اِپِسّی ئے دُمی سال ءِ کێمیا ءِ کِلاس اَت۔ سَجَّہێں بَچَکّ بے تْرِکّ ءُ تَواریا لِکچَر ءِ گۆش دارَگ ءَ دِلگۆش اَت اَنت۔
ھَروَہدا کُوکّار ءُ جَگّا کَنۆکێں شَیتانێں بَچَکّانی چُشێں بے تَواری ءُ گۆں لِکچَر ءَ دِلگۆشی ئے یَکّ سَوَبے اِش اَت کہ لِکچَرار کِتاب ءِ اَنچێں دَرے وانێنَگ ءَ اَت کہ چَکّاس ءَ آیَگ ءِ اُمێد ئِے ھَستَت بلے مَستِرێں سَوَب لِکچَرار ئے تْرُندی اَت۔ وانێنَگ ءِ وَہد ءَ آئی ءَ گَپّ یا جَگّا سَگِّت نَکُت۔ گَپّ ءَ بِلّ آئی ءِ کِلاس ءَ چِشَگ، کُلَّگ ءُ گِہاسَگ ھَم بَند اَت۔ اگں کَسے ءَ بے اِنانی پہ گِہاسَگ ءَ دَپ پَچ کُت، بِزاں کہ واجَہ ءِ دَست ءِ چاک آئی ءِ دَپ ءَ پُتِرت۔ چاک ءِ جَنَگ ءَ آئی ءِ نِشانَگ یَکّ ءُ ٹِکّ اَت۔ اگں کَسے ءَ سئے بَراں گێش چِشِت یا کُلِّت گُڈا بِزاں چَہ کِلاس ءَ دَر ئِے کُت ءُ ھِچّ اُزر ئِے گۆش نَداشت۔ ھَرکَس ءَ کُلَّگ ءُ پَشّانک ءَ گِپت گُڈا لِکچَرار ئے دَست ءَ پَشَل بَیَگ ءِ ساہار ءَ اِے کِلاس ءَ نَیَتک۔
چونایا لِکچَرار سَکّ تْرُند اَت بلے وانێنگا کُنٹ اَت۔ آئی ءَ ھَشت ماہ پێسَر چَہ بَلۆچِستاں دانِشگاہ شالکۆٹ ءَ وَتی وانَگ سَرجَم کُتَگَت ءُ مَزَنێں تَچ ءُ تاکے ءَ رَند ڈِگری کالِج تُربَت ءَ لَگِّتَگَت۔ وانێنَگ ءَ نِزۆر اَت ءُ وَتی ھَمے نِزۆری ءِ چێر دَیَگ ءِ وَستا وَت ءَ تْرُند ئِے کُتَگَت۔
“سَیَد! تَو گَپّے ءَ سَہی ئے؟” دِلپُلّ ءَ سَیَد ءِ گۆش ءَ ھَلوَت کُت۔
“اِنّاں، چِہ گَپّے؟” سَیَد کَمّے ھَیراں بُوت۔
“گَپّ اِش اِنت کہ…”
دِلپُلّ پہ گَپّ ءِ گُشَگ ءُ سَیَد پہ گۆش دارَگ ءَ گێگ بُوت کہ لِکچَر ءَ را آ دیت اَنت۔
“اَڈ ءِ اُو! گَپّ مَکَنِت۔”
دوێں بے تَوار بیت اَنت ءُ لِکچَر ءَ را پَدا وانێنَگ بُنگێج کُت۔ سَیَد ءِ دِل ءَ دَم پہ سَہت ھَمے گَپّ پاد اَتک کہ بارێں دِلپُلّ ءَ چِہ گَپّے گۆں بلے لِکچَرار ئے تُرسا ھِچّ ئِے نَگُشت۔ پێسَر ءَ اَنگَت آ چَہ لِکچَر ءَ لَبزے لَبزے پۆہ بَیَگ ءَ اَت بلے نی آئی ءِ دِلگۆش چَٹ دیر اَتک۔ دِل ءِ تَہا داں سَہتُکے کَشّانچیلّا رَند آئی ءَ پَدا دِلپُلّ ءِ نێمَگ ءَ چارِت ءُ ھَلوَت کُت۔ “دِلپُلّ! بُگُش بارێں چِہ گَپّے؟”
“اَنّی بِلّ یار! رَند ءَ گُشاں گۆں۔” دِلپُلّ ءَ ھَلوَتی گُشت۔
“نہ یار! اَنّی بُگُش گۆں۔” سَیَد ءَ گِرّ بَست۔
“اَڈ ءِ، واجَہ زَہر گیپت،” دِلپُلّ ءَ گُشت ءُ واجہ ئے نێمَگ ءَ چارِت۔ واجَہ ءِ چَمّ پێسَر ءَ ھَمینگُر سَکّ اَت اَنت۔
“شُما پَدا گَپّ ءَ اِت؟”
دوێں تُکّ ءُ نُکّ بُوت ءُ نِشت اَنت۔ سَیَد سَرزاہَرا لِکچَر ءَ گۆش دارَگ ءَ اَت بلے دِل ءِ تَہا پہ دِلپُلّ ءِ نێمتَوامێں گَپّ ءِ اِشکُنَگ ءَ بے تاہیر اَت ءُ وَہدے لِکچَرار بَوڈ ئے سَر ءَ چیزّے نِبِشتَہ کَنَگ ءَ لَگِّت، سَیَد ءَ گُشادیا چَہ دِلپُلّ ءَ جُست کُت: “ھاں بارێں، بُگُش گَپّ چے اِنت؟”
“گَپّ اِش اِنت کہ ٹاپُو شُتَگ کَراچی ءَ ۔” دِلپُلّ ءَ چَہ زْیادَہێں جُستاں رَکَّگ ءِ واست ءَ گَپّ گُشت گۆں۔
“ھَووو؟” سَیَد ءِ ھَیرانێن ءُ چۆ بُرزێں تَوار دْراہێں کِلاس ءَ شِنگ بُوت۔ دْرُستێں بَچَکّاں چَکّ جَت ءُ چارِت ءُ لِکچَرار ئے کُورّاتَگێں چاک ءِ ٹُکُّر تَچک ءَ سَیَد ءِ ھَیرانێں دَپ ءَ پُتِرت۔ بَچَکّاں دَپ داشت ءُ کَندَگ ءَ لَگِّت اَنت۔
“شُمئے دُێنانی دَپ نَۆشتیت۔ شاباش، دَر آِت، دَر آِت۔”
“واجَہ ما…” دِلپُلّ ءَ دَپ پَچ کُت بلے واجَہ ءَ گَپّ گۆش نَداشت۔
“نہ، نہ، چِکِّت ئِے۔ نہ وَت وانِت نہ دِگِراں کِلِّت۔ شاباش، کَشِّت وَتی بُوچّ ءَ !”
دِلپُلّ ءُ سَیَد پَشَل پَشَلا چَہ کِلاس ءَ دَر اَتک اَنت۔
“تَو یار! لِکچَر ءِ سَہت ءَ پَرچا ٹاپُو ءِ گَپّ شُرُو کُت؟” سَیَد دِلپُلّ ءِ سَر ءَ نُرُنڈَگ ءَ اَت۔
“سۆچ لِکچَر ءَ ، داں “نَکل جاں” زِندَگ اِنت چی ءَ چُرت جن ئے؟ بُرێں کَنٹین ءَ تَرا ٹاپُو ءِ ھالاں دیاں۔” دِلپُلّ ءَ سَیَد ءِ دَست ءَ گِپت ءُ دوێں دێم پہ کَنٹین ءَ شُت اَنت۔
کالِج ءِ کَنٹین ءِ دو کۆٹی اَت اَنت۔ کَستِرێں کۆٹی ءَ چَہگراد نَئی بَکش ءَ چاہ گْراست ءُ اێدِگِ مَستِرێں کۆٹی ءَ بَچَکّاں نِشت ءُ چاہ وارت۔ بَچَکّانی بازی ءِ سَوَب ءَ آئی ءَ کَسانێں کۆٹی ءَ ھَم چیزّے کُرشی جَتَگَت۔ آس رۆک بَیَگ ءِ سَوَب ءَ کَستِرێں کۆٹی ءَ گَرماگ ءَ بے کِ نَئی بَکش ءَ دِگِہ کَسّ نِشت نَبُوت بلے زِمِستان ءَ باپ ءُ وَشّ اَت۔
مَرچی گۆریچ ءَ مۆسُم سَکّ سارت کُتَگَت۔ آ نَئی بَکش ءِ باپێں کۆٹی ءَ پُتِرت اَنت بلے اود ءَ جاگَہ نێستَت۔ کُرشی دْراہ پُرّ اَت اَنت۔ آ مَستِرێں کۆٹی ءَ شُت ءُ نِشت اَنت کہ ھۆرک اَت بلے سارت اَت۔
“نَئی بَکش! دو چاہ،” دِلپُلّ ءَ چَمِدا کُوکّار کُت چی ءَ کہ دوێں کۆٹی ڈُکِّتَگَت اَنت۔
“شَرّ اِنت، شَرّ اِنت،” نَئی بَکش ءَ چَمۆدا کُوکّار کُت۔ “شُما پیس وَرِت گۆں، جاں؟” آئی ءَ کێک ءَ را “پیس” ءُ بَچَکّانا “جاں” گُشَگ ھێل کُتَگَت۔
“ھَو، ھَو،” سَیَد ءَ پَسَّو دات ءُ دێم گۆں دِلپُلّ ءَ تَرّێنت۔ “نی بُگُش بارێں۔ ٹاپُو چی ءَ کَراچی ءَ شُتَگ؟”
“پِت ءَ بُرتَگ، وانێنَگ ءَ۔”
“وانێنَگ ءَ؟ آ وَ ھَمِد ءَ وانَگ ءَ اَت۔”
“پِت ئِے گُشیت اِد ءَ نَوانیت۔” دِلپُلّ ءَ گُشت ءُ سَیَد ءَ کَندِت۔
“بِشتێن ئِے۔ ما وَت وانێنتَگ ءُ مُلا کُتَگَت، ھا ھا ھا۔ کَدی بُرتَگ ئِے؟
“پَیری۔”
کَنٹین ءِ بَچَکّ ءَ چاہ ءُ کێک آُرت اَنت۔ دِلپُلّ ءَ چاہ ءَ گُٹّے گِپت ءُ گُش ئے ھَیالے ءَ کَپت ءُ سَیَد ءِ چَمّ دَریگ ءِ بَندێں کانچاں ڈَنّ کالِج ءِ دْرَچکاں سَکّ اَت اَنت کہ گۆریچ آیانی گْوَرشاہ ءُ سَرشاہاں چَنڈێنگا اَت۔ گۆریچ ءِ دَوا باپی اِنت ءُ آیانی اِے باپ دیۆک چَہ دَست ءَ شُتَگَت۔
“اَڈ ءِ، شُما اِد ءَ نِشتَگِت؟ مَن شُمارا دْرُستێں کالِج ءَ پَٹِّتَگ۔”
دوێں چَہ وَتی ھَیالاں دَر اَتک اَنت۔ اُمێد کَندان ءَ پێداگ اَت۔ اُمێد، سَیَد ءُ دِلپُلّ یَکّێں پاڈَو ءِ نِندۆک اَت اَنت ءُ نَزّیکێں سَنگَت اَت اَنت۔ آ مُدام ھَمراہ اَت اَنت۔ اِسکۆل ءِ زَمانَگ ءَ سَیێں ھَمسَبَکّ اَت اَنت بلے اُمێد دَہ ءَ بے سۆب بُوت ءُ نی چَہ دُێناں سالے پَشت اَت۔
“مَزَنێں چُرتے ءَ کَپتَگِت شُما، گُش ئے لانچ بُڈِّتَگ اَنت شُمئے۔” آئی ءَ کُرشیے کَشِّت ءُ نِشت۔
“ھَو، اَنچێں گَپّے ءُ تَئی لانچ ھَم سَر نَیَتکَگ،” دِلپُلّ ءَ گُشت ءُ پَدا دْرُستێں گَپّ ئِے جَت ءُ دات اَنت۔ اُمێد ھَم چَہ ٹاپُو ءِ رَوگ ئے ھال ءَ کَمّے پَرێشاں بُوت۔
“نی نۆکێںے دَر گێجَگ لۆٹیت،” سَیَد ءَ جَوَڈِت۔
“گْرانێں کارے،” دِلپُلّ ءَ دَرّاێنت۔
“پَدا ھَم… تَچ ءُ تاک بِکَن ئے رَسیت۔ اِے تُربَت اِنت۔” اُمێد ناُمێد نَہ اَت۔ پَدا دُێنانی نێمَگ ءَ چارانا جُست ئِے کُت، “شُما بارێں کَسّ چَمّانی چێرا نَکُتَگ؟”
دِلپُلّ ءَ یَکّ بَرے سَر پہ اِنّاں سُرێنت بلے پَدا دَمان ءَ گُشت ئِے: “اَڈ ءِ، یَکّے ھَست۔ سَکّێں ڈَولدارێںے۔ اَوَلی سال ءَ اِنت۔”
“اِے مَن ھَم دیتَگ بلے نَزاناں کئے اِنت ءُ چۆنێںے۔” سَیَد ءَ ھَم آ بَچَکّ یاد اَتک۔ “اُمێد، تَو ئِے نَزان ئے؟ مَنی ھَیال ءَ تَئی کِلاس ءَ اِنت۔”
“زانان ئِے، شَرّ ئِے زاناں! نام ئِے پُلّان اِنت، ھاسٹَل ءَ اِنت ءُ…” اُمێد ءَ گَپّ دَپ ءَ اَت کہ بَچَکّے ءَ سَرُکّ کُت ءُ آئی ءَ گَپّ بَند کُت۔ دِلپُلّ ءُ سَیَد ءِ مُورک ھَم مُجِت اَنت۔ چَرائی ئے آیَگ ءَ آیانی مَجلِس ھَراب بیتَگَت۔ آۆکێں بَچَکّ ءَ کہ نام ئِے شێر مَہمَد اَت، اِشانا “چِہ ھالے” جَت ءُ دَروازَگ ءِ نێمَگ ءَ چارِت۔
“بْیا اَڈ ءِ! جاگَہ ھَست۔”
یَکّ شَرَّنگێں بَچَکّے کہ دو سئے کِتاب ءُ کاپی ئِے دَست ءَ اَت، پُتِرت۔ سَیێں پہ ھُبّ ءُ واہَگے آئی ءِ دێم ءَ پاد اَتک اَنت۔ شِکار پادِ وَت اَتکَگَت!
جۆڈی ءَ رَند اُمێد ءَ کَنٹین ءِ بَچَکّ تَوار کُت۔ آ اَتک۔ اُمێد ءَ پُلّان ءِ نێمَگ ءَ چارانا چاہ ءُ کێک ءِ آڈَر دات۔
“نہ یار! چاہ بَسّ اِنت۔ کێک مَیار۔” پُلّان ءِ ھَمرَہ شێر مَہمَد ءَ دَمان ءَ گُشت ءُ پَدا چَہ پُلّان ءَ جُست ئِے کُت: “تَو کێک وَر ئے گۆں؟”
“نہ، دِل نَیَیت۔ چاہ بَسّ اِنت،” پُلّان ءَ گُشت ءُ سَیێں گُش ئے دَماںے ءَ پُلّان ءِ وَشّێں تَوار ءِ سِہرا گار بیت اَنت۔ آیاں بازێں شَرَّنگێں بَچَکّے دیتَگَت بلے پُلّاں چَہ دْرُستاں دێماتِر اَت۔ اَنچۆ رَنگ ءُ دانَگ، اَنچۆ گُٹّ۔
اِے دیواں دَماںے ءَ مَنت۔ گَپّ ءُ رَپّ بُوت۔ کَندَگ ءُ مَسکَرا بُوت۔ وَہدے گَنٹی ءَ تَوار کُت، پُلّان ءُ شێر مَہمَد پاد اَتک اَنت۔ آ وانۆکێں بَچَکّ اَت اَنت ءُ ھَر کِلاسِش گۆں پابَندی گِپت۔
گۆں پُلّان ءَ اِے گْوَنڈێں نْیاد ءَ سَیێناں تُکشِت کہ وَت ءَ اَدَبدار، مَردُمدۆست ءُ شَرکِرد پێش بِدار اَنت۔ پُلّان ءَ اگں گَپّے جَت، آیاں پہ ھُبّ ءُ واہَگے گۆش داشت ءُ آئی ءِ مَسکَرایانی سَر ءَ اَنچۆ کَندَگ ءِ بَدَل ءَ لاپلێٹی وارت۔ آ شِکار ءِ رِپک ءُ ھُنِراں زَبر اَت اَنت۔ ءُ وَہدے دیواں ھَلاس بُوت، پُلّاں ھَکّ ءُ دِل آیانی سَنگَت جۆڈ بیتَگَت۔
دو سئے ھَپتَگ گْوَست ءُ اِے دَرگَت ءَ پُلّاں گۆں آیاں سَکّ نَزّیک بُوت۔ چَہ وَتی ھَمباں شێر مَہمَد ءَ ھَم گێش۔
“پُلّاں! گَپّے بُگُشاں دِل ءَ نیار ئے؟” یَکّ رۆچے شێر مَہمَد ءَ دَرّاێنت۔
“نہ، نَہ بُگُش۔” پُلّاں کہ وانَگ ءَ اَت، گۆں آئی ءَ دِلگۆش بُوت۔
“تَو اِے بَچَکّانی اِینچُک ھَمراہ مَبی۔”
“کَئی؟ اُمێدزَئی ئے؟”
“ھَو، مَن اِشکُتَگ کہ اِے شَرّێں بَچَکّ نَہ اَنت۔”
“بلے گۆں مَن سَکّ شَرّ اَنت۔ تَو وَت دیتَگ کہ چۆنێں مَردُمدۆست اَنت۔ وانَگ ءَ بے چارَگ نِزۆر اَنت وَ دِگِہ گَپّے بلے دِگِہ ھَر وَڈ ءَ شَرّ اَنت۔ باوَر کَن مَن ھَروَہدا اِشانی ھَمراہ باں، مَن ءَ کَلدارے ھَم ھَرچ کَنَگ ءَ نَیل اَنت ءُ پہ مَن چۆ بْرات ءَ اَنت۔” پُلّان ءَ آیانی بارَوا شێر مَہمَد ءِ گَپّ دۆست نَبیتَگَت۔
“چونایا وَ مَن ھَم سَرزاہِرا آیانی تَہا ھَرابی نَگِنداں بلے…”
“اگں ھَرابیے مانِش زاہِر بیت۔” پُلّان ءَ آئی ءِ گَپّ ءِ تَہا دَور کُت۔
“چۆ شَرّ اِنت بلے مَن اِشکُتَگ کہ اِے شَرّێں بَچَکّ نَہ اَنت۔ نِشَہ مِشَہ کَنَنَت۔ بَرے بَرے کہ کَنگَلا بَنت، دُزّی دازی ءَ ھَم چَکّ ءُ پَد نَبَنت۔ پَمِشکا مَن چارِت تَرا ھال بِدیاں کہ تَو مَنی سَنگَتے ئے ءُ چُشێں گَپّاں چَہ تَو چێر دَیَگ بَدواہیے بیت۔”
“اِے بارَوا مَن ھَم اِشکُتَگ۔ یَکّ رۆچے مَن چَہ آیاں جُست ھَم کُت۔ آیاں گُشت ما بیِس (بی ایس او) کَہُور ءِ مَردُم این ءُ اِے دْرۆگ بیِس یاسین ءِ بَچَکّاں شِنگ کُتَگ اَنت۔”
چَہ پُلّان ءِ اِے گَپّ ءَ شێر مَہمَد کَمّے بے وار بُوت، چی ءَ کہ آ بیِس یاسین ءِ باسکے اَت۔
پُلّان ءَ آئی ءِ بے واری مارِت ءُ گۆں نَرمی گُشت: “شێر مَہمَد! مَن تَئی سَنگَتی ءُ دۆزواہی ءِ کَدر ءَ کَناں بلے مَنی ھَیال ءَ آ ھَم تَئی پَیم ءَ مَنی سَنگَت ءُ دۆزواہ اَنت،” پُلّان ءَ گُشت ءُ گَپّ چَمِدا کُٹِّت۔
یَکّ سُہبے کہ پَدا گۆریچ ءَ سَر کُتَگَت، سَیَد ءُ دِلپُلّ ءُ اُمێد کَنٹین ءِ مَستِرێں کۆٹی ءِ کُنجے ءَ زُکُّرتَگ ءُ چاہ وَرَگ ءَ اَت اَنت۔
“یار! اِشیا مارا زَرّ ءَ چَٹ کُت،” دِلپُلّ گُشَگ ءَ اَت۔
“پُلّاں اِے ھَرچاں کَرزیت،” سَیَد ءَ بِچکَندِت۔
“پہ مُرگ ءِ مُژدَوار کَنَگ ءَ مۆچکێں چَنڈَگ لۆٹیت،” اُمێد ءَ ھُژّارێں شِکاری ءِ وَڈ ءَ دَرّاێنت۔
“چۆ ھَو بلے مَن گُشَگ ءَ آں کہ مۆچکێن ءِ چَنڈَگ کَدی بَند بیت ءُ …”
“ھَو یار!” سَیَد ءَ دِلپُلّ ءِ گَپّ گِپت گۆں۔ “نی ما لِبز ءِ گُورچێنَگ ءَ دَم بُرتَگ۔”
“شَرّ اِنت، گُڈا مَرچی وَڈے کَنێں بارێں،” اُمێد ءَ گُشت۔
ھَمے وَہد ءَ سَیمی پیرَڈ ئے گَنٹی ءَ تَوار کُت۔
“مَرچی مئے اِے پیرَڈ ھالیگ اِنت۔ مَن رَواں پُلّان ءَ کاراں۔ شُما چے گُشِت؟” دُێناں مَنِّت۔ اُمێد گُشادیا شُت ءُ دێر نَگوَست گۆں پُلّان ءَ اَتک۔ آیاں پَرایا چاہ ءُ کێک لۆٹاێنت۔ کَمّے دِگِہ گَپّ ءُ رَپّ ءَ رَند اُمێد ءَ دَرّاێنت، “پُلّاں، یار! ما پہ تَو داوَتے ٹَہێنتَگ۔”
“داوَت؟” پُلّاں ھَیراں بُوت۔ “پَرچا؟”
“نی گۆش دارِت، اِے گُشیت پَرچا، تَو یار مئے شَرّێں سَنگَتے ئے۔ ما تَرا یَکّ رۆچے نانے ھَم وارێنت نَکَنێں؟”
اُمێد ءَ اَنچۆ گُشت کہ پُلّاں رْیابَند بُوت۔
داوَت پَشَّمبِہ ءِ شَپ ءَ ٹَہێنَگ بُوت۔ آدێنَگ ءِ چُٹّی دێم ءَ اَت۔ بے گاہ ءَ آیاں پِلِمے چارَگ ءِ پْرۆگرام کُتَگَت۔ پَشَّمبِہ ءِ بے گاہ ءَ اُمێد ءَ پُلّاں چَہ ھاسٹَل ءَ پَرپَٹ ءَ دُپُشتَگ کُت ءُ وَتی مِہمانجاہ ءَ آُرت۔ سَیَد ءُ دِلپُلّ پێسَر ءَ وَداریگ اَت اَنت۔ آپ ءُ تام ءَ رَند ویسیار ءُ ٹیوی گۆں دَرزِنے ریلّا آرَگ بیت اَنت۔
“تَو چۆنێں پِلِم چار ئے پُلّاں؟” اُمێد ءَ جُست کُت۔ “مَنی کِرّا ھَر وَڈێں ھَست۔ مَتلَب کْوَہنێں، نۆکێں، آرٹ، کَمَرشَل…”
“مَن ءَ آرٹ دۆستِر بیت۔”
اُمێد ءَ دِگِہ لَہتے ریلّ پُلّان ءِ دێم ءَ مُچّ کُت۔ پُلّان ءَ یَکّے گِچێں کُت ءُ ھَمے پِر کَنَگ بُوت۔ باپێں بان ءَ نِندَگ ءُ پِلِم چارَگ ءُ گَپّ ءُ رَپ ئے تَہا سَما نَکَپت کہ کَدی شَپ اَتک۔ آیاں ھما وَہدی سَما بُوت وَہدے اُمێد ءِ کَستِرێں بْرات اَتک ءُ وَرَگ ءِ جاڈی بَیَگ ءِ ھال ئِے دات۔
دێر نَبُوت کہ پِلِم ھَم ھَلِّت۔ وَرَگ آرَگ بیت اَنت۔ ھما وَرَگ کہ دِل بُگُشیت، تَہر تَہر ءِ وَرَگ پَرزۆنَگ ءِ سَر ءَ اێر اَت۔ پُلّاں وَتی چۆ اِزَّت دیَگ ءَ سَکّ وَشّ بُوت۔ وَرَگ ءُ چَرَگ ءَ رَند وَہدے دْرُست پہ گێگ ءُ گْوَم نِشت اَنت، پُلّان ءَ رَوَگ ءِ اِجازَت لۆٹِت۔
“اَنّی رَو ئے؟” دِلپُلّ ھَیراں بُوت۔ “تَرا ھاسٹَل دِگِہ دِلے وَشّ بیت۔”
“نہ یار! وَشّی ءِ گَپّ نَہ اِنت۔ مَن ءَ کَمّے وانَگی اِنت۔”
“وانَگ باندا بیت کَنت۔ چُٹّی اِنت۔ شَرّ بواں،” سَیَد ءَ بِچکَندانا گُشت بلے چَہ پُلّان ءِ رَوگ ئے گَپّ ءَ نَگێگ اَت۔ اُمێد ءَ سَیَد ءَ را اَمتُہتی چَمُّکے جَت ءُ سَیَد ڈَنّ ءَ دَر اَتک۔
“تَو وَت گُش ئے کہ شێر مَہمَد لۆگ ءَ شُتَگ۔ اود ءَ اێوک ءَ تَرا وَشّ بیت؟” دِلپُلّ ءَ جُست کُت۔
“ھَو، مَن ءَ اێوک ءَ نِندَگ ءُ وانَگ وَشتِر بیت۔” پُلّاں اَنگَت رَوگ ئے ھَیال ءَ اَت۔
“تَو یار کَمال کن ئے، بِنِند گَپّے جَنێں۔ پِلِمے چارێں۔ تَو یَکّ شَپے ھَم گۆں ما گْوازێنت نَوَر ئے؟” اُمێد ءَ گۆں کَمّے گِلَگ گُشت۔ اُمێد ءِ گَپّ ءَ پُلّاں گِپت۔ سَنگَتاں آ ھَمینچُک اِزَّت داتَگَت کہ آیانی گَپّ ئِے اِنّاں کُت نَکُت۔
سَیَد کہ اُمێد ءِ چَمُّک ءِ سَر ءَ ڈَنّ ءَ شُتَگَت، پَدا اَتک ءُ جار ئِے جَت: “پَرپَٹ پَنچَر اِنت۔” ءُ پَدا دێم ئِے گۆں پُلّان ءَ کُت ءُ گُشت ئِے: “پُلّاں! نی تَو اِے گۆریچ ءَ گَنتِر شُت نَوَر ئے۔ مَرچی مۆسُم ءُ اولاک ھَرد مئے بُن ءَ اَنت۔” سَیَد ءِ گَپّ ءِ سَر ءَ دْرُستاں کَندِت۔
پُلّان ءِ پَسُند ءِ دِگِہ پِلِمے بُنگێج بُوت۔ پَجّیا چَہواری بُوت۔ اُمێد ءَ اَنچێں وَڈے ءَ پُلّان ءِ چاہانی تَہا تۆسێنَگی دَرماں ماں گێتک کہ آ ھِچّ سَہی نَبُوت۔ اَلبَت سَیَد ءُ دِلپُلّ ءَ ھَیال گْوَر اَت۔
“یار! مَن ءَ واب گِران اِنت۔” کَمُّکے ءَ رَند پُلّان ءَ گِہاسِت۔ آئی ءِ چَمّ چَہ واب ءَ ھُمار اَت اَنت۔
“تَئی جاگَہ تَیار اِنت۔” اُمێد ءَ مِہمانجاہ ءِ کُنجے ءَ جَتَگێں تَہت ءُ نِپادانی نێمَگ ءَ دَست شَہار دات۔ پُلّاں بے تَہمبُلی پاد اَتک ءُ نِپادانی سَر ءَ تَچک بُوت۔ سَہتُکے ءَ رَند آ گْرانواب اَت۔ اُمێد پاد اَتک ءُ پُلّان ئِے ٹۆہێنت بلے آ سُدّ ءُ سَما ءَ ڈَنّ اَت۔
“اَڈ ءِ اِے پِلِم ءَ دَر کَن یار، بَچَکّ اَتکَگ آرٹ پِلِم چاریت۔ بْیا پہ تَو پُندِتَگ اَنت ھَمِد ءَ ،” دِلپُلّ ءَ گۆں زَہرناکێں بِچکَندے گُشت ءُ سَیَد ءَ پِلِم دَر کُت۔
“چےے پِر کَناں؟”
“گۆریچ اِنت، باپێںے پِر کَن۔” اُمێد ءَ سَلاہ دات ءُ سَیَد ءَ باپێںے پِر کُت۔ پَدا دیوان ءَ شَرابی بۆتَلے ھَم مِکّ بُوت۔
ڈَنّ ءَ گۆریچ ءَ شیکّ شیکّے چێر اَت ءُ باپێں باں گۆں وَتی باپێں چیزّاں سَکّ وَشّ اَت۔
<سترُنگ><اِم>ناگُماں