندَگ اَتک۔ آئی ءَ ھَیال کُت کہ مُلا تُوری ھَر دین ءِ بِبَنت، چۆ ھَر ءَ سْرُمبچار اَنت۔ اِشانی کِرّا ھَرچیزّ چَہ دین ءَ بِندات بیت ءُ چَہ دین ءَ کُٹّیت۔ بَزَّگ نَزان اَنت کہ دین پہ اِنسان ءَ اِنت، اِنساں پہ دین ءَ نَہ اِنت۔ دین اولاکے، اِے بَس ءِ پَیم ءَ ۔ اَنچۆ کہ بَس مَردُم ءَ چَہ یَکّ جاہے ءَ دُمی جاہ ءَ سَر کَنت، ھَمے پَیم دین اِمرۆز داں بَہِشت ءِ اولاک اِنت۔
بلے مَرچاں گُش ئے دین پَنچَر اَنت، اَیرلاک اَنت یا اِنجِنِش ھَراب اَنت۔ گاڈی کہ ھَراب بیت اُستاد ءُ کِلینڈَر آئی ءَ چُنڈ اَنت۔ اگں آیانی دَست ءَ اَڈّ مَبیت مِستِریے ءِ کِرّا بَرَنت ئِے بلے… بلے اِے دین، اِے کَلَنڈێں بَس کہ ھَراب اَنت، راہ ءِ نێم ءَ اوشتاتَگ اَنت، کَسِّش اَڈّ نَکَنت۔ مَردُم ھَم سَوار اَنت۔ ڈِلێوَراں سُکّاں دَست ءَ اِنت۔ دْرُستانی ھَیال ءَ بَس رَوان اَنت بلے اَسَل ءَ اوشتاتَگ اَنت ءُ بِہ مِنزِل ءَ سَر نَبَنت۔
مِنزِل پہ مِنزِل
واجَہ ءِ مَکاما
مَردُماں گَپّ بَند کُت ءُ ھَمے سِپَت دَپ ءَ کُت چی ءَ کہ بازارے نَزّیک اَت۔ وَہدے گاڈی بازار ءَ اێر کَپت اَنت، رَپتارِش سُست کُت۔ یَکّ نێمَگے لَہتے گْوَنڈُو اوشتاتَگَت۔ کارَوان ءِ ھَر گاڈیے کہ آیانی کِرّا گْوَست، دادِش کُت ءُ سِپَت ءُ چَوگانانی پَسَّوِش دات۔
آئی ءَ داد کَنۆکێں زَہگانی نێمَگ ءَ چارِت۔ چۆن جۆش ءَ اَنت اِے گْوَنڈُو۔ کۆدِکاں! شُما چی ءَ داد کَنِت مارا؟ ما چِہ زَہم جَتَگ؟ کَلَنڈێں بَس وَ اَنگَت نێمراہ ءَ اوشتاتَگ اَنت ءُ چَہ ما کَسّ آیانی اَڈّ کَنَگ ءِ سُدّ ءَ نَہ اِنت۔
آئی ءِ چَمّ داد کَنۆکاں کَمّے پَسِّند گْوَنڈُوانی دِگِہ رُمبے ءَ کَپت اَنت کہ کارَوان ءِ گاڈیاں پَنچ دیَگ ءَ اَت اَنت ءُ کُوکّار ءَ اَت اَنت:
“کاپِر کاپِر، زِگری کاپِر۔”
کئے کاپِر ءُ کئے مۆمِن؟ پَیگَمبَراں نَزانتَگ، شُما چۆن زانِت کۆدِکاں!
اَناگَہا چَہ پَنچ دیۆکێں زَہگاں یَکّے ءَ سِنگے ماں بُرِّت کہ رَند رَندی بَس ءِ پَچێں کانچے ءَ پُتِرت۔ جَنێںے ءَ چیووَلِت ءُ پَدا بَس ءِ مَردُماں دَپ ءِ سِپَت یَلَہ دات ءُ “کاپِر کاپِر، سُنّی کاپِر،” گُشَگ ءَ لَگِّت اَنت۔
دُمی نێمَگ ءَ داد کَنۆکێں زَہگانی رُمب ءَ ھَم اَنچێں نارَہے دَپ ءَ کُت ءُ بێراں یَکّے ءَ سِنگے پَنچ دیۆکێں رُمب ءِ نێمَگ ءَ چَگَل دات۔ پَدا دوێں رُمب یَکّے دُمیگ ءِ نێمَگ ءَ ڈۆک ماں بُرَّگ ءَ لَگِّت اَنت ءُ ھَر چَگَل ءِ پَجّیا زاہے ھَم شُت گۆں۔
اِے لِمپیێں زَہگ رۆچے تَنگَوێں وَرنا بَنت بلے ھَرابێں بَسانی اَڈّ کَنَگ یا مِستِری ءِ کِرّا بَرَگ ءِ بَدَل ءَ وَت ماں وَت کُشت ءُ کۆش کَن اَنت۔ گازی بَنت، شَہید بَنت بلے ھَرابێں بَس بِہ شَرّ نَبَنت۔ ھَمِد ءَ اوشت اَنت۔ رۆچ، ماہ، سال ءُ کَرن پَدی بَنت ءُ کَلَنڈێں بَس گۆں دَلوَتێں سَواریاں رێز اَنت ءُ ھاکاں ھَوار بَنت۔
آئی ءَ چَہ ھَرد رُمباں چَمّ ٹَگَلێنت اَنت ءُ دێم ءَ چارِت۔ دێم ءِ گاڈی کَچّائیں سَڈَکّ ءَ دَنز ءُ دیتّ کَنانا رَوان اَت اَنت۔ اَناگَہا آئی ءَ ھَیال اَتک گُش ئے اِے دیتّ ءُ دَنز کَلَنڈێں بَسانیگ اَنت کہ مُساپِراں کَرنانی کَرن ءِ نِندَگ ءُ چارَگ ءَ رَند پہ زَہر بُن داتَگ اَنت۔
بلے اِے تَہنا آئی ءِ دِل ءِ واہَگے اَت ءُ مَردُماں اَنگَت ھَمے سِپَت دَپ ءَ اَت کہ
مِنزِل پہ مِنزِل
واجَہ ءِ مَکاما
کارَواں نی چَہ بازار ءَ دَر اَتکَگَت پَمِشکا گاڈی تێزتِر بیت اَنت۔ آئی ءَ یَکّ بَرے پَدا ھَرد رُمبانی نێمَگ ءَ چارِت کہ اَنگَت یَکّے دُمیگ ءِ سَر ءَ ڈۆکشانیا اَت اَنت۔
<سترُنگ><اِم>ناگُماں