آ وَرنا دێم پہ وَتی مِنزِل ءَ گام جَنان اَت۔ رۆچ تْرُند اَت بلے کَوش ءَ رۆچ ءِ بْرانزانی سۆچاکی پْرۆشتَگَت ءُ گَرماگی آسگوارێں رۆچاں ھَمینچُک ھَم باز اِنت۔
پَیادَگ ءِ اِے سَپَر آئی ءَ سُہبی دَہ ءِ کِساس ءَ چَہ دَگّ ءِ کِرّ ئے ھۆٹَلُکا بُنگێج کُتَگَت۔ چَہ شَہر ءَ آ بَس ءَ اَتکَگَت۔ آئی ءَ اَنچێں بازارے ءَ رَوَگی اَت کہ اود ءَ دَگّ نَشُت۔ آئی ءَ چَہ ھۆٹَلُک ئے واہُند ءَ جُست کُت ءُ سۆج داتَگێں نێمَگ ءَ رَہ گِپت۔
دو کَلاک ءِ کِساس ءَ یَکَّجّا رَوَگ ءَ رَند آ پہ دَم کَنَگ ءَ کَہیرے ءِ ساہِگ ءَ نِشت۔ جیگ ئِے پَچ کُت ءُ دِلبَند ئِے کَوش ءَ دات۔ کَوش کہ آئی ءِ ھێدێں دِلبَند ءَ لَگِّت، سارتیے جان ءِ بَند بَندا ئِے شِنگ بُوت ءُ ژَندی ئِے رَواں بُوت۔
ھَمے سَہت ءَ نَزّیک ءَ کَپۆتے ءَ کُوکُو کُت۔ آئی ءَ چَمّ شانک دات اَنت۔ نَزّیک ءَ کَہیرے ءِ لُڈّۆکێں ٹالانی سَر ءَ کَپۆتے نِشتَگَت۔ پَرے شَہری مُساپِر ءَ کہ زِند ئِے مُدام شَہر ءِ کُوکّار ءُ جَگّا ءُ دَنز ءُ دیتّانی تَہا گْوَستَگَت، اِے اِنسِرتَگێں جَنگَل ءِ وَشّێں کَوش، دْرَچکانی لُڈَّگ ءُ ژامب ژامب ءُ کَپۆت ءِ دِلساچێں کُوکُو نایابێں نْیامَت اَت اَنت۔
آئی ءَ وَتی زِند ءِ اِے پُرێمِنێں دَماں سَکّ دۆست بیت اَنت بلے اِے ھَیال ءَ آ اَبێتک کُت کہ دَمانُکے ءَ رَند آ اِے دْراہێں نْیامَتاں یَلَہ دَنت ءُ چِدا رَوت۔ پَدا مَردُمانی کِرّا، ھما مَردُمانی کہ دِل ءَ آرام ءُ اَجام ءِ بَدَل ءَ گَم ءُ گَرَٹّی دی اَنت۔ چَرے مَردُماں وَ اِے دَرچک، اِے مُرگ، اِے کَوش شَرتِر اَنت کہ دِل ءِ چِلّ ءُ زَنگاں شۆد اَنت ءُ اَنچێں دِلسُبَکّیے بَکشا اَنت کہ دِل پہ بال کَنَگ ءَ ھُلّ بَندیت…
اِے دَمان ءَ آئی ءِ دِل ءَ ھُلّ کُت کہ آ زِند ءِ کُلّێں کار ءُ چُلۆپَگاں یَلَہ بِدَنت ءُ ھَمے وَڈێں دِلارامێں گْیاباںے ءَ بْیَیت ءُ بِنِندیت ءُ وَتی سَرجَمێں زِند ءَ ھَمِد ءَ بُگوازێنیت۔ یا ناکاما آزاتێں کَہیرے بِبیت ءُ کَپۆتانی زَہیرنالێں کُوکُوانی بے تَوارێں گۆش دارۆک بِبیت۔ کَوش ءِ مَستێں شیکّاں بُلُڈّیت، ماہ ءِ سارتێں رُژن ءَ بُچُکّیت۔ گۆروَنڈ ءُ مِنج ءُ شَنگِر بِبیت ءُ زِند ءِ چارێں رۆچاں چَہ نادِلسِرێں مَردُماں دیر ھَمے بَہِشتگۆنَگێں گْیابان ءَ بُگوازێنیت۔
چۆنێں سَرسَبزێں واہگے اَت بلے ھَمے سَہت ءَ آئی ءِ ھَیالاں تَپَرے ءَ شَہم کُت ءُ کَہیرے بَیَگ ءِ واہَگ ماں آئی ءِ دِل ءَ گیمُرت… واہَگانی ھَم ھَدّے ھَست۔ ھَدّ ءَ بُگوَز اَنت، گیمُر اَنت۔
بلے آئی ءِ وَ ھِچّ واہَگ پیلَو نَبیتَگَت… آئی ءِ واہَگ اَت کہ دَہ ءَ رَند دێم ءَ بْواناں بلے پِت ٹیبی ءَ تَہت ءِ باہۆٹ کُت ءُ دَہ مَردُم ءِ لاپ دَیَگ ءِ ڈُبَّہ آئی ءِ شَکَروَرنائیں کۆپَگاں کَپت ءُ وانَگ ئِے شُت۔ چِد ءُ پَد آئی ءِ واہَگ اَت کہ اَلکاپێں کارے بِرَسیت بلے سالے ءِ تَچ ءُ تاک ءَ رَند ھَم بے کار اَت۔ گُڈسَرا سَر ئِے پہ ماسٹَریا کَپت کہ ماں اِے مُلک ءَ بے زَرّ ءُ بے بِستارێں نَوکَریے اَت۔ ناکاما یَلَہ دات ئِے نَکُت ءُ نی ھَمِش اِنت ھَمے دیرکَپتَگێں بازار ءِ بُنگێجی وانَگجاہ ءَ لَگِّتَگَت۔
اَئی ئے واہَگ اَت کہ…۔۔ آئی ءِ واہَگ بے ھِساب اَت اَنت بلے یَکّے ھَم پیلَو نَبیتَگَت۔ گُش ئے آئی ءِ ھَر واہَگ چَہ ھَدّ ءَ ھما دێم اَت۔ مَن کُجام واہَگ ءَ بِکَناں کہ چَہ ھَدّ ءَ مَگوَزیت؟ مَنی واہَگانی شَہار پَرچا چۆ کَسان اِنت؟
آئی ءَ پہ نَگێگی دْراجێں گینّے کَشِّت ءُ پاد آیَگ ءَ گێگ بُوت کہ مۆرے ءَ چَمّ ئِے کَپت اَنت کہ کَڈُکّی پادے دَپ ءَ اَت ئِے ءُ کَپان ءُ پاد آیان ءَ رَوان اَت۔ آ پہ دِلگۆش مۆر ءَ چارَگ ءَ لَگِّت۔ تَو ھَم مَنی وَڈےنے ئے۔ مئے دَر پہ دَری یَکّ اِنت۔ تَو کَسانێں مۆرے ئے ءُ مَن مَزَنێں۔
مَزَنێں مۆر ءَ وَتی اِے ھَیال ءِ سَر ءَ بِچکَندِت… بلے مَن چَہ تَو دێماتِر آں۔ باز دێماتِر۔ کُج ءَ مَنی جَنجال کُج ءَ تئیگ۔ مَن سُرِندَہانی سَروَری آں پَمِشکا ھَر چیزّ ءَ مَنی بَہر گێشتِر اِنت۔
اِے نْیام ءَ مۆر چَرایا سئے چار گام گِستا بیتَگَت۔ تَو شُت ئے؟ مَنی گَپّاں گۆش نَدار ئے؟ ھَیر، شَرّ اِنت، گۆش مَدار۔ مَنی ھَیال ءَ تَو ھَم آرامێں کُرشیانی سَر ءَ نِندۆکێں واجہانی وَڈێں بے ھاجَتے ئے۔ بلے نہ… چۆ نَہ اِنت۔ مَن رَد آں۔ تَو وَ مَنی وَڈےنے ئے! تَو مَنی پَیم ءَ گێشِ وَتی تَچ ءُ تاکاں نا ئِے۔ ھَیر، تَو بُرَو۔ نی مَن ھَم رَواں۔
آ پاد اَتک۔ بَیگ ئِے بَڈّ ءَ کُت ءُ پَدا رَہ گِپت۔ نی کَوش سُست اَت ءُ رۆچ ءِ آسگوارێں بْرانز آئی ءَ گَنتِر بے وار کَنان اَت اَنت۔ زیتّاں آ سَر داں پاد ھێدرێچ بُوت۔ آئی ءَ گۆں کاسَگچَٹّێں لَنکُک ءَ پێشانیگ ءِ ھێد چُکُرّێنت اَنت ءُ گام تْرُندتِر کُت اَنت۔ گامانی کُنٹی ماں اِے ٹاکێں نێمرۆچ ءَ مُپتا راہ ءِ شُولّ دَیَگ اَت۔
زیتّاں آ مُلکے ءِ گْوَر ءَ رَسِت۔ گۆں سَبزێں کِشارانی گِندَگ ءَ دِل ئِے سارت تَرِّت ءُ مُلک ءِ پَتَنێں بَند ءِ سَر ءَ بَستَگێں کاپَر ءِ چێرا شُت ءُ اوشتات۔ کاپَر ءِ چێرا دو بَرۆنک ھَستَت ءُ آپ ءَ نێمانێں مَشکے تۆکی مِنُکّا دْرَتکَگَت۔ نَزّیک ءَ کَسّ دَر ءَ نَہ اَت۔ آ پہ دَم کَنَگ ءَ بَرۆنک ئے سَر ءَ وَپت۔ اِینچُک دێرا یَکَّجّا پاداں رَوَگ ءَ رَند نی اِد ءَ تَچک بَیَگ سَکّ وَشّ اَت۔
دَم ءِ بال ءَ کَنَگ ءَ رَند آئی ءَ چَہ مَشک ءَ رۆدے آپ پالات ءُ وارت ءُ پَدا بَرۆنک ئے سَر ءَ نِشت۔ ھَمے وَہد ءَ کَلَم ءِ جَہلێں تَوارے آئی ءِ گۆشاں کَپت۔ چَکّ ئِے جَت ءُ چارِت ئِے۔ یَکّ وَرنائیں شِپانکے رَمَگ ءَ سَر دیان ءُ کَلَم جَناں پێداگ اَت۔
گَرم ءِ جَل ءَ کَلَم ءِ جَنَگ! اِے وَ چَٹ ماسٹَری ئے وَڈێں کارے۔ آئی ءَ شِپانک ءِ سَر ءَ کَندَگ اَتک بلے پَدا چَہ دِل ءِ کُنجے ءَ نَرمێں تَوارے اَتک۔ بِلّ ئِے کَلَم جَنت۔ اِے آسێں گَرم ءَ کَلَم ءِ سارتێں زێمِر تۆست کَنت۔ بِلّ ئِے جَنت… نی کَلَم ءِ تَوار آئی ءَ وَشّ بَیان اَت۔
وَہدے شِپانک ءَ آ دیت کَلَم ءِ جَنَگ ئِے بَند کُت۔ پَس ئِے چَہ ڈِگاراں پَسِّند کَہیرانی چێرا واپێنت اَنت ءُ پَدا کاپَر ءِ نێمَگ ءَ اَتک۔ سَلام ءُ جۆڈی ءَ رَند شِپانک ءَ رۆد زُرت ءُ چَہ مَشک ءَ آپ پالات ءُ دَرامَد ءِ نێمَگ ءَ شَہارت اَنت۔ “واجَہ! آپ نَوَر ئے؟”
“اِنّاں، مَن اَنّی وَرت،” آئی ءَ پَسَّو دات۔ “واجَہ”ئے لَبز ءَ آئی ءِ دِل ءَ چَہ شِپانک ءَ شَرتِری ئے مارِشتے پاد کُت۔ آئی ءَ شِپانک ءِ نێمَگ ءَ چارِت کہ گَبُورچ گَبُورچا آپ وَرَگ ءَ اَت۔ آئی ءَ اِے سۆتکالێں وَرنا ءِ سَر ءَ بَزَّگ بُوت کہ شَکَروَرنائی ءَ ھَم دێم ئِے کْرِچک کَپان اَت بلے دِل ءَ وَشّ ھَم بُوت کہ دُنیا ءَ چُشێں مَردُم ھَست کہ مَن چَراہاں ھَر وَڈ ءَ گِہتِر آں۔
ھَمے وَہد ءَ ڈِگار ءِ بَند ءِ سَر ءَ پَسے دَر کَپت ءُ دێم پہ کِشاراں مَیدان ئِے کُت ءُ آئی ءَ یاد اَتک کہ مَن ھَم بے کاری ئے زَمانگا پہ نَوکَری ءِ ھَر ھۆرکێں جاگَہ ءَ اَنچۆ دْرِکّ زُرتَگَت۔
“کِچّ مِر… کِچّ!” شِپانک ءَ بَرۆنکا تِکَہێں مُکّی چَکاپت ءُ پَس ءَ سِست پِر۔ پَس پَد تَرِّت۔ چَٹ ھَمے پَیم رِشوَتوارێں اَپسَرانی سۆچاکێں گَپّاں آ چَہ کارگِساں دَر کُتَگَت۔
ماسٹَرا سَر چَنڈێنت ءُ اِے نَوَشّێں ھَیال گَلّێنت اَنت ءُ ڈِگار ءِ کِشاراں چارَگ ءَ لَگِّت کہ پَس پہ آیانی وَرَگ ءَ اَتکَگَت۔ کِشار اَنچۆ ھَجگ ءُ نازُرک اَت اَنت کہ آئی ءِ دِل ءَ ھَم گُشت بْوَرِش۔
پَس ءِ گَلّێنَگ ءَ رَند شِپانک پَدا اَتک ءُ نِشت ءُ ماسٹَر ھَمے ھَیالان اَت کہ اگں شِپانک مَن ءَ مێتَگ ءَ سَر بِکَنت، سَکّ شَرّ اِنت بلے شِپانک رَمَگ ءَ چۆن بِکَنت؟ اِے ھَم گَپّے اَت۔ آئی ءَ چَہ شِپانک ءَ جُست کُت: “تَو ساہِگابادا زان ئے؟” “ھَو، ھَو۔”
“نَزّیک اِنت، دیر اِنت؟ مَن ھَمۆدا ماسٹَر لَگِّتَگاں۔” آئی ءِ دِل ءَ اَتک بُگُشاں کہ جَل ءِ سَر ءَ نَل ءِ جَنَگ ءِ کار ءَ لَگِّتَگاں۔
“نَزّیک اِنت۔ مَن ھَمۆدا رَوَگ ءَ آں۔ مَن ءُ تَو پَجّیا رَوێں۔” شِپانک ءَ گَلے چِت۔ ماسٹَرے ءِ ھَمراہی ءَ بازار ءَ رَوَگ پَرایا شَرَپ ءِ گَپّے اَت۔
“مَرچی اود ءَ سیرے ھَست؛ بَٹّ ءُ گۆشت اِنت، ڈُہل ءُ ناچ اِنت۔ ڈِگارانی سَر ءَ پَمِشکا کَسّ نێست۔” شِپانک ءِ چَمّ تْرِپَگ ءَ اَت اَنت۔ بَٹّ ءُ گۆشت ءِ نام ءِ اِشکُنَگ ءَ ماسٹَر ئے دَپ ءَ آپ دات ءُ رۆتاں چُورّ ءُ چار شُرُو کُت۔ لِبزاں اێر بَرانا آئی ءَ پہ شِپانک ءِ وَشّ کَنَگ ءَ گۆں وَسّاچێں پَرێشانی ءَ جُست کُت۔ “گُڈا رَمَگ مُلکاں نَرَوت؟”
“اِنّاں، اِنّاں۔ مَن رَمَگ ءَ سَر دیاں کَناں، بَراں گۆں کَور ءِ کِرّ ئے اوٹَگ ءَ۔ اود ءَ کَہیرانی چێرا واپێنانِش۔ دَمِش بُرتَگ۔ اِے گَرم ءِ جَل ءَ ھِچّ جاہ نَرَو اَنت۔ پَدا مَن ءُ تَو رَوێں سیر ءِ سَر ءَ ۔ تَرا مَردُم گِند اَنت گَل بَنت۔ مئے ھَند ءَ وانِندَگێں مَردُم نێست ءُ ڈَنّی ماسٹَر نَجَلّ اَنت۔”
“ھُومّم۔“ ماسٹَر مَردُمانی گَل بَیَگ ءِ ھَیال ءَ گَل بُوت۔ شِپانک ءِ دَنزێں دێم ءَ چارانا جُست ئِے کُت: “تَو پَرچا نَوَنتَگ؟”
“مَن؟” شِپانک ءَ کَندِت۔ آئی ءِ چیرکا زَردێں دَنتاناں پَدا ماسٹَر ئے دِل ءَ شَرتِری ئے مارِشت پاد کُت۔ “مئے وَہد ءَ اِسکۆل نَبیتَگ۔ اِشیا ھَمِش اِنت سئے سال اِنت بَستَگِش۔”
ماسٹَرا سَر سُرێنت۔ پَدا شِپانک ءَ کَمّے ھَیال کُت ءُ گُشت: “واجَہ! بَرے بَرے مَن گُشاں دْرێگَتێں مَن ماشٹَرے بیتێناں۔ تَئی وَڈ ءَ مَنی زِند ھَم شَرّ بیتَگَت ءُ چُکّاں وانێنۆکے ھَم رَسِتَگَت۔”
ماسٹَرا ھَیراں ھَیران ءَ آئی ءِ نێمَگ ءَ چارِت۔ شِپانک ءِ زِرێں چَمّانی تَہا مُرتَگێں وابانی جۆن تْرَپَّل اَت اَنت۔ گُش ئے ھَمے سَہت ءَ ماسٹَرا وَتی نَوکَری سَکّ دۆست بُوت۔
<سترُنگ><اِم>ناگُماں