سَرسَبزێں دْرَچکانی ءُ رَنگ رَنگ ءِ ڈَولدار ءُ وَشبُوێں پُلّانی نْیام ءَ پَکّائیں دَگّ ءِ سَر ءَ اُمێتان ءِ کارگاڈی وار وارا رَوان اَت۔ آئی ءِ کَش ءَ شَرَّنگێں بُلۆر نِشتَگَت ءُ ڈَنّ ءِ دِلساچێں نِدارگاں چارَگ ءَ اَت۔
جَمبَراں مَہگۆنَگے ءِ سْیاہ ءُ بَزێں مَلگۆرانی وَڈ ءَ آزماں اَندێم کُتَگَت۔ سارتێں کَوشے کَشَّگ ءَ اَت۔ آپوارێں دْرَچک وَتی نازُرکێں لَمب ءُ ٹالاں لُڈّێنَگ ءَ اَت اَنت۔
دْرَچکانی سَر ءَ نِشتَگێں جِنگُلانی چُلی چُلی، کُلیانی کُلی کُلی ءُ کَپۆتانی کُوکُو ءِ بے دَروَرێں زێمِر ساز اَت اَنت۔ چاگِرد ءِ ھَریَکّ چیزّے گُش ئے چَہ گَل ءَ بال اَت۔ پُلگوارێں بَہارگاہ ءِ مۆسُم اَت۔ ھَوراں دِل ءِ مَیلا گْوَرتَگَت۔ لَد ءُ گْیاباں، کۆہ ءُ کُوچَگ دْراہ آباد اَت اَنت۔
اِے مَستێں مۆسُم ءَ اُمێتان ءُ آئی ءِ مَہدرۆشُمێں دۆست بُلۆر پہ سَیل ءُ ساواتے دَر اَتکَگَت اَنت ءُ اَنّی آیانی گاڈی سَرسَبزێں جَنگَلانی نْیام ءَ وار وارا رَوان اَت۔ گاڈی ءِ کانچ پَچ اَت اَنت۔ شَیتانێں کَوش گۆں بُلۆر ءِ پَچێں مَلگۆراں لَیب ءَ اَت۔
“بُلۆر!” اُمێتان ءَ آئی ءِ نێمَگ ءَ پہ مِہر چارِت۔
“ھُومّم۔” آ ڈَنّ ءِ نِدارَگانی چارَگ ءَ دِلگۆش اَت۔
“تَو ھَروَہدا ڈَنّ ءَ چی ءَ چار ئے؟ بَرے بَرے مئے نێمَگ ءَ ھَم چَمشانکے بِدئے۔ ما ھَم تَئی پُرکَیپێں چارَگانی واہَگدار ایں،” اُمێتان ءَ گُشت ءُ سَنج ءِ دْراہێں رَنگ بُلۆر ءِ دێم ءَ تالاں بیت اَنت۔ آئی ءَ اُمێتان ءِ دَپ ءَ ھَزار رَند ءَ اِے مِہردَرشانێں گَپّ اِشکُتَگَت اَنت بلے پَدا ھَم لَجّ ئِے بُوت۔
“پَچێں جاگَہے ءَ بُرێں۔ یَپَّیما دْرَچکانی چێرا بَیَگ وَشّ نَہ اِنت۔” بُلۆر ءَ کَندِت۔
اُمێتان ءَ گاڈی تاب دات۔ کَوش ءِ تْرُندێں کۆلے ءَ بُلۆر ءِ دْراجێں مَہپَر بال دات اَنت ءُ آیانی لَمب اُمێتان ءِ دێم ءَ شِنگێنت اَنت۔
“بُلۆر! وَتی مَلگۆراں سَرپَد کَن مَنی چَمّاں اَندێم مَکَن اَنت۔ مَن ءَ وَ پێسَر ءَ تَئی مِہر ءَ اَنچۆ چَمبَند کُتَگ کہ کُلّێں دُنیا ءَ بے کِ تَرا دِگِہ کَسّ ءَ نَگِنداں۔”
“تَو وَ شاِرے ئے، اُمێتاں! مَن پێسَر ءَ نَزانتَگ،” بُلۆر ءَ کَندان ءَ گۆں ٹَہلے وَتی دْراجێں مَلگۆر پُشت ءَ چَنڈِت اَنت۔
“ءُ تَو شَکَّلێں شَیرانی اَنچێں کِتابے ئے کہ دِل گُشیت ھَروَہدا تَرا بوان ءُ بواں،” اُمێتان ءَ اَنچۆ گُشت گُش ئے ھَکّ ءُ دِل وَشّێں شَیرے وانَگ ءَ اِنت۔
بُلۆر ءِ ھَزارزێمِرێں ٹَہک چارێں نێمَگاں شِنگ بُوت۔
کَمّے رَوَگ ءَ رَند گاڈی چَہ بُرز ءُ بَزێں دْرَچکانی نْیام ءَ دَر اَتک ءُ سَرسَبزێں دَینَگے ءَ سَر بُوت۔
“ھَمِد ءَ بِدار،” بُلۆر ءَ گُشت۔ اُمێتان ءَ گاڈی اوشتارێنت۔ دُێناں کَوش کَشِّت اَنت ءُ شِپاد ءَ لَہمێں کاہانی سَر ءَ دَست ماں دَست رَواں بیت اَنت۔
“چۆنێں وَشّێں مۆسُمے،” بُلۆر ءَ آزمان ءِ دێم ءَ لۆنجانێں جَمبَرانی نێمَگ ءَ چارِت۔
“ءُ اِے مۆسُم تَو بْرَہدارتِر کُتَگ۔” اُمێتان ءَ آئی ءِ دَست ءَ گِپت۔ بُلۆر ءَ کَندان ءَ گُشت: “ھَورے بیتێں مۆسُم چِد ءُ وَشتِر بیتَگَت۔”
“ھَور بیت۔” اُمێتان ءَ اَنچۆ گُشت گُش ئے ھَور آئی ءِ دَست ءَ اِنت۔
“تَو چۆن زان ئے؟”
“بَسّ مَن زاناں، ھَور بیت۔ بِچار جَمبَراں، چۆن لۆنجان اَنت۔”
“بَلکێں نَگوار اَنت۔” بُلۆر سَبزێں کاہانی سَر ءَ نِشت۔ اُمێتان ءَ آئی ءِ کِرّا سْرۆش دات ءُ وَپت۔
“مَن گُشاں گْوار اَنت۔”
“نَگوار اَنت،” بُلۆر ءَ اُمێتان ءِ کُنَّت کَنَگ ءِ واست ءَ جاہِلی کُت۔
“شَرت بَند ءِ گۆں؟” اُمێتاں پاد اَتک ءُ نِشت۔
“ھَو۔”
“بِچار!”
“چارِتَگ بلے شَرت چے اِنت؟” بُلۆر ءَ بِچکَندِت۔
“شَرت… ھاں، شَرتے ھَست بلے تَو ئِے مَنّ ءِ؟”
“یَبَّرے بُگُش ئِے گۆں،” بُلۆر ءَ اَڈی کُت۔
“چۆ نَگُشان ئِے گۆں، یَبَّرے بِمَنّ ئِے، رَند ءَ گُشان ئِے گۆں۔”
“شَرّ اِنت بابا! مَنّان ئِے،” بُلۆر ءَ نَرم نَرما گُشت۔ گُش ئے آئی ءَ کَمّے باز اَندازَہ بیتَگَت کہ شَرت چۆنێںے بیت۔
“وادَہ کَن۔”
“وادَہ اِنت۔”
“گُڈا شَرت اِش اِنت کہ اگں ھَور بیت، تَو مَن ءَ چُکَّگے بِدئے۔ نَبیت، مَن تَرا دیاں،” اُمێتان ءَ کَندان ءَ شَرت گُشت۔
“اُوبابی!” بُلۆر پاد اَتک ءُ اوشتات۔ “مَن اِے شَرت ءَ نَمَنّاں۔”
“نی چۆن نَمنّ ئے، تَو وادَہ کُتَگ۔” دَنینگَہ اُمێتان ءَ گَپّ دَپ ءَ اَت کہ تْرَمپے آئی ءِ دَست ءَ لَگِّت۔
“اِشنا ءَ ! ھَور اِنت۔ مَن شَرت بُرت،” اُمێتان ءَ کُوکّار کُت۔ بُلۆر ءَ آئی ءِ دَست ءِ سَر ءَ کَپتَگێں تْرَمپ ءِ نێمَگ ءَ چارِت کہ ھَمے وَہد ءَ تْرَمپے آئی ءِ جِند ءِ پێشانیگ ءَ کَپت۔ آئی ءَ شَرت باہێنتَگَت۔ پَمِشکا دَست ئِے تُکّ جَت اَنت ءُ تَتک۔ اُمێتاں آئی ءِ دُمب ءَ کَپت۔ کَمُّکے تَچَگ ءَ رَند اُمێتان ءَ بُلۆر رَسێنت ءُ پُشتُکائی گُلاێش کُت۔
“اُمێتاں! یَلَہ دَئے نہ۔” آ پہ دَر آیَگ ءَ کُلکُچَگ ءَ اَت۔
“پَرچا؟” اُمێتان ءَ آ کَجِّت۔
“بَسّ مَن ءَ یَلَہ دَئے،” آئی ءَ نێم کَندان ءُ نێم گْرێوان ءَ گُشت۔
“اونہۆن… چۆ تَو یَلَہ نَبَئے، پێسَر ءَ زُبان ءَ مۆک، رَند ءَ یَلَہ بَئے۔”
آئی ءَ بُلۆر ءِ دێم گۆں وَت چَکَرّێنت ءُ چُکَّگ ءَ گێگ بُوت کہ بُلۆر ءَ دَست وَتی دێم ءَ داشت اَنت۔ اُمێتان ءَ آ کِلی کُت۔ بُلۆر ءَ کَندِت ءُ دَست ئِے شُلَگ بیت اَنت ءُ اُمێتان ءَ آئی ءِ سُہرێں لُنٹانا دْراجێں واسے گِپت… تْرَمپاں اێر دات۔
بُلۆر ءَ زۆر جَت ءُ چَہ اُمێتان ءِ اَمبازاں دَر اَتک ءُ دێم پہ گاڈی ءَ شُت۔ بلے اُمێتاں پَدا آئی ءَ سِست پِر ءُ گِپت ئِے۔
“کُج ءَ رَو ئے؟” اُمێتان ءَ آئی ءِ دوێں دَست مُہر داشت اَنت۔
“اِد ءَ ھَور اِنت۔ پُچّ میسّ اَنت۔ ھاک ءُ گِل ءَ مێں بَنت۔ بُرێں گاڈی ءِ تَہا نِندێں۔” بُلۆر پہ رَوَگ ءَ زۆر جَنَگ ءَ اَت۔
“اونہۆن… نہ مَن وَت رَواں، نہ تَرا کِلّاں،” اُمێتان ءَ آ اَنگَت مُہر داشتَگَت۔ “پُچّ بِلّ ئِے میسّ اَنت، بِلّ ئِے گِلێں بَنت، چے بیت؟ گَرماگی ھَورے۔ چُشێں مۆسُم بَرے بَرے کئێت۔”
“نہ، مَن رَواں،” بُلۆر ءَ پِر لێسِت۔
“اِنّاں، مَرچی مَن تَرا میسّێناں گۆں۔ مَنی جاں! چُشێں مۆسُم ءَ اگں مئے پُچّے مَمیسّیت گُڈا مئے وَرنائی چے گُشیت۔”
ھَمے وَہد ءَ اَناگہا گِرۆک ءَ تْرُندێں شَہمے جَت ءُ پَدا آزماندِرّێں گْرَندے ءَ سَرجَمێں گێدی ماں پَتات ءُ بُلۆر اُمێتان ءِ آمبازاں پُتِرت۔
ھَور رِچَگ ءَ اَت۔ بُلۆر ءِ پُچّ میسِّتَگ ءُ جان ءَ لِچِّتَگَت اَنت ءُ آئی ءِ وَرنائیں بالاد ءِ دْرُستێں جَہل ءُ بُرز دَر ءَ اَت اَنت۔ دوێں تَرّێں کاہانی سَر ءَ وَپت اَنت۔
“اُپّ… چۆن وَشّ اِنت۔ گُش ئے مَن وابے گِندَگ ءَ آں، بُلۆر!” اُمێتان ءَ بُلۆر ءِ نێمَگ ءَ چارانا گُشت کہ چَمّ ئِے نَزّ اَت اَنت ءُ تْرَمپ آئی ءِ اِسپێتێں دێم ءَ رِچَگ ءَ اَت اَنت ءُ پَدا چُکُرّانا بُن ءَ کَپَگ ءَ اَت اَنت۔ بُلۆر ءِ اِے میسِّتَگێں زێبایا اُمێتان ءِ دِل ءَ گُش ئے آسے ماں داشت۔ آئی ءِ دِل ءَ ھَزار باہَند چِست بُوت ءُ بُلۆر ئِے گِپت ءُ کَجِّت۔ بُلۆر ءِ دَپ ءَ چَہ لِزَّت ءُ وَشّی ءَ سَرّێچێں اُپّارے دَر اَتک۔ اُمێتان ءَ وَتی تُنّیگێں لُنٹ بُلۆر ءِ شَکَّلێں لُنٹانی سَر ءَ اێر کُت اَنت…
“پاد آ، پاد آ، تَو اَنگَت واب ئے، اُمێتاں؟”
“مَن واب نَہ آں، مَنی جاں! مَن ءَ تَو ءُ اِے مَستێں مۆسُم ءَ بے سار کُتَگ،” آئی ءِ لُنٹ سُرِت اَنت بلے تَوار دَر نَیَتک۔
“پاد آ، بِچار، نی رۆچ دَر آیَگی اِنت۔ اَنگَت تَو واب ئے۔”
اُمێتان ءَ پہ ھَیرانی چَمّ پَچ کُت اَنت۔ آئی ءِ مات بَرۆنک ئے سَرینّاں اوشتاتَگَت ءُ آئی ءَ ناوَلَّگ ءَ اَت۔ اُمێتان ءَ وَتی اَمبازانی تَہ ئے بُلۆر چارِت… بُلۆر ءِ بَدَل ءَ سَرجاہ آئی ءَ بَگَل ءَ اَت ءُ آ نِدارَگ ءِ نام ءُ نِشاں نێستَت۔ آئی ءَ وَتی چَمّ نَزّ کُت اَنت کہ ھما ڈَولدارێں نِدارَگ پَدا بْیَیت۔
“اُمێتاں! تَو پاد آ۔ اِینچُک وَپسَگ؟ تَرا کئے ءَ گُشت دۆشی باسکۆپ ءَ بُرَو؟ نی واب ئے ءُ واب ئے۔ پاد آ، بُرَو چَمّاں شۆد۔”
آئی ءِ مات کَلۆگَرا پُتِرت ءُ آ، دِل ءَ مات ءِ سَر ءَ نُرُنڈَگ ءَ لَگِّت کہ زِند ءِ وَشتِرێں واب ئِے سَرجَم بَیَگ ءَ نَِشت۔ گۆں بے تَہمبُلی پاد اَتک، چَمّ ئِے شُشت اَنت ءُ چاہ ءِ وَرَگ ءَ لَگِّت۔ شیرچاہ ءِ گُٹّ گِرانا آ، دۆشیگێں پِلِم ءِ ھَیالاں شُت کہ وَت ءُ آئی ءِ شْوانگێں سَنگَت جُمُّک ءَ چارِتَگَت۔
آیانی مێتَگ ءِ ھۆٹَل ءَ دێر اَت کہ ٹیوی ءُ پِلِم اَتکَگَت بلے چِد ءُ پێسَر آئی ءَ ھِچّ پِلِم نَچارِتَگَت۔ اَلبَت جُمُّک ءُ بازار ءِ اێدِگِ بَچَکّانی دَپ ءَ تَوسیپ ئِے باز اِشکُتَگَت۔ وَہدے آئی ءَ بَچَکّانی گَپّ اِشکُت اَنت، آئی ءِ دِل ءَ واہَگ پاد اَتک کہ پِلِمے بِچاران ءُ پَدا دۆشی وَت ءُ جُمُّک ءَ شَور کُت ءُ شُت اَنت۔
پِلِم آئی ءَ سَکّ وَشّ بُوت۔ نِدارَگ، جَنگ ءُ چۆپ، ناچ ءُ سَوت… دْراہ پہ اُمێتان ءَ نۆک اَت اَنت۔ تامُر ءِ شَرَّنگ ءُ ھَزاردابێں جِنِکّاں یَکّے آئی ءِ پێسَریگێں دِشتار بُلۆر ءِ رَنگ اَت۔ بُلۆر دَرکَسانی آئی ءِ نامگِپت اَت بلے اُمێتان ءِ گَریبی ءِ سَوَب ءَ بُلۆر ءِ جُوپَجَتێں مات ءُ پِت بَجِّت اَنت ءُ آئی ءِ سیرِش گۆں مَشکَتی بَچَکّے ءَ کُت۔ ھَروَہدا کہ بُلۆر ءِ ھَمرَنگێں جِنِکّ پِلِم ءَ زاہِر بُوت، اُمێتان ءِ دِل ءِ دْریکَّگ تْرُند بیت اَنت۔ دۆشیگێں پِلِم ءِ چارگ ئے وَہد ءَ گُش ئے آ اِے دُنیا ءَ نَہ اَت۔
دۆشیگێں پِلِم ءِ جِنِکّ ءُ وَتی وَشّێں واب ءِ ھَیالانی تَہا گار، آئی ءَ پَنچ کۆپ شیرچاہ گُلاٹِت۔ اِے دَرگَت ءَ آئی ءِ مات ءَ سئے ھُشکێں لُوجَّر اِشکِرانی سَر ءَ پَتک ءُ دۆشیگێں چارێں سِرتَگێں نَگَنانی تَل ءَ دات ءُ شِپانکُو ءَ کُت اَنت۔ ڈِکّے نا ئِے ھَم شِپانکُو ءَ ماں کُت ءُ کَلّیگ ئِے چَہ آپ ءَ پُرّ کُت۔
اُمێتان ءَ چاہ وارت، شِپانکُو ءُ کَلّیگ کۆپَگ ءَ کُت اَنت، چادِر بَڈّ ءَ کُت، مُکّی ءُ نَل زُرت اَنت ءُ وَتی پَنچێں دانَگ پَس چَہ واڈ ءَ دَر کُت اَنت۔ پَدا وَت ءُ جُمُّک ءَ بازار ءِ چَوَکّێں پَس زُرت اَنت ءُ رَمَگ ءَ سَر دیانا دێم پہ لَد ءَ شُت اَنت۔
<سترُنگ><اِم>ناگُماں