“اِلیاس!”
“ھاں ناکُو!”
“مَنی چُکّ! مَن ءَ دێم ءَ جاگَہ بیت؟” ناکُو مَزار ءَ چَہ بَس ءِ اُستاد ءَ جُست کُت۔ آ بَس ءِ دێمی دَروازَگ ءِ دَپ ءَ اوشتاتَگَت ءُ سیٹّاں چارَگ ءَ اَت کہ مَردُماں گِپتَگَت اَنت۔
“اِنّاں، ناکُو! دێم ءَ جاگَہ نێست۔ سیٹّ مَردُماں گِپتَگ اَنت۔ تَو بُرَو پُشت ءَ بِنِند۔” اِلیاس ءَ گۆں ناکُو مَزار ءَ گُشت ءُ پَدا کِلینڈَر ئِے تَوار کُت۔
“پیرَل! اُو پیرَل!”
پیرَل ءَ چَہ بَس ءِ پُشت ءَ تَوار پَد دات: “ھاں اُستاد!”
“ناکُو مَزار ءَ شَرّێں جاگَہے ءَ نادێں۔”
“شَرّ اِنت اُستاد! بْیا ناکُو بْیا!” کِلینڈَر ءَ چَمۆدا کُوکّار کُت۔
ناکُو مَزار لَٹّ ءَ جِکّ دیانا کِلینڈَر پیرَل ءِ نێمَگ ءَ رَوَگ ءَ لَگِّت۔ مَن اُستاد ءِ پُشتی سیٹّ ءَ نِشتَگَتان ءُ آیانی گَپّاں گۆش دارَگ ءَ اَتاں۔ مَن ءَ کَماش ءِ سَر ءَ بَزَّگ بُوت۔ اِے پیر ءُ آجِزێں مَرد بَس ءِ پُشت ءَ مِرچانی گۆنی ءُ پێلکانی سَر ءَ ، اِینچُک جَمپ ءُ جۆل ءِ تَہا چۆن نِشت کَنت۔ اِشیا اَبَید مِرچانی تْرُندێں بُو ءَ مَن ءَ بے وار کُتَگَت ءُ دَم پہ سَہت چِشان اَتاں۔ مَن ناکُو تَوار جَت۔
“اُو ناکُو مَزار! بْیا دێم ءَ ، پہ تَو جاگَہے ھَست۔”
“ھَو، مَنی چُکّ؟ جاگَہ ھَست؟” ناکُو گَل بُوت۔
“دێم ءَ وَ جاگَہ نێست، ناگُماں! تَو ناکُو ءَ چی ءَ تَوار کَنَگ ءَ ئے؟” اُستاد اِلیاس ءَ مَنی نێمَگ ءَ چَکّ جَت ءُ گُشت۔
“مَن ناکُو ءَ وَتی جاگَہ ءَ نادێناں،” مَن پَسَّو دات۔
“گُڈا تَو؟ نَیا ئے گۆں زاناں؟” اُستاد ءَ پہ ھَیرانی گُشت۔
“چَتّ ءَ رَواں۔” مَن پۆنز کِچێنت کہ مِرچانی بُو ءَ پَلپَٹَگ ءَ اَت۔
“چَتّ ءَ رَو ئے؟ پَرچا؟ ھَمِد ءَ بِنِند۔ گَپّے جَنێں۔”
“اِنّاں مَن رَواں، اِد ءَ مِرچاں۔۔۔” مَن ءَ چِشَگ ءَ وار نَدات ءُ اُستاد اِلیاس ءَ کَندان ءَ گُشت: “چۆن کَنێں یار، مئے رۆزیگ اِنت۔”
مَن ناکُو وَتی جاگَہ ءَ نادێنت ءُ وَت بُرز ءَ سَر کَپتان ءُ تاج ءِ تَہا چادِرے پَچ کُت ءُ تَچک بیتاں۔ گَرماگی رۆچ اَت اَنت بلے گَرم نَہ اَت۔ یَکّے وَ دَنینگَہ سُہب اَت ءُ دُمی جَمبَراں ساچاں کُتَگَت ءُ کَوشے کَشَّگ ءَ اَت۔
بَس ءَ کَمّ ءُ گێش کَلاکے بیتَگَت کہ تُربَت ءَ رَوگ ئے چِن ءُ لانچ ءَ اَت بلے دَنینگَہ نَگیشِّتَگَت۔
چونایا چَہ بَلّ نِگوَر ءَ ھَر رۆچ یَکّ بَسے تُربَت ءَ شُت ءُ دِگِرے چۆداں بَلّ ءَ اَتک۔ ھَمے دوێں بَسانی بَرکَت ءَ بَلّ نِگوَر ءِ دُکّاندار، ھۆٹَلی، باگی، نادراہ ءُ اێدِگِ مَردُمانی کار سَوار بیت اَنت۔ چَہ تُربَت ءَ بَساں پہ مَردُماں راشِن ءُ دِگِہ ساماں آُرت گۆن ءُ چَہ نِگوَر ءَ پَس، دار، مِرچ ءُ لیمبُو پہ بَہا ءَ تُربَت ءَ بُرت۔
اَنّی کِساس دو ھَپتَگ اَت کہ دُمی بَس ھَراب اَت ءُ پہ اَڈّ بَیَگ ءَ کَراچی ءَ شُتَگَت ءُ نی اُستاد اِلیاس ءِ یَکّێں بَس کہ یَکّ رۆچے چَہ بَلّ ءَ تُربَت ءَ شُت ءُ دُمی رۆچ ءَ چۆداں اِد ءَ اَتک، سَکّ رَشّ اَت۔
ھَرکَس ءَ کہ بَلۆچِستان ءَ سَپَر کُتَگ، آ شَرّی ءَ زانت کہ اِد ءَ پہ رَوواءَ چۆنێں دِل ءُ جَگَر لۆٹیت۔ بَلّ نِگوَر چَہ اێدِگِ ھَنداں اَنگَت گَنتِر اِنت کہ گاڈی ءُ اولاک کَمّ اَنت، سَپَر کَنۆک باز اَنت ءُ دَگّ سَکّ ھَراب اَنت۔ بَس کہ رَوت اِشی ئے تَہا ھَمینچُک دَنز ءُ ھاک چِست بیت گُش ئے سْیَہگواتے ءَ ماں شانتَگ۔ بَس ءِ باڈی اَنچۆ ڈَکّ ڈَکّ، ٹۆک ٹۆک ءُ ٹِلینگ ٹِلینگ کَنت گُش ئے بُرّے اُستَکار دێم پہ دێم نِشتَگ ءُ داس ءُ تَپَر ٹَپَّگ ءَ اِنت۔ ھاک ءُ دَنز، جَمپ ءُ جۆل ءُ ٹۆک ءَ ٹاک ءِ پَجّیا بَس ءِ ٹَیپ ئے گَژانگ گَژانگ گۆشاں کَرّ کَنت ءُ ھَرکَس گێشِ وَتی گِر ءُ دار ءَ نَبیت۔
بَس ءَ کَلاکے ءَ گێش اَت کہ رَوگ ئے چِن ءُ لانچ ءَ اَت بلے دَنینگَہ پہ رَوَگ ءَ جاڈی نَہ اَت۔ بَس ءِ چَپّ ءُ چاگِرد ءَ مَردُم مُچّ اَت اَنت ءُ بَس ءِ مُنشی ءَ یا دِگِہ رَۆکے ءَ کار ءُ کُلَہ گۆں کَنَگ ءَ اَت اَنت۔
“اَڈ ءِ، اُو پَیز!”
مَنی گۆشاں ناکُو مَزار ءِ زَہگ شَہداد ءِ تَوار کَپت۔ مُنشی پَیز زاناں دَزگَٹّ اَت کہ کُوکّار ئِے کُت: “ھاں شَہداد! کَمّے سَبر کَن، پێداگ آں۔”
مَن جَہل ءَ چارِت۔ ھَمے وَہد ءَ شَہداد ءَ مَن ءَ دیت۔
“اَڈ ءِ ناگُماں! تَو تُربَت ءَ رَوَگ ءَ ئے؟” آئی ءَ کَندان ءَ جُست کُت۔
“ھَو، کار ءُ کُلَہے ھَست بُگُش۔”
“اِنّاں، جاں! دِگِہ کار نێست۔ بَسّ مَنی پِت تَئی ھَمسَپَر اِنت۔ تُربَت ءَ ناکُو بَہادُرّ ءِ لۆگ ءَ اێر کئێت، اَوَل ھُدا ءُ رَند ءَ تَئی مَیار اِنت۔”
“بے مَیار ئے، شَہداد! ناکُو ءِ ھَیالداریا مَن بے گُشَگ ءَ کَناں۔”
“مَنی چُکّ شَہداد! بے گَم بی۔” ناکُو مَزار ءَ چَہ بَس ءِ دَریگ ءَ سَر کَشِّت۔ “ناگُماں جان ءَ اَنّی وَتی سیٹّ مَن ءَ داتَگ ءُ وَت شُتَگ بُرز ءَ نِشتَگ۔ ھُدا ئِے سَبز کَنات۔” ناکُو یَپَّیما مَن ءَ نێکدوا کَنان اَت۔
“ھاں ڈ ئے شَہداد! تَرا چِہ کار ھَست؟” مُنشی گیشِّتگَت ءُ دێم پہ شَہداد ءَ پێداگ اَت۔
“پہ مَن کِرێٹے ھَیک بْیار گۆں۔” شَہداد ءَ لَہتے زَرّ مُنشی ءِ نێمَگ ءَ شَہارت۔
مُنشی ءَ زَرّ زُرت اَنت ءُ کَشی کیسَّگ ءَ کُت اَنت ءُ کاپی ءِ تَہا شَہداد ءِ کار نِبِشتَہ کُت۔ شَہداد دێم پہ وَتی ھۆٹَل ءَ شُت۔ مَن پَدا چادِر ءِ سَر ءَ تَچک بیتاں۔
“تُربَت۔۔۔ تُربَت۔۔۔ تُربَت۔۔۔ بْیاِت۔ جَلدی کَنِت کہ بَس چُٹَّگی اِنت۔” پیرَل ءَ وَتی کِلینڈَری گْوانک جَت۔
“پَیز! اُو پَیز!” مَنی گۆشاں ناکُو اَبدِلَہ ئے تَوار کَپت کہ مُنشی ءَ تَوار کَنَگ ءَ اَت۔
“پێداگ آں، ناکُو!”
“پہ مَن دو کِرێٹ اَمب ءُ کِرێٹے چَماٹَہ بْیار گۆں۔ بِزیر زَرّاں۔ اگں چَماٹَہ نَبیت، بَٹاٹَہ بْیار گۆں۔”
مَن تاج ءِ تَہا وَپتَگ ءُ مَردُمانی گَپّاں گۆش دارَگ ءَ اَتاں کہ اَناگَہا بَرکَت اَلی سَجّادا سَرُکّ کُت۔
“اَڈ ءِ بَدگُماں! تَو اِد ءَ نِشتَگ ءِ، بیماں؟” گۆں مَنی گِندَگ ءَ آئی ءَ کُوکّار کُت۔ آ ھَروَہدا مَن ءَ ناگُمان ءِ بَدَل ءَ بَدگُماں گُشیت ءُ مَن ھَم آئی ءِ نام کَرۆتکَگ۔۔۔ مَن آئی ءَ بَرکَتێں بِزاں بَرکَت بیتَگێں شاِر گُشاں۔
“اُہُہ…” مَن پاد اَتک ءُ نِشتاں۔ “اَڈ ءِ بَرکَتێں شاِر! تَو اِے بَڈی پَجَر ءَ ھَم مئے سَر ءَ نَکپ ئے؟”
سَجّادا کَندَگے جَت ءُ مَنی کِرّا چادِر ءِ سَر ءَ نِشت۔
“تَو کُج ءَ رَوَگ ءَ ئے؟” آئی ءَ جُست کُت۔
“مَن تُربَت ءَ ، ءُ تَو؟”
“مَن ھَم تُربَت ءَ ۔”
مَن کَندِت۔
“چی ءَ کَند ءِ؟” سَجّادا گۆں ھَیرانی مَن ءَ چارِت۔
“ھَمے بے پایدَگێں جُست ءُ پُرسانی سَر ءَ مَن ءَ گَپّے یاد اَتک۔”
سَجّادا سارتێں گینّے کَشِّت ءُ گُشت: “کُجام گَپّ؟”
“یَکّ رَندے بَسے ءَ دو کَرّ کَش ماں کَش نِشتَگَت۔ اَوَلی کَرّ ءَ چَہ دُمیگ ءَ جُست کُت:
‘تَو شالکۆٹ ءَ رَوَگ ءَ ئے؟’
دُمیگ ءَ پَسَّو دات:
‘اِنّاں، مَن شالکۆٹ ءَ رَوَگ ءَ آں۔’
اَوَلیگ ءَ دَرّاێنت:
‘بَل ءِ بَل ءِ، مَن گُشت زاناں تَو شالکۆٹ ءَ رَوَگ ءَ ئے!’”
سَجّادا اُہُو اُہُو کَندِت۔ وَہدے کَندَگ ئِے بَسّ کُت، گُڈا مَن جُست کُت: “تَو بارێں نۆکێں شَیر مَیر پِر نَبَستَگ؟”
“بَل ءِ، پِر بَستَگ۔ چی ءَ زاناں؟” سَجّادا چَہ کیسَّگ ءَ ھُکَّہ کَشِّت ءُ دَپے مُشۆک دَپ ءَ کُت۔
“شَیرے بِجَن،” مَن پَرماِش کُت۔
“تَو وَ شَیراں سَرپَد نَبَئے، مُپتا پَرچا زَوالِش بِکَناں؟”
“تَئی شَیر، شَیر وَ نَہ اَنت، گُش ئے پیربَکش ءِ گَپّ اَنت۔”
“بیماں! اُہُو اُہُو اُہُو۔۔۔”
اُستاد اِلیاس ءَ دو سئے بَر ءَ ھارِن جَت ءُ دێر نَگوَست کہ بَس دێم پہ تُربَت ءَ رَہادَگ بُوت۔ وَہدے بَس چَہ بَلّ نِگوَر ءِ بازار ءَ دَر اَتک، اُستاد ءَ رَپتار تێز کُت۔
جَمبَراں ساچاں کُتَگَت ءُ نی چَہ بَس ءِ تَچَگ ءَ کَوش ءَ شیکّ شیکّے چێر اَت۔ سَجّاد ئے شاِری رَگ ءَ جاہ جَت ءُ بے گُشَگ ءَ دَستُونکے دَپگال کَنَگ ءَ لَگِّت۔
بَس کَمّے شُتَگَت کہ مَن دیت کہ دیر پَٹَکّێں مَردے اوشتاتَگ ءُ بَس ءَ چادِر کَنَگ ءَ اِنت۔ نَزّیک ءَ رَسِتێں داں ٹالویگ ءِ شَپُکّ اَت۔ نام ئِے شَپی مَہمَد اَت بلے ھَرکَس ءَ شَپُکّ کُت۔ گَریبێں مَردے اَت۔ گۆش ئِے ڈامپ اَت اَنت، چَمّ ئِے کانٹ اَت اَنت ءُ سَر ءَ سُبَکّ اَت۔ آئی ءِ کار ءُ دَند ءَ اِش اَت کہ کِرێٹے دو کِرێٹ سَبزی ءُ نیبَگ ئِے لۆٹاێنت ءُ وَتی مێتَگ ءَ بَہا ئِے کُت اَنت ءُ وَتی لاپ ئِے دَر گێتک۔
“آ شَپُکّ اِنت، بیماں!” سَجّادا کُوکّار کُت۔
شَپُکّ ءِ کِرّا بَس ءَ داشت۔ شَپُکّ بَس ءِ دێمی نێمَگ ءَ ماں تَرِّت ءُ مُنشی ءِ نێمَگ ءَ رَوَگ ءَ لَگِّت۔ اُستاد اِلیاس ءَ شَیتانی کُت، زۆراں ھارِن جَت۔ شَپُکّ ءَ چۆ ھَزِتَگێں ھُشتِرا تْراس کُت ءُ اُستاد ءِ سَر ءَ نُرُنڈَگ ءَ لَگِّت۔
“کَلام بِجَنت تَرا! گۆش تَو مئے کَرّ کُت اَنت، کَمبَہتێں دِرتَریشّ! چَہ گۆش ءَ ما پێسَر ءَ اِلِّلّا ایں۔”
مَردُماں پْریشت کُت کَندَگ۔
“شَپُکّ پہ تَو چے بْیاراں گۆں؟” مُنشی پَیز ءَ جُست کُت۔
“پہ مَن کِرێٹے اَمب بْیار گۆں۔” شَپُکّ ءَ چَہ کیسَّگ ءَ زَرّ کَشِّت ءُ مُنشی ءَ دات اَنت۔ مُنشی ءَ آئی ءِ کُلَہ وَتی کاپی ءَ نِبِشتَہ کُت۔
“اَمبا چے کن ئے، بیماں؟” سَجّادا چَہ تاجا کُوکّار کُت۔
شَپُکّ ءَ نَزانت کہ تَوار چَہ کُج ءَ اَتک۔ آئی ءَ گُشت زاناں کِلینڈَر پیرَل اِنت پَرچا کہ پیرَل ءَ مُدام شَپُکّ کَلاگ زُرت ءُ اَنّی ھَم شَپُکّ ءِ کِرّا اوشتاتَگَت۔ شَپُکّ ءَ دێم تَرّێنت، پَنچے پیرَل ءِ سَر ءَ جَت ءُ کانٹێں چَمّ ئِے دَر آُرت اَنت۔
“اوہِ تَئی سَر بات، کَمبَہتێں دِرتَریشّ! اِینچُک نَزان ئے کہ اَمبا مَردُم چے کَنت؟”
جَہل ءَ کَندَگ ءُ کُوکّار بُوت ءُ سَجّاد تاج ءِ تَہا لاپلێٹی وَرَگ ءَ لَگِّت۔ بَس پَدا رَہادَگ بُوت۔
دْرَچکۆہ ءَ بَس ءَ داشت ءُ ھاں مَہمَد پَسی ءَ وَتی سی دانَگ پَس ءُ مێش چَتّ ءَ لَڈِّت ءُ وَت ھَم سَر کَپت ءُ مئے کِرّا اَتک ءُ نِشت۔ دِگِہ ھَمراہے ھَم گۆن اَت ئِے۔
وَہدے بَس اوشتاتَگَت، دَلوَتاں دْراہێں بَس پہ دۆدَگ ءُ بانرَگ سَر ءَ زُرت بلے وَہدے بَس رَہادَگ بُوت، دْراہ بے تْرِکّ ءُ تَوار بیت اَنت۔
“ھاں مَہمَد، اِشاں کُج ءَ بَرَگ ءَ ئے؟” مَن جُست کُت۔
“تُربَت ءَ ،” ھاں مَہمَد ءَ پَسَّو دات۔
“بَہایگ اَنت؟”
“ھَو۔۔۔۔ اَڈ ءِ، مَرچاں اِے بَس سَکّ رَشّ اِنت۔ مَن شُتاں بَس ءِ تَہا سَرُکّے کُت۔ لِلِّک لَگَتّ بیت،” ھاں مَہمَد ءَ دَرّاێنت۔
“دُمی بَس پہ اَڈّ بَیَگ ءَ کَراچی ءَ شُتَگ، ھَمے واست ءَ اِے رَشّ اِنت،” سَجّادا پَسَّو دات۔
“کَئی؟ اُستاد اِمام بَکش ءِ بَس شُتَگ؟” ھاں مَہمَد ءَ پَدا جُست کُت۔
“ھَو،” سَجّادا سَر سُرێنت۔
“بلے مَرچاں آئی ءِ اُستاد اِمام بَکش نَہ اِنت، مُراد بَکش اِنت،” مَن دَرّاێنت۔
“مُراد بَکش کئے اِنت؟” ھاں مَہمَد ءَ جُست کُت۔
“اِمام بَکش ءِ بْرات اِنت۔ دوێں ناکُو اُمَر ءِ چُکّ اَنت۔ ناکُو اُمَر ءَ ھَم وَہد ءَ کَراچی ءَ گاڈیے گۆں بیتَگ۔” مَن یَکّ ءُ یَکّ ءَ سَرپَد کُت۔
“ھَو، ھَو،” ھاں مَہمَد ءَ سَر سُرێنت۔ آئی ءِ ھَمراہ بے تْرِکّ ءُ تَوار نِشتَگَت ءُ مئے گَپّاں گۆش دارَگ ءَ اَت۔
سِبدان ءَ بَس ءَ داشت ءُ یَکّ ءُ دو مَردُم سَوار بُوت۔ لَہتے پہ پێشاپ ءَ اێر اَتک۔ وَہدے بَس اوشتاتَگَت دو پَس مِڈَگ ءَ لَگِّت۔
“دُشَمبِہ!” ھاں مَہمَد ءَ وَتی ھَمراہ ءَ گُشت، “بُرَو شُومّاں گیشّێں۔ اِد ءَ مِڈَگ ءِ جاگَہ اِنت؟ نی وَت ءَ پِرّێن اَنت، بے پیر!”
دُشَمبِہ ءَ پَس گیشّێنت اَنت ءُ اَتک۔ بَس پَدا رَہادَگ بُوت بلے دێر نَگوَست کہ دِگِہ دو اَڈِت۔
“اَبا، اِے شُومّ مارا آرام ءَ نِندَگ ءَ نَیل اَنت۔” ھاں مَہمَد ءَ گُشت ءُ اِے رَندی وَت ءُ ھَمراہ دوێں شُت اَنت۔ پَسِش گیشّێنت اَنت ءُ پَدا ھَمۆدا چَتّ ءِ کَلانٹَگ ءِ آسِنِش داشت ءُ نِشت اَنت کہ پَسانی دِلگۆشداریا بِکَن اَنت۔
“پَسانی کِسَّہے بْیاراں؟” مَن گۆں سَجّادا گُشت۔
“ھَو بارێں۔” سَجّاد دِلگۆش بُوت۔
“اِے گَپّ مَنی جِند ءِ سَر ءَ گْوَستَگ۔” مَن وَتی کِسَّہ بُنگێج کُت۔ “یَکّ رَندے بَس ءِ چَتّ چَہ بُز ءُ مێش ءَ مَرچیگێں وَڈ ءَ لَڈِّتَگَت ءُ مَن ھَم اَنچۆ تاجا نِشتَگَتاں۔۔۔”
“کُجام بَس اَت؟ اِش اَت؟”
“اِنّاں، دُمیگ اَت۔ آ وَہدی اُستاد اِمام بَکش ءَ گۆن اَت۔ مَنی آدَت اِنت کہ مَن ءَ سَپَر ءِ وَہد ءَ واب گیپت۔ مَن کہ کۆچَنڈَگ ءَ لَگِّتاں گُڈا چادِر پَچ کُت ءُ ھَمِد ءَ تاج ءِ تَہا تَچک بیتان ءُ واب کَپتاں۔”
“ھَووو!” سَجّادا مُشۆکیێں تُکّے جَت ءُ “ھَو” دْراجکَشّ دات۔
“بلے دێر نَگوَست کہ چَہ ڈاہ ءُ شۆر ءَ مَنی چَمّ پَچ بیت اَنت۔ مَن جَہ سِرِّتاں، گِنداں داں بَس اوشتاتَگ ءُ مَردُم چَتّ ءَ دَلوَتانی چَپّ ءُ چاگِرد ءَ مُچّ اَنت۔ یَکّے ءَ گُشت: “مێشے ءُ بُزے مِڈِتَگ۔۔۔”
“چے؟ مێشے ءُ بُزے؟” سَجّاد ھَیراں بُوت۔
“ھَو۔ مَن چَمِّ وَت دیت کہ مێشے ءُ بُزے دێم پہ دێم اوشتاتَگ اَنت۔ چَہ مِڈَگ ءَ دَمِش بُرتَگ ءُ ھیسک ءُ ھَمپان اَنت۔ اُستاد اِمام بَکش ءَ زَہر ءَ زَہر جُست کُت چی ءَ مِڈِتَگِت شُما؟
“چَہ دَلوَتاں جُست ئِے کُت؟” سَجّاد پَدا ھَیراں بُوت۔
“ھَو، مَن وَت ھَیران اَتاں کہ اِمام بَکش ءَ چَہ دابَواں چُشێں جُست پَرچا کُت۔ اِے گُنگُدام چۆن پَسَّو دی اَنت۔ بلے دُمی سَہت ءَ مَن بَہ مَنتاں۔ پَس چۆ مَردُم ءَ گَپّ ءَ لَگِّت اَنت۔۔۔”
“چے؟ بیماں چُشێں دْرۆگ چی ءَ بَند ءِ؟” سَجّادا ناباوَری کَندِت۔
“اَڈ ءِ تَو گَپّ ءَ سَرجَم بَیَگ ءَ بِلّ۔ مَن وَت ھَمۆدا بیتَگاں۔ مَن دیت کہ دَلوَتانی گَپّ جَنَگ ءَ کَسّ ھَیراں نَہ اَت۔ گُش ئے اِے گَپّ پہ کَسّ ءَ نۆک نَہ اَت۔ اُستاد اِمام بَکش ءِ پَسَّو ءَ بُز ءُ مێش دُێناں ھۆر ءَ دَپ پَچ کَشِّت گُڈا اُستاد ءَ ھَکَّل کُت اَنت ءُ گُشت: ‘یَکّ بَرے یَکّے گَپّ بِکَنت۔’ مێش ءَ گْرێوان ءَ گُشت: ‘اُستاد اِمام جاں! باااں۔۔۔ باااں، مَن اوشتاتَگَتاں کہ اِے بُز ءَ گُشت تَو چِدا دیر آ، مَن وَپساں۔ باااں۔۔۔ باااں۔ مَن گُشت اِد ءَ مارا اوشتَگ ءَ جاگَہ نێست۔ تَو گُش ئے مَن وَپساں؟ گُڈا بُز ءَ مَن ءَ ھَکَّل کُت کہ چِتَور جاگَہ نێست۔ جاگَہ دی ئے بِدئے، نَدی ءِ اَنچێں چَپُّویگے جَناں کہ چۆ پَژم ءَ بال بِکَن ئے۔ باااں۔۔۔ باااں۔’ بُز ءَ کُوکّار کُت: ‘دْرۆگ بَندیت واجَہ! سْیاہێں دْرۆگ بَندیت…’ اِمام بَکش ءَ بُز ھَکَّل کُت: ‘تَو بَسّ کَن اَنّی، رَند ءَ وَتی گَپّاں بِجَن۔’ مێش پَدا شُرُو بُوت: ‘مَن گُشت زاناں اِے جاگَہ تئیگ اِنت کہ مَن ءَ چۆ گُرّ ءُ نِہِرّ دی ئے؟’ بُز ءَ چَمّ دَر آُرت اَنت ءُ گُشت کہ جاگَہ زاناں تَئی پِتَئێگ اِنت؟ واجَہ اِمام جاں! باااں۔۔۔ باااں!، وَہدے مَنی پِت ءِ نام ئِے گِپت گُڈا مَن ھَم بێر دات۔ پَدا بُز ءَ مَن ءَ گۆں ڈَکَّراں ماں بَست۔۔۔’ مێش ءَ وَتی گَپّ ھَلّێنت ءُ گْرێوَگ ءُ لِمپ ءِ شُلُوپَّگ ءَ لَگِّت۔”
“اَڈ ءِ بَدگُماں! تَو سَکّ زَبر ئے دْرۆگ ءِ بَندَگ ءَ، بیماں! کَدی دَلوَت گَپّ کَن اَنت؟ اگں ھَکّ ءُ دِل دَلوَتاں گَپّ کُتێں گُڈا اِے ھال کُلّێں دُنیا ءَ شِنگ نَبیتَگَت؟ مَن بارێں چِد ءُ پێسَر اِے گَپّ نَِشکُتَگ۔” سَجّادا کُوکّار کُت۔
“اَڈ ءِ تَو گَپّ ءَ گۆش دار، اِے مَنی سَرگوَست اِنت۔ مَنی جِند ھَمۆدا بیتَگ۔” مَن زۆر مُورک مُجێنت اَنت۔
“ھَو؟ شَرّ اِنت… شَرّ اِنت، زَبَرّ ئِے، بارێں دێم ءَ چے بُوت؟”
“وَہدے مێش ءَ وَتی گَپّ جَت اَنت گُڈا بُز ءَ وَتی کِسَّہ آُرت۔ بُز ءَ گُشت: ‘واجَہ اِمام بَکش! مَن ءَ دو سئے رۆچ بیت وَشّ وَشّ نَہ آں۔ اَنّی وَہدے مَن بَس ءَ سَوار بیتاں گُڈا چَہ بَس ءِ جَمپ ءُ جۆلاں مَنی پاد دْرَہِت اَنت۔ مَن مێش ءَ را گُشت کَمُّک کِنز کہ تَچک باں۔ نادراہ آں، اوشتات نَکَناں۔ گُڈا مێش ءَ چِست ءَ دَرّاێنت: ‘تَو ھَم گَنۆک ئے۔ اِد ءَ وَپسَگی جاگَہ کُج اِنت؟’ مَن دَست بَست اَنت بلے اِے شُومّ ئے دِل ءَ رَہم نَشُت۔ گُڈا مَن گُشت، جاگَہ دی ئے بِدئے، نَدی ءِ مَن وَت ءَ دَور دیاں۔۔۔ ءُ مَن وَت ءَ را شِلِنگ کُت ءُ دَور دات ءُ مێش مَن ءَ جَنَگ ءَ لَگِّت۔ بے اێێں…بے اێێں، ماااں…ماااں۔’ بُز شُرُو بُوت گْرێوَگ ءَ۔ اُستاد اِمام بَکش ءَ واری ءُ اَزابیے آیانی سَلاہ ءُ بِناہ کُت ءُ وَشّاں کُت اَنت۔
مَن چَہ پیرێں گُرانڈے ءَ جُست کُت، ‘تَو چے گُش ئے، کئے مَیاریگ اِنت؟’ گُرانڈ ءَ بُز ءُ مێش ءِ نێمَگ ءَ گۆں زَہرناکی چارِت ءُ دَرّاێنت: “مَنی ھَیال ءَ اِے دوێں چَپُورت اَنت ءُ دوێں مَیاریگ اَنت، بِچارِش نی پَشَل اَنت۔ اَڈ ءِ کَدی سَپَر ءِ دَرگَت ءَ مِڈَگ ءُ دِلرَنجی بیتَگ؟ سَپَر اَنچێں چیزّے کہ زَہرێناں وَشّاں کَنت بلے اِے شُومّ مِڈِتَگ اَنت۔ بُن بے اَگلی اِنت۔’ پَدا گُرانڈ ءَ بِچکَندانا گۆں مَن گُشت: ‘چونایا، واجَہ ناگُماں…’”
“یَ، تَئی نام گُرانڈ ءَ چِتَور زانت؟”
“مَن نَزاناں، مَن وَت ھَیران اَتاں کہ گُرانڈ ءَ مَنی نام چِتَور زانت۔ ھَیر، آئی ءَ گُشت: ‘مُساپِر وَڈ وَڈێں ھَست۔ لَہتے ھَرابێں مُساپِر اَنت کہ اێدِگَراں ھَم جَنجال کَن اَنت، چۆ کہ اِے ناشَر اَنت۔’ آئی ءَ بُز ءُ مێش ءِ نێمَگ ءَ دَست شَہار دات کہ پیرێں گُرانڈ ءِ گَپّاں پہ دِلگۆش گۆش دارَگ ءَ اَت اَنت۔ گُرانڈ گُشَگ ءَ اَت: ‘لَہتے شَرّێں مُساپِر اَنت کہ آیانی ھَمراہی ءَ دِل سێر نَکَنت ءُ لَہتے اَنچێں اَزابێں، گَریبێں مُساپِر اَنت کہ کَسّی کار ءَ کار نَدار اَنت ءُ بے تَواری سَپَر کَن اَنت۔ گُش ئے گۆں نَہ اَنت۔’
‘ھَو،’ مَن گُشت ءُ گُرانڈ ءِ نێمَگ ءَ چارِت کہ آ وَتی گَپّاں بَرجاہ بِداریت پَرچا کہ مَن ءَ گُرانڈ ءِ دُرّێں دانک وَشّ بیت اَنت۔ گُرانڈ ءَ کُوکّار کُت ءُ گُشت: ‘اِنّاں۔’ مَن ھَیراں بیتاں کہ آئی ءَ پَرچا چۆ کُوکّار کُت ءُ اِنّاں گُشت کہ ھَمے وَہد ءَ گُرانڈ ءَ تْرُندێں ڈَکَّرے مَنی پێشانیگ ءَ جَت… ءُ مَن چَہ بَس ءَ جَہلاد بیتاں۔”
“یَ! تَرا کُشت ئِے وَ۔ تَو زاناں چے کُت؟” سَجّاد ھَیران اَت۔
“مَن ھِچّ نَکُت۔ آئی ءَ وَسَّرا مَن ءَ ڈَکَّرے جَت۔ مَن چَمّ پَچ کُت اَنت۔ بَس ءَ سْیاہَلُوا داشتَگَت ءُ بِرِکّانی جَنَگ ءِ سَوَب ءَ مَنی پێشانیگ ءَ گۆں آسِنے ءَ ڈیکَّر وارتَگَت ءُ مَنی وَشّێں واب چَمِدا آسَر بُوت۔” مَن وَتی گَپّ ھَلاس کُت ءُ بِچکَندانا سَجّاد ئے نێمَگ ءَ چارِت۔
“پُکُّو!” سَجّادا دْراجێں پُکّے کَشِّت۔ “اَڈ ءِ بَدگُماں! تَو گُڈُومبے ئے۔ اِینچُک دْرۆگ ءِ بَندَگ!”
“دْرۆگے نَہ اَت۔۔۔ وابے اَت!”
“واب وَ دْرۆگ اَنت، بیماں!”
“بَرے بَرے واب راست ھَم بَنت۔ مَن دَلوَتانی مِڈَگ ءِ واب دیتَگَت۔ اِش اِنت مَرچی مِڈِت اَنت،” مَن پَسَّو دات۔ سَجّادا ھِچّ نَگُشت ءُ کَندِت۔
بَس کَمُّکے شُتَگَت کہ سَجّادا کُوکّار کُت: “آ سْیاہَلُو ئے ھۆٹَل اِنت۔” سَجّادا گۆں ھۆٹَل ءِ گِندَگ ءَ گَلے چِت۔ شُد ءَ زاناں زۆر پِر داتَگَت۔
بَس ءَ ھۆٹَل ءِ دَپ ءَ داشت۔ مَردُم اێر اَتک اَنت ءُ ھۆٹَل ءَ شُت اَنت۔ نَگَن ءِ وَراگا رَند مَن پاد اَتک ءُ پێشاپے ءَ شُتاں۔ وَہدے واتَرّ بیتاں داں گِنداں کہ مَردُم بَس ءَ سَوار اَنت بلے جاک ءُ جَلَّل اِنت۔ مَن بَس ءَ پُتِرتاں۔ سَجّاد نَزّیک ءَ اوشتاتَگَت۔ مَن جُست کُت: “چِہ گَپّے؟”
سَجّادا پَسَّو دات: “دو مَردُم سیٹّانی سَر ءَ مِڈِتَگ۔”
مَن مِڈۆکێں مَردُمانی نێمَگ ءَ چارِت۔ یَکّے چَنگێز اَت ءُ یَکّے دِلبۆد۔ دو سال اَت کہ دوێں ڈِگارے ءِ بَند ءِ سَر ءَ اَڈِتَگَت اَنت ءُ ھَر رۆچ پێشی پاشیا تُربَت ءَ رَہادَگ اَت اَنت۔
چَنگێز گُشَگ ءَ اَت: “اِے جاگَہ مَنیگ اِنت۔ تَرا زاناں بَرَگی اِنت، بُگُش۔”
دِلبۆد ءَ گۆں ھَیرانێں چَمّاں چَنگێز چارِت ءُ کُوکّار کُت: “سیٹّ مَنیگ اِنت، تَو زۆرانسَری کن ئے، دِگِہ گَپّے۔”
چَنگێز ءَ دَپ پَچ کَشِّت: “چِتَور تئیگ اِنت؟ تَئی ھۆش نی پَہکا گار اِنت۔ اِے سیٹّ مَن پێسَر ءَ گِپتَگ۔”
دِلبۆد ءَ ھَم دَپ پێسَر کُت: “ھۆش مَنی نہ، تَئی گار اِنت۔ سِبدان ءَ کہ مَن سَوار بیتاں، اِے جاگَہ ءَ کَسّ نَنِشتَگَت۔ مَن ھَمِد ءَ نِشتاں۔ نی تَو دْرِکّ ئے ءُ کا ئے کہ جاگَہ مَنیگ اِنت؟”
“اَڈ ءِ، بے مِنَّت!” چَنگێز ءَ کُوکّار کُت۔ “سِبدان ءَ کہ بَس ءَ داشت ءُ تَو سَوار بیت ئے، اِے وَہدی مَن پێشاپے ءَ اێر اَتکاں۔ مَن اَنچۆ کہ اَتکاں بَس رَہادَگ بُوت۔ پَمِشکا مَن دَروازَگ ءِ دَپ ءَ اوشتاتاں۔ مَن تَرا دیت کہ تَو مَنی سیٹّ ءِ سَر ءَ نِشتَگ ءِ بلے مَن ھِچّ نَگُشت کہ سْیاہَلُو ئے ھۆٹَل نَزّیک اِنت۔ کَمُّکے اوشتَگ ءَ مَن ءَ ھِچّ نَبیت۔”
“ھَو، اَڈ ءِ! اِے جاگَہ ءَ پێسَر ءَ چَنگێز نِشتَگَت،” دِگِہ یَکّے ءَ ھَم چَنگێز ءِ گَپّ گِپت گۆں۔
مَن دێم ءَ کِنزِتان ءُ گۆں دِلبۆد ءَ گُشت: “اَڈ ءِ دِلبۆد! پَروا نێست۔ تَو کَمّے بۆشت یا بُرز ءَ بْیا مَنی کِرّا۔ بِلّ ئِے چَنگێز نِندیت۔ شُما مَمِڈِت، بْرات بِت۔ اِے چُشێں گَپّے نَہ اِنت۔”
“مَن پَرچا بۆشتاں؟” دِلبۆد بْرانز گِپت۔ “پَرچا بُرَواں چَتّ ءَ مێشانی تَہا بِنِنداں؟ مَن چِلّ کَلدار باڈَو داتَگ۔”
مَن پَد کِنزِتاں۔
“تَو اگں چِلّ کَلدار داتَگ، مَن ھَم ھُشکا سَوار نَبیتَگاں،” چَنگێز ءَ جَبَزَّہ کُت۔
“تَو وَزّان ئے وَتی چِلّێں کَلداراں، اِے جاگَہ ءَ مَن نِنداں،” دِلبۆد ءَ اَڈی کُتَگَت۔
“نِند ئے بِنِند۔۔۔ جاگَہ تَئی بُن اِنت،” چَنگێز ءَ گُشت ءُ سیٹّ ءِ سَر ءَ نِندَگ ءَ لَگِّت۔ دِلبۆد ءَ آ تێلانک دات۔
“اَڈ ءِ سیٹّ زاناں تَئی پِتَئێگ اِنت؟” چَنگێز ءَ چَمّ دَر آُرت اَنت۔
“گُڈا زاناں تَئی پِتَئێگ اِنت؟” دِلبۆد ءَ بێر دات۔
“باز پِت پِت مَکَن۔ سِلّێں زُبان ءَ لَگام دَئے۔” چَنگێز چَہ زَہر ءَ پێچ ءُ تاب وَرَگ ءَ اَت۔
دِلبۆد ھِژم گِپت ءُ چَنگێز ءَ را شَہماتے گۆژبُنا ئِے گْوَر دات۔
“تَو۔۔۔ تَو مَن ءَ جَت؟ تَئی مات ءَ مَن۔۔۔” چَنگێز ءَ ماتی زاہے دات۔
دِلبۆد ءَ آئی ءَ را دِگِہ سۆچاکێں شَہماتے دَپ ءَ جَت۔ چَنگێز ءَ گُشادیا لانک ءَ بَستَگێں وَتاس کَشِّت ءُ دِلبۆد ءِ دِلبَند ءَ دو تیر پَد ماں پَد داگ دات۔
“بِزیر سیٹّ ءَ کینّ ءَ کَن۔۔۔ بے گَیرَت!”
چَہ دِلبۆد ءِ دِلبَند ءَ ھۆناں پینژار بَست ءُ چَنگێز ءِ دَپ ءُ دێم ءُ پُچّانی سَر ءَ رِتک اَنت۔ گۆں تیرانی لَگَّگ ءَ دِلبۆد ءَ پِریاتے جَت ءُ بُن ءَ کَپت۔ گۆں وَتاس ءِ آس بَرَگ ءَ بَس ءِ مَردُماں ھَم کُوکّار ءُ واہی بِنا کُت ءُ پہ دَر آیَگ ءَ یَکّے دُمیگ ءَ تێلانک دَیاں بیت اَنت۔
چَنگێز ءِ زَہر اَنگَت اێر نَیَتکَگَت اَنت۔ آئی ءَ پہ سَیمی تیر ءِ جَنَگ ءَ دِلبۆد ءِ نێمَگ ءَ وَتاس تَچک کُت بلے ھَمے سَہت ءَ چَہ پُشت ءَ کِلینڈَر پیرَل ءَ چَنگێز ءِ دَست گِپت ءُ تاب دات۔ وَتاس ءَ آس بُرت۔ ءُ اِے رَندی چَنگێز ءَ چیہانٹے جَت۔ تیر آئی ءِ گُٹّ ءَ مان اَتکَگَت۔ وَتاس چَرائی ئے دَست ءَ کَپت ءُ آ وَت چۆ گُڈِّتَگێں دْرَچک ءَ دِلبۆد ءِ سَر ءَ کَپت۔
مَردُمانی شۆر ءُ شار گێشتِر بیت اَنت۔ ھَریَکّے پہ دَر آیَگ ءَ دُمیگ ءَ تێلانک دیان اَت۔
بلے سَجّاد کُنٹ اَت ءُ اوشتاتَگَت۔ دو مَردُم آئی ءِ دێم ءَ بے مَوت ءَ مُرتَگَت ءُ آیانی جۆن گۆں زَگرێں ھۆناں کَپتَگَت اَنت۔ سَجّاد اَنچۆ مُلُور اَت، گُش ئے اِند نا اِندا گْرێت۔
گُڈسَرا دْراہێں مَردُم اێر اَتکَگَت اَنت بلے سَجّاد اَنگَت مِکّ اَت۔ مَن آ دَست ءَ گِپت ءُ چَہ بَس ءَ اێر کُت۔
<سترُنگ><اِم>ناگُماں